Nou montré nou l’amour pou Bondié par nou ministere

1. Ki l’amour pou Bondié ti pousse Jésus pou faire?

¹ L’amour ti pousse Jésus pou accompli so ministere. Chaque domaine dan ministere Jésus prouve bien l’amour ki li ti ena pou Jéhovah. Jésus ti dire: “Pou ki le monde koné ki mo content le Père, pareil couma le Père finn donne moi l’ordre pou faire, coumsa-mem mo pé faire.” (Jean 14:31) Nou ki suive bann trace Jésus, nou aussi nou ena privilege pou montré nou grand l’amour pou Bondié par nou ministere.—Mat. 22:37; Éph. 5:1, 2.

2. Couma nou montré nou l’amour pou Jéhovah?

² “Ki to nom sanctifié”: Kan nou profite chaque l’occasion pou koz avek zele lor Jéhovah ek lor so Royaume, nou montré nou l’amour pou Bondié, ek nou pé participé pou sanctifié so nom. (Ps. 83:18; Ézék. 36:23; Mat. 6:9) Pareil couma Jésus, par nou ministere nou contigne montré enn desir sincere ki nom Jéhovah sanctifié ek ki So volonté accompli.—Mat. 26:39.

3. Couma nou l’amour pou Jéhovah aide nou pou surmonte bann difficulté?

³ L’amour motive nou pou surmonte bann difficulté: L’amour pou Jéhovah aide nou pou surmonte n’importe ki difficulté. (1 Cor. 13:4, 7) Jésus ti faire face ar enn quantité situation dan so la vie ki ti kapav empeche li accompli so ministere. Mais, so l’amour profond ek so desir pou faire volonté Jéhovah ti aide li pou perseveré. (Marc 3:21; 1 Pierre 2:18-23) Nou aussi nou gagne beaucoup difficulté, ek nou l’amour pou Bondié kapav aide nou pou surmonte sa. Kan nou suive bien l’exemple Christ, nou kapav gagne plus l’assurance en nou-mem ek nou pa pou baisse lé-bras pou faire tou seki nou kapav pou accompli nou ministere. Mem si bann probleme couma, l’opposition nou famille, enn mauvais la santé, l’age ou-soit l’indifference bann dimoune en general kapav affecté nou, mais nou l’amour pou Jéhovah pou aide nou pou surmonte tou sa bann difficulté-la ek accompli nou ministere avek plus efficacité.

4. Ki la joie nou gagné?

⁴ L’amour li fort, ek c’est enn privilege ki nou ena pou montré sa l’amour profond-la pou Bondié par nou ministere. (1 Cor. 13:13) Lepok kot Jéhovah pou sanctifié so nom enn fois pou tou, pé vini bien vite. Alors, anou faire ki nou “l’amour contigne augmenté.”—Phil. 1:9; Mat. 22:36-38.