Kan Eski Lafin sa Lemond-la Pou Arive? Seki Zezi Ti Dir

REFLESI LOR DE KITSOZ KI ZEZI TI DIR KONSERNAN LAFIN SA LEMOND-LA :

“Pran kont, parski zot pa konn ni zour, ni ler.”​—MATIE 25:13.

“Get bien, vey bien; parski zot pa kone kan tousala pou arive.”​—MARK 13:33.

Sa montre ki personn lor later pa kone kan exakteman lafin sa lemond-la pou arive. Me selman, Labib dir ki Bondie inn fixe ‘enn zour ek enn ler’ pou ki sa arive. (Matie 24:36) Alor, eski savedir ki nou pena okenn fason pou kone ki sa zour-la li pre? Non. Zezi ti dir so bann disip ki kan zot pou trouv sertin levennman arive, zot pou kone ki lafin sa lemond-la li pre.

SIGN KI ZEZI TI DONE

Sa bann levennman-la ti enn sign ki ti pou anons “konklizion sa sistem-la,” setadir lafin sa lemond-la. Zezi ti dir: “Nasion pou lev kont nasion ek rwayom kont rwayom, pa pou ena ase manze ek pou ena bann tranbleman-de-ter dan enn landrwa apre lot.” (Matie 24:3, 7, NW) Li ti dir osi ki pou ena “bann lepidemi.” (Lik 21:11) Eski ou trouv sa bann levennman ki Zezi ti predir la pe realize?

Azordi, bann dimounn pe soufer akoz bann lager, lafaminn, bann tranbleman-de-ter ek plizir maladi. Par exanp, an 2004, enn gran tranbleman-de-ter ki ti ena dan Losean Indien, ti provok enn tsunami ki ti touy apepre 225,000 dimounn. Dan lespas trwa-z-an, plis ki 6.9 milyon dimounn finn mor dan lemond akoz lepidemi COVID-19. Zezi ti dir ki bann levennman koumsa ti pou montre ki lafin sa lemond-la li bien pre.

“BANN DERNIE ZOUR”

Labib apel sa peryod zis avan lafin lemond la “bann dernie zour.” (2 Pier 3:3, 4) De Timote 3:1-5 dir ki dan bann dernie zour, bann dimounn pou rezet tou bann bon prinsip moral. (Get lankadre “Zis Avan Lafin sa Lemond-la.”) Eski azordi ou trouv bann dimounn ki egois, ki gourma, ki violan, ek ki pa montre lamour pou zot prosin? Sa osi se enn prev ki lafin sa lemond-la bien pros.

Pandan komie letan bann dernie zour pou dire? Labib dir ki res “zis enn tigit letan mem.” Apre sa, Bondie pou detrir “bann ki detrir later.”​—Revelasion 11:15-18; 12:12, NW.

BIENTO LATER POU VINN ENN PARADI!

Bondie inn fini fixe enn zour ek enn ler kot Li pou detrir sa move lemond-la. (Matie 24:36) Me selman, ena enn bon nouvel: Bondie “pa anvi ki personn mor.” (2 Pier 3:9, NW) Li pe donn nou tou lokazion pou aprann konn so volonte ek obeir Li. Pou ki rezon? Parski Li anvi ki nou sirviv lafin sa lemond-la ek viv dan so nouvo lemond, kot later pou vinn enn paradi.

Bondie finn organiz enn program lansegnman dan lemond antie pou ki bann dimounn kapav aprann kouma pou form parti dan sa nouvo lemond, ki pou anba direksion so Rwayom. Zezi ti dir ki sa bon nouvel lor Rwayom Bondie la pou prese “partou dan lemonn.” (Matie 24:14) Dan lemond antie, bann Temwin Zeova pas plizir milyar lertan pou prese ek ansegn bann dimounn konsernan mesaz lespwar ki ena dan Labib. Zezi ti dir ki sa kanpagn predikasion la pou fer partou lor later avan lafin sa lemond-la.

Pa res boukou letan pou ki bann imin kontign dirize. Me ena enn bon nouvel: Ou kapav sirviv lafin sa lemond-la ek viv dan sa Paradi lor later ki Bondie inn promet la. Prosin lartik pou explike ki ou kapav fer pou viv dan sa nouvo lemond-la.