Encourage bann dimoune ki ena enn grand chagrin dan zot leker
1 Jamais dan l’histoire humain, bann dimoune pa finn bizin autant l’encouragement ki azordi. Kan nou suive nou lé-Roi, Christ Jésus, nou aussi nou pé travail pou “soulage bann dimoune ki ena enn grand chagrin dan zot leker.”—Is. 61:1.
2 Methode pou encourage bann dimoune: Pou encourage bann dimoune dan nou ministere, nou presentation bizin bien equilibré ek encourageant. Kan nou pa koz trop beaucoup lor bann mauvais kitsoz ki ena dan le monde ek lor bann fausse doctrine, conversation-la pou tourne plus autour bann verité ki ena dan la Bible ek lor sa joli l’esperance ki nou ena grace a bann promesse bien encourageant ki Bondié finn faire. Sa pa vedir ki nou pa bizin koz lor Har–Maguédôn. Nou finn gagne mission pou annonce “l’année kot Jéhovah montré so faveur, ek jour vengeance nou Bondié,” ek pou “averti enn mauvais dimoune pou ki li detourne-li ar mauvais chemin ki li pé prend.” Mais, l’avertissement concernant Har–Maguédôn ek bann detail lor destruction ki pou ena fodé pa passe avant sa bon nouvelle lor Royaume Bondié-la.—Is. 61:2; Ézék. 3:18; Mat. 24:14.
3 Predication porte-en-porte: Li pa rare pou joinde bann dimoune ki decouragé a cause maladie, la mort enn dimoune ki zot ti content, bann injustice, ou-soit bann probleme l’argent. Nou ki imite Christ, nou “ena pitié” ek nou montré compassion envers bann dimoune ki nou joinde dan ministere. (Luc 7:13; Rom. 12:15) Mem si nou lire enn ou deux verset ki koz lor probleme dimoune-la, nou bizin “pré pou ecouté,” lerla sa pou permette dimoune-la exprime seki li ressenti. (Jacq. 1:19) Apré ki nou’nn ecoute dimoune-la, nou pou pli kapav encourage li.
4 Pendant la conversation, kan ou trouvé li approprié, ou kapav dire: “Mo ti pou content partage avek ou bann parole encourageant ki ena dan la Bible.” Nou bizin ena bon jugement pou pa dire dimoune-la ki tou seki li croire, li fausse. Au contraire, nou l’objectif c’est pou donne l’encouragement ek reconfort kan nou servi la Bible pou fortifié zot leker. Pou faire sa, ou kapav examine livre Comment raisonner à partir des Écritures, page 119-122, enba titre “Encouragement.” Ou-soit ou kapav donne dimoune-la tract De l’aide pour les déprimés ek discute bann point ki ena ladan avek li.
5 Rod bann l’occasion pou encourage lezot: Eski ou konn enn voisin, enn collegue travail, enn camarade lekol, ou-soit enn membre ou famille ki bizin l’encouragement? Kifer ou pa faire enn zeffort pou visite sa bann dimoune-la kot zot, avek l’objectif pou encourage zot a travers la Bible? Kan ou koné kifer zot bizin l’encouragement, sa pou aide ou pou prepare-ou pou sa situation-la. Certain finn encourage lezot par lettre ou-soit telephone. Vrai l’amour pou nou prochain pou pousse nou pou mette-nou dan zot place ek donne zot l’encouragement ki bizin a travers la Bible.—Luc 10:25-37.
6 Oui, nou finn gagne l’ordre pou encourage bann ki en deuil, pou remonte moral bann ki triste, ek pou donne dimoune l’espoir lor enn l’avenir heureux. C’est sa qualité l’encouragement-la ki bann dimoune partout dan le monde bizin. Kan nou koz avek la joie lor bann bon kitsoz ki Bondié finn promette, sa pou donne bann dimoune ki sincere l’encouragement ek l’espoir. Anou touletan rappel ki nou bizin soulage bann dimoune ki ena enn grand chagrin dan zot leker!