Couma Nous Kapav Tire Profit Avec l’École Ministère Théocratique?

¹ Bann serviteurs Jéhovah éna grand privilège pou recevoir enn instruction théocratique dans l’École Ministère Théocratique. (Is. 54:13; Jean 6:45) Mais, si nous envie profite au maximum sa l’école-la, tou pou dépann lor bann zefforts ki nous faire. Eski ou trouvé ki l’École Ministère Théocratique pé augmente ou spiritualité?

² Bann Bon Commentaires: Beaucoup surveillants l’école finn remarqué ki l’étude profond bann techniques oratoire finn aide bann proclamateurs pou vinn beaucoup plus efficace dans prédication. En plus, enn surveillant l’école finn trouvé ki grâce à participation l’assistance dans sujet Points Biblique Intéressant, de plus en plus bann frères ek soeurs pé garde bon l’habitude pou suive programme lecture la Bible chaque semaine. En séki concerne Devoir No. 2, beaucoup frères bien content ki zot gagne plus lé-temps pou concentré lor lecture bann versets Biblique, sans ki zot bizin prépare enn introduction ek enn conclusion. Asterla, bann frères ki gagne sa devoir-la kapav pli concentré pou améliore zot capacité pou lire.—1 Tim. 4:13.

³ Nous Tou Nous Kapav Tire Profit: Faire bann commentaires pendant réunions vinn enn plaisir. (Prov. 15:23) Parski nous gagne bann questions révision en avance, nous kapav prépare nous ek lerla participé dans révision sans hésité. En plus, à partir La Tour de Garde 1^er Janvier 2004, nous kapav trouve bann points Biblique intéressant lor bann livres la Bible ki corresponn avec lecture la Bible pou l’École Ministère Théocratique. Sa bann l’articles-la finn aide beaucoup pou faire bann bon commentaires pendant sujet Points Biblique Intéressant.

⁴ Tou séki inscrire zot nom dans l’école-la gagne grand privilège pou prépare ek pou faire bann devoirs. Nous tou nous kapav profite bann commentaires positif ki surveillant à l’école donné lor l’estrade. Chaque étudiant kapav profite aussi bann lézot conseils ki surveillant l’école donne zot en privé après réunion. Bann devoirs ki trouve à la fin chaque chapitre dans livre Tirez profit de l’École du ministère théocratique, ek ki koz lor différent techniques oratoire, aide nous encore plus.

⁵ Kan ou gagne bann conseils pratique ek Biblique pendant ou-soit après l’École, écrire zot dans ou livre École du ministère. Médite lor séki ou finn aprann, ek réfléchi couma sa instruction ki vinn de Jéhovah-la pé augmente ou spiritualité.