Kestion Ki’nn Souleve

◼ Ki kitsoz bizin ansegn bann zanfan pou zot vinn bann adilt lor plan spiritiel?

Bann paran Kretien fer boukou zefor pou elve zot zanfan “dan disiplinn ek dan bann lansegnman Jéhovah.” (Éph. 6:4; not) Par exanp, bann paran inn trouve ki zot gagn boukou bienfe kan zot examinn brosir Anou Examine la Bible Toulé-Jour ansam avek zot bann zanfan toule gramatin. Pandan ladorasion an fami ouswa dan lezot lokazion, bann fami kapav get enn video ansam ek diskit lor la, koz lor bann size presi ki ena dan bann lartik Jeunes s’interrogent, zwe enn zistwar Biblik, ouswa fer bann ti demonstrasion. Me, pou ki bann zanfan “avans ver matirite,” fode ki bann paran ansegn zot bann verite profon ki ena dan Labib osi.​—Héb. 6:1.

Anou gete ki nou abitie ansegn bann dimounn ki nou zwenn dan teritwar. An zeneral, souvan nou servi liv Ki la Bible enseigné vrai-mem? pou koumans enn letid Labib premie fwa nou zwenn enn dimounn, ouswa dan enn vizit. Kan nou’nn konplet sa liv-la, nou servi liv “Reste dan l’amour Bondié.” Kifer? Liv Ki la Bible enseigné? donn etidian-la enn konesans debaz lor Labib. Parkont liv “Reste dan l’amour Bondié” ed li kone kouma pou aplik bann prinsip Labib dan so lavi toulezour. Sa de piblikasion-la ed bann nouvo pou vinn bann dimounn ki “anrasine” dan Christ ek “stab dan lafwa.” (Col. 2:6, 7) Eski sa de liv-la kapav itil pou nou bann zanfan osi? Zot osi zot bizin kone ki ete laranson, Rwayom Bondie, ek dan ki kondision bann dimounn mor ete. Zot bizin kone kifer Bondie permet soufrans ek kouma nou kone ki nou pe viv dan bann dernie zour. Bizin fer zot gagn konviksion ki se bann Temwin Jéhovah ki ena laverite. Bann ki pli zenn, zot osi zot bizin konpran bann prinsip Labib ek kone kouma pou form zot “kapasite pou diserne.” (Héb. 5:14) Biensir, bann paran bizin pran an konsiderasion laz zot zanfan ek zot kapasite pou konpran. Me selman, boukou zanfan ena kapasite pou aprann bann verite Biblik bien profon, mem si zot ankor tipti.​—Luc 2:42, 46, 47.