Kouma pou Ed Bann Ki Pa Tro Konn Lir

1. Ki difikilte nou kapav gagne kan nou ansegn bann dimounn ki pa tro konn lir?

¹ Parmi bann ki interese ar bann kitsoz spiritiel, ena osi bann dimounn ki pa tro konn lir. Kan zot trouv Labib ek lezot liv, sa inpresionn zot. Si koumansman mem, nou ofer zot liv Ki la Bible enseigné?, kitfwa zot pa pou aksepte. Me, kouma nou kapav ed sa bann dimounn-la lor plan spiritiel? Nou finn demann bann proklamater dan plis ki 20 pei ek ki ena boukou lexperyans kouma zot, zot fer. Anou get zot bann sigzesion.

2. Ki bann zouti efikas nou kapav servi pou ed bann ki pa tro konn lir?

² Si etidian-la pa tro konn lir ouswa mem pa konn lir ditou, to kapav koumans letid dan brosir Ekout Bondie ouswa Ekout Bondie ek Viv pou Touletan. Get seki enn pionie dan l’États-Unis fer: Li montre dimounn-la toulede brosir ek demann li avek ki brosir li pou pli alez pou etidie. Biro nasional dan Kenya dir ki sa bann zouti-la zot bien efikas dan zot teritwar. Kifer? Se parski dan l’Afrique, an zeneral bann dimounn ansegn lezot atraver bann zistwar, olie ki zot servi metod kestion-repons. Li vre ki enn dimounn ki konn lir pou aksepte pli fasilman ki nou lir enn paragraf avek li ek nou poz li kestion. Me, enn dimounn ki pa tro konn lir pou pa pou alez avek sa metod-la. Avek bann ki konn inpe lir, boukou proklamater kontan koumans letid dan bann brosir kouma: Enn Bon Nouvel Ki Sorti kot Bondie!, Ou Kapav Vinn Kamarad Bondie!, ouswa Mo livre zistoire la Bible.

3. Pou nou kapav ed bann dimounn ki pa konn lir dan enn fason efikas, ki kitsoz li bon nou kone?

³ Felisit Zot: Bann dimounn ki pa konn lir kapav santi zot anbarase, ek zot panse ki zot pa vo nanye. Souvan-defwa, premie kitsoz ki bizin fer avan ansegn zot laverite se, met zot alez. Se pa parski enn dimounn pa konn lir ki li pa intelizan, ouswa li pena kapasite pou aprann. Alor, donn li respe ki li merite, ek tret zot avek dignite. (1 Pierre 3:15) Si li santi ki li vo lapenn li fer tou sa bann zefor-la ek li trouve ki li pe fer bann progre lor plan spiritiel, sa pou pous li pou kontign so letid. Alor, pa ezite pou felisit li.

4. Kouma nou kapav ankouraz bann dimounn ki gagn difikilte pou lir pou prepar zot letid?

⁴ Mem si etidian-la gagn difikilte pou lir, ankouraz li pou prepar so letid. Sertin proklamater dan l’Afrique du Sud ankouraz zot bann letid pou demann enn manb zot fami ki bien konn lir pou ed zot. Enn lot proklamater dan l’Angleterre les so bann letid swiv de-trwa paragraf dan so liv pandan letid. Koumsa zot kapav trouve kouma li fasil pou trouv bann repons kan zot deza fini souligne, ek sa pous zot pou prepar zot letid. Enn frer dan l’Inde ankouraz so bann letid pou get bann zimaz prosin leson ek pou medit lor sa bann zimaz-la alavans.

5. Kouma nou kapav montre pasians kan nou pe fer letid?

⁵ Ena Pasians: Ninport ki piblikasion to servi, met laksan lor bann pwin prinsipal, ek ed to letid konpran zot bien. Dan koumansman, li pli bon ki to fer letid zis pou 10-15 minit. Pa examinn tro boukou paragraf enn sel kout. Ena pasians si to letid pran letan pou lir. Amezir ki so rekonesans pou Jéhovah ogmante, sirman li pou anvi aprann lir bien. Kouma to kapav ed li fer sa? Koumansman mem, invit li pou asiste bann renion.

6. Kouma nou kapav ed enn kikenn pou aprann lir?

⁶ Si to letid pe aprann lir, li pou fer bann progre spiritiel boukou pli vit. (Ps. 1:1-3) Pou ed zot etidian, boukou finn rezerv de-trwa minit alafin sak letid pou examinn brosir Fer Zefor pou Aprann Lir ek Ekrir. Si to etidian dekouraze, kitfwa to kapav fer li gagn plis konfians an limem kan to atir so latansion lor bann kitsoz ki li’nn reisi aprann fer. Donn li lasirans ki Jéhovah pou beni so bann zefor, ek ankouraz li pou priye Jéhovah pou gagn so led. (Prov. 16:3; 1 Jean 5:14, 15) Sertin proklamater an Angleterre ankouraz zot etidian pou fixe bann lobzektif rezonab letap par letap. Dabor, zot bizin esey konn tou bann alfabet, apre sa aprann pou rod ek lir sertin verse Labib, ek finalman lir bann piblikasion Biblik ki servi enn langaz sinp. Montre enn kikenn lir, pa vedir zis montre li kouma pou fer sa, me sa vedir osi pous li pou li anvi fer sa.

7. Kifer fode pa nou ezite pou fer bann dimounn ki pa tro konn lir konn laverite?

⁷ Jéhovah pa mepriz bann dimounn ki pena enn gran ledikasion. (Job 34:19) Se sirtou leker enn dimounn ki Jéhovah examine. (1 Chron. 28:9) Alor, pa ezite pou fer bann dimounn ki pa tro konn lir dekouver laverite. To ena plizir zouti bien efikas ki kapav ed twa pou koumans etidie avek zot. Avek letan, to kapav kontign so letid dan liv Ki la Bible enseigné? Sa pou ed li ena enn konesans pli konple lor Labib.