Lekol Minister Teokratik pu 2004
1 Zeova ekip bann dimunn ordiner pu fer enn travay ki ena enn linportans mondyal. Enn fason ki Li fer sa, se atraver formasyon ki Lekol Minister Teokratik done tulesemenn. Eski u pe partisipe otan ki u sityasyon permet u? Apartir Zanvye pu ena detrwa sanzman pu permet bann etidyan tir plis profi.
2 Konseye Adzwin Aturderol: Bann frer ki fer diskur instriksyon ek Pwin Biblik Interesan finn byin apresye bann remark ki zot inn gayne avek konseye adzwin. Dan bann kongregasyon kot ena ase ansyin kalifye, sak ansyin kapav azir kuma konseye adzwin aturderol. Kumsa, kapav diviz travay-la; me pli inportan, bann ansyin ek bann asistan ministeryel kalifye kapav profit lexperyans plizir orater ek anseynan kapab.
3 Program Revizyon Oral: Si u kongregasyon ena lasanble sirkonskripsyon dan semenn kot ena revizyon oral, lerla bizin ranvway revizyon pu semenn apre lasanble ek swiv program pu semenn apre, pandan semenn lasanble. Selman, li pa neseser pu fer sa sanzman-la kan revizyon oral tomb dan semenn vizit sirveyan sirkonskripsyon. Dan semenn vizit, bizin prevwar kantik, Teknik Oratwar, Pwin Biblik Interesan parey kuma lor program. Apre Teknik Oratwar, pu bizin fer diskur instriksyon ki baze lor program semenn prosenn. Apre Pwin Biblik Interesan pu ena Reynion Servis ki pu dir demi-ertan, avek trwa partisipasyon 10 minit, sakenn, uswa de partisipasyon 15 minit, sakenn. (Pa pu ena Anons.) Apre, pu sant kantik ek sirveyan sirkonskripsyon pu pran sa demi-ertan ki reste-la. La semenn apre, Lekol Minister Teokratik pu kumans avek Teknik Oratwar, Pwin Biblik Interesan ek apre pu ena revizyon oral.
4 Profit sak lokazyon ki u gayne pu grandi lor plan spirityel. Amezir ki u profit linstriksyon ki u resevwar grasa Lekol Minister Teokratik, u ankuraz u kongregasyon ek u zwe enn rol dan realizasyon bann profesi Labib. Anplis u atir luanz lor Loter sa mesaz extraordiner ki nu bizin proklame-la.—Izai 32:3, 4; Rev. 9:19.