Lekol Minister Teokratik 2015 Ed Nou pou Amelior Fason Ki Nou Ansegne

¹ David ti ekrir dan enn psaume: “Les bann parol ki sorti dan mo labous ek meditasion mo leker fer twa plezir, A Jéhovah twa ki mo gran Ros ek mo Sover.” (Ps. 19:14) Nou osi, nou anvi ki nou bann parol fer Jéhovah plezir, parski nou akord enn gran linportans ar privilez ki nou ena pou koz lor laverite dan kongregasion ek dan predikasion. Enn fason ki Jéhovah form nou pou nou akonpli nou minister, se atraver Lekol Minister Teokratik. Nou gagn sa formasion-la sak semenn dan plis ki 111,000 kongregasion atraver lemond. Dan lemond antie, sa Lekol-la finn ed bann frer ek ser ki sorti dan diferan kiltir ek ki dan diferan kondision sosial pou vinn bann minis kalifie pou anons bonn nouvel. Sa inn ed zot pou ansegn avek lasirans, takt, ek kouraz.​—Actes 19:8; Col. 4:6.

² Dan program Lekol Minister Teokratik pou 2015, nou pou examinn bann size dan brosir “Anou Dekouver Seki Ena dan Parol Bondie,” bann size ki sorti dan Étude perspicace des Écritures Volim 1 ek 2, ek dan Latour Degard an Kreol ek an Franse. Anplis, ena bann sanzman konsernan letan ki bizin pran pou fer bann Pwin Interesan lor lektir Labib ek Devwar No. 1. Nou pou trouv sa bann sanzman-la ek fason ki bann devwar pou prezante dan Lekol, dan bann prosin paragraf.

³ Pwin Interesan lor Lektir Labib: Bann frer ki pou prezant sa parti-la pou ena de minit pou examinn enn pwin Biblik interesan ek pratik dan lektir Labib ki’nn prevwar pou sa semenn-la. Avek enn bon preparasion, bann frer pou kapav partaz enn pwin ki pou bien itil pou kongregasion, dan letan ki zot ena. Apre sa, bann asistan pou kontign ena sis minit pou donn enn komanter 30 segonn ouswa mwins, lor bann pwin interesan ki zot finn trouve dan lektir Labib pou sa semenn-la. Nou bizin prepar nou ek disiplinn nou pou nou kapav donn enn komanter interesan ek pratik dan 30 segonn. Me, se enn bon formasion pou nou. Sa donn osi letan lezot pou fer bann komanter lor seki zot finn aprann dan zot bann resers personel.

⁴ Devwar No. 1: Letan ki’nn prevwar pou Lektir Labib finn vinn trwa minit ouswa mwins ek pou ena mwins verse pou lir. Bann ki gagn enn lektir pou fer, bizin repet plizir fwa ek lir for parti ki zot finn gagne. Zot bizin osi fer bien atansion pou pronons bien ek lir avek fasilite pou ki bann asistan bien konpran bann lide ki pe lir. Tou bann serviter Jéhovah bizin fer zefor pou lir bien, parski lektir ena enn rol inportan dan nou ladorasion. Nou bien kontan pou trouve kouma boukou parmi nou bann zanfan lir bien! Nou felisit bann paran ki, avek lamour, fer zefor pou ed zot bann zanfan pou lir bien.

⁵ Devwar No. 2: Sa size-la pou fer par enn ser ek li bizin pran sink minit. Li bizin devlop tem ki’nn donn li. Kan sa size-la baze lor brosir Anou Dekouver Seki Ena dan Parol Bondie ek Latour Degard, li bizin montre kouma nou kapav aplik sa dan nou teritwar dan enn fason realist ek pratik. Kan size-la baze lor liv Étude perspicace des Écritures, lor enn personaz Biblik, zelev-la bizin etidie bann ransegnman anba nom sa personaz-la, li bizin swazir bann verse apropriye ki li pou servi, ek montre ki leson nou kapav aprann ar lexanp sa personaz Biblik la. Li kapav azout bann lezot verse si zot apropriye ar size-la. Sirveyan Lekol pou swazir enn interlokitris.

