Reponse pou quatre question concernant la fin

JÉSUS CHRIST ti annoncé ki dan l’avenir, “la fin pou vini.” Concernant sa lepok-la, li ti dire: “Lerla pou ena enn grand tribulation couma jamais pa finn ena depuis commencement le monde ziska zordi, non, ek ki pa pou ena encore.”—Matthieu 24:14, 21.

Seki Jésus ti dire concernant la fin, ensam avek lezot texte la Bible lor sa sujet-la, faire nou pose bann question important. Kifer ou pa ouvert ou la Bible ek lire reponse ki li donné pou sa bann question-la?

1 Ki pou fini?

La Bible pa enseigné ki la terre li-mem pou detruire. Enn psalmiste ti ecrire: “[Bondié] finn pose la terre lor so bann base bien fixe; jamais, oui jamais li pa pou bougé.” (Psaume 104:5) Li pa enseigné aussi ki tou la vie lor la terre pou disparette dan enn grand la guerre mondial. (Isaïe 45:18) Jésus li-mem ti dire ki pou ena bann dimoune ki pou survive kan la fin pou vini. (Matthieu 24:21, 22) Alors, dapré la Bible, ki pou fini?

Bann gouvernement humain ki pa finn reussi gouverne bien pou disparette. Bondié ti inspire prophete Daniel pou ecrire: “Bondié ki dan le ciel pou etabli enn royaume ki jamais pa pou detruire. Ek sa royaume-la pa pou vinn pou okenn lot peuple. Li pou crase tou bann lezot royaume ek li pou fini zot, ek li-mem li pou regné pou touletan.”—Daniel 2:44.

La guerre ek pollution. Psaume 46:9 dire seki Bondié pou faire: “Li faire bann la guerre arreté ziska dan boute la terre. L’arc-la, Li casse li, lance-la aussi Li casse li boute-boute; Li brule bann char la guerre dan difé.” La Bible enseigné aussi ki Bondié pou “detruire bann ki pé detruire la terre.”—Révélation 11:18.

Crime ek l’injustice. Parole Bondié faire sa promesse-la: “Bann dimoune droite pou reste lor la terre, ek bann dimoune ki pa kapav faire zot okenn reproche, zot ki pou resté. Mais bann mauvais dimoune zot, pou tire zot lor sa la terre-la; ek bann traitre zot, pou rass zot lor la.”a—Proverbes 2:21, 22.

2 Kan la fin pou vini?

Jéhovah finn etabli enn “le temps fixé” kot Li pou tire tou mechanceté ek kot Li pou faire so Royaume dirige la terre entier. (Marc 13:33) Mais la Bible dire dan enn fason bien clair ki li pa possible pou calcule exactement date ki la fin pou vini. Jésus ti dire: “Concernant sa jour-la ek sa l’heure-la, personne pa koné, ni bann ange ki dan le ciel ni mem le Fils, mais selman le Père.” (Matthieu 24:36) Mais, Jésus ek so bann disciple zot, zot ti annonce bann condition ki pou ena lor la terre zis avant la fin. Nou pou koné ki la fin pré kan tou bann l’evenement ki nou pou examiné zis apré, pou arrivé en mem temps ek dan le monde entier.

Bann bouleversement politik, social, ek dan l’environnement pé arrive enn point ki jamais nou’nn koné dan l’Histoire. Pou reponn question ki so bann disciple ti posé lor la fin, Jésus ti dire: “Nation pou leve kont nation ek royaume kont royaume, pou ena bann tremblement de terre dan enn l’endroit apré lot, pa pou ena assez mangé. Sa bann kitsoz-la zot commencement bann douleur.” (Marc 13:8) L’apotre Paul ti ecrire: “Dan bann dernier jour pou ena bann lepok critik ki difficile pou supporté. Parski bann dimoune pou content zot-mem, zot pou content l’argent, zot pou vantard, zot pou ena l’orgueil, zot pou koz en mal lor lezot ek lor Bondié, zot pou desobeir zot parent, zot pou ingrat, zot pa pou fidele, zot pa pou ena okenn affection naturel, zot pa pou d’accord entre zot-mem, zot pou mette bann fausse accusation lor lezot, zot pa pou konn controle-zot, zot pa pou ena okenn pitié, zot pa pou content seki bien, zot pou traitre, zot pou ena la tête dur, zot pou rempli ar l’orgueil, zot pou content plaisir plutot ki Bondié.”—2 Timothée 3:1-5.

Enn campagne mondial predication dan tou langue pé deroulé. Jésus ti dire: “Sa bon nouvelle lor royaume-la pou preché partout kot dimoune resté lor la terre couma enn temoignage pou tou bann nation; ek lerla la fin pou vini.”—Matthieu 24:14.

