Ki Kapav Ed Nou pou Ena enn Pli Bon Lavenir?

Kouma nou ti gete dan bann lartik avan, pou gagn enn pli bon lavenir, bann dimounn inn met zot konfians dan bann kitsoz kouma destin, ledikasion, larises ouswa vinn enn bon dimounn. Me si nou servi sa bann mwayin-la pou esey gagn enn pli bon lavenir, se koumadir nou pe servi enn map ki pa bon pou al dan enn nouvo landrwa. Eski savedir ki nou pena okenn bon gid pou nou lavenir? Anou gete.

MEYER GID KI EXISTE

Bien souvan kan nou ena pou pran enn desizion, nou al get enn kikenn ki pli gran ek ki pli saz ki nou. Parey, ena enn Kikenn ki bien pli gran ek bien pli saz ki nou ek Li kapav gid nou pou nou lavenir. Nou kapav trouv So bann konsey dan enn liv ki finn ekrir inn gagn anviron 3,500 an. Sa liv-la se enn liv sakre ki apel Labib.

Kifer ou kapav fer Labib konfians? Parski li vinn depi sa Kikenn ki pli gran ek ki pli saz dan liniver la. Labib dekrir Li kouma “Ansien Bann Zour” ki la “depi touzour e pour touzour.” (Daniel 7:9; Psom 90:2) Limem “Kreater lesiel . . . , Limem vre Bondie, Li ki finn form later.” (Izai 45:18) Li fer nou kone ki so nom se Zeova.—Psom 83:18, NW.

Labib pa zis pou enn ras ouswa enn kiltir parski li vinn depi sa Kikenn ki finn kree tou dimounn la. So bann konsey touletan marse ek li itil pou tou bann dimounn. Labib se liv ki’nn plis tradir ek distribie dan lemond.a Savedir ki bann dimounn partou dan lemond kapav lir Labib ek les zot gide par so bann konsey. Sa bann linformasion-la konfirm seki Labib dir:

“Bondie tret tou dimoun parey lor mem baz. Bondie aksepte ninport ki dimoun dan ninport ki nasion si li ador li e fer seki drwat.”—ZISTWAR BANN APOT 10:34, 35.

Parey kouma bann paran ki ena lamour ed zot bann zanfan, Zeova osi, ki kouma enn Papa ki ena lamour, anvi ed nou atraver so Parol, Labib. (2 Timote 3:16) Ou kapav fer konfians so Parol parski se Li ki’nn kree nou ek Li kone ki pli bon pou nou.

ENN GID KI FIAB

Nou kapav ena konfians ki Labib li enn gid ki fiab pou nou lavenir. Kifer? Parski anviron 2,000 an avan, li ti predir dan enn fason exakt ki bann levennman pou arive lor later ek kouma bann dimounn pou ete azordi.

KI BANN LEVENNMAN POU ARIVE

“Pei pou lev kont pei, rwayom kont rwayom. Pou ena bann tranbleman deter terib ek lafaminn dan boukou landrwa ek bann lepidemi.”—LIK 21:10, 11.

KOUMA BANN DIMOUNN POU ETE

“Pou ena bann moman difisil dan bann dernie tan. Dimoun pou konn zis zotmem ek zot larzan. Zot pou egois, gourman, vantar. Lorgey ek difamasion pou trap zot. Pou ena rebel anver paran. Dimoun pou ingra, zot pou komet sakrilez, zot pou san pitie, ek laenn pou ranpli leker. Zot pou ena parol blesan ek zot pa pou kontrol zot lalang. Zot pou kont tou seki bien. Zot pou azir kouma tret; zot fronte telman lorgey amar zot. Olie kontan Bondie, zot kontan plezir.”—2 TIMOTE 3:1-4.

Kouma li posib ki Labib inn fini predir sa bann kitsoz-la dan enn fason otan presi? Sirman ou pou dakor avek Leung ki res Hong Kong. Li dir: “Bann profesi ki ena dan Labib finn ekrir depi bien lontan. Li inposib ki enn sinp dimounn finn kapav predir sa bann kitsoz-la dan enn fason presi koumsa. Li kler ki Labib bizin vinn depi enn kikenn ki bien pli siperyer ki nou.”

Dan Labib, ena boukou bann profesi ki’nn fini akonpli.b Sa montre ki Labib vremem Parol Bondie. Zeova dir: “Momem Bondie, ek pena personn kouma mwa. Depi koumansman mo fer konn lafin.” (Izai 46:9, 10) Alor, ou ena bann bon rezon pou fer konfians seki Labib dir lor lavenir.

ENN GID KI ED OU ASTERLA EK POU TOULETAN

Kan ou swiv bann konsey ki ena dan bann Lekritir Sakre, ou pou tir boukou profi. Anou get sertin lexanp.

BANN BON KONSEY LOR LARZAN EK TRAVAY

“Vomie enn pwanie repo, ki de pwanie travay dir ek galoup deryer divan.”—EKLEZIAST 4:6.

KOUMA POU ENA ENN LAVI FAMI ERE

“Ki sakenn kontan so fam kouma li kontan limem, e fam la bizin respekte so mari.”—EFEZIEN 5:33.

KOUMA POU ENA ENN BON RELASION AVEK LEZOT

“Pa les lakoler oubien traka fatig twa; sinon to kapav mal fini.”—PSOM 37:8.

Kan ou fer seki Labib dir, ou pou ena enn bon lavi asterla ek enn zoli lavenir. Dan Labib, nou kapav trouv promes ki Bondie fer konsernan enn zoli lavenir kot pou ena

LAPE EK SEKIRITE

“Zot pou viv enn lavi prosper ek pezib.”—PSOM 37:11.

ENN PLAS POU RESTE EK MANZE POU ZOT TOU

“Zot pou ranz bann lakaz ek zot pou res ladan, zot pou plant bann karo rezin ek zot pou manz zot bann frwi.”—IZAI 65:21.

POU NEPLI ENA MALADI OUSWA LAMOR

“Pa pou ena ni lamor, ni dey, ni lamantasion, ni douler.”—REVELASION 21:4.

Ki ou bizin fer pou gagn enn lavenir koumsa? Get prosin lartik.

a Pou gagn bann detay lor tradiksion ek distribision Labib, al lor nou sit www.pr418.com/mfe ek al dan seksion LABIB EK OU > LISTWAR & LABIB.

b Pou gagn plis ransegnman, get sapit 9 dan liv La Bible— Parole de Dieu ou des hommes? an Franse ki pibliye par bann Temwin Zeova. Sa liv-la disponib lor www.pr418.com/fr. Al dan seksion BIBLIOTHEQUE > LIVRES & BROCHURES.