Eski ou pé servi tou bann lartik ki ena ladan?
1 “Mo impatient pou servi sa dan predication!” C’est seki enn soeur ti ecrire apré ki li ti lire La Tour de Garde 1er janvier 2008. Eski ou finn lire certain lartik ki ena dan edition publik en français, ek eski ou finn trouve bann moyen pou servi zot dan predication?
2 Seki nou aprann ar Jésus: Kitfois ou finn remarké ki lartik “ Ce que nous apprenons de Jésus ” kapav aide ou pou commence bann l’etude la Bible. Si ou pankor faire li, essaye lire titre lartik-la avek enn dimoune dan predication, ek montré li seki Jésus ti dire lor sa sujet-la, couma ena dan premier paragraphe. Si dimoune-la montré l’interet, ou kapav contigne conversation-la kan ou servi bann sous-titre ki finn ecrire en forme question pou faire dimoune-la reflechi. Invite dimoune-la pou dire seki li pensé lor question-la. Faire enn ti commentaire lor bann zimage, ek contigne avek prochain paragraphe. Kitfois ou kapav koz lor la moitié lartik-la premier fois ki ou joinde dimoune-la, ek apré contigne koz lor lot la moitié-la kan ou revisite li. Prepare-ou pou ou contigne l’etude dan livre Ki la Bible enseigné?
3 Bonheur familial: Lartik “ Clés du bonheur familial ” parette toulé-trois mois. Li’nn faire pou aide bann mari, bann femme, ek bann parent pou guetté couma zot kapav applik bann principe la Bible kan zot gagne bann probleme ki affecté la paix dan zot famille. Ou kapav aussi servi sa bann lartik-la pou aide bann ki pa Témoin pou trouve sagesse ki ena dan la Bible.—2 Tim. 3:16, 17.
4 Bann lartik pou bann jeune: Lartik “ Pour nos jeunes lecteurs ” inn faire dan enn fason kot lecteur-la gagne l’occasion pou reflechi lor enn recit dan la Bible ek pou analyse li en detail. Ou kapav servi sa bann lartik-la pou aide bann jeune ki ou joinde dan predication pou trouve valeur pratik pou etudié Parole Bondié. (Ps. 119:9, 105) Kan ou pé koz avek bann parent, ou kapav montré lartik “ Enseignez vos enfants ” ki parette chaque deux mois. Sa bann lartik-la kapav aide bann jeune zenfant pou aprann bann kitsoz important en rapport avek bann personnage ki ena dan la Bible. Eski ou faire-ou enn devoir pou lire sa bann lartik-la avek ou zenfant?
5 Lezot lartik: Chaque mois, lartik “ Question des lecteurs ” reponn enn question ki bann dimoune ki pa Témoin kapav posé. Ou kapav attire l’attention bann dimoune lor sa lartik-la dan predication. Lartik “ Une lettre de . . . ” li enn recit bien vivant ki enn dimoune raconté lor so la vie ek ki montré bann difficulté ar ki bann missionnaire ek lezot Témoins faire face pou accompli zot ministere. Sa bann lartik-la kapav aide bann ki interessé pou trouvé couma la bonne nouvelle pé preché partout lor la terre, ek sa montré ki signe presence Christ pé realisé.—Mat. 24:3, 14.
6 Chaque mois, lartik “ Approchez-vous de Dieu, ” ki basé lor lecture la Bible ki faire dan Lekol ministere theocratik, kapav pousse bann ki ena enn leker sincere pou envie aprann plus lor Jéhovah. Lartik “ Imitez leur foi, ” ki parette quatre fois par an, inn faire pou aide bann dimoune pou faire vision bann recit ki ena dan la Bible, lor bann personnage biblik—zot bann choix, zot bann probleme, zot la foi—ek faire zot vinn vivant dan zot l’esprit.
7 Nou vrai-mem bien content ki chaque mois nou gagne enn La Tour de Garde entier ki’nn faire pou servi dan predication! Anou faire tou seki nou kapav pou konn bien sa bann lartik-la ek anou servi zot maximum possible dan nou ministere.