Kouma pou Prepar Bann Lintrodiksion Efikas

1. Kifer li inportan nou fer enn bon lintrodiksion?

¹ Dan enn repa, souvan enn bon lantre donn nou plis lapeti pou manz lezot pla ki pe vini apre. Li parey dan nou minister, enn bon lintrodiksion kapav fer nou gagn bann bon konversasion Biblik. Bann lintrodiksion efikas kapav kourt ouswa long ek koz lor diferan size. Me parey kouma pou enn bon manze, pou fer enn bon lintrodiksion nou bizin bien reflesi ek sa demann enn bon preparasion. (Prov. 15:28) Kouma nou kapav fer enn lintrodiksion efikas?

2. Kouma nou kapav prepar enn lintrodiksion ki interesan?

² Swazir Bann Size ki Pou Interes Bann Dimounn: Nou bann lintrodiksion bizin pous bann dimounn pou anvi konn plis, sinon zot kapav terminn konversasion-la lamem. Alor, kan nou pe prepar nou bann lintrodiksion, reflesi lor bann size ki interes bann dimounn dan teritwar. Par exanp, eski zot interese ar enn bon gouvernman, enn lavi fami ere, ouswa lafin bann lager? Bann dimounn an zeneral kontan donn zot lopinion, alor prepar enn kestion ki pou ankouraz zot reflesi. Eski ou kapav servi enn parmi bann model lintrodiksion ki ena dan Nou Minister ek adapte li ar ou teritwar? Kifer detanzantan ou pa pratik bann lintrodiksion pandan ou Ladorasion an Fami?

3. Kouma nou kapav adapte nou lintrodiksion avek kiltir enn dimounn ouswa lanvironnman kot li’nn grandi?

³ Pran Kont Kiltir Dimounn-la ek Lanvironnman kot Li’nn Grandi: Dan sertin landrwa, bann dimounn atann ki depi koumansman mem dan nou konversasion, nou explik zot rezon nou vizit. Dan lezot landrwa, bann dimounn trouv sa malelve si enn viziter pa pran zot nouvel ouswa pa prezant zotmem. Dan sertin landrwa, akoz krwayans relizie bann dimounn, fasilman nou kapav koz lor Labib dan nou lintrodiksion. (Actes 2:14-17) Selman, dan bann landrwa kot bann dimounn pa dan enn relizion Kretien ouswa pa frekant okenn relizion, olie ki nou koz lor Labib premie fwa mem, kitfwa li pou pli bon ki nou fer sa kan nou revizit bann dimounn-la.​—Actes 17:22-31.

4. Kouma nou kapav ena bann parol lintrodiksion ki efikas?

⁴ Bann Parol Lintrodiksion: Prepar bien ou bann parol lintrodiksion. An prinsip li pli bon fer bann fraz kourt ek sinp. Fason ki nou dir nou bann parol lintrodiksion osi li bien inportan. Nou bizin bien vivan. Fer enn sourir sinser ek amikal pou montre ki nou interese avek dimounn-la. Si nou swiv sa bann sigzesion-la, sa pou ed nou prepar bann lintrodiksion efikas ki pou ankouraz bann dimounn dan nou teritwar pou manz lor “latab Jéhovah.”​—1 Cor. 10:21.