Question Ki’nn Soulevé
◼ Dan ki fason pratik nou kapav aide bann pionnier?
A travers le monde pendant l’année service 2009, preské 800,000 frere ek soeur finn servi couma pionnier permanent ou-soit special. Sa bann serviteur a plein temps-la pé sacrifié tou zot le temps, la force, ek di-bien pou ki zot annonce la bonne nouvelle lor Royaume Bondié. (Prov. 3:9) Oui, Jéhovah vrai-mem content avek bann zeffort ki zot pé faire! Dan ki fason nou kapav montré ki nou ena mem pensé ki Jéhovah ek aide nou bann pionnier pou gagne la joie ek pou enduré dan zot service?
Pena doute ki bann parole ki nou finn bien choisir pou encourage-zot pou contigne servi couma pionnier. (Prov. 25:11) Eski nou kapav modifié programme ki nou ena pou la semaine pou ki nou kapav travail avek zot dan predication? Kan nou travail avek zot, nou kapav propose pou servi nou transport au lieu ki servi pou zot. Ek si nou voyage dan zot transport, kitfois nou kapav donne zot enn ti contribution pou couvert zot bann depense. (1 Cor. 13:5; Phil. 2:4) Nou kapav aussi montré ki nou soutenir zot avek amour kan nou montré l’hospitalité ek kan de temps en temps nou invite bann pionnier kot nou pou enn repas.—1 Pierre 4:8, 9.
Bann l’Ecriture donne nou garanti ki Jéhovah pou donne bann dimoune ki rod So Royaume avant tou kitsoz, tou seki zot bizin. (Ps. 37:25; Mat. 6:33) Enn fason ki Li faire sa, c’est a travers l’amour ki ena parmi nou, bann chretien. (1 Jean 3:16-18) Bien sur, fodé pa ki bann pionnier attann ki lezot prend zot bann responsabilité financier. Ek fodé pa ki zot prend l’initiative pou dire lezot kan zot bizin kitsoz. Mais selman, nou kapav aide nou bann pionnier ki fidele ek “compense asterla seki bannla manké” dan enn fason pratik kan nou prend zot compte ek kan nou observé.—2 Cor. 8:14, 15.
Kan Phoebé—ki ti dan congregation Cenchrées dan premier siecle ek ki ti preche l’evangile—ti voyagé pou al Rome, Paul ti encourage bann frere dan Rome pou “accueillir-li dan le Seigneur dan enn fason ki digne pou bann saint, ek . . . aide li dan tou kitsoz kot kitfois li pou bizin zot.” (Rom. 16:1, 2) Nou ena l’occasion pou montré sa mem soutien ki rempli ar l’amour-la envers tou bann ki pé annonce la bonne nouvelle sans arreté, en tant ki pionnier permanent ek special, dan nou congregation.—Actes 5:42.