Kouma Zeova Anvi ki Nou Tret Bann Ki’nn Fer enn Pese Grav?

1. Ki Zeova anvi pou tou dimounn?

ZEOVA inn kree nou avek kapasite pou pran bann desizion. Toulezour nou pran bann desizion, ek sertin desizion ki nou pran pli inportan ki lezot. Desizion pli inportan ki enn dimounn kapav pran se donn so lavi Zeova ek servi Li ansam ar so bann frer ek ser. Zeova anvi ki tou dimounn fer sa. Kifer? Parski Li kontan bann dimounn ek Li anvi ki zot ere. Li anvi ki zot vinn so kamarad ek ki zot viv pou touletan.—Det. 30:19, 20; Gal. 6:7, 8.

2. Ki Zeova anvi pou bann ki pankor repanti? (1 Zan 2:1)

² Selman, Zeova pa obliz personn pou servi Li. Li les sak dimounn deside seki li anvi fer. Me ki kapav arive si enn Kretien dezobeir lalwa Zeova ek ki li fer enn pese grav? Si li pa repanti, pou bizin tir li dan lasanble. (1 Kor. 5:13) Me kanmem sa, Zeova gard lespwar ki li pou repanti ek ki li pou retourn ver Li. Avredir, enn parmi bann rezon prinsipal kifer Zeova inn donn laranson, se pou ki Li kapav pardonn bann dimounn ki repanti. (Lir 1 Zan 2:1.) Nou Bondie Zeova ena boukou lamour ek Li ankouraz bann ki fer pese pou repanti.—Zaka. 1:3; Rom. 2:4; Zak 4:8.

3. Ki nou pou examine dan sa lartik-la?

³ Dan Labib, Zeova dir nou seki Li resanti konsernan pese ek konsernan bann dimounn ki fer pese. Li anvi ki nou ena mem santiman ki Li. Dan sa lartik-la, nou pou gete kouma nou kapav fer sa. Pou koumanse, nou pou gete seki lapot Pol ti dir lasanble Korint fer kan enn frer ti fer enn pese grav. Apre sa, nou pou gete seki li ti dir sa lasanble-la fer apre ki sa zom-la ti repanti. Ek an dernie, nou pou gete seki Zeova resanti anver bann ki fer enn pese grav.

SEKI TI ARIVE KAN ENN FRER TI FER ENN PESE GRAV

4. Ki sitiasion ti arive dan lasanble Korint? (1 Korintien 5:1, 2)

⁴ Lir 1 Korintien 5:1, 2. Pandan so trwaziem vwayaz misioner, Pol ti gagn sok kan li ti aprann seki ti pe arive dan lasanble ki ti fek forme dan Korint. Enn frer dan sa lasanble-la ti pe gagn relasion sexiel ar so mama belmer. Sa ti enn kitsoz bien degoutan, ek “mem parmi bann dimounn lezot nasion pa finn tann enn limoralite koumsa”! Anplis, lasanble ti pe toler sa konportman-la, ek kitfwa zot ti mem “fier akoz sa.” Kitfwa sertin ti aksepte sa parski sa ti montre ki zot bann dimounn ki toleran ek ki Zeova ena mizerikord anver bann dimounn ki inparfe. Me Zeova pa aksepte ki so bann serviter konport zot koumsa. Akoz move konportman sa frer-la, bann dimounn ki pa ti ador Zeova ti gagn sok ek zot ti dir bann move kitsoz lor bann serviter Zeova. Sa frer-la kitfwa ti ena osi enn move linflians lor bann lezot Kretien ki ti pe frekant li. Akoz sa sitiasion-la, ki lord Pol ti donn lasanble Korint?

5. Ki kitsoz Pol ti dir lasanble Korint fer, ek ki li ti pe rod dir? (1 Korintien 5:13) (Get zimaz osi.)

⁵ Lir 1 Korintien 5:13. Zeova ti fer Pol ekrir lasanble Korint enn let ek li ti explik zot ki bizin “tir” sa zom-la dan lasanble. Kouma bann frer ek ser ti bizin tret sa zom-la? Pol ti dir zot “aret frekant” li. Zot ti bizin “mem pa . . . manz avek enn dimounn koumsa.” (1 Kor. 5:11) Kan nou manz avek enn kikenn, savedir ki nou pas letan avek li ek ki nou koz avek li. Alor, li kler ki Pol ti pe dir bann frer ek ser ki zot bizin pa pas letan ar sa dimounn-la. Koumsa, li pa ti pou kapav inflians zot pou fer bann move kitsoz. (1 Kor. 5:5-7) Anplis, sa ti kapav fer sa dimounn-la konpran ki li’nn fer enn move kitsoz. Lerla, kitfwa li ti pou gagn onte ek sa ti kapav motiv li pou repanti.

