Eski Li Ase ki Ou enn Bon Dimounn pou Gagn enn Pli Bon Lavenir?

Pandan plizir siek, boukou inn panse ki si nou enn bon dimounn, sa kapav fer nou gagn enn pli bon lavenir. Par exanp, bann dimounn ki res dan L’Orient ena boukou respe pou Confucius (551-479 A.N.L.), enn gran filozof ek ansegnan Sinwa. Li ti dir: “Seki ou pa anvi lezot fer ar ou, pa fer li ar zot.”a

SEKI BOUKOU DIMOUNN SWAZIR POU FER

Boukou dimounn krwar ki si zot azir bien, zot pou ena enn pli bon lavenir. Zot fer zefor pou montre respe anver lezot, pou ena bann bon manier, pou asim bien zot rol, ek pou gard enn bon konsians. Linh, enn madam ki res dan Vietnam, dir: “Mo finn touletan krwar ki si mo onet ek sinser, mo pou ena enn pli bon lavi ek gagn bann bon kitsoz.”

Sa mem madam la pe servi bann pov ek bann ki pena lakaz manze.

Ena sertin dimounn ki fer dibien otour zot parski zot relizion ansegn zot sa. Enn misie ki apel Hsu-Yun ek ki res Taywan, dir: “Mo’nn aprann ki si enn dimounn fer bann bon kitsoz, li pou dan bien apre so lamor, me si li fer bann move kitsoz, li pou soufer apre so lamor.”

ESKI SA VREMEM MARSE?

Alafin lazourne, madam-la pe pran so ti garson me li sagrin ek fatige.

Li vre ki kan nou fer bann bon kitsoz pou lezot, nou gagn boukou bienfe. Me, boukou dimounn ki’nn esey fer lezot dibien finn realize ki zot pa touletan gagn seki zot ti pe atann an-retour. Enn madam ki apel Shiu Ping ek ki res Hong Kong dir: “Avek lexperyans, mo’nn aprann ki bann ki fer dibien pa touletan gagn bann bienfe an-retour. Mo’nn fer mo maximum pou okip mo fami ek pou fer seki bien. Me, mo mari ti kit mwa ek mo garson.”

Boukou finn realize ki bann dimounn ki relizie zot pa touletan bann bon dimounn. Etsuko, enn madam ki res dan Zapon dir: “Mo ti rant dan enn relizion ek mo ti koumans organiz bann laktivite pou bann zenn. Mo ti gagn sok kan mo ti trouve ki sertin dimounn dan sa relizion-la, ti imoral, ti lager pou gagn pouvwar ek ti mal servi bann donasion.”

“Mo’nn fer mo maximum pou okip mo fami ek pou fer seki bien. Me, mo mari ti kit mwa ek mo garson.”—SHIU PING, HONG KONG

Sertin dimounn ki ti bien relizie inn dekouraze, parski mem si zot ti pe fer bann bon kitsoz, zot ti pe gagn bann problem. Se seki Van, enn madam ki res Vietnam, ti resanti. Li dir: “Toulezour mo ti pe aste bann frwi ek bann fler, ek mo ti pe ofer sa mo bann anset ki’nn mor, avek lespwar ki mo pou gagn bann benediksion dan lavenir. Me malgre tousala, mo mari ti tom bien malad. Apre sa, mo zenn tifi, ki ti pe etidie dan enn lot pei, ti mor.”

KIFER ESKI LI PA ASE KI NOU ZIS ENN BON DIMOUNN?

Li inportan ki nou enn bon dimounn, me sa pa ase pou garanti nou enn bon lavenir. Kifer nou dir sa? Anou gete ki bann Lekritir Sakre dir.

PA TOU DIMOUNN ANVI FER SEKI BON

“Enn sel dimounn ki fer pese kapav detrir boukou bon kitsoz.”—EKLEZIAST 9:18.

Mem ki kantite zefor ou fer pou vinn enn bon dimounn, bann aksion bann lezot dimounn ki egois kapav fer ou ditor. Par exanp, kitfwa pandan enn pandemi ou pou fer zefor pou swiv konsey bann lotorite ek pou gard distans avek lezot. Me, ki pou arive si lezot pa rod obeir? Akoz zot, bann dimounn ki pe anvi azir bien kapav tom malad.

BANN DIMOUNN PA KONE KI KITSOZ VREMEM BON

“Ena enn semin ki paret drwat devan enn dimounn, me alafin li amenn ver lamor.”—PROVERB 14:12.

Listwar montre ki boukou dimounn inn swiv enn sime ki zot ti panse bon, me plitar, zot inn realize ki zot ti dan lerer. Mem si zot ti panse ki seki zot ti pe fer li bon, zot inn kanmem soufer akoz bann desizion ki zot inn pran.

BANN KITSOZ KI NOU PA ATANN ARIVE

“Zot pa kone ki dime rezerv zot.”—ZAK 4:14.

Mem enn bon dimounn kapav mor enn kou san ki nou atann. Par exanp, pandan sa pandemi COVID-19 la, boukou volonter inn mor alor ki zot ti pe esey ed lezot. Gete seki Liting, enn madam ki res dan Lasinn ek ki’nn perdi so papa dan enn aksidan, panse. Li dir: “Mo pa konpran kouma enn bon dimounn koumsa kapav mor. Mo papa ti travay bien dir, li ti sinser ek ti ena boukou limilite. Li tousel ti mor dan sa loto-la.”

Pou gagn enn bon lavenir, li pa ase ki nou zis enn bon dimounn. Alor ki kitsoz kapav ed nou? Nou bizin enn gid ki nou kapav fer konfians, ki pou kapav reponn nou bann kestion ek ki pou montre nou kouma nou kapav gagn enn pli bon lavenir. Kotsa nou kapav trouv enn gid koumsa?

a Pou gagn plis linformasion lor bann lansegnman Confucius, get sapit 7, paragraf 31-35, dan liv L’humanité à la recherche de Dieu an Franse, ki’nn pibliye par bann Temwin Zeova ek ki disponib lor www.pr418.com.