Jéhovah pé forme nou pou faire so travail
1. Ki Jéhovah faire kan Li donne bann dimoune enn travail?
1 Kan Jéhovah donne bann dimoune enn travail pou faire, Li donne zot aussi l’aide ki zot bizin pou faire sa travail-la. Par exemple, Jéhovah ti dire Noé faire enn kitsoz ki jamais li ti faire avant, setadir range enn l’arche. Mais Jéhovah ti dire li aussi couma li bizin faire sa. (Gen. 6:14-16) Jéhovah ti donne Moïse, ki ti enn berger bien humble, enn mission: li ti bizin al vers bann ancien dan Israël ek vers Pharaon. Jéhovah pa ti laisse li allé coumsa-mem, mais Li ti donne li sa l’assurance-la: “Allé, ek moi mo pou avek to la bouche ek mo pou aprann toi seki to bizin dire.” (Ex. 4:12) Azordi Jéhovah inn donne nou enn mission: preche la bonne nouvelle. Mais Li pa laisse nou debrouille-nou par nou-mem. Li pé forme nou pou faire sa travail-la. Couma? A travers Lekol ministere theocratik ek reunion service. Couma eski nou kapav profite sa formation-la?
2. Couma ou kapav tire bien profit ar Lekol ministere theocratik?
2 Lekol ministere theocratik: Avant ou assisté chaque reunion, lire ek etudié bann sujet ki pou examiné. Apré sa, guetté couma bann zeleve developpe zot bann sujet, coumsa ou pou kapav vinn enn pli bon enseignant. (Prov. 27:17) Amenn ou livre École du Ministere avek ou. Kan surveillant lekol faire reference ar sa livre-la apré chaque devoir, souligne bann point important ki ou envie mette en pratik. Dan bann la marge ou kapav ecrire bann ti note. Mais, meilleur fason pou ou profite bien sa lekol-la, c’est kan ou-mem ou participé. Eski ou’nn mette ou nom dan lekol? Kan ou gagne enn devoir pou faire, prepare li bien ek applik bann conseil ki ou gagné. Kan ou participe dan ou ministere, servi seki ou’nn aprann.
3. Ki pou aide nou tire profit ar reunion service?
3 Reunion service: Si a l’avance nou lire bann sujet ki pou examiné ek nou prepare bann commentaire, nou pou rappel pli bien bann suggestion ki pou presenté pendant sa reunion-la. Si nou faire bann ti commentaire, pli beaucoup dimoune pou kapav participé. Suive bien bann demonstration, ek servi bann suggestion ki ou pensé pou kapav faire ou vinn pli efficace dan ou ministere. Kan enn lartik bien important parette dan Ministere du Royaume, garde enn copie, coumsa pli tard ou kapav servi li.
4. Kifer nou bizin bien servi formation ki Jéhovah donne nou?
4 Noé ek Moïse ti gagne bann mission bien difficile pou faire. Nou aussi mission ki nou’nn gagné pou preche la bonne nouvelle partout lor la terre li pa facile. (Mat. 24:14) Mais si nou compte lor Jéhovah, nou Grand Instructeur, ek nou servi bien formation ki Li donne nou aussi, nou pou reussi.—Is. 30:20.