6. Kouma lasanble Korint ek sa zom ki ti fer pese la, ti reazir ar let lapot Pol?

⁶ Apre ki li ti avoy so let lasanble Korint, Pol ti pe demann limem kouma bann frer ek ser ti pou reazir. Lerla, Tit ti anons Pol enn bon nouvel. Lasanble Korint ti swiv bann instriksion Pol ek zot ti tir sa zom-la dan lasanble. (2 Kor. 7:6, 7) Anplis, inpe apre ki Pol ti avoy sa let-la, zom-la ti repanti! Li ti sanz so latitid ek so konportman, ek li ti koumans swiv bann prinsip Zeova. (2 Kor. 7:8-11) Lerla, Pol ti avoy lasanble bann lezot instriksion. Ki li ti dir zot fer?

KOUMA BANN FRER EK SER TI BIZIN TRET SA ZOM KI TI REPANTI LA?

7. Ki lefe sa disiplinn-la finn ena lor sa zom-la? (2 Korintien 2:5-8)

⁷ Lir 2 Korintien 2:5-8. Pol ti dir zot ki “pinision ki mazorite . . . finn donn sa dimounn-la, li ase.” Sa disiplinn ki sa zom-la ti gagne ti ed li pou repanti. Alor, lasanble ti nepli bizin kontign disiplinn li.—Ebre 12:11.

8. Ki kitsoz Pol ti ankouraz lasanble pou fer?

⁸ Sa zom-la ti repanti, alor Pol ti dir bann ansien les li retourn dan lasanble. Me li ti osi ankouraz zot pou akeyir li bien, pou “pardonn li avek tou zot leker ek rekonfort li,” ek osi “rasir li ki zot kontan li.” Pol ti anvi ki, par zot bann parol ek zot bann aksion, zot montre sa zom-la ki zot inn vremem pardonn li ek ki zot kontan li. Koumsa, sa zom-la ti pou santi ki bann frer ek ser kontan ki li’nn retourne.

9. Kifer sertin dan lasanble kitfwa pa ti kontan ki sa frer-la ti retourne?

⁹ Eski sertin dan lasanble pa ti kontan ki sa frer-la ti retourne? Labib pa dir nanye lor la, me kitfwa sa ti arive. Sertin kitfwa ti ankoler parski li ti fer zot gagn onte, ouswa zot ti ankoler akoz ditor ki li ti fer lasanble. Sertin kitfwa pa ti dakor osi ki sa frer-la gagn sa kalite lakey-la, parski avredir, se zot ki ti fer zefor pou res fidel ar Zeova. (Konpar ar Lik 15:28-30.) Kifer sa ti bien inportan ki lasanble montre sa frer-la ki zot ti vremem kontan li?

10-11. Ki ti kapav arive si bann ansien pa ti pardonn sa zom-la?

¹⁰ Sey mazine seki ti kapav arive si bann ansien pa ti les sa zom-la revinn dan lasanble, ouswa apre ki li ti retourne, bann frer ek ser pa ti montre ki zot kontan li? Lapot Pol dir ki sa zom-la ti kapav tom dan enn “gran tristes,” ek si sa ti arive, li ti kapav panse ki zame li pa pou kapav rekoumans servi Zeova. Li ti kapav mem panse ki Zeova zame pa ti pou pardonn li, ek ki akoz sa, li pa neseser ki li fer zefor pou sanze.

¹¹ Ki kitsoz ankor ti kapav arive si bann frer ek ser pa ti pardonn sa zom-la? Sa ti pou met zot lamitie ar Zeova an danze. Kifer? Parski zot pa ti pou imit Zeova, ki pardonn bann dimounn ki repanti. Olie sa, zot ti pou resanble Satan, ki kriel ek ki pena mizerikord. Zot ti pou koumadir bann zouti dan lame Satan pou touy sa zom-la lor plan spiritiel.—2 Kor. 2:10, 11; Efe. 4:27.

