LARTIK LETID 34
KANTIK 107 Lexanp Bondie lor Lamour
Ansien, Montre Lamour ek Mizerikord Anver Bann Ki Fer Pese
“Bondie, dan so zantiyes, pe esey ed twa pou repanti.”—ROM. 2:4.
PWIN PRINSIPAL
Dan sa lartik-la, nou pou gete kouma bann ansien kapav ed bann ki fer enn pese grav.
1. Eski ena enn lespwar pou bann ki’nn fer enn pese grav? Explike.
DAN lartik avan, nou ti trouve seki lapot Pol ti dir lasanble Korint fer, kan enn frer ti fer enn pese grav. Sa frer-la pa ti repanti, ek ti bizin tir li dan lasanble. Selman, kouma verse prinsipal pou sa lartik-la montre, Zeova kapav ed enn kikenn pou repanti. (Rom. 2:4) Alor, kouma eski Li servi bann ansien pou ed enn kikenn pou repanti?
2-3. Ki nou bizin fer si nou aprann ki enn kikenn inn fer enn pese grav, ek kifer?
2 Selman, si bann ansien pa kone ki enn kikenn inn fer enn pese grav, zot pa pou kapav ed li. Alor, si nou aprann ki enn kikenn inn fer enn pese grav, enn pese ki kapav fer li nepli form parti dan lasanble, ki nou bizin fer? Nou bizin ankouraz li pou al rod led ar bann ansien.—Iza. 1:18; Zist. 20:28; 1 Pier 5:2.
3 Me fer koumadir dimounn-la pa anvi al koz ar bann ansien, ki nou bizin fer? Nou bizin al koz ar bann ansien pou ki zot kapav ed li. Kan nou fer sa, nou montre ki nou kontan sa dimounn-la, parski nou kone ki bann ansien pou kapav ed li. Si sa dimounn-la pa sanze, li pou plis gat so lamitie ar Zeova, ek li kapav mem gat repitasion lasanble. Alor, mem si nou trouv sa difisil pou al koz ar bann ansien, nou pou fer li parski nou kontan Zeova ek nou kontan sa dimounn-la osi.—Ps. 27:14.
FASON KI BANN ANSIEN ED BANN KI FER ENN PESE GRAV
4. Kan bann ansien zwenn ar enn kikenn ki’nn fer enn pese grav, ki lobzektif zot ena?
4 Kan enn kikenn dan lasanble fer enn pese grav, komite bann ansien pou swazir trwa ansiena ki pou zwenn sa dimounn-la. Sa trwa ansien-la bizin ena limilite ek zot bizin konn zot limit. Kifer? Parski kan zot pe esey ed sa dimounn-la pou sanze, zot bizin konpran ki zot pa kapav fors li pou repanti. (Det. 30:19) Zot konpran ki pa tou dimounn ki pou repanti, parey kouma Lerwa David. (2 Sam. 12:13) Sertin kapav desid pou rezet bann konsey ki Zeova donn zot. (Zen. 4:6-8) Me kanmem sa, lobzektif sa bann ansien-la se pou ed bann ki fer pese pou repanti. Me ki bann ansien bizin rapel kan zot pou zwenn ar enn kikenn ki’nn fer enn pese?
5. Ki kitsoz bann ansien bizin rapel kan zot zwenn ar enn kikenn ki’nn fer enn pese? (2 Timote 2:24-26) (Get zimaz osi.)
5 Bann ansien bizin konsider enn kikenn ki’nn fer enn pese kouma enn ‘mouton ki’nn perdi,’ ki ankor ena boukou valer pou Zeova. (Lik 15:4, 6) Alor, kan zot zwenn ar li, fode pa ki zot koz brit ar li ouswa ki zot tret li dan enn move fason. Fode pa zot zis poz kestion pou gagn bann linformasion. Okontrer, zot bizin ena bann kalite ki mansione dan 2 Timote 2:24-26. (Lir.) Zot bizin res zanti, dous, ek bon, parski zot anvi tous so leker ek ed li pou sanze.
