‘Donne ou nâme’ pou aide ou etudiant
1. Ki enn etudiant la Bible bizin pou li progressé?
1 Pou nou kapav aide enn etudiant la Bible pou li al ziska prend bapteme, nou bizin faire plus ki zis conduire enn l’etude la Bible regulier avek li. L’apotre Paul ti compare relation ki li ti ena avek bann dimoune ki li ti enseigné avek relation ki enn mama ena avek enn zenfant ki li nourri ek ki li prend soin. Nou aussi nou content pou donne “nou prop nâme,” setadir nou le temps ek bann zeffort sincere, pou aide nou bann etudiant pou progressé lor plan spirituel.—1 Thess. 2:7-9.
2. Kifer nou bizin montré enn l’interet personnel sincere, ek couma nou kapav faire sa?
2 Enn l’interet personnel: A mesure ki enn etudiant la Bible applik seki li aprann, so conscience pou pousse li pou arrete frequente bann dimoune ki pa applik bann principe ki ena dan la Bible. (1 Pierre 4:4) So famille kitfois pou rejette li. (Mat. 10:34-36) Li pou senti-li tousel, alors nou kapav aide li pou surmonte sa kan nou montré li enn l’interet personnel sincere. Enn missionnaire ki ena l’experience ti dire: “Pa pressé pou allé couma l’etude fini. Si li approprié, resté ek kozé pou enn ti moment.” Ou bizin pré pou donne ou etudiant enn l’aide pratik. Par exemple, eski ou kapav telephone li ou-soit rann li visite kan li malade? Si possible, eski ou kapav assize kot li ek aide li avek so bann zenfant dan reunion?
3. Couma nou kapav aide nou etudiant pou gagne l’encouragement avek bann membre congregation?
3 L’aide la congregation: Si ou pé preche dan l’endroit kot ou etudiant resté, kitfois ou kapav rann li enn ti visite ek ou kapav presente li bann lezot proclamateur. De temps en temps, kan li approprié, ou kapav invite different proclamateur, bann ancien aussi, pou accompagne ou dan l’etude. Bien vite apré ki enn l’etude inn bien etabli, encourage ou etudiant pou assisté reunion la Salle du Royaume. Sa pou aide li pou profite frequentation encourageant bann membre congregation ki pou kapav vinn so famille.—Marc 10:29, 30; Héb. 10:24, 25.
4. Couma nou zeffort kapav recompensé?
4 Enn parent ki touletan aide so zenfant spirituellement, gagne beaucoup la joie kan zenfant-la prend position pou Jéhovah ek kan li marche dan la verité. (3 Jean 4) Nou kapav ressenti mem la joie si nou donne tou nou nâme pou aide nou bann etudiant.