12. Kouma lasanble Korint ti kapav imit Zeova?

¹² Kouma lasanble Korint ti kapav imit Zeova, ek pa imit Satan? Se kan zot pardonn bann ki repanti, parey kouma Zeova. Gete seki sertin ekrivin Labib ti dir lor Zeova. David ti dir ki Zeova “bon ek [Li] pre pou pardone.” (Ps. 86:5) Profet Mishe ti dir: “Kisann-la ki enn Bondie kouma twa, ki pardonn bann erer ek pese?” (Mish. 7:18) Ek Izai ti dir: “Fode ki dimounn ki fer seki pa bon kit so move semin, ek enn move dimounn sanz so fason panse. Ki li retourn ver Zeova, ki pou ena pitie pou li, ki li retourn ver nou Bondie parski So pardon bien gran.”—Iza. 55:7.

13. Kifer li pa ti neseser ki bann ansien atann ankor pou reintegre sa zom-la dan lasanble? (Get lankadre “Kan Eski Sa Zom-La Ti Reintegre?”)

¹³ Pou ki lasanble Korint imit Zeova, zot ti bizin pardonn sa zom-la, akeyir li bien dan lasanble, ek montre li ki zot kontan li. Pol ti dir ki si zot pardonn sa zom-la, zot ti pou montre ki zot “obeir dan tou kitsoz.” (2 Kor. 2:9) Mem si sa ti fer zis de-trwa mwa ki ti tir sa zom-la dan lasanble, li ti repanti. Alor, li pa ti neseser ki bann ansien atann ankor pou ki zot reintegre li.

KOUMA NOU KAPAV IMIT LAZISTIS EK MIZERIKORD ZEOVA?

14-15. Ki leson nou aprann ar seki ti arive dan lasanble Korint? (2 Pier 3:9) (Get zimaz osi.)

¹⁴ Zeova inn fer ekrir seki ti arive dan lasanble Korint “pou ansegn nou.” (Rom. 15:4) Sa zistwar-la montre nou ki Zeova pa aksepte ki enn kikenn ki fer enn pese grav ek ki pa repanti, res dan lasanble. Sertin kapav panse ki, parski Zeova ena mizerikord, Li kapav les enn kikenn ki pa repanti res dan lasanble. Me se pa koumsa ki Zeova montre mizerikord. Li vre ki Zeova ena mizerikord, me sa pa vedir ki Li aksepte bann move konportman. So bann prinsip konsernan lebien ek lemal zame sanze. (Zid 4) Si Zeova ti les enn kikenn ki pa repanti res dan lasanble, sa pa ti pou an-akor ar so mizerikord parski sa dimounn-la ti pou kapav fer boukou ditor dan lasanble.—Prov. 13:20; 1 Kor. 15:33.

¹⁵ Selman, Zeova pa anvi ki personn detrir. Li anvi sov bann dimounn, tanki sa posib, ek Li montre mizerikord anver bann dimounn ki sanz zot konportman ek ki anvi revinn so kamarad. (Eze. 33:11; lir 2 Pier 3:9.) Se pou sa rezon-la ki, kan sa zom dan lasanble Korint la ti repanti ek ki li ti sanz so konportman, Zeova ti servi Pol pou dir lasanble-la pardonn li ek reaksepte li dan lasanble.

16. Ki to resanti kan to reflesi lor seki ti arive dan lasanble Korint?

¹⁶ Seki ti arive dan lasanble Korint montre nou ki Zeova Li enn Bondie lamour ek lazistis. (Ps. 33:5) Eski sa pa motiv twa pou donn Li plis laglwar? Anplis, nou tou nou fer pese, ek nou tou nou bizin so mizerikord. Akoz sa, nou bien rekonesan ki Li’nn donn laranson pou ki Li kapav pardonn nou bann pese. Sa vremem rekonfort nou kan nou kone ki Zeova bien kontan so bann serviter ek ki Li anvi ki nou ere!

17. Ki nou pou examine dan bann prosin lartik?

¹⁷ Azordi, si enn kikenn dan lasanble fer enn pese grav, kouma bann ansien kapav imit lamour Zeova ek ed sa dimounn-la pou repanti? Kouma bann frer ek ser bizin reazir kan bann ansien desid pou tir enn kikenn dan lasanble ouswa pou reintegre enn kikenn? Nou pou reponn sa bann kestion-la dan bann prosin lartik.