Parey kouma bann berze dan lepase, ki ti fer zefor pou rod bann mouton ki ti perdi, bann ansien fer tou seki zot kapav pou ed enn kikenn ki’nn fer enn pese (Get paragraf 5)
6. Kouma bann ansien kapav prepar zot leker avan ki zot zwenn ar enn kikenn ki’nn fer enn pese? (Romin 2:4)
6 Bann ansien bizin prepar zot leker. Zot bizin fer zefor pou imit fason ki Zeova tret bann dimounn ki fer pese. Zot bizin rapel bann parol lapot Pol, ki ti dir: “Bondie, dan so zantiyes, pe esey ed twa pou repanti.” (Lir Romin 2:4.) Fode pa zot bliye ki zot bann berze, ek ki zot bizin swiv direksion Lekris ek imit li dan fason ki zot tret bann frer ek ser. (Iza. 11:3, 4; Mat. 18:18-20) Alor, avan ki zot zwenn ar enn kikenn ki’nn fer enn pese, zot bizin priye Zeova ek rapel lobzektif ki zot ena, setadir esey ed li pou repanti. Zot bizin fer bann resers dan Labib ek dan nou bann piblikasion, ek priye Zeova pou ki Li ed zot konpran sa dimounn-la ek konpran so sitiasion. Zot bizin osi reflesi lor sa dimounn-la so pase ek lor bann sitiasion ki’nn pous li pou pans ek azir dan sa fason-la.—Prov. 20:5.
7-8. Kouma bann ansien kapav imit pasians Zeova kan zot zwenn ar enn kikenn ki’nn fer enn pese?
7 Bann ansien bizin imit pasians Zeova. Zot bizin rapel kouma Zeova ti tret bann dimounn ki’nn fer pese dan lepase. Par exanp, Zeova ti ena pasians ar Kain. Li ti dir li seki ti pou arive si li pa ti sanze, me Li ti osi dir li ki li ti pou gagn bann benediksion si li ti obeir. (Zen. 4:6, 7) Zeova ti avoy profet Natan pou konsey David, ek Natan ti servi enn lexanp pou ed David pou repanti. (2 Sam. 12:1-7) Ek kan bann Izraelit ti dezobeir Zeova, Li ti “kontign avoy” so bann profet “ankor ek ankor.” (Zer. 7:24, 25) Li pa ti atann ki zot repanti pou ki Li ed zot. Okontrer, mem si zot ti ankor pe fer pese, Li ti ankouraz zot pou repanti.
8 Kan zot pe ed enn kikenn ki’nn fer enn pese grav, bann ansien swiv lexanp Zeova. Parey kouma 2 Timote 4:2 dir, zot bizin ena “boukou pasians” kan zot pe ed sa dimounn-la. Enn not pou letid pou sa verse-la dir ki enn ansien ‘bizin touletan res kalm ek ena pasians pou ki li kapav ed sa dimounn ki’nn fer pese la pou fer seki drwat. Si ansien-la ankoler ouswa si li agase, kitfwa dimounn-la pa pou ekout so konsey, ouswa kitfwa li pa pou anvi repanti.’
9-10. Kouma bann ansien kapav ed enn kikenn ki’nn fer enn pese pou reflesi lor seki li’nn fer?
9 Bann ansien bizin esey konpran seki’nn arive avan ki li’nn fer sa pese-la. Par exanp, zot kapav demann zotmem kouma so lamitie ar Zeova inn afebli? Eski li ti pe negliz so letid personel ek predikasion? Eski li’nn aret priye Zeova regilierman? Eski li’nn les so bann move dezir kontrol li? Eski li ti pe pran bann move desizion konsernan so bann frekantasion ek so bann divertisman? Eski sa bann desizion-la finn ena enn move lefe lor li? Eski li konpran kouma so bann desizion ek so bann aksion inn afekte so Papa Zeova?
10 Bann ansien kapav poz li bann kestion ki fer li reflesi lor bann kitsoz ki’nn afebli so lamitie ar Zeova ek ki’nn fer li tom dan pese. Zot pou poz sa bann kestion-la avek boukou bonte, san ki zot rant dan so lavi prive. (Prov. 20:5) Anplis, zot kapav servi bann lexanp pou ed sa dimounn-la reflesi, pou ki li trouve ki li’nn fer enn erer, parey kouma Natan ti fer ar David. Premie fwa ki zot zwenn ar sa dimounn-la, kitfwa li pou koumans regrete ek li pou vremem sagrin akoz seki li’nn fer. Kitfwa li kapav mem repanti.
