Eski To Pe Prepar Twa pou Memoryal?

Zezi ti pre pou mor ek dernie Pak ki li ti pou selebre ti bien inportan. Akoz sa, li ti desid pou manz sa repa Pak la avek so bann zapot ek pou etabli Repa Lesegner, ki ti pou bizin selebre toule lane. Alor, li ti avoy Pier ek Zan pou prepar plas kot pou fer sa. (Lk 22:7-13; get zimaz lor kouvertir.) Sa rapel nou ki nou bizin prepar nou pou Memoryal ki pou fer le 27 Mars. Sirman bann lasanble finn fer bann laranzman konsernan lorater, bann lanblem, ek bann lezot kitsoz ankor. Me, ki nou kapav fer personelman pou prepar nou pou Memoryal?

Prepar to leker. Lir ek medit lor lektir Labib pou Memoryal. Ena enn program pou sa lektir-la dan brosir Anou Examinn Labib Toulezour. Ek ena osi enn program kot ena pli boukou detay dan seksion 16 dan brosir Enn Gid pou Pli Konpran Parol Bondie. (Get osi Kaye Renion Lavi Kretien ek Minister Avril 2020.) Bann fami ki anvi etidie lor linportans laranson dan zot ladorasion an fami kapav trouv bann linformasion dan Index des publications des Témoins de Jéhovah ouswa dan Liv Resers pou Bann Temwin Zeova.

Invit lezot pou asiste. Partisip afon dan kanpagn linvitasion pou Memoryal. Reflesi lor bann dimounn ki to kapav invite, kouma par exanp, bann vizit, bann ansien letid Labib, bann fami, ek bann lezot dimounn ki to kone. Bann ansien bizin fer sir ki zot invit bann inaktif. Rapel ki si enn dimounn pa res dan to landrwa, to kapav trouv ler ek landrwa kot pou fer Memoryal pre kot li reste lor jw.org, anba seksion KISANNLA NOU ETE dan parti “Memoryal Lamor Zezi.”

Ki nou kapav fer ankor pou prepar nou?