3 Ki pou arrivé apré la fin?

La Bible pa enseigné ki Bondié pou prend tou bann bon dimoune lor la terre pou faire zot al vive pou touletan heureux dan le ciel. Au contraire, Jésus ti enseigné ki projet ki Bondié ti ena au commencement pou bann dimoune, pou realisé. Li ti dire: “Heureux bann dimoune ki ena enn caractere doux, parski zot pou herite la terre.” (Matthieu 5:5; 6:9, 10) Pou bann dimoune ki mort avant la fin, la Bible promette ki zot pou ressuscité. (Job 14:14, 15; Jean 5:28, 29) Ki pou arrivé apré la fin?

Depuis le ciel, Jésus pou regné en tant ki le Roi dan Royaume Bondié. Prophete Daniel ti ecrire: “Mo ti pé contigne guette bann vision ki mo ti gagné pendant la nuit, ek guetté! Enn kikenn ki ressemblé garson enn zom [Jésus Christ ki’nn ressuscité] ti pé vini avek bann nuage dan le ciel. Li ti reussi rente devant l’Ancien bann jour [Jéhovah], ek ti amenn li pré devant Li. Ek ti donne li [Jésus] domination, grandeur, ek enn royaume, pou ki bann peuple, bann nation ek bann langue, zot tou servi li. So domination pou enn domination ki pou duré pou touletan, ek ki pa pou fini ek so royaume jamais pa pou renversé.”—Daniel 7:13, 14; Luc 1:31, 32; Jean 3:13-16.

Bann sujet Royaume Bondié pou ena enn la santé parfait, enn securité ki pou duré, ek la vie eternel. Prophete Isaïe ti ecrire: “Oui, zot pou range bann lakaz ek zot pou reste ladan; ek zot pou plante bann karo raisin ek zot pou mange zot bann fruit. Zot pa pou rangé pou ki enn lot resté; zot pa pou planté pou ki enn lot mangé.” (Isaïe 65:21-23) L’apotre Jean ti ecrire pou sa lepok-la: “Guetté! La tente Bondié avek bann dimoune, ek Li pou reste avek zot, ek zot pou vinn so peuple. Ek Bondié Li-mem pou avek zot. Li pou souye tou larme dan zot lizié, ek la mort nepli pou existé. Dimoune nepli pou en deuil, zot nepli pou ploré ek nepli pou ena douleur. Bann kitsoz avant finn disparette.”—Révélation 21:3, 4.

4 Ki ou bizin faire pou survive?

L’apotre Pierre ti dire ki certain ki pou vive dan lepok la fin pou bouffonné kan zot pou tendé ki Bondié pou prend bann action par rapport ar seki pé passé lor la terre ek Li pou tire tou mechanceté. (2 Pierre 3:3, 4) Mais kan-mem, Pierre ti encourage bann ki vive dan nou lepok pou faire bann kitsoz ki nou pou examiné asterla.

Tire leson ar seki’nn arrivé dan le passé. Pierre ti ecrire ki Bondié “pa ti hesité pou puni enn le monde ancien, mais Li ti sap Noé ki ti enn predicateur la justice, ensam avek sept lezot kan Li ti amenn enn deluge lor enn le monde ki pa ti ena okenn respé pou Bondié.” (2 Pierre 2:5) Concernant sa bann ki pé bouffonné-la, Pierre ti dire: “Pareil couma zot envie, zot blié ki par parole Bondié ti ena bann le ciel depuis lepok longtemps ek ti ena enn la terre ki ti sorti net dan de l’eau ek ki ti au milieu de l’eau; ek par sa bann moyen-la, le monde dan sa lepok-la ti detruire kan li ti couvert ar de l’eau. Mais par sa mem parole-la, Bondié finn reserve le ciel ek la terreb ki existé zordi, pou brulé par difé, ek pou jour jugement ek destruction bann dimoune ki pena okenn respé pou Bondié.”—2 Pierre 3:5-7.

Vive en accord avek bann principe moral ki Bondié inn etabli. Dapré l’apotre Pierre, bann ki envie survive kan la fin pou vini, pou faire “bann action ki montré ki zot conduite saint ek ki zot ena l’attachement pou Bondié.” (2 Pierre 3:11) Remarké ki Pierre ti mette l’accent lor “bann action ki montré ki zot conduite saint ek ki zot ena l’attachement pou Bondié.” Mais li pa assez ki nou zis dire ki nou ena la foi, ou-soit ki, kan inn arrive dernier minute, lerla nou faire enn dernier zeffort pou ena bann bon relation avek Bondié.

Ki bann action precis Bondié accepté? Kifer ou pa compare seki ou koné avek seki la Bible enseigné lor sa sujet-la? Bann Témoins de Jéhovah ti pou content pou aide ou. Demann zot pou montré ou bann verset dan ou la Bible ki appuye zot reponse. Si ou faire sa, sa pou aide ou pou guette l’avenir avek courage ek confiance, malgré bann tracas ki nou pé gagné zordi.

[Notes]

[Zimage page 7]

C’est pa la terre ki pou disparette, mais bann ki pé detruire li