11. Kouma Zezi ti tret bann dimounn ki ti fer pese?
11 Bann ansien bizin fer zefor pou imit Zezi. Kan li ti koz ar Sol, Zezi ti poz li enn kestion ki ti fer li reflesi. Li ti dir: “Sol, Sol, kifer to pe persekit mwa?” Zezi ti poz sa kestion-la pou ki Sol konpran ki li ti pe fer enn move kitsoz. (Zist. 9:3-6) Ek konsernan “Zezabel,” Zezi ti dir: “Mo’nn donn li letan pou repanti.”—Rev. 2:20, 21.
12-13. Parfwa, kifer bann ansien bizin donn enn dimounn letan pou repanti? (Get zimaz osi.)
12 Bann ansien swiv lexanp Zezi kan zot pran letan avan ki zot pran enn desizion; fode pa vit-vit zot panse ki enn kikenn ki’nn fer enn pese pa’le sanze. Sertin dimounn repanti kan bann ansien zwenn zot pou premie fwa. Me lezot kitfwa bizin plis letan. Alor, pou enn kikenn ki bizin plis letan, kitfwa bann ansien pou bizin zwenn li plizir fwa. Kan bann ansien zwenn sa dimounn-la pou premie fwa, kitfwa li pou koumans reflesi lor seki bann ansien inn dir li. Ek apre sa, kitfwa avek limilite li pou priye Zeova pou ki Zeova pardonn so pese. (Ps. 32:5; 38:18) Lerla, kan bann ansien pou rezwenn li enn lot fwa, kitfwa so latitid pa pou parey kouma premie fwa ki zot ti zwenn li.
13 Kan bann ansien esey ed enn kikenn pou repanti, zot bizin montre konpasion ek bonte. Zot priye Zeova pou ki Li beni zot bann zefor ek zot gard lespwar ki sa dimounn-la ‘regagn so bon sans’ ek repanti.—2 Tim. 2:25, 26.
Kan enn kikenn fer enn pese, bann ansien kitfwa pou bizin zwenn ar li plizir fwa pou donn li letan pou repanti (Get paragraf 12)
14. Kisann-la ki vremem ed enn kikenn pou repanti, ek kifer nou dir sa?
14 Nou tou nou bien kontan kan enn kikenn repanti! (Lik 15:7, 10) Me mem si bann ansien fer zot maximum pou ed enn kikenn pou sanze, kisann-la vremem ed li pou repanti? Lapot Pol ti dir: “Li posib ki Bondie donn zot repantans.” (2 Tim. 2:25) Konsernan sa verse-la, enn not pou letid dir: “Se gras-a Zeova, pa gras-a enn dimounn, ki enn kitsoz koumsa kapav arive, parski se Zeova ki ed bann ki rebel pou fer bann sanzman. Pol koz lor sertin parmi bann benediksion ki enn kikenn gagne kan li repanti; li gagn enn konesans pli exakt lor laverite, li regagn so bon sans, ek li sorti dan piez Satan.—2Tim 2:26.”
15. Kan enn kikenn repanti, kouma bann ansien kontign ed li?
15 Kan enn kikenn repanti, bann ansien pou kontign vizit li pou ed li pou fer so lafwa vinn pli for. Ek zot pou kontign ed li pou lit kont bann piez Satan ek pou fer seki bon. (Ebre 12:12, 13) Biensir, bann ansien pa pou dir lasanble seki sa dimounn-la inn fer. Me ki kitsoz lasanble kitfwa pou bizin kone?
“KORIZ ZOT DEVAN TOU DIMOUNN”
16. Dan 1 Timote 5:20, kan Pol servi lexpresion “tou dimounn,” lor kisann-la li ti pe koze?
16 Lir 1 Timote 5:20. Pol ti dir Timote, ki ti enn ansien, ki li ti bizin koriz “bann ki pratik pese” devan “tou dimounn.” Eski Pol ti pe rod dir ki bizin koriz enn kikenn ki’nn fer enn pese devan tou bann frer ek ser? Pa forseman. Pol ti pe koz lor bann dimounn ki kitfwa ti konn sa sitiasion-la. Kitfwa zot ti temwin seki ti arive, ouswa kitfwa sa dimounn-la ti dir zot ki li’nn fer enn pese. Dan sa ka-la, bann ansien pou dir zis bann dimounn ki konn sa sitiasion-la, ki zot inn okip sa sitiasion-la ek ki zot inn koriz sa dimounn ki’nn fer pese la.