⁶ Devwar No. 3: Sa size-la pou fer par enn frer ouswa enn ser ek li bizin pran sink minit. Kan enn ser fer sa devwar-la, li bizin swiv mem linstriksion ki’nn done pou Devwar No. 2. Kan enn frer fer sa devwar-la, li pou baz li lor liv Étude perspicace des Écritures ek li pou fer sa dan form enn diskour ki konsern loditwar. Zelev-la bizin devlop tem ki finn donn li, li bizin swazir bann verse ki apropriye, ek montre ki leson nou kapav aprann ar lexanp sa personaz Biblik la.

⁷ Nouvo Instriksion pou Devwar No. 3 pou Bann Frer: Kan sa devwar-la baze lor brosir Anou Dekouver Seki Ena dan Parol Bondie, ouswa dan Latour Degard, frer-la bizin prezant sa dan form enn demonstrasion koumadir li pe fer ladorasion an fami, ouswa li dan predikasion. An zeneral, sirveyan Lekol pou swazir kisannla ki pou akonpagn zelev-la ek osi so kad. Sa interlokiter-la bizin enn manb lafami sa zelev-la ouswa enn frer dan kongregasion. Zelev-la kapav azout bann lezot verse ki met laksan lor bann prinsip Biblik ki apropriye ar tem-la, dan so devwar. Detanzantan, kapav donn enn ansien pou prezant sa parti-la. Bann ansien kapav swazir zotmem zot kad ek kisannla pou akonpagn zot. Pena dout ki sa pou bien ankouraz bann manb kongregasion pou trouv bann ansien servi zot kapasite pou ansegne avek enn manb zot fami ouswa enn lot frer.

⁸ Konsey: Apre sa devwar-la, sirveyan lekol pou pran de minit pou felisit zelev-la ek pou donn li bann konsey ankourazan ki baze lor liv Tirez profit de l’École du ministère théocratique. Kan sirveyan lekol anons prosin zelev, li pa pou dir ki pwin zelev-la pou travay. Apre sak devwar, sirveyan lekol bizin felisit sinserman zelev-la, dir ki pwin li ti ena pou travay ek dir kifer zelev-la inn bien travay sa pwin-la, ouswa avek zantiyes explik li kifer li pou bon ki li kontign travay sa pwin-la.

⁹ Nou kapav trouv bann pwin ki bann zelev bizin travay, dan liv École du ministère, paz 79-81. Kan zelev-la inn fini fer so devwar, apre renion, sirveyan lekol pou ekrir seki bizin dan so liv. Li pou osi demann li an prive si li’nn fer exersis ki an rapor avek sa pwin ki li ti ena pou travay la. Apre ouswa dan enn lot moman, sirveyan lekol kapav felisit li ek donn li bann lezot konsey pratik. Li bon ki enn zelev konsider led personel ki li gagne dan lekol kouma enn lokazion ki pou ed li progrese lor plan spiritiel.​—1 Tim. 4:15.

¹⁰ Si enn zelev depas letan, sirveyan lekol ouswa so asistan bizin pre pou donn enn signal. Par exanp, li kapav sonn enn ti laklos ouswa fer enn ti tapaz dan enn fason bien diskre pou fer zelev-la konpran ki li’nn depas letan. Zelev-la bizin konpran ki li bizin terminn so fraz ek kit lestrad.​—Get liv École du ministère, p. 282, par. 4.

¹¹ Nou ankouraz tou bann ki ranpli bann kondision, pou partisip dan Lekol Minister Teokratik. (Get liv École du ministère, p. 282, par. 6.) Formasion ki sa lekol-la done finn ed bann serviter Jéhovah pou pres ek pou ansegn bon nouvel lor Rwayom Bondie avek konviksion, dignite ek lamour. Wi, Jéhovah bien kontan ki tou bann ki pe tir profi ar sa formasion-la pe loue Li!​—Ps. 148:12, 13; Is. 50:4.