Aide bann dimoune pou ecoute Bondié
1. Ki bann brochure ti apparette dan l’assemblée district “Ki Royaume Bondié vini!,” ek kifer zot bien utile?
1 Dan l’assemblée district “Ki Royaume Bondié vini!,” ti ena deux nouveau brochure ki ti apparette: Ecoute Bondié ek vive pou touletan, ek enn version pli simple Ecoute Bondié. Parski zot pena beaucoup texte, zot facile pou traduire ek kapav faire sa dan enn tigit le temps. En realité, kan brochure Ecoute Bondié ek vive pou touletan ti apparette en anglais, ti’nn fini gagne l’autorisation pou traduire li dan 431 langue.
2. Kisannla pou tire profit ar sa bann brochure-la?
2 Kisannla surtout pou tire profit ar sa bann brochure-la? Anou guette certain situation ki souvent arrivé dan le monde:
• Kan enn proclamateur pé koz avek enn dimoune, ki li’nn zwenn pou premier fois ou-soit lor enn nouvelle visite, li remarké ki dimoune-la pa konn lire ditou ou-soit pa trop konn lire.
• Enn proclamateur pé preche avek bann dimoune ki koz enn langue ki nou’nn traduire dan bien tigit publication ou-soit ki nou pa’nn traduire ditou. Ou-soit la plupart dimoune dan nou territoire pa konn lire langue ki zot pli a l’aise pou kozé.
• Enn proclamateur servi langue des signes pou preche avek enn dimoune sourde dan so territoire.
• Enn parent envie enseigne la verité so zenfant ki pankor konn lire.
3. Ki bann caracteristik brochure Ecoute Bondié?
3 Ki zot bann caracteristik: Ena bien tigit texte dan brochure Ecoute Bondié. En principe, ena zis enn ti phrase ek enn verset la Bible ki trouve enba lor chaque page, ki mette l’accent lor bann point principal. Kifer? Maziné ki enn dimoune offert ou enn brochure ki’nn ecrire dan enn langue ki ou pa kapav lire, kitfois ena bann l’ecriture ki ou pa habitué trouvé. Mem si ena bann joli zimage ladan, eski sa pou interesse ou? Kitfois non. Li pareil pou bann dimoune ki pa konn lire, si zot trouve bann l’ecriture dan enn publication, bien vite sa pou decourage zot. A cause sa, lor chaque page ena bann zimage ki’nn bien preparé ki capté l’attention, ek ena bann fleche ki dirige conversation-la lor prochain zimage.
4. Ki bann caracteristik brochure Ecoute Bondié ek vive pou touletan?
4 Dan brochure Ecoute Bondié ek vive pou touletan ena bann mem zimage ki dan brochure Ecoute Bondié. Sa brochure-la finn faire pou etudié avek bann dimoune ki pa trop konn lire ou-soit ki pé aprann lire. Enn enseignant la Bible kapav aussi servi enn copie Ecoute Bondié ek vive pou touletan kan li pé faire l’etude avek enn dimoune dan brochure Ecoute Bondié. Lor chaque deux page, au commencement dan coté gauche ena enn question ki sa bann page-la reponn. En plus bann zimage ena aussi bann commentaire ek bann verset ki’nn cité. Vers la fin plusieurs page ena enn l’encadré kot ena lezot point ek bann verset ki’nn cité. Dependant capacité ou etudiant ou kapav koz lor sa bann point ek sa bann verset-la.
5. Kan ek couma nou kapav offert sa bann brochure-la?
5 Couma pou servi zot: Si ou trouvé ki sa li pou dan l’avantage enn dimoune, ou kapav offert sa brochure-la kan ou pé preché porte en porte, mem si c’est pa bann brochure ki nou pé offert sa mois-la. (Guette l’encadré “Couma kapav offert zot.”) Ou kapav presente sa brochure-la kan ou pé faire enn nouvelle visite. Ou kapav zis dire sa dimoune interessé-la ki ou ena enn kitsoz pou montré li ek ou presente li enn brochure.
6. Couma nou pou servi sa bann brochure-la pou conduire enn l’etude la Bible?
6 Dan brochure Ecoute Bondié pena bann question, alors bann discussion pa pou faire par question-reponse pareil couma ou habitué faire kan ou faire l’etude dan livre Ki la Bible enseigné? Dan tou bann culture, bann dimoune content ecoute bann zistoire. Alors, servi bann zimage pou dire bann zistoire inspiré ki ena dan la Bible. Expliké ki ena lor sa bann zimage-la. Ou bizin ena l’enthousiasme. Invite ou etudiant pou dire seki li pensé. Lire bann verset ki ena lor bann page enba, ek raisonne ar li lor la. Pose bann question pou implik dimoune-la dan conversation ek pou faire sur ki li comprend. Si li pé servi Ecoute Bondié ek vive pou touletan, kan pé koz lor chaque zimage, lire ensam bann commentaire ek bann verset la Bible ki corresponn.
7. Couma nou kapav aide nou etudiant la Bible pou progressé?
7 Aide etudiant-la pou progressé: Nou souhaité ki ou bann conversation pou pousse ou etudiant pou envie aprann lire pou ki par li-mem li aprann konn Jéhovah. (Mat. 5:3; Jean 17:3) Alors, si ou pé faire l’etude dan Ecoute Bondié, avek le temps ou kapav propose etudiant-la pou aide li aprann lire, ek ou kapav commence faire so l’etude dan brochure Ecoute Bondié ek vive pou touletan. N’importe ki brochure ou pé servi, etudiant-la pa pou encore pré pou prend bapteme mem si’nn fini brochure-la. Ou bizin commence faire so l’etude dan livre Ki la Bible enseigné? ou-soit dan enn lot publication approprié, ki pou donne li enn pli bon connaissance lor la Bible.
8. Kifer nou bien reconnaissant ki nou ena sa bann nouveau brochure-la?
8 Pou ki bann dimoune vive pou touletan, zot bizin ecoute Souverain l’univers. (Is. 55:3) Ek volonté Jéhovah c’est ki “tou sorte qualité dimoune,” mem bann ki pa konn lire, aprann pou ecoute Li. (1 Tim. 2:3, 4) Pena doute ki vrai-mem nou ena enn grand reconnaissance pou sa bann nouveau zouti ki nou kapav servi pou enseigne bann dimoune pou ecoute Bondié!
[L’encadré page 3]
Couma kapav offert zot
Montré dimoune-la page 2-3, ek dire: “Eski ou ti pou content vive dan enn le monde coumsa? [Laisse dimoune-la reponn.] La Bible promette [ou-soit, sa livre sacré-la promette] ki Bondié bientot pou faire la terre vinn enn joli l’endroit kot pou ena la paix ek kot personne pa pou pauvre ek pa pou tombe malade. Guetté ki nou bizin faire pou vive dan enn le monde coumsa. [Lire Isaïe 55:3, ki cité la-haut lor page 3.] Sa verset-la dire nou ‘vinn vers’ Bondié ek ‘ecoute’ Li. Mais couma nou kapav ecoute Bondié?” Ouvert page 4-5, ek discute reponse-la avek li. Si li pena le temps, quitte brochure-la avek li ek faire bann l’arrangement pou retourné ek reponn question-la.