Tou Dimounn Anvi Ena enn Pli Bon Lavenir
Ki kalite lavenir ou anvi ena? Pena dout ki parey kouma tou dimounn, ou osi ou anvi ki dan lavenir, ou ek ou fami zot ere, zot ena enn bon lasante, zot viv anpe ek dan bien.
Me selman, boukou dimounn pa sir si zot pou reisi ena enn lavenir kouma zot zot anvi. Zot inn trouve ki ena bann kitsoz ki kapav arive san ki zot atann, kouma COVID-19, ki’nn afekte lavi bann dimounn, ki’nn fer zot vinn mizer, ek ki’nn mem touy boukou dimounn. Akoz sa, boukou gagn traka pou zot lavenir.
Akoz zot pa tro sir kouma sa pou ete pli devan, bann dimounn pe kontign rod enn solision ki pou permet zot ena enn pli bon lavenir. Sertin panse ki bann lafors invizib kouma destin ouswa lasans, kontrol zot lavi. Boukou dimounn galoup deryer larises ek ledikasion parski zot panse ki sa bann kitsoz-la pou fer zot gagn seki zot anvi. Ena lezot ki panse ki pou ena enn pli bon lavi, zot zis bizin vinn enn bon dimounn.
Eski sa bann kitsoz-la kapav fer ou gagn lavenir ki ou pe anvi? Pou ou kone, ou bizin gagn repons sa bann kestion-la:
Ki kitsoz ki vremem determine kouma ou lavenir pou ete?
Eski ledikasion ek kas kapav garanti ou enn pli bon lavi?
Eski li ase ki ou enn bon dimounn pou gagn enn pli bon lavenir?
Kotsa ou kapav gagn bann konsey ki fiab pou ena enn pli bon lavenir?
Sa magazinn Latour Degard la kapav ed ou pou gagn repons sa bann kestion-la.