1er Partie—Bann l’Études Biblique Ki Faire Nou Étudiants Progressé
Ki Été enn l’Étude Biblique?
1 Dans le monde entier, bann serviteur Bondié dirige apépré six million l’études Biblique chaque mois. Si nous servi bann méthodes l’enseignement efficace, nous pou kapav aide bann étudiants pou progressé ziska ki zot voué zot la-vie ar Jéhovah, prend baptême ek vinn bann enseignants “bien qualifié pou enseigne lézot.” (2 Tim. 2:2) Eski ou ti pou content aide ou étudiant pou faire sa bann progrès-la? À partir sa mois-la, nous pou trouve enn série l’article dans Ministère du Royaume ki pou explique nous bann points important pou dirige bann l’étude Biblique ki progressé.
2 Kan Eski Nou Kapav Mette enn l’Étude Biblique lor Nou Rapport? Si ou éna bann discussions organisé régulièrement lor la Bible ek dans bann publications ki recommandé, mem si li dure zis détrois minutes, ou pé conduire enn l’étude Biblique. Mem si sa discussion-la déroulé devant la porte ou-soit par téléphone, li compté couma enn l’étude. Si, après ki ou’nn montré enn dimoune couma enn l’étude déroulé, ou’nn faire l’étude encore deux fois avec li, ek ou pensé ki l’étude-la pou contigné, ou kapav remette enn rapport l’étude.
3 Beaucoup dimoune étudié la Bible dans brochure Ki Bondye Pe Demann Nu? ek livre Konesans Ki Amenn ver Lavi pu Tuletan. Kan étudiant-la finn fini étudié sa bann publications-la, ek nous trouvé ki li pé progressé, mem doucement-doucement, ek ki li pé apprécié séki li pé aprann, nous kapav contigne so l’étude dans livre Ador Sel Vre Bondye. Nous kapav servi brochure U Kapav Vinn Kamarad Bondye! pou étudié avec bann dimoune ki pa trop konn lire.
4 L’étude Biblique c’est enn moyen efficace ki’nn aide plusieurs millions dimoune pou vinn bann vrai disciples Jésus Christ. (Mat. 28:19, 20) Si ou applique bann suggestions ki pou parette dans sa série l’article ki pou vini-la, ou pou kapav dirige enn l’étude Biblique ki progressé.