Kontign “Mars dan Laverite”

1. Kan nou rakont lezot kifer nou kontan ki nou enn Temwin Zeova, ki bienfe nou gagne?

“KOUMA to’nn konn laverite?” Sirman to’nn reponn sa kestion-la plizir fwa, pa vre! Se enn parmi bann kestion ki souvan nou poz bann frer ek ser kan nou anvi aprann konn zot pli bien. Nou kontan kan nou bann frer ek ser rakont nou kouma zot finn aprann konn Zeova. Anplis, nou osi nou kontan rakont zot kifer nou kontan ki nou enn Temwin Zeova. (Rom. 1:11) Kan nou gagn sa bann konversasion-la, sa ed nou pou rapel ki kantite valer laverite ena pou nou. Sa ed nou osi pou res bien determine pou “mars dan laverite,” setadir pou kontign viv dan enn fason ki pou fer nou gagn benediksion ek faver Zeova.​—3 Zan 4.

2. Ki nou pou examine dan sa lartik-la?

² Dan sa lartik-la, nou pou get bann rezon kifer nou kontan ki nou dan laverite. Nou pou gete osi kouma nou kapav kontign montre nou lamour pou laverite. Sa pou ed nou pou ogmant nou rekonesans pou Zeova, nou Papa ki’nn atir nou dan laverite. (Zan 6:44) Sa pou osi pous nou pou partaz bann verite Biblik ar lezot.

KIFER NOU KONTAN “LAVERITE”?

3. Sit enn parmi bann rezon kifer nou kontan laverite.

³ Ena plizir rezon kifer nou kontan laverite. Me rezon pli inportan, se parski nou kontan Zeova, Lasours laverite. Atraver so Parol, Labib, nou’nn aprann ki Zeova Li Bondie Tou-Pwisan ki’nn kree lesiel ek later. Nou’nn aprann osi ki Li enn Papa ki ena boukou lamour ek ki Li vremem gagn nou traka. (1 Pier 5:7) Nou kone ki Li “enn Bondie ki ena mizerikord ek konpasion, ki pa ankoler vit ek ki ena lamour fidel ek laverite an-abondans.” (Ex. 34:6) Zeova kontan lazistis. (Iza. 61:8) So leker fermal kan Li trouv nou soufer. Li’nn fixe enn moman kot Li pou tir tou nou bann soufrans, ek Li pe atann sa moman-la avek inpasians. (Zer. 29:11) Nou osi nou pe atann sa moman-la avek inpasians! Se enn parmi bann rezon kifer nou kontan Zeova sa kantite-la!

4-5. Kifer lapot Pol ti konpar nou lesperans ar enn lank?

⁴ Enn lot rezon pou kifer nou kontan laverite, se parski gras-a laverite, nou gagn bann bienfe. Bann verite ki ena dan Labib donn nou enn lespwar pou lavenir. Lapot Pol ti servi enn lexanp pou explik valer ki sa lesperans-la ena. Li ti dir: “Sa lesperans la, li kouma enn lank solid ek stab ki tini nou pou lavi.” (Ebre 6:19) Parey kouma enn lank tini enn bato, lesperans ki ena dan Labib kapav ed nou pou res kalm kan nou ena bann problem dan nou lavi.

⁵ Dan bann verse avan, Pol koz lor lesperans bann Kretien ki pou al viv dan lesiel. Me sa bann parol-la konsern osi bann Kretien ki ena lesperans pou viv lor later, ki pou vinn enn paradi. (Zan 3:16) Kan nou’nn aprann ki nou ena enn lesperans pou lavenir, sa finn donn nou lavi enn sans.

6-7. Ki bienfe Yvonne inn gagne kan li’nn aprann laverite lor lavenir?

⁶ Anou get lexanp enn ser ki apel Yvonne. Li pa’nn grandi dan laverite, ek kan li ti tipti, li ti per lamor. Li rapel ki li ti lir enn fraz ki ti res dan so lespri: “Pou ena enn zour kot pa pou ena landemin.” Yvonne dir: “Sa bann parol-la ti anpes mwa dormi aswar, parski mo ti kontign pans lor seki pou arive dan lavenir. Mo ti pe reflesi, ‘Bizin ena enn rezon kifer nou lor later. Kifer mo la?’ Mo pa anvi mor!”

⁷ Plitar, kan li ti vinn enn adolesan, Yvonne ti zwenn bann Temwin Zeova. Li dir: “Mo ti koumans krwar ki mo ti pou kapav viv pou touletan lor later, ki pou vinn enn paradi.” Ki bienfe Yvonne inn gagne kan li’nn aprann sa verite-la? Li dir: “Asterla, mo dormi bien aswar, parski mo nepli gagn traka seki pou arive dan lavenir, ek mo nepli per lamor.” Pena dout ki Yvonne bien kontan laverite ki ena dan Labib, ek li kontan partaz ar lezot so lesperans konsernan lavenir.​—1 Tim. 4:16.

8-9. (a) Dan enn parmi bann parabol Zezi, ki valer enn trezor ti ena pou enn misie? (b) Ki valer laverite ena pou twa?

⁸ Parmi bann verite ki ena dan Labib, ena osi bon nouvel lor Rwayom Bondie. Zezi ti konpar sa verite-la ar enn trezor ki kasiet. Dan Matie 13:44, Zezi ti dir: “Rwayom lesiel, parey kouma enn trezor ki finn kasiet dan enn karo. Ler kikenn dekouver li, li rekasiet li; li telman kontan ki li vann tou seki li ena e li al aste sa karo la.” Remarke ki sa misie-la pa ti pe rod sa trezor-la. Me kan li’nn trouv li, li’nn fer bann gran sakrifis pou gagn li. Li’nn mem vann tou seki li ti ena. Kifer? Parski li ti kone ki sa trezor-la ena boukou valer. Sa trezor-la ti ena plis valer ki tou bann kitsoz ki li ti vande.

⁹ Sirman twa osi to ena mem santiman konsernan laverite! Azordi, sa lemond-la kapav ofer nou boukou kitsoz. Selman, nou kone ki pena nanye dan sa lemond-la ki ena plis valer ki lazwa ki nou gagne kan nou servi Zeova. Ek kan nou servi Zeova, nou gagn osi posibilite pou viv pou touletan anba direksion Rwayom Bondie. Nou lamitie avek Zeova ena plis valer ki ninport ki sakrifis ki nou kapav fer. Nou pli gran lazwa se pou “fer li plezir.”​—Kol. 1:10.

10-11. Ki kitsoz ti pous Michael pou fer bann sanzman dan so lavi?

¹⁰ Boukou parmi nou inn fer bann gran sakrifis pou fer Zeova plezir. Ena ki finn abandonn bann gran karyer dan sa lemond-la, ek ena lezot ki’nn aret galoup deryer larzan. Ena osi ki finn sanz zot lavi net kan zot inn aprann konn Zeova. Se seki Michael ti fer. Michael pa’nn grandi dan laverite, ek kan li ti zenn, li ti pe fer karate. Li dir: “Pou mwa, sa ti bien inportan ki mo res fit. Parfwa, mo ti mem pran mwa pou enn terib.” Kan li ti koumans etidie Labib, Michael ti aprann seki Zeova panse lor laviolans. (Ps. 11:5) Michael dir ki, sa koup ki ti etidie Labib avek li la, zame pa ti demann li pou aret fer karate. Zot ti zis ansegn li bann verite ki ena dan Labib.

¹¹ Plis Michael ti aprann konn Zeova, plis so lamour pou Zeova ti grandi. Seki ti plis tous li, se konpasion ki Zeova ena pou so bann serviter. Avek letan, Michael ti realize ki li ti bizin pran enn desizion bien inportan. Li dir: “Mo ti kone ki sa ti pou bien difisil pou mo aret fer karate. Me mo ti kone osi ki sa ti pou fer Zeova plezir, ek mo ti sir ki, servi Zeova ena plis valer ki ninport ki sakrifis.” Bann verite ki Michael ti aprann, ti ena boukou valer pou li, ek se akoz sa ki li ti dispoze pou fer bann gran sanzman dan so lavi.​—Zak 1:25.

12-13. Kouma bann verite ki ena dan Labib inn ed Mayli?

¹² Pou montre valer ki laverite ena, Labib konpar laverite ar enn lalanp ki briye dan nwar. (Ps. 119:105; Efe. 5:8) Mayli, ki res Azerbaidjan, explike kouma Labib inn bien ed li, ek li vremem rekonesan anver Zeova pou sa. Mayli so bann paran pa ti dan mem relizion. So papa ti enn Mizilman, ek so mama ti enn Zwif. Mayli dir: “Mo pa ti ena okenn dout ki Bondie existe, me mo ti ena boukou kestion. Mo ti demann momem, ‘Kifer Bondie inn kree bann dimounn, ek kifer enn dimounn bizin soufer toutlong so lavi, pou ki apre li al soufer dan lanfer?’ Boukou dimounn dir ki, tou seki arive, se volonte Bondie. Alor, mo ti demann momem, ‘Eski Bondie kontrol bann dimounn ek Li kontan trouv zot soufer?’”

¹³ Mayli ti kontign rod bann repons pou so bann kestion. Avek letan, li ti aksepte enn letid Labib ek li’nn vinn enn Temwin Zeova. Li dir: “Bann rezonnman lozik ki ena dan Labib inn ed mwa pou vinn enn kikenn ki pli ere. Bann lexplikasion ki mo’nn gagne dan Parol Bondie inn ed mwa pou mo res anpe.” Parey kouma Mayli, nou tou nou donn laglwar Zeova, “Sa Enn ki finn apel [nou] pou sorti dan teneb pou rant dan so lalimier merveye.”​—1 Pier 2:9.

14. Kouma nou kapav ogmant nou lamour pou laverite? (Get lankadre “Bann Lezot Kitsoz ar ki Nou Kapav Konpar Bann Verite Biblik.”)

¹⁴ Sa se zis de-trwa lexanp ki’nn montre nou valer ki laverite ena. Sirman to pe pans bann lezot lexanp ankor. Dan to letid personel, eski to kapav rod bann lezot rezon kifer nou bizin kontan laverite? Plis nou kontan laverite, plis nou pou rod bann fason pou montre ki nou kontan laverite.

KOUMA NOU MONTRE KI NOU KONTAN LAVERITE?

15. Sit enn fason kouma nou kapav montre ki nou kontan laverite.

¹⁵ Nou montre ki nou kontan laverite kan nou etidie Labib ek bann piblikasion regilierman. Ninport ki kantite letan ki nou dan laverite, nou pou touletan kontign aprann. Premie nimero Latour Degard ti dir: “Laverite, li kouma enn ti fler ki dan enn gran karo lerb. Ena telman boukou mansonz dan sa lemond-la, ki sa kapav bien difisil pou trouv laverite. Akoz sa, bizin fer boukou zefor pou rod sa fler-la. . . . Ek enn fwa ki’nn trouv li, bizin fer boukou zefor pou gard li. Selman, fode pa nou kontant nou zis ar enn sel fler. . . . Nou bizin kontign rod bann lezot fler.” Kitfwa nou kapav trouv sa difisil pou etidie, me li vo lapenn ki nou fer sa zefor-la.

16. Ki metod to’nn trouv efikas pou etidie Labib? (Proverb 2:4-6)

¹⁶ Pa tou dimounn ki kontan lir ek etidie. Me Zeova anvi ki nou ‘kontign rode,’ pou ki nou konpran laverite pli bien. (Lir Proverb 2:4-6.b) Si nou kontign fer sa zefor-la, nou pou touletan gagn bann bienfe. Kan li lir Labib, Corey fer zefor pou konpran sak verse ki li lir. Li dir: “Mo lir sak not, mo get bann verse ki ena dan kolonn, ek mo fer bann lezot resers. . . . Sa metod-la inn ed mwa pou aprann boukou kitsoz.” Ki nou servi sa metod-la ouswa enn lot metod, nou montre ki nou kontan bann verite ki ena dan Labib, kan nou pran letan ek nou fer zefor pou etidie zot.​—Ps. 1:1-3.

17. Ki savedir viv laverite? (Zak 1:25)

¹⁷ Biensir, nou kone ki li pa ase ki nou zis etidie bann verite ki ena dan Labib. Pou nou vremem gagn bann bienfe, nou bizin viv laverite, setadir ki nou bizin met an pratik seki nou aprann. Se koumsa ki laverite pou rann nou ere. (Lir Zak 1:25.) Kouma nou kapav sir ki nou pe viv laverite? Enn frer ti dir ki nou bizin examinn noumem, pou gete si nou pe met an pratik seki nou pe aprann, ek gete dan ki domenn nou bizin fer plis zefor ankor. Lapot Pol ti dir: “Me kot nou finn arive, anou kontigne tini ferm dan mem direksion.”​—Fil. 3:16.

18. Kifer nou bizin fer nou maximum pou kontign “mars dan laverite”?

¹⁸ Reflesi lor bann bienfe ki to gagne kan to fer to maximum pou kontign “mars dan laverite”! To ena enn pli bon lavi, to fer leker Zeova kontan, ek to rann to bann frer ek ser zwaye. (Prov. 27:11; 3 Zan 4) Wi, samem bann pli bon rezon pou kontan laverite ek pou viv laverite?