Enn Lekol Ki Ekip Nu pu Bann Kitsoz Ki Plis Konte dan Lavi
1 Dimunn al lekol pu gayn enn linstriksyon ki pu ed zot realiz zot bann lobzektif dan lavi. Me, ki lobzektif ki pli inportan ki tu? Eski se pa donn laglwar sa Kikenn ki’nn donn nu lavi la ek ed lezot pu konn so bann lintansyon ek so manyer azir? Lobzektif Lekol Minister Teokratik, se prepar nu pu anseyn lezot nu lafwa. Alor, amezir ki nu asiste sa lekol la sak semenn, nu pu devlop bann kapasite ki ekip nu pu bann travay pli inportan ki ena dan lavi.
2 Dan Nu Minister DiRwayom mwa dernye, u’nn gayn enn kopi “Program Lekol Minister Teokratik pu 2003.” Program la donn bann detay lor fason ki lekol pu dirize. Sirman u pu truve ki li pratik pu gard sa program la dan u liv Tirez profit de l’École du ministère théocratique. Parski tulesemenn, u pu bizin amenn sa liv la ar u. Asterla, anu get inpe seki pu ena dan Lekol Minister Teokratik an 2003.
3 Kalite Ki enn Orater Bizin Devlope: Apartir Zanvye, lekol pu kumans avek enn diskur sink minit. Dan sa diskur la, pu koz lor enn kalite ki enn orater bizin devlope, uswa lor enn domenn an rapor avek lektir, letid, uswa lanseynman. Sa parti la pu prezante par sirveyan lekol, uswa par enn ansyin kalifye. Frer ki fer sa diskur la kapav egzaminn definisyon enn kalite ki enn orater bizin devlope ek linportans sa kalite la. Apre sa, li bizin egzaminn bann legzanp ki ena dan Labib. Li pu montre kuma kapav servi sa kalite ki enn orater bizin devlope la. Ek li pu montre sirtu kuma kan nu fer sa, sa kapav amelyor nu predikasyon.
4 Devwar No. 1: Bann frer ki gayn diskur instriksyon pu fer, ankuraze ankor enn fwa pu “konsantre plis lor valer pratik bann ranseynman ki pe egzamine.” Savedir ki bizin montre kongregasyon kuma zot kapav servi sa bann ranseynman la. Si u gayn sa diskur la pu fer, get liv École du ministère, paz 48-9. U pu gayn bann lide lor fason ki bizin prepar sa diskur la. Etidye usi bann referans ki done par deryer dan Index liv la, anba tit “Application pratique.”
5 Program Lektir Labib: Kitfwa avan, u pa’nn kapav respekte program lektir Labib ki ti prevwar tulesemenn. Alor, kifer eski sa lane la, u pa fer u enn devwar pu respekte li? Bann ki fer sa pu konplet Lekritir Grek Kretyin lafin lane. Dan liv École du ministère, paz 10, paragraf 5, u pu truv profi ki gayne kan kumans enn program lektir Labib avek bann Lekritir Grek Kretyin.
6 Pwin Biblik Interesan: Sa parti la pu nepli sis minit, me dis minit. Lasistans pu gayn lokazyon donn bann komanter lor lektir Labib pu lasemenn. Bann ki gayn privilez pu partisip ladan bizin respekte letan ki zot ena. Sa parti la pu prezante tulesemenn, mem kan ena revizyon oral. Amezir ki u lir bann sapit la, rod bann pwin ki u kapav servi dan u letid familyal, dan u servis uswa dan u fason viv. Ki bann kalite Zeova u truv byin dan fason ki Li ti tret so pep ek bann lezot nasyon? Ki u finn aprann ki’nn fortifye u lafwa ek ki’nn fer u ena plis rekonesans pu Zeova? Santi u lib pu donn komanter lor ninport ki pwin dan sa bann sapit la, mem dan porsyon pu Devwar No. 2. Dayer, frer ki fer sa parti la pa pu fer okenn komanter; li pu zis lir.
7 Devwar No. 2: Tulesemenn, premye devwar zelev se pratik enn lektir an piblik. Lektir la pu baze lor Labib, eksepte sak dernye lektir dimwa, lektir la pu tire dan Latur Degard. Zelev la pu fer so lektir san li fer enn introdiksyon, ni enn konklizyon. Kumsa, li pu konsantre plis lor so bann kapasite pu lir byin an piblik.—1 Tim. 4:13.
8 Devwar No. 3 ek No. 4: Kan bann devwar la baze lor liv Comment raisonner, sertin pu gayn plis paragraf ki lezot. Me, pu sertin devwar, pu gayn zis enn tem. Alor bann ki gayn enn tigit ranseynman mem uswa ki gayn zis enn tem pu devlope, zot pu gayn lokazyon fer resers dan bann piblikasyon Lasosyete. Li pu pli fasil pu bann ser adapte zot bann lide avek sa kikenn ar ki zot pe koze la.