17. Si boukou dimounn dan lasanble kone ki enn kikenn inn fer enn pese grav, ouswa si zot pou konn sa sitiasion-la apre, ki lanons bizin fer dan lasanble, ek kifer?
17 Parfwa, kan enn kikenn fer enn pese grav, li kapav arive ki boukou dimounn dan lasanble kone ki li’nn fer enn pese, ouswa kitfwa zot pou konn sa sitiasion-la apre. Dan sa ka-la, lexpresion “tou dimounn” vedir tou bann frer ek ser dan lasanble. Lerla, enn ansien pou fer enn lanons dan lasanble pou dir ki sa frer-la ouswa sa ser-la inn gagn enn blam. Kifer? Pol dir: “Pou ki sa servi kouma enn lavertisman pou lezot,” pou ki zot pa fer pese.
18. Kan enn zanfan ki miner me ki batize fer enn pese grav, kouma bann ansien bizin okip sa sitiasion-la? (Get zimaz osi.)
18 Ki bann ansien bizin fer si enn zanfan ki ankor miner, setadir ki ena mwins ki 18 an, me ki batize, fer enn pese grav? Komite bann ansien pou swazir de ansien ki pou zwenn ar miner-la ansam ar so bann paran, ki bann Kretien.b Sa de ansien-la pou demann bann paran-la seki zot inn fer pou ed zanfan-la pou li sanze ek li repanti. Si zanfan-la inn ekout konsey so bann paran ek ki li pe fer bann sanzman ki bizin, sa de ansien-la kapav deside pou les bann paran-la kontign ed zot zanfan. Bann ansien kone ki Zeova inn donn bann paran responsabilite pou koriz zot zanfan, ek zot bizin fer sa avek amour. (Det. 6:6, 7; Prov. 6:20; 22:6; Efe. 6:2-4) Selman, detanzantan, bann ansien-la pou gete si bann paran-la pe donn zot zanfan led ki li bizin. Me ki bann ansien bizin fer si enn miner ki batize pe kontign fer seki pa bon? Dan sa ka-la, komite bann ansien pou form enn group ansien ki pou zwenn miner-la ansam ar so bann paran, ki bann Kretien.
Kan enn miner ki batize fer enn pese grav, de ansien pou zwenn li ansam ar so bann paran Kretien ouswa ar so titer (Get paragraf 18)
“ZEOVA RANPLI AR LAFEKSION EK TANDRES, EK ENA MIZERIKORD”
19. Kan bann ansien ed enn kikenn ki’nn fer enn pese, kouma zot kapav imit Zeova?
19 Zeova anvi ki bann ansien protez lasanble kont tou bann ki pa’le swiv so bann lalwa. (1 Kor. 5:7) Selman, zot bizin osi esey fer tou seki zot kapav pou ed enn kikenn ki’nn fer enn pese pou repanti. Akoz sa, kan bann ansien pe ed enn kikenn pou repanti, zot bizin res pozitif ek gard lespwar ki li kapav sanze. Zot fer sa parski zot anvi imit Zeova ki “ranpli ar lafeksion ek tandres, ek ena mizerikord.” (Zak 5:11) Lapot Zan enn bon lexanp dan sa domenn-la, parski li ti tret so bann frer ek ser avek boukou lamour. Li ti dir: “Mo bann ti zanfan, mo pe ekrir zot sa bann kitsoz-la pou ki zot pa fer enn pese. Me si enn kikenn fer enn pese, nou ena enn avoka kot nou Papa: Zezi Kris, enn kikenn ki drwat.”—1 Zan 2:1, not.
20. Ki nou pou examine dan dernie lartik?
20 Malerezman, li kapav arive ki enn kikenn pa’le repanti. Lerla, pou bizin tir li dan lasanble. Ki bann ansien bizin fer kan sa arive? Nou pou examinn sa dan dernie lartik.
KANTIK 103 Bann Berze—Enn Kado Zeova
a Dan lepase, nou ti dir ki sa trwa ansien-la ti form parti enn “komite disiplinn relizie.” Me nou nepli servi sa lexpresion-la parski lobzektif sa bann ansien-la se pa zis pou disiplinn enn kikenn. Aster-la, nou pou dir ki sa trwa ansien-la form “enn group ansien.”
b Sa konsern osi bann titer legal ouswa bann dimounn ki ena responsabilite sa zanfan miner la.