Servi Sit jw.org dan To Minister

Nou sit jw.org se enn zouti bien itil ki ed nou anons bon nouvel “ziska dan rezion pli lwin lor later.” (Actes 1:8) An realite, laplipar dimounn pa’nn dekouver sa sit-la par zotmem. Se zis apre ki enn proklamater inn montre zot sa sit-la ki zot kone li existe.

Enn sirveyan sirkonskripsion ti download video Kifer Li Bon Etidie Labib? lor so portab ek sak fwa ki li gagn lokazion, li montre sa. Par exanp, kan li prese lakaz par lakaz, li dir: “Mo pe fer enn ti vizit pou ed bann dimounn gagn repons sa trwa kestion inportan la: Kifer ena sa kantite problem-la dan lemond? Kouma Bondie pou regle zot? Antretan, kouma nou kapav fer fas ar sa bann problem-la? Sa ti video-la reponn sa bann kestion-la.” Apre sa, li pez play ek li get reaksion dimounn-la. Video-la telman kaptivan ki lizie laplipar dimounn res brake lor la, tanki video-la pankor fini. Apre sa, sirveyan sirkonskripsion-la dir: “Parey kouma ou’nn tande, ou kapav demann enn letid Labib lor Internet. Kouma mo lamem, mo kapav montre ou kouma nou fer sa.” Si dimounn-la aksepte, li servi brosir Enn Bon Nouvel pou montre li kouma enn letid Labib deroule. Si dimounn-la pena letan, li fer laranzman pou fer sa dan so prosin vizit. Pandan ki li pe fer enn ti poz pou bwar enn kafe, li koumans enn konversasion amikal ar enn dimounn ki asiz pre kot li, ek li servi mem metod pou montre video-la. Eski to pe servi sit jw.org dan to minister?