“Apel Bann Ansien”

1. Kouma Zeova montre ki Li kontan so bann serviter?

ZEOVA kontan tou bann ki servi Li, ek Li pran zot swin parey kouma enn bon berze pran swin so bann mouton. Li’nn donn lavi so Garson ki Li bien kontan pou nou, ek Li’nn donn nou bann ansien ki pran nou swin. (Zist. 20:28) Zeova anvi ki bann ansien tret so bann serviter avek tandres. Li’nn etabli Zezi kouma sef lasanble. Bann ansien bizin swiv bann instriksion Zezi ek ed bann serviter Zeova pou kontign ena enn bon lamitie avek Li.—Iza. 32:1, 2.

2. Dapre Ezekiel 34:15, 16, kisann-la Zeova anvi ede?

² Zeova gagn traka tou so bann serviter, me Li sirtou gagn traka bann ki feb lor plan spiritiel. Se akoz sa ki Li servi bann ansien pou ed zot. (Lir Ezekiel 34:15, 16.) Zeova anvi ed nou tou kan nou bizin led. Selman, Li pa zis anvi ki nou priye Li pou gagn so led. Li anvi osi ki nou rod led “bann berze ek ansegnan” ki ena dan lasanble.—Efe. 4:11, 12.

3. Kifer li inportan ki nou reflesi lor responsabilite ki Zeova inn donn bann ansien?

³ Dan sa lartik-la, nou pou trouve kouma Zeova servi bann ansien pou ed bann ki feb lor plan spiritiel. Nou pou osi reponn sa bann kestion-la: Kan eski nou bizin rod led bann ansien? Kifer nou bizin fer sa? Ek kouma bann ansien ed nou? Mem si pou linstan nou ena enn bon lamitie ar Zeova ek ki nou pa bizin led bann ansien, sa lartik-la pou ogmant nou rekonesans pou fason ki Zeova servi zot, ek li pou montre nou seki nou bizin fer kan nou bizin zot led.

KAN ESKI NOU BIZIN “APEL BANN ANSIEN”?

4. Kouma nou kone ki Zak 5:14-16, 19, 20 pe koz lor enn kikenn ki malad lor plan spiritiel? (Get zimaz osi.)

⁴ Disip Zak explike kouma Zeova servi bann ansien pou ed nou. Li dir: “Eski ena enn kikenn parmi zot ki malad? Ki li apel bann ansien dan lasanble.” (Lir Zak 5:14-16, 19, 20.) Dan sa verse-la, Zak pe koz lor enn kikenn ki bizin regagn enn bon lamitie ar Zeova. Kouma nou konn sa? Nou konn sa parski se pa led enn dokter ki sa dimounn-la bizin rode. Zak dir ki sa dimounn ki malad la bizin “apel bann ansien” ki ena dan lasanble. Zak dir osi ki sa dimounn-la pou geri lor plan spiritiel apre ki Zeova inn pardonn so bann pese. Kan enn kikenn malad, pou ki li bien li bizin al get enn dokter, dir dokter-la bann sintom ki li gagne, ek swiv bann konsey ki dokter-la donn li. Dan mem fason, kan nou malad lor plan spiritiel, nou bizin al get bann ansien, nou bizin explik zot nou sitiasion, ek nou bizin swiv bann konsey Biblik ki zot donn nou.

5. Kouma nou kapav kone si nou ankor ena enn bon lamitie ar Zeova?

⁵ Dan Zak sapit 5, Zak ankouraz nou pou koz ar bann ansien kan nou santi ki nou lamitie ar Zeova pe koumans gate. Ek li bien inportan ki nou fer sa avan ki nou perdi net nou lamitie ar Zeova. Alor, nou bizin onet ar nou-mem. Kifer? Parski Labib dir ki si nou pa fer atansion, nou kapav panse ki nou ena enn bon lamitie ar Zeova, alor ki an realite nou’nn fini perdi so faver. (Zak 1:22) Se seki ti ariv sertin Kretien dan lasanble Sard. Zezi ti dir zot ki zot ti fini perdi faver Zeova. (Rev. 3:1, 2) Kouma nou kapav kone si nou ankor ena enn bon lamitie ar Zeova? Enn fason nou kapav konn sa, se kan nou konpar seki nou ti resanti pou Zeova kan nou ti fek pran batem, ar seki nou resanti pou Li aster-la. (Rev. 2:4, 5) Pou nou fer sa, nou kapav demann nou-mem: ‘Eski mo ankor kontan lir ek etidie Labib? Eski mo ankor pe asiste tou mo bann renion? Kan mo asiste renion, eski mo ankor pe prepar mwa bien? Eski predikasion ankor inportan pou mwa, ouswa mo prefer pas letan pou fer bann lezot kitsoz? Eski mo ankor gard bann divertisman ek bann kitsoz materyel dan zot plas?’ Si nou reponn non pou enn parmi sa bann kestion-la, kitfwa sa vedir ki nou lamitie ar Zeova nepli for kouma avan. Ek kitfwa sa pou plis anpire si nou pa fer nanye. Alor, si nou santi ki nou pa pe kapav amelior nou relasion ar Zeova par nou-mem, ouswa si nou’nn al fer enn kitsoz ki’nn gat nou lamitie ar Zeova, nou bizin rod led bann ansien.

6. Kan enn kikenn fer enn pese grav, ki li bizin fer?

⁶ Ena sertin pese ki telman grav, ki si enn kikenn fer sa kalite pese-la ek ki li pa repanti, pou bizin tir li dan lasanble. (1 Kor. 5:11-13) Si to’nn fer sa kalite pese-la, to bizin al koz ar enn ansien. Kan enn kikenn fer enn pese grav, li pa kapav regagn enn bon lamitie ar Zeova par limem; li bizin led. Ek pou ki Zeova pardonn nou bann pese, nou bizin fer “bann aksion ki montre ki [nou’nn] repanti.” (Zist. 26:20) Enn parmi sa bann aksion-la, se al koz avek bann ansien.

7. Kisann-la osi bizin led bann ansien?

⁷ Bann ansien pa zis ed bann ki’nn fer enn pese grav, me zot osi ed bann ki feb lor plan spiritiel. (Zist. 20:35) Par exanp, kitfwa to pe gagn difikilte pou lit kont enn move dezir. Li kapav difisil pou twa pou lit kont sa move dezir-la, parski avan ki to vinn dan laverite kitfwa to ti enn droge, to ti get pornografi, ouswa to ti ena enn lavi imoral. Si to dan sa sitiasion-la, fode pa to per pou rod led bann ansien. To kapav koz ar enn ansien avek ki to santi twa alez. Li pou ekout twa bien, li pou donn twa bann bon konsey, ek li pou rapel twa ki si to kontign reziste kont to move dezir, sa pou fer Zeova plezir. (Ekle. 4:12) Ek si to dekouraze parski to pe bizin kontign lit kont sa move dezir-la, bann ansien pou rapel twa ki parski to’nn rod led, sa fer Zeova plezir. Sa montre osi ki to ena limilite, ki to pa’le kont lor to prop lafors, ek ki to vremem anvi fer Zeova plezir.—1 Kor. 10:12.

8. Eski nou bizin al get bann ansien pou tou erer ki nou fer? Explike.

⁸ Li pa neseser ki nou al get bann ansien pou tou erer ki nou fer. Par exanp, fer koumadir to’nn dir enn frer ouswa enn ser enn kitsoz ki’nn bles li, ouswa to’nn sap lor kal ar li. Olie ki to al get enn ansien, to kapav swiv konsey Zezi ek al fer lape ar sa dimounn-la. (Mat. 5:23, 24) To kapav osi fer bann resers dan nou bann piblikasion pou ki to aprann pou ena plis douser, pasians, ek kontrol lor tomem. Biensir, si apre ki to’nn fer tousala, sitiasion-la pa’nn rezoud mem, to kapav demann enn ansien pou ed twa. Kan Evodi ek Sintik pa ti pe reisi regle enn problem ki ti ena ant zot, lapot Pol ti demann enn frer dan lasanble pou ed zot. Dan mem fason, enn ansien dan to lasanble kapav ed twa osi.—Fil. 4:2, 3.

KIFER NOU BIZIN “APEL BANN ANSIEN”?

9. Kifer fode pa nou onte pou al rod led ar bann ansien? (Proverb 28:13)

⁹ Kan nou’nn fer enn pese grav, ouswa kan nou santi ki nou pa pe reisi lit kont nou bann move dezir, nou bizin ena lafwa ek kouraz pou al rod led ar bann ansien. Fode pa nou onte pou fer sa. Kifer? Parski Zeova servi bann ansien pou ed nou, pou ki nou kapav kontign ena enn bon lamitie avek Li. Alor, kan nou al rod led bann ansien, nou montre ki nou fer Zeova konfians ek ki nou anvi obeir Li. Sa montre osi ki nou rekonet ki nou bizin so led pou ki nou kapav kontign fer seki drwat. (Ps. 94:18) Si nou’nn fer enn pese, nou kapav sir ki Zeova pou pardonn nou si nou al dir bann ansien seki nou’nn fer ek ki nou aret fer sa pese-la.—Lir Proverb 28:13.

10. Ki kapav arive si nou esey kasiet bann pese ki nou’nn fer?

¹⁰ Kan nou fer enn pese grav ek ki nou al koz ar bann ansien, Zeova kapav pardonn nou ek nou kapav regagn enn bon lamitie avek Li. Parkont, si nou pa al koz ar bann ansien ek ki nou esey kasiet pese-la, nou sitiasion kapav vinn pli pir. Kan Lerwa David ti esey kasiet bann pese ki li ti fer, li ti tom dan depresion ek sa ti rann li malad, parski li ti kone ki li ti nepli ena enn bon lamitie ar Zeova. (Ps. 32:3-5) Kan nou malad ouswa nou blese, plis nou tarde pou okip sa, plis sa pou anpire. Dan mem fason, kan nou fer enn pese grav, plis nou tarde pou al rod led bann ansien, plis nou pou soufer. Zeova pa anvi ki nou soufer, akoz sa Li demann nou pou al koz ar bann ansien pou ki nou kapav “remet bann kitsoz an-ord” avek Li.—Iza. 1:5, 6, 18.

11. Si nou kasiet pese ki enn kikenn inn fer, ki lefe sa kapav ena lor lezot?

¹¹ Kan nou fer enn pese grav ek ki nou esey kasiet sa, sa kapav ena enn lefe lor lezot osi. Par exanp, sa kapav anpes lespri sin azir lor lasanble, ek sa kapav ena enn lefe osi lor lape ki ena parmi bann frer ek ser. (Efe. 4:30) Si nou aprann ki enn kikenn dan lasanble inn fer enn pese grav, nou bizin ankouraz li pou al koz ar bann ansien. Si apre ki nou’nn donn li inpe letan pou fer sa, me ki li pa’nn fer li, alor nou bizin al get bann ansien nou-mem. Kifer? Parski si nou kasiet so pese, nou pou koupab parey kouma li. (Lev. 5:1) Alor, si enn kikenn dan lasanble inn fer enn pese grav, nou lamour ek nou fidelite anver Zeova bizin pous nou pou al dir sa bann ansien. Kan nou fer sa, nou pou ede pou ki lasanble res prop, ek ki sa kikenn ki’nn fer enn pese la regagn enn bon lamitie ar Zeova.

KOUMA BANN ANSIEN ED NOU?

12. Kouma bann ansien ed bann ki bizin regagn enn bon lamitie ar Zeova?

¹² Labib dir ki bann ansien bizin ed bann ki bizin regagn enn bon lamitie ar Zeova. (1 Tes. 5:14) Si to’nn fer enn pese, bann ansien kitfwa pou poz twa bann kestion pou konpran seki to panse ek seki to resanti. (Prov. 20:5) Kitfwa to kapav trouv sa difisil pou al koz ar bann ansien. Kitfwa to timid ouswa to onte pou koz lor seki’nn arive. Selman, pou ki bann ansien kapav ed twa, to bizin ouver to leker ar zot. Fode pa to per tansion to dir zot enn move kitsoz. (Zob 6:3) Kan to al koz ar bann ansien, zot pou fer zefor pou ekout twa bien, pou ki zot konpran bien to sitiasion. Zot pa pou prese pou tir bann konklizion. Lerla, apre sa, zot pou donn twa bann konsey. (Prov. 18:13) Bann ansien kone ki sa pran letan pou ed enn kikenn ki bizin led. Alor, zot konpran ki parfwa zot pou bizin zwenn enn kikenn de-trwa fwa pou ki zot kapav donn li led ki li bizin.

13. Kouma bann ansien kapav ed nou gras-a Labib ek lapriyer? (Get zimaz osi.)

¹³ Kan to koz ar bann ansien, zot pou fer tou seki zot kapav pou ki to pa santi twa plis koupab, ek zot pou priye pou twa. To pou etone kan to pou trouv “lefe pwisan” ki zot lapriyer ena! Labib dir ki zot pou osi “met delwil lor [twa] lor nom Zeova.” (Zak 5:14-16) Sa delwil-la se bann verite ki ena dan Labib. Savedir ki zot pou servi bien Labib pou ki zot kapav rekonfort twa ek ankouraz twa, pou ki to kapav regagn enn bon lamitie ar Zeova. (Iza. 57:18) Bann konsey Biblik ki zot pou donn twa, pou donn twa lafors pou to kapav kontign fer seki Zeova demann twa. Gras-a led bann ansien, to kapav tann lavwa Zeova pe dir twa: “Ala semin-la. Mars ladan.”—Iza. 30:21.

14. Dapre Galat 6:1, kouma bann ansien ed bann ki’nn fer “enn fopa”? (Get zimaz osi.)

¹⁴ Lir Galat 6:1. Kan enn Kretien fer “enn fopa” savedir ki li pa pe swiv bann prinsip Zeova. Kitfwa li’nn pran enn move desizion ouswa li’nn fer enn pese grav. Bann ansien kontan zot bann frer ek ser, akoz sa zot pou “esey redres sa dimounn-la avek douser.” Lexpresion Grek ki’nn servi pou “redres” dekrir fason ki enn dokter remet enn lezo ki’nn kase dan so plas, pou ki li kapav geri. Parey kouma enn bon dokter ki pou fer bien atansion kan li pe remet enn lezo dan so plas, pou ki sa dimounn-la pa gagn plis douler, bann ansien pou fer tou seki zot kapav pou ki enn kikenn ki’nn fer “enn fopa,” li pa plis soufer. Labib dir osi ki bann ansien bizin“fer atansion ar [zotmem].” Kan zot ed enn kikenn pou swiv bann prinsip Labib, bann ansien bizin rapel ki zot osi zot fer bann erer. Akoz sa, zot bizin fer bien atansion ki zot pa montre ki zot pli siperyer, pli drwat, ouswa pli bon ki sa dimounn-la. Olie sa, zot bizin kontign ena limilite ek montre konpasion anver li.—1 Pier 3:8.

15. Ki nou bizin fer si nou ena enn problem?

¹⁵ Nou kapav fer bann ansien dan nou lasanble konfians. Zeova inn ansegn zot kouma zot bizin gard bann kitsoz konfidansiel, kouma zot kapav donn bann konsey ki sorti dan Labib olie ki zot donn zot prop lopinion, ek osi kouma zot bizin kontign ed nou pou sarye nou fardo. (Prov. 11:13; Gal. 6:2) Mem si sak ansien ena so personalite ek so lexperyans, kan nou gagn enn problem nou kapav al koz ar ninport ki ansien. Selman, fode pa ki nou al rod konsey ar sak ansien ziska ki nou gagn enn kikenn ki dir nou seki nou anvi tande. Si nou fer sa, nou pou koumadir bann dimounn ki kontan ki “kares zot zorey” olie ki zot aksepte “bon lansegnman” ki ena dan Parol Bondie. (2 Tim. 4:3) Kan nou al koz ar enn ansien, li kapav demann nou si nou’nn fini koz ar bann lezot ansien ek osi si bann-la inn fini donn nou bann konsey. Enn ansien pou osi montre ki li ena modesti si li al rod konsey ar enn lot ansien.—Prov. 13:10.

NOU REPONSABILITE DEVAN ZEOVA

16. Ki responsabilite sakenn parmi nou ena?

¹⁶ Mem si bann ansien donn nou bann konsey ek ki zot ed nou kan nou ena bann problem, zot pa pou dir nou seki nou bizin fer. Sakenn parmi nou ena sa responsabilite devan Zeova: Par seki nou dir ek seki nou fer dan nou lavi toulezour, nou bizin montre Zeova ki nou kontan Li ek ki nou anvi fer Li plezir. Nou kapav sir ki Zeova pou ed nou pou pran bann bon desizion ek pou res fidel anver Li. (Rom. 14:12) Se pou sa rezon-la ki bann ansien pa pou dir nou seki nou bizin fer. Olie sa, zot pou servi Labib pou montre nou seki Zeova panse dan sertin sitiasion ek zot pou les nou pran nou prop desizion. Kan nou swiv bann konsey Biblik ki zot donn nou, nou pou form nou “kapasite pou konpran,” pou ki nou kapav pran bann bon desizion.—Ebre 5:14.

17. Ki Zeova anvi nou fer?

¹⁷ Nou bien rekonesan anver Zeova parski Li pran nou swin avek boukou tandres, parey kouma enn bon berze ki pran bien swin so bann mouton! Zeova inn avoy “enn bon berze” lor later, Zezi, pou ki li donn so lavi kouma enn ranson pou ki nou kapav viv pou touletan. (Zan 10:11) Ek gras-a bann ansien ki nou ena dan nou bann lasanble, Zeova inn tini promes ki Li ti fer, kan Li ti dir: “Mo pou donn zot bann berze ki mo leker inn swazire, ek vremem bann-la pou pran zot swin avek konesans ek avek lintelizans.” (Zer. 3:15) Alor, kan nou feb lor plan spiritiel ouswa kan nou bizin regagn enn bon lamitie ar Zeova, fode pa nou ezite pou al rod led bann ansien. Bann ansien, se enn dispozision ki Zeova inn pran pou nou, alor anou profit bien sa dispozision-la.