Kouma Bann Lager Pou Arete?

BONDIE POU ELIMINN BANN GOUVERNMAN IMIN

Bondie pou detrir tou bann gouvernman imin dan enn lager ki Labib apel lager Armagedon.a (Revelasion 16:16) Sa moman-la, “bann lerwa lor later antie” pou rasanble zot ansam pou “lager gran zour Bondie Tou-Pwisan.” (Revelasion 16:14) Apre lager Armagedon, pa pou ena okenn lager ankor lor later.

Bondie pou ranplas bann gouvernman imin par so Rwayom, setadir enn gouvernman ki pou dirize depi lesiel ek ki zame pa pou detrir. (Daniel 2:44) Bondie inn swazir so garson, Zezi Kris, kouma lerwa dan sa gouvernman-la. (Izai 9:6, 7; Matie 28:18) Sa gouvernman-la se sa mem Rwayomb ki Zezi ti ansegn so bann disip pou priye. (Matie 6:9, 10) Tou bann dimounn lor later pou viv ini anba enn sel gouvernman, ek se Zezi ki pou diriz nou.

Zezi pa pou fer parey kouma bann dirizan imin. Li pa pou servi pouvwar ki li ena pou so prop lintere. Parski li azir avek lazistis ek ki li pa fer preferans, personn pa pou bizin per ki tret li dan enn fason inzis akoz so ras, so nasionalite, ouswa so kiltir. (Izai 11:3, 4) Ek personn pa pou bizin lager pou lazistis. Kifer sa? Parski Zezi pou pran kont bien-et sak dimounn. “Li pou sap sa dimounn mizer ki kriye o-sekour la, ek osi sa dimounn ki dan gran sagrin la, ek ninport kisann-la ki pena personn pou ed li. . . . Li pou delivre zot ar bann ki pe fer dominer ar zot ek li pou tir zot dan violans.”—Psom 72:12-14.

Rwayom Bondie pou detrir tou bann zarm danzere ki ena lor later. (Mishe 4:3) Li pou osi tir tou bann move dimounn ki pa’le aret lager ouswa ki fer lezot ditor. (Psom 37:9, 10) Tou bann misie, tou bann madam, ek tou bann zanfan pou santi zot an sekirite ninport kotsa zot ete lor later.—Ezekiel 34:28.

Kan gouvernman Bondie pou diriz later, tou bann dimounn pou ena meyer lavi ki ena. Li pou tir tou bann problem ki fer bann dimounn lager, kouma par exanp lamizer, lafaminn, ek problem lakaz. Tou dimounn pou gagn enn kantite manze ki bon pou lasante ek zot pou gagn enn plas konfortab pou viv.—Psom 72:16; Izai 65:21-23.

Rwayom Bondie pou tir tou bann dega ki lager inn fer, parmi pena zis blesir fizik me ena osi bann problem mantal ek bann soufrans emosionel ki bann dimounn gagne akoz bann kitsoz terib ki arive pandan lager. Mem bann dimounn ki’nn mor pou resisite ek regagn lavi lor later. (Izai 25:8; 26:19; 35:5, 6) Bann fami pou reini ek bann dimounn pa pou mem rapel okenn move kitsoz ki’nn arive dan lepase parski “bann kitsoz ki ti ena avan finn disparet.”—Revelasion 21:4.

BONDIE POU ELIMINN PESE

Kan Rwayom Bondie pou diriz later, tou bann dimounn pou ador sel vre Bondie, Zeovac, “Bondie lamour ek lape.” (2 Korintien 13:11) Bann dimounn pou aprann viv ansam dan lape. (Izai 2:3, 4; 11:9) Bann dimounn ki obeir Bondie pou nepli fer pese, ek zot pou vinn parfe.—Romin 8:20, 21.

BONDIE POU ELIMINN SATAN EK SO BANN DEMON

Rwayom Bondie pou detrir bann ki inflians bann dimounn pou lager, setadir Satan ek so bann demon. (Revelasion 20:1-3, 10) San zot move linflians, “pou ena lape an-abondans.”—Psom 72:7.

Ou kapav sir ki promes ki Bondie fer pou eliminn lager pou realize. Bondie ena kapasite ek osi dezir pou fer li.

• Bondie ena sazes ek pouvwar ki bizin pou fer lager ek violans arete net. (Zob 9:4) Nanye pa inposib pou li.—Zob 42:2.

• Bondie deteste trouv bann dimounn soufer. (Izai 63:9) Li osi “ena laenn pou enn kikenn ki kontan laviolans.”—Psom 11:5.

• Bondie touletan tini parol; li pa kapav koz manti.—Izai 55:10, 11; Tit 1:2.