Enseigne bann ki pa trop konn lire
1. Ki defi nou kapav joinde dan nou ministere?
1 Kan nou pé participe dan ministere, parfois li arrivé ki nou bizin enseigne la verité bann dimoune ki ena difficulté pou lire. Sa kapav enn defi pou nou. Ki nou kapav faire?
2. Couma ek kifer nou montré respé pou bann ki limité dan zot capacité pou lire?
2 Respecté zot dignité: C’est pa l’education enn dimoune ki important pou Jéhovah, mais c’est condition so leker. (1 Sam. 16:7; Prov. 21:2) Alors, fodé pa nou meprise bann ki gagne difficulté pou lire. Li pou pli facile pou sa bann dimoune-la pou accepté nou l’aide si nou montré ki nou ena respé ek patience envers zot. (1 Pierre 3:15) Li bon ki nou pa insisté ki dimoune-la lire enn verset ou-soit enn paragraphe. A mesure ki enn dimoune aprann plus bann verité ki ena dan la Bible, li pou pli envie ameliore so capacité pou lire pou ki li gagne la joie lire Parole Bondié “doucement la-nuit li-jour.”—Ps. 1:2, 3.
3. Ki bann methode nou kapav servi pou enseigne bann ki limité dan zot capacité pou lire?
3 Bann methode pou enseigné: Bann zimage bien bon pou nou enseigne bann dimoune ek pou aide zot rappel seki zot finn aprann. Ou kapav demann enn etudiant seki li remarké concernant enn zimage ki ena dan publication ki ou pé servi. Apré, servi bann question precis pou aide li comprend seki sa zimage-la enseigné. Servi bann texte la Bible ki enseigne bann kitsoz precis en rapport avek sa zimage-la. Ou kapav aussi servi bann zimage pou faire enn revision lor seki zot finn etudié. Pa examine trop beaucoup paragraphe dan enn sel jour. Mette l’accent lor theme chapitre ki zot pé etudié ek bann point principal ki ena ladan, ek evite discute lor bann point ki en dehors sujet. Lire bann verset direct dan la Bible, ek servi bann question pou faire sur ki etudiant-la comprend seki finn lire. Sa kapav augmente so desir pou ameliore so capacité pou lire, pou li kapav rod bann verité ki ena dan la Bible par li-mem.
4. Couma nou kapav aide nou etudiant pou ameliore so capacité pou lire?
4 Bann l’aide pou ameliore lecture: Bann dimoune ki pa trop konn lire ou-soit ki pa finn gagne l’occasion pou aprann lire bien, kapav comprend ek rappel bien bann kitsoz ki zot aprann. Ou kapav encourage sa bann dimoune-la pou servi bann enregistrement audio nou bann publication. Kan li ecoute bien lecteur-la pendant ki li suive seki finn ecrire dan enn publication, li kapav mem repete doucement bann mot-la, sa pou aide li pou ameliore so capacité pou lire. Li kapav aussi gagne l’aide a travers brochure Appliquez-vous à la lecture et à l’écriture. Dan certain congregation, bann ancien kapav faire l’arrangement pou ena bann classe pou montré bann dimoune lire. Sa bann suggestion pratik-la kapav aide nou pou aide bann ki limité dan zot capacité pou lire pou ki zot kapav comprend “bann l’ecriture sacré,” ki pou faire zot vinn sage pou gagne delivrance.—2 Tim. 3:15.