LARTIK LETID 10
KANTIK 31 Mars ar Bondie!
Ena Mem Fason Panse ki Zeova ek Zezi
“Parski Kris ti soufer kan li ti enn imin, zot osi prepar zot pou ena mem leta-d-espri.”—1 PIER 4:1.
PWIN PRINSIPAL
Dan sa lartik-la, nou pou trouve kouma lapot Pier ti aprann pou pans parey kouma Zezi ek nou pou trouve kouma nou osi nou kapav fer parey.
1-2. Ki savedir kontan Zeova, ek kouma Zezi inn montre ki li kontan Zeova?
ZEZI ti explike ki komannman pli inportan se: “To bizin kontan Zeova to Bondie avek tou to leker, avek tou to lavi, avek tou to lafors ek avek tou to lespri.” (Lik 10:27) Savedir ki nou bizin kontan Zeova avek tou seki nou ena ek avek tou seki nou ete. Sa konsern nou bann dezir, nou bann lemosion, nou lafors, ek osi nou fason panse. Biensir, nou pa kapav konpran net Zeova so fason panse. Me enn kitsoz ki kapav ed nou pou konpran Zeova so fason panse, se kan nou etidie “fason panse Kris,” parski Zezi pans parey kouma Zeova.—1 Kor. 2:16.
2 Zezi kontan Zeova avek tou so lespri. Kan li ti lor later, li ti kone seki Zeova ti anvi li fer, ek li ti bien deside pou azir an-akor ar So volonte, mem si li ti kone ki li ti pou soufer akoz sa. Zezi ti vremem anvi fer volonte so Papa, akoz sa li pa ti les nanye vinn pli inportan pou li.
3. Ki kitsoz lapot Pier ti aprann avek Zezi, ek ki li ti ankouraz bann Kretien pou fer? (1 Pier 4:1)
3 Pier ek bann lezot zapot ti gagn privilez pou pas boukou letan avek Zezi ek pou aprann pou ena mem fason panse ki li. Kan Pier ti ekrir so premie let, li ti ankouraz bann Kretien pou “prepar zot pou ena mem leta-d-espri” ki Zezi.a (Lir 1 Pier 4:1.) Kan Pier ti dir bann Kretien “prepar zot,” li ti servi enn lexpresion ki ti dekrir kouma bann solda bizin prepar zot bann zarm pou zot al lager. Alor, si bann Kretien ena mem fason panse ki Zezi, zot pou bien ekipe pou lit kont zot dezir pou fer pese ek pou lit kont lemond Satan.—2 Kor. 10:3-5; Efe. 6:12.
4. Ki nou pou examine dan sa lartik-la?
4 Dan sa lartik-la, nou pou aprann plis lor fason panse Zezi ek nou pou gete kouma nou kapav ena mem fason panse ki li. Nou pou gete kouma nou kapav (1) ena mem fason panse ki Zeova, parski sa bien inportan pou ki tou bann serviter Zeova tom dakor ant zot. (2) Nou pou gete kouma nou kapav ena limilite, ek (3) kouma nou kapav ena bon zizman kan nou kont lor Zeova dan lapriyer.
ENA MEM FASON PANSE KI ZEOVA
5. Dan ki sitiasion Pier pa ti ena mem fason panse ki Zeova?
5 Anou get enn sitiasion kot lapot Pier pa ti ena mem fason panse ki Zeova. Zezi ti dir so bann zapot ki li ti bizin al Zerizalem, ek ki laba bann sef relizie ti pou aret li, ti pou tortir li ek ti pou touy li. (Mat. 16:21) Pier ti kone ki Zezi ti Lemesi ek ki li ti pou sap pep Bondie. Alor, li ti trouv sa difisil pou krwar ki Zeova ti pou les Zezi mor. (Mat. 16:16) Akoz sa, Pier ti amenn Zezi dan enn kwin, ek li ti dir li: “To bizin bon ar tomem, Segner; zame sa pa pou ariv twa.” (Mat. 16:22) Dan sa sitiasion-la, Pