Ed Bann Aveg pou Konn Zeova
1. Kouma Zezi ti montre konpasion pou bann aveg?
1 Zour lamor Zezi pe koste. Alor ki li pe kit lavil Zeriko, li tann de mandian aveg pe kriye for-for: “Pitie nou Segner!” Mem si Zezi pe pans sa gran leprev ki pe atann li la, li arete, li apel zot, ek geri zot. (Mat. 20:29-34) Kouma nou kapav imit konpasion ki Zezi ena pou bann aveg?
2. Si nou zwenn enn aveg dan enn landrwa piblik, kouma nou kapav rann li temwaniaz?
2 Pre Pou Ede: Si to zwenn enn aveg dan enn landrwa piblik, prezant twa ek demann li si li bizin led. Koumansman, li kapav paret inpe mefian, parski souvan bann dimounn profit zot sitiasion pou anbet zot. Selman, to zantiyes ek to lintere sinser kapav met li alez. Li bon osi to kone ki kantite li pa trouv kler, koumsa to pou kone kouma pou ed li. Apre ki to’nn ed li, to kapav dir li ki to pe ed bann dimounn gagn enn konesans lor Labib. Demann li si to kapav lir enn pasaz Labib kouma par exanp Psom 146:8 ouswa Izai 35:5, 6. Si li kapav lir Bray, demann li si li pou kontan gagn enn piblikasion ki pou ed li konn plis lor Labib. To kapav osi ed li pou gagn bann piblikasion odio lor sit jw.org. Eski lor so komputer ena enn program ki kapav lir bann dokiman lor lekran? Si wi, kitfwa li pou kontan gagn bann lartik ki paret lor jw.org ki pa disponib an odio, ek lezot piblikasion ki li kapav download dan forma RTF (Rich Text Format).—Get lankadre “Kan To Pe Ed enn Aveg . . .”
3. Kouma nou kapav rod bann aveg dan nou teritwar?
3 Rod Bann Aveg: Bien rar nou zwenn bann aveg kan nou prese lakaz par lakaz. Kifer sa? Se parski boukou zene pou koz avek bann etranze ki vinn kot zot. Alor, sa demann bann gran zefor pou “rod” sa bann dimounn-la ek pres ar zot. (Mat. 10:11) Eski to ena enn kamarad lekol ouswa enn koleg travay ki aveg? Pran linisiativ pou koz ar li. Si dan to teritwar ena enn lekol pou bann aveg, demande si zot ti pou kontan gagn nou bann piblikasion an Bray pou met dan zot libreri. Eski to konn enn fami kot ena enn dimounn aveg? Eski dan to teritwar ena bann asosiasion ki ofer led bann aveg ouswa bann home ki okip osi bann aveg? Explik fami-la, resepsionis-la, ouswa direkter-la ki bann Temwin Zeova bien interese pou ed bann dimounn aveg. Demann li si to kapav amenn bann piblikasion an Bray ouswa bann anrezistreman odio. Montre li ki dapre Labib, Bondie promet ki biento bann aveg pou trouv kler. Kitfwa to kapav montre li osi video « Sans elle, je serais perdu » lor jw.org. Sa video-la montre kouma enn misie aveg inn gagn bann bienfe gras-a Labib an Bray. Si to explik li pou ki rezon to’nn vini, sa kapav permet twa rant an kontak avek bann aveg.
4. Ki lexperyans Janet ansegn nou?
4 Enn ser aveg ki apel Janet, ti al dan enn rezidans kot bann aveg reste. Li ti koumans enn konversasion avek enn zenn madam. Janet ti dir li: “Zezi ti geri bann aveg pou montre seki biento li pou fer pou tou bann aveg.” Zot ti examinn Revelasion 21:3, 4, ek Janet ti explik li kouma Rwayom Bondie pou realiz sa promes-la. Pandan enn moman, madam-la ti res trankil, apre li ti dir: “Premie fwa mo tann enn aveg limem explik mwa sa. Boukou panse ki bann dimounn vinn aveg, swa akoz seki zotmem ouswa seki zot bann gran dimounn inn fer.” Janet ti avoy madam-la enn e-mail avek enn link pou liv Ki la Bible enseigné? Asterla sa madam-la pe etidie Labib de fwa par semenn.
5. Ki rezilta nou pou gagne si nou interes nou ar bann aveg?
5 Biensir nou pa kapav fer bann aveg trouv kler parey kouma Zezi. Me nou kapav ed tou bann ki bondie sa lemond-la inn avegle, pou trouv laverite ki ena dan Labib, parmi ena bann ki aveg fizikman. (2 Kor. 4:4) Zezi ti geri sa de mandian aveg la parski li ti ena “konpasion” pou zot. (Mat. 20:34) Si to’si to interes twa ar bann aveg, to pou gagn privilez pou ed sertin konn Zeova, Bondie ki pou fer tou bann aveg trouv kler.