3 | Bann Lexanp Biblik Kapav Ed Ou

LABIB KOZ . . . Lor bann zom ek fam fidel ki ti ena “bann santiman parey kouma nou.”—ZAK 5:17.

Seki Savedir

Dan Labib, nou trouv plizir lexanp bann zom ek bann fam ki ti konn diferan kalite santiman. Kan nou lir zot zistwar, kitfwa nou pou trouv enn personaz Labib ki finn ena bann mem santiman ki nou.

Seki Kapav Ede

Nou tou bizin santi ki lezot konpran nou, sirtou kan nou pe fer fas ar enn problem lasante mantal. Kan nou lir Labib, nou aprann ki ti ena bann lezot dimounn ki ti ena bann mem panse ek bann mem santiman ki nou. Lerla, nou realize ki finn ena lezot ki’nn soufer parey kouma nou ek nou pa santi nou tro tousel kan nou angwase ek kan nou ena bann santiman ki fatig nou.

Labib koz boukou lor santiman bann dimounn ki ti santi zot initil ek dezespere. Eski ou’nn deza ena sa santiman-la: ‘Mo nepli kapav’? Moiz, Eliya ek David ti santi zot koumsa.—Nonb 11:14; 1 Lerwa 19:4; Psom 55:4.
Labib koz lor enn fam ki ti apel Ana. Labib dir ki li ti bien soufer ek ki “so nam ti amer” parski li pa ti ena zanfan ek lot madam so mari pa ti pe aret boufonn li.—1 Samiel 1:6, 10.
Labib koz lor enn zom ki ti apel Zob. Mem si li ti ena enn gran lafwa an Zeova, li ti bien soufer akoz bann santiman negatif, ek enn fwa, li ti mem dir: “Mo’nn degout mo lavi; mo pa anvi kontign viv.”—Zob 7:16.

Kan nou aprann kouma sa bann personaz Labib la inn reisi fer fas ar bann move fason panse, sa montre nou ki nou osi nou kapav gagn lafors ki bizin pou sirmont bann santiman negatif.

Labib Pe Ed Kevin

Kouma Problem Bipoler Afekte Mwa?

“Kan mo ti pre pou gagn sinkant an, mo ti aprann ki mo ena enn problem bipoler. Ena fwa, mo santi ki mo kapav fer fas ar ninport ki problem ki ena dan lavi. Me ena fwa, mo santi ki li pa vo lapenn viv.”

Kouma Labib Ed Mwa?

“Enn personaz Labib lor ki mo kontan medite se lapot Pier. Li ti fer bann erer ki ti fer li santi li initil. Me olie ki li kontign pans lor la, Pier ti antour li avek bann kamarad ki ti gagn so traka. Kan mo problem bipoler fatig mwa, bann erer ki mo fer telman dekouraz mwa ki mo santi mwa initil. Parey kouma Pier, mo esey res pros avek mo bann kamarad ki ed mwa pou pa bes lebra.

“Enn lot personaz Labib ki bien rekonfort mwa, se Lerwa David. Souvan li ti dekouraze akoz so sitiasion ek li ti regret bann erer ki li ti fer avan. Lerwa David fer mwa pans momem parski parfwa mo dir ouswa mo fer bann kitsoz ki mo regrete apre. Mo trouv bann parol David dan Psom 51 bien rekonfortan. Dan verse 3, David dir: “Mo rekonet mo bann tor; mo bann pese touzour divan mo lizie.” Se koumsa mem ki mo santi mwa kan mo bien deprime, parski li bien difisil pou trouv momem dan enn fason pozitif dan sa bann moman-la. Me mo osi ena mem santiman ki David, ki dir dan verse 10: “Bondie kree an mwa enn leker pir ek prop renouvel an mwa enn lespri nouvo ek lwayal.” Se sa bann mo lamem ki mo servi kan mo demann Bondie pou ed mwa pou ena enn bon lopinion lor momem. Ek, verse 17 donn mwa rekonfor. Li dir ki Bondie pa pou rezet enn kikenn ki ena “leker brize.” Sa verse-la rasir mwa ki Bondie kontan mwa.

“Kan mo res konsantre lor bann lexanp biblik ek lor seki Bondie pe donn mwa aster-la, sa ranforsi mo lespwar pou lavenir. Bann promes Labib inn vinn reel pou mwa ek sa vremem ed mwa pou pa bes lebra.”