Ki Bon, Ki Pa Bon: Labib—Enn Gid Ki Ou Kapav Fer Konfians

Si nou pran bann desizion dapre seki nou resanti ouswa dapre seki lezot dimounn panse, nou pa sir ki nou pou pran enn bon desizion. Labib explik nou kifer, me li osi fer plis ki sa. Li ed nou pou kone ki bon, ki pa bon ek se samem ki pou ed nou pou ena enn lavi ere.

NOU BIZIN DIREKSION BONDIE

Dan Labib, Bondie Zeovaa explike ki bann dimounn bizin so led parski zot pa kapav fer tou kitsoz par zotmem. (Zeremi 10:23) Akoz samem, li finn donn nou bann bon prinsip ki trouv dan Labib. Li kontan bann dimounn ek li pa anvi ki nou pran bann move desizion ki pou fer nou ditor ek ki pou rann nou lavi difisil. (Deteronom 5:29; 1 Zan 4:8) Anplis, antan ki nou Kreater, li ena sazes ek konesans ki bizin pou donn nou pli bon konsey ki ena. (Psom 100:3; 104:24) Mem sa, zame Bondie pa fors personn pou viv dapre so bann prinsip.

Zeova ti donn premie zom ek premie fam, Adan ek Ev, tou seki zot ti bizin pou ki zot vremem ere. (Zenez 1:28, 29; 2:8, 15) Li ti osi donn zot bann instriksion sinp ek li ti atann ki zot obeir sa bann instriksion-la. Selman, li ti les zot swazir si zot pou swiv sa bann instriksion-la ouswa non. (Zenez 2:9, 16, 17) Malerezman, Adan ek Ev ti swazir pou viv kouma zot zot ti anvi, olie ki zot viv dapre seki Bondie ti anvi pou zot. (Zenez 3:6) Ki rezilta sa finn amene? Eski bann dimounn pli ere kan zot swazir par zotmem ki bon, ki pa bon? Non. Listwar finn montre ki kan bann dimounn pa viv dapre bann prinsip Bondie, zot pa konn vre lape ek boner.—Ekleziast 8:9.

Ninport kotsa nou reste ouswa fason ki nou’nn grandi, Labib kapav gid nou pou fer bann bon swa. (2 Timote 3:16, 17; get lankadre “Enn Liv pou Tou Dimounn.”) Anou gete kouma Labib kapav gid nou.

Pou aprann plis kifer nou apel Labib “Parol Bondie”, get video Kisannla Ki Finn Fer Ekrir Labib? lor jw.org.—1 Tesalonisien 2:13.

KIFER SERTIN DIMOUNN PANSE KI LABIB PA KAPAV ED ZOT

Sertin dimounn pa dakor ki Labib li enn gid ki fiab. Gete seki zot kapav dir.

Seki zot dir: “Labib kontredir limem.”

Laverite: Li kapav paret ki sertin parti Labib li kontredir lezot parti Labib. Me selman, si nou aprann plis lor kouma ek kan ti ekrir zot, nou pou remarke ki zot pa kontredir zot kamarad.

Pou get sertin sa bann lexanp-la, lir lartik « Y a-t-il des contradictions dans la Bible ? » lor jw.org.

Seki zot dir: “Bann dimounn ki dir ki zot swiv seki Labib ansegne, zotmem zot fer bann move kitsoz. Alor, li pa vremem enn bon gid.”

Laverite: Labib pa an-tor kan bann dimounn pa aplik seki li ansegne ek kan zot azir dan enn move fason. Li ti fini predir ki boukou dimounn, mem bann sef relizie ki dir ki zot swiv Labib, zot ti pou fer so lekontrer. Akoz sa, ti osi dir ki pou “koz an mal” lor bann lansegnman Labib.—2 Pier 2:1, 2.

Pou gagn enn lexanp lor kouma boukou sef relizie zot pa swiv seki Labib ansegne, get lartik « La religion n’est-elle qu’une entreprise commerciale de plus ? » lor jw.org.

Seki zot dir: “Bann dimounn ki swiv Labib zot pa respekte lezot dimounn ki diferan ar zot.”

Laverite: Labib ankouraz nou pou tret tou dimounn avek respe. Li pa dakor ki enn kikenn. . .

konsider limem pli siperyer ki lezot.—Filipien 2:3.
pa respekte bann dimounn ki pena mem krwayans ki li.—1 Pier 2:17.
fors lezot pou trouv bann kitsoz parey kouma li.—Matie 10:14.

Labib montre ki Bondie touletan tret bann dimounn avek bonte ek dan enn fason zis, ek Li anvi ki nou fer parey.—Romin 9:14.

Pou gagn plis linformasion, get lartik “Tolerans—Ki Labib Dir lor La?” lor jw.org.

LABIB DIR NOU SEKI BONDIE ANVI NOU FER

Labib koz lor relasion ki ti ena ant Bondie ek bann dimounn depi koumansman. Li ed nou pou konpran ki Bondie konsider bon ouswa pa bon, ek ki kitsoz kapav fer nou dibien ouswa fer nou ditor. (Psom 19:7, 11) Bann prinsip ki ena ladan touletan marse ek zot ed nou pou fer bann bon swa dan nou lavi toulezour.

Par exanp, anou get konsey ki trouv dan Proverb 13:20: “Enn kikenn ki mars avek bann dimounn ki ena lasazes pou gagn lasazes, me enn kikenn ki gagn zafer avek bann dimounn bet, sa pou mal fini pou li.” Sa prinsip-la ti itil dan lepok lontan, ek azordi osi li touzour itil. Labib li ranpli ar sa bann kalite prinsip-la.—Get lankadre “Bann Konsey Ki Ena dan Labib Zot Touzour Itil.”

Me kitfwa ou demann oumem, ‘Kouma eski mo kapav sir ki bann konsey ki ena dan Labib zot kapav ed mwa azordi?’ Dan prosin lartik, nou pou get lexperyans ki sertin dimounn inn fer.

a Zeova se nom Bondie.—Psom 83:18.

BANN KONSEY KI ENA DAN LABIB ZOT TOUZOUR ITIL

Mem si finn gagn apepre 2,000 an ki finn fer ekrir Labib, li ankor touzour itil azordi. Depi touletan, bann dimounn ti anvi ena enn lavi ere ek sa pa’nn sanze azordi. (Ekleziast 1:9) Bann konsey bien saz ki ena dan Labib kapav ed nou pou reisi fer sa.

Lonette

“Nou anvi azir dan enn fason onet dan tou kitsoz.”—Ebre 13:18.
“Ki sa kikenn ki kokin la aret kokin; okontrer ki li travay dir.”—Efezien 4:28.

Enn Bon Relasion Avek Lezot

“Ki sakenn kontign rod lintere lezot, me pa so prop lintere.”—1 Korintien 10:24.
“Kontign siport sakenn zot kamarad ek pardonn sakenn zot kamarad avek tou zot leker.”—Kolosien 3:13.

Kouma pou Pran Bann Bon Desizion

“Enn dimounn naif krwar tou seki li tande, me enn dimounn ki ena enn bon zizman reflesi bien lor sak pa ki li fer.”—Proverb 14:15.
“Enn dimounn ki ena bon zizman kasiet kan li trouv enn danze, me enn kikenn ki pena lexperyans kontign ale ek li soufer akoz bann konsekans.”—Proverb 22:3.