Laenn Pou Disparet pou Touletan!
Mem si nou pena okenn laenn pou lezot, nou pa kapav anpes lezot pou ena laenn. Toulezour, bann dimounn inosan pe bizin sibir laenn. Alor, ki vre solision ena kont laenn?
Zis Zeova tousel ki kapav tir laenn net dan leker bann dimounn. Labib promet nou ki Li pou fer sa.—Proverb 20:22.
BONDIE POU ELIMINN TOU SEKI KREE LAENN
1. SATAN LEDIAB. Se Satan, sa anz rebel la, ki responsab laenn ki ena azordi. Bondie inn promet ki li pou detrir Satan ek tou bann ki pe montre laenn parey kouma Satan.—Psom 37:38; Romin 16:20.
2. MOVE LEMOND SATAN. Bondie pou tir tou bann move kitsoz ki ena dan sa lemond-la, mem bann politisien malonet ek bann sef relizie ki pe ankouraz laenn. Bondie pou retir osi sa sistem komersial ki gourma la, ki ranpli ar koripsion ek ki pe explwat bann ti dimounn.—2 Pier 3:13.
3. LINPERFEKSION. Labib dir ki tou bann imin finn erit linperfeksion, savedir tandans pou pans, resanti, ek fer seki pa bon. (Romin 5:12) Enn parmi sa bann move tandans la, se pou kiltiv ek montre laenn anver lezot. Bondie pou ed bann imin pou gagn laviktwar lor linperfeksion ek lerla pou nepli ena okenn tras laenn.—Izai 54:13.
LABIB PROMET KI POU ENA ENN LEMOND SAN LAENN
1. PA POU ENA OKENN LINZISTIS. Se Rwayom Bondie, enn gouvernman kot ena lazistis ek ki dan lesiel, ki pou diriz later ek li pou dire pou touletan. (Daniel 2:44) Pou nepli ena okenn prezize ek diskriminasion. Bondie pou repar tou bann linzistis ki bann imin pe kone asterla.—Lik 18:7.
2. TOU DIMOUNN POU VIV ANPE. Personn pa pou soufer akoz lager ek laviolans. (Psom 46:9) Tou bann dimounn ki pou lor later pou viv dan lape ek sekirite.—Psom 72:7.
3. BANN DIMOUNN POU VINN PARFE EK ZOT POU VIV POU TOULETAN. Tou bann dimounn pou ena vre lamour anver zot prosin. (Matie 22:39) Personn pa pou soufer, mem bann move souvenir pa pou rann nou tris. (Izai 65:17) Lerla, limanite pou nepli konn laenn ek tou dimounn “pou viv enn lavi prosper ek pezib.”—Psom 37:11.
Eski ou ti pou kontan viv dan enn lemond koumsa? Depi asterla mem, boukou dimounn pe aprann pou aplik bann prinsip Labib ek pou rezet laenn. (Psom 37:8) Se seki bann Temwin Zeova dan lemond antie pe fer. Mem si zot sorti depi diferan kiltir, zot form enn fami ki ini gras-a lamour.—Izai 2:2-4.
Bann Temwin Zeova pou bien kontan pou partaz avek ou kouma zot inn aprann pou fer fas ar linzistis ek diskriminasion. Seki ou pou aprann kapav ed ou, tigit par tigit, pou ranplas laenn par lamour. Ou kapav aprann kouma pou tret tou bann dimounn avek zantiyes, mem bann ki pena rekonesans ouswa ki ena laenn. Sa pou fer ki depi asterla mem ou kapav konn vre lazwa, ek ou relasion avek lezot pou ameliore. Me sirtou, ou pou aprann ki ou bizin fer pou kapav viv lor later kan Rwayom Bondie pou dirize ek kot laenn pou disparet net.—Psom 37:29.