Aide bann ki etudié devant la porte ou-soit par telephone, pou faire progré
1. Avek ki l’objectif nou conduire bann l’etude la Bible?
1 Li enn la-joie pou commence enn l’etude la Bible, pa vrai? Mais trouve enn dimoune ki interessé pou etudié la Bible, li zis enn commencement. L’objectif enn l’etude, c’est pou aide dimoune-la pou vinn enn vrai disciple Jésus. (Mat. 28:19, 20) Ki kapav aide nou pou reussi faire sa?
2. Ki été enn l’etude devant la porte ou-soit par telephone, ek kifer zot efficace?
2 Bann dimoune ki occupé: Zordi, pli allé, dimoune pli occupé. Dan certain l’endroit, bien tigit dimoune disposé pou passe enn heure-temps pou etudié la Bible dan commencement-mem. Pou ki nou kapav aide sa qualité dimoune-la, nou finn gagne l’encouragement pou commence ek pou conduire bann l’etude devant la porte enn dimoune, ou-soit par telephone. Au commencement, sa bann l’etude-la kapav bien courte, ek kitfois nou kapav guette zis dé-trois verset la Bible dan enn ou-soit deux paragraphe dan enn publication, couma livre Ki la Bible enseigné? Nou felicite bann proclamateur ki pé conduire sa bann qualité l’etude-la devant la porte ou-soit par telephone.
3. Kifer nou bizin faire tou seki nou kapav pou augmente le temps ki nou passé dan enn l’etude ki nou faire devant la porte?
3 Mais, eski nou bizin contente-nou contigne etudié touletan avek dimoune-la devant so la-porte? Non. Mem si li bon ki nou pa reste trop longtemps kan nou fek commence enn l’etude, Ministère du Royaume (français) mai 1990, page 8 dire: “Enn fois ki l’etude inn etabli ek ki l’interet dimoune-la inn augmenté, nou kapav faire l’etude pendant inpé pli longtemps.” Sa li bien important. Anou prend enn l’exemple: si enn zenfant pa’nn gagne mangé pendant longtemps, kitfois nou pou donne li mangé tigit-tigit ziska ki so l’appetit ré-vinn normal. Mais si nou contigne donne li sa tigit mangé-la pendant enn longue period lé-temps, nou pa pou kapav attann ki li regagne tou so la-force ek grandi couma bizin. Li pareil pou enn dimoune ki pé etudié la Bible. Li bizin enn l’etude pli serieux ek regulier pou li kapav vinn enn serviteur Bondié ki ena maturité spirituel.—Héb 5:13, 14.
4. Ki l’avantage ena kan conduire enn l’etude dan lakaz?
4 Bann l’etude ki nou faire dan lakaz: Li pli bon ki nou faire l’etude dan enn l’endroit trankil—soit dan enn lakaz, soit dan enn lot place approprié. Sa pou aide etudiant-la pou aprann pli bien ek aussi pou comprend pli bien seki parole Bondié dire. (Mat. 13:23) Li pou aussi pli facile pou enseignant-la adapté seki zot pé etudié dapré besoin etudiant-la. En plus, enn l’etude ki dure pli longtemps pou permette ou examine Parole Bondié dan enn fason pli profond ki pou plus fortifié la foi etudiant-la.—Rom. 10:17.
5. Couma ou kapav propose enn dimoune pou etudié dan lakaz au lieu ki etudié devant so la-porte?
5 Couma ou kapav propose enn dimoune pou etudié dan lakaz au lieu ki etudié devant la porte? Apré ki ou’nn faire plusieurs ti l’etude, kifer ou pa propose dimoune-la pou etudié pendant pli longtemps? Zot kapav tombe d’accord en avance lor ki quantité lé-temps zot pou etudié. Ou-soit ou kapav servi enn method indirect ek demann li: “Eski ou ena le temps zordi pou assizé ek discute sa ensam?” ou-soit, “Zordi comié lé-temps ou ti pou content passé pou nou discute sa sujet-la?” Si ou pa gagne okenn resultat, contigne faire ou l’etude devant la porte. Ou kapav réessayé enn lot l’occasion.
6. Avek ki l’objectif nou bizin contigne accompli nou ministere, ek couma bann suggestion ki ena dan sa lartik-la kapav aide nou pou faire sa?
6 Kan nou rod bann dimoune ki sincere, fodé pa nou blié l’objectif ki nou ena kan nou conduire bann l’etude la Bible. Nou envie aide bann ki sincere pou vinn bann serviteur Jéhovah ki voué ek baptisé. Nou souhaité ki Jéhovah beni nou bann zeffort a mesure ki nou contigne accompli nou ministere avek sa l’objectif-la.—2 Tim. 4:5.