Kestion Ki’nn Souleve

◼ Eski enn proklamatris bizin kouver so latet si enn proklamater pe akonpagn li dan enn letid Labib ki fer devan laport enn dimounn?

Kan enn proklamatris pe kondir enn letid Labib ki bien etabli ek ena enn proklamater prezan, proklamatris-la bizin kouver so latet. (1 Cor. 11:3-10) La Tour de Garde 15 Ziliet 2002, paz 27, an Franse explike: “[Enn letid Labib] se enn program lansegnman ki’nn organize ek kot dimounn ki pe kondir letid-la, limem prezide. Dan sa ka-la, sa letid Labib-la fer osi parti dan program lansegnman kongregasion. Si enn proklamatris batize pe kondir enn letid koumsa ek ena enn proklamater batize avek li, proklamatris-la pou bizin kouver so latet.” Proklamatris-la pou bizin kouver so latet mem si pe fer letid dan enn lakaz, devan enn laport, ouswa dan enn lot plas.

Dan enn lot kote, enn ser kapav koumans enn letid Labib devan laport enn dimounn kan li al vizit dimounn-la pou montre li kouma enn letid Labib deroule, ouswa pou examinn enn parti dan enn piblikasion ki servi pou fer letid. Dan sa ka-la, sa letid-la pankor bien etabli ek mem si enn proklamater pe akonpagn li, li pa neseser kouver so latet. Souvan sa pran inpe letan, ek parfwa bizin fer plizir vizit avan ki etabli bann letid Labib ki fer devan laport, alor bann proklamater bizin montre zot rezonab ek get bann sitiasion pou kone kan bizin kouver latet.