Livre Ki la Bible enseigné?—Nou zouti principal pou conduire bann l’etude la Bible
1 Eski ou rappel couma nou ti bien content kan ti presente livre Ki la Bible enseigné vrai-mem? pou l’assemblée district “L’obeissance pou Bondié”? Tou dimoune ti content pou gagne enn copie personnel apré la fin program, samedi apré-midi. Couma nou pou servi sa nouveau zouti-la? Sa livre-la inn publié pou ki nou servi sa couma zouti principal pou commence bann l’etude la Bible. Mem si nou bizin attann mois mars pou presente sa livre-la dan predication, nou encouragé pou servi sa depuis asterla-mem pou commence ek dirige bann l’etude.
2 Bann l’etude ki nou pé faire asterla: Bann proclamateur ki pé faire l’etude dan livre Konesans Ki Amenn ver Lavi pu Tuletan ou-soit dan brochure Ki Bondye Pe Demann Nu? bizin servi zot bon jugement pou decidé kan ek couma zot pou commence servi sa nouveau livre-la. Si ou fek commence enn l’etude, ou kapav al direct dan nouveau livre ek commence avek chapitre 1. Si ou’nn avancé inpé dan livre Konesans, ou kapav contigne ou l’etude dan chapitre ki corresponn dan livre Ki la Bible enseigné? Si ou’nn arrive vers la fin livre Konesans, ou kapav decide pou termine sa livre-la.
3 Surement nou tou, nou konn beaucoup dimoune ki pou kapav profite enn l’etude dan livre Ki la Bible enseigné?, parski sa livre-la presente bann l’enseignement la Bible dan enn fason simple, ek ki facile pou suive. Kifer ou pa offert tou sa bann dimoune-la enn l’etude dan sa livre-la? Par exemple, ena certain ki finn etudié brochure Ki Bondye Pe Demann Nu? ou-soit livre Konesans, mais ki pa finn progressé ziska voué zot la-vie ek prend bapteme. Kitfois sa bann dimoune-la ti pou content recommence enn l’etude dan sa nouveau livre-la. Bann parent kapav decidé pou servi sa livre-la pou faire zot zenfant gagne connaissance exact lor volonté Bondié.—Col. 1:9, 10.
4 Etudié enn deuxieme livre: Eski nou kapav etudié enn deuxieme livre, kan nou fini livre Ki la Bible enseigné? Oui. Si nou trouvé ki dimoune-la pé faire progré, mem doucement-doucement, ek li pé montré ki li apprecié seki li pé aprann, nou kapav contigne so l’etude dan livre Ador Sel Vre Bondye. Pena okenn doute ki livre Ki la Bible enseigné?, li enn zouti extra ki nou ena dan nou la-main pou accompli nou mission pou faire bann disciple.—Mat. 28:19, 20.