9 Bann Kad Ki U Pu Servi pu Fer U Devwar: Kuma finn indike dan paz 45, dan liv École du ministère, sirveyan lekol kapav swazir enn kad pu zelev la. Sinon, bann ser kapav swazir enn kad dan paz 82 pu adapte zot demonstrasyon. Si enn ser fer enn devwar sak de mwa, dan sinkan li pu’nn servi 30 diferan kad ki ena dan sa liv la. Bann ser ki swazir kad No. 30, setadir “Autre cadre de discussion adapté à votre région”, pu bizin ekrir kad la anba lor zot fis devwar (S-89) uswa par deryer. Dan paz 82, akote sak kad ki mansyone, ena bann tire. Sirveyan lekol pu ekrir lor la, dat ki zelev la inn fer so devwar. Li pu ekrir dan liv zelev la mem, akote sa kad ki li’nn servi la. Li kapav fer sa an mem tan ki li pe ekrir bann remark lor so fis konsey.
10 Fis Konsey: U fis konsey truv dan liv la mem, paz 79-81. Donk, apre sak devwar u fer, u bizin donn sirveyan lekol u liv. Sirveyan la pu bizin pran not bann pwin lor ki bann zelev pe travay.
11 Revizyon Oral: Revizyon Lekol Minister Teokratik pu fer enn fason oral. Pu ena li sak 2 mwa, pandan 30 minit. Bann kestyon ki pu egzamine pandan sa revizyon la pu kontiyn paret dan Nu Minister DiRwayom. Ki pu fer si vizit sirveyan uswa lasanble sirkonskripsyon tom dan semenn revizyon oral? Bann diskur semenn apre bizin prezante enn semenn avan, ek ranvway revizyon oral pu semenn apre.
12 Dezyem Lekol: Dan bann kongregasyon kot ena plis ki 50 zelev dan lekol, bann ansyin kapav pans fer enn dezyem lekol. “Dan sa lekol la, kapav prezant tu bann devwar zelev, uswa zis devwar No. 3 ek No. 4.” (École du ministère, p. 285) Lide servi dezyem lekol zis pu de dernye devwar, aplike sirtu pu bann kongregasyon kot ena buku ser ek tigit frer pu fer lektir. Bann ansyin bizin servi enn frer kalifye pu diriz sa lekol la.
13 Konseye Spesyal: Kuma finn indike dan program Lekol Minister Teokratik, kolez ansyin pu nom enn konseye spesyal. So rol se donn bann konsey prive bann ansyin ek bann serviter ministeryel ki fer pwin biblik interesan ek diskur instriksyon. Frer ki asim sa rol la bizin enn frer ki ena lexperyans. Fode ki bann lezot ansyin kapav respekte so konsey. Kan li konseye, li bizin ankuraz bann orater la, felisit zot pu zot bon diskur ek bann teknik ki zot servi pu anseyne. Li kapav usi sigzer enn u de pwin ki orater la kapav amelyore. Si enn frer fer diskur ase suvan, li pa neseser ki konsey li sak fwa. Me, konseye spesyal la pu sirman truve ki mem sertin orater ki asterla fer diskur piblik, bizin led pu progrese.—1 Tim. 4:15.
14 Ki Bann Konseye La Bizin Ekute: Ki pu ed enn konseye kone si enn size inn byin prezante? Dan liv École du ministère ena 53 sapit ki nimerote. Dan trwazyem lankadre laplipar sa bann sapit la, ena enn ti rezime bann kitsoz ki bizin ekute lor enn size ki pe prezante. Sirveyan lekol bizin pran kont usi bann lezot rapel ek sigzesyon ki ena dan sa liv la. Sa pu ed li truve si size la finn byin prezante ek si so bann lide ti byin relye. Not par egzanp bann kestyon ki ena lao dan paz 55 ek bann lide dan dernye paragraf, dan paz 163.
15 Ekrir dan Bann Plas Vid: Dan bann paz liv École du ministère ena bann gran marz. Ek ena usi enn kantite lespas vid ki u kapav servi pu not bann pwin kan u fer u letid personel ek kan u asiste Lekol Minister Teokratik. (Get paz 77, 92, 165, 243, 246, ek 250.) Amenn u liv ar u sak semenn. Swiv ladan kan pe fer premye diskur. Gard u liv tuletan uver pandan derulman lekol. Not bann sigzesyon ki sirveyan lekol fer. Pran kont bann metod ki servi pu anseyne, bann kestyon, bann legzanp, bann konparezon, ek bann zimaz ki tu bann ki partisipe la servi. Pran kont usi bann lobze ki zot servi pu anseyne, ek bann kitsoz ki zot site pu montre bann diferans. Si u pran bann bon not, u kapav rapel bann pwin byin inportan ki u’nn kapte dan lekol ek servi zot apre.
16 Zezi Kris ti kone ki pres labonn nuvel lor Rwayom Bondye, sa mem pli gran privilez ki enn dimunn kapav gayne. Sa mem ki ti so prinsipal misyon. (Mark 1:38) Li ti dir: “Mo bizin pres labonn nuvel lor Rwayom Bondye parski se pu sa rezon la ki finn avoy mwa.” (Lik 4:43) Nu’si nu finn aksepte linvitasyon pu swiv li. Alor, nu byin okipe avek travay predikasyon, ek nu pe tuletan fer zefor pu amelyor kalite nu “sakrifis luanz.” (Ebre 13:15) Pu nu reysi fer sa, anu byin deside pu partisip regilyerman dan Lekol Minister Teokratik, enn lekol ki pu prepar nu pu bann kitsoz ki plis konte dan lavi.