2 | “Konsolasion ki Ena dan Bann Lekritir”

LABIB DIR: “Tou bann kitsoz ki finn ekrir lontan finn ekrir pou ansegn nou, pou ki par nou landirans ek par konsolasion ki ena dan bann Lekritir, nou gagn lesperans.”—ROMIN 15:4.

Seki Savedir

Dan Labib, ena bann panse rekonfortan ki kapav donn nou lafors ek landirans ki nou bizin pou fer fas ar bann panse negatif. Mesaz ki ena dan Labib donn nou osi lespwar ki biento nou pou nepli soufer lor plan emosionel.

Seki Kapav Ede

Nou tou arive parfwa santi nou tris; me bann ki pe soufer akoz depresion ouswa langwas kitfwa pe bizin lit kont sa bann santiman-la toulezour. Kouma Labib kapav ede?

Dan Labib, ena boukou panse pozitif ki kapav ranplas bann panse negatif. (Filipien 4:8) Li kapav ranpli nou lespri avek bann panse rekonfortan ek sa kapav ed nou pou ena kontrol lor nou bann lemosion.—Psom 94:18, 19.
Labib kapav ed nou pou aret panse ki nou pa vo nanye.—Lik 12:6, 7.
Ena boukou verse dan Labib ki rasir nou ki nou pa tousel, ek ki Bondie, nou Kreater, konpran nou bann santiman.—Psom 34:18; 1 Zan 3:19, 20.
Labib promet ki Bondie pou retir nou bann move souvenir. (Izai 65:17; Revelasion 21:4) Kan nou pe lite akoz bann move panse ek bann move santiman, sa promes-la kapav donn nou lafors pou kontign andire.

Labib Pe Ed Jessica

Kouma Depresion Afekte Mwa?

“Kan mo ti ena 25 an, mo ti aprann ki mo ti ena enn depresion bien grav. Bann move souvenir ti touletan fatig mwa. Bann dokter ti ed mwa konpran ki mo ti ena bann panse negatif akoz bann levennman ki’nn tromatiz mwa dan lepase, ek se akoz sa ki mo ti pe fer enn depresion. Apart bann medsinn, mo ti bizin swiv enn terapi ki ti pou ed mwa pou lit kont bann panse negatif la.”

Kouma Labib Ed Mwa?

“Kan mo depresion ti vinn for, mo ti pe gagn bann kriz panik, mo ti extra angwase ek mo pa ti pe dormi. Souvan aswar, boukou bann panse negatif ti pe vinn dan mo latet ek sa ti pe fatig mwa parski mo pa ti ena okenn kontrol lor zot. Kouma li dir dan Psom 94:19, Bondie kapav rekonfort nou ek soulaz nou kan bann traka kraz nou. Alor mo ti gard mo Labib ek enn karne kot ena bann verse ankourazan pre kot mo lili. Kan mo pa ti pe kapav dormi, mo ti pe lir detrwa verse Labib, pou ki bann panse Bondie rekonfort mwa.

“Labib ankouraz nou pou rezet bann panse ki pa an-akor avek seki nou kone lor Bondie. Dan lepase, mo ti panse ki mo pa vo nanye, ki personn pa kontan mwa ek ki mo initil. Me mo’nn aprann ki an realite, sa bann panse-la zot pa an-akor avek Labib, parski Labib dekrir Bondie kouma enn Papa ki ena lamour ek konpasion ek ki gagn traka sakenn parmi nou. Tigit-tigit mo’nn aprann pou kontrol mo bann panse olie ki mo les mo bann panse kontrol mwa. Mo’nn aprann pou trouv momem parey kouma Bondie trouv mwa. Sa ti enn letap inportan parski sa inn ed mwa pou aret trouv momem dan enn fason negatif.

“Mo atann avek inpasians kan tou bann move souvenir ek bann move fason panse pou disparet. Mo kone ki dan lavenir pou nepli ena okenn problem lasante mantal. Sa ed mwa pou andire depi aster-la mem ek pou atann avek pasians lavenir kot mo pou nepli ena depresion.”