Reconforte bann ki en deuil
1. Kifer bann dimoune ki en deuil bizin reconfort?
1 Perdi enn kikenn ki nou content dan la mort, c’est enn l’experience ki faire bien souffert, surtout pou bann ki pena l’esperance Royaume Bondié. (1 Thess. 4:13) Beaucoup parfois demandé: ‘Kifer dimoune mort? Ki arrive zot kan zot mort? Eski enn jour mo pou retrouve sa dimoune ki mo content-la?’ Ala deux-trois suggestion ki nou kapav servi dan predication pou reconforte bann dimoune ki’nn perdi enn famille proche ou-soit enn camarade.—Is. 61:2.
2. Si enn dimoune dire nou ki li en deuil, eski nou bizin toujours essaye donne li enn longue temoignage?
2 De porte en porte: Enn dimoune kapav dire nou ki finn fek ena enn la-mort dan so famille. Eski dimoune-la chagrin, ou-soit eski li pé ploré? Eski so lakaz rempli avek bann famille ki’nn vini pou la mort? Dan sa deux cas-la, li preferable ki nou pa reste longtemps pou rann temoignage. (Eccl. 3:1, 7) Kitfois nou kapav presente li nou condoléance, nou donne li enn tract, enn magazine ou-soit enn brochure approprié, ek apré nou quitte li. Plitar nou kapav revini dan enn lot moment pli approprié pou partage plus l’encouragement ki sorti dan la Bible.
3. Si bann circonstance permette, ki texte la Bible nou kapav montré enn dimoune ki en deuil?
3 Parfois, nou kapav discerné ki premier fois-mem nou kapav koz enn tipé plus avek dimoune-la. Mem si li pa l’heure pou contredire bann fausse l’idée, kitfois nou kapav lire bann promesse ki ena dan la Bible concernant resurrection avek dimoune-la. (Jean 5:28, 29) Ou-soit nou kapav montré seki la Bible dire concernant condition bann mort. (Eccl. 9:5, 10) Lire enn recit ki la Bible raconté concernant enn resurrection, sa aussi kapav donne bann dimoune reconfort. (Jean 11:39-44) Enn lot kitsoz ki nou kapav faire, c’est examine bann parole Job, enn zom fidele ki ti mette so l’espoir en Jéhovah. (Job 14:14, 15) Avant nou allé, nou kapav offert brochure Que devient-on quand on meurt ?, Quand la mort frappe un être aimé... , ou-soit enn lot brochure ou-soit enn tract ki approprié. Ou-soit nou kapav laisse livre Ki la Bible enseigné? ek nou attire so l’attention lor bann pensée ki ena dan chapitre 6, ek faire l’arrangement pou discute plus lor sa sujet-la kan nou revini la prochaine fois.
4. Ki bann lezot l’occasion nou ena pou donne reconfort?
4 Dan lezot l’occasion: Si enn discours l’enterrement pé faire dan la Salle du Royaume, eski pou ena bann dimoune ki pa Témoin ki pou vinn assisté? Nou kapav faire zot gagne bann publication ki pou reconforte zot. Dan certain funerarium—enn la-salle kot amenn lekor enn dimoune ki’nn mort ek kot bann famille joinde avant ki enterre li—bann responsable finn apprecié pou gagne bann publication approprié pou bann famille ki en deuil. Parfois ena l’annonce bann decès dan la gazette. Sa finn donne certain l’occasion pou ecrire enn ti lettre pou reconforte sa bann famille ki en deuil-la. Dan enn cas, apré ki enn veuf ek so tifi finn gagne enn lettre avek bann tract ladan, zot finn al kot sa proclamatrice-la ek finn demann li: “Eski c’est ou-mem ki’nn envoye moi sa lettre-la? Eh bien, mo envie konn plus lor la Bible!” Sa missié-la ek so tifi finn d’accord pou gagne enn l’etude la Bible ek zot finn commence assisté bann reunion dan congregation.
5. Kifer nou bizin veille bann l’occasion pou reconforte bann ki en deuil?
5 Ecclésiaste 7:2 dire: “Vaut mieux al dan lakaz kot ena deuil ki al dan lakaz kot ena fête.” Souvent enn dimoune ki en deuil plus disposé pou ecoute Parole Bondié ki enn dimoune ki pense zis pou amusé. Nou tou bizin veille bann l’occasion approprié pou reconforte bann ki’nn perdi enn dimoune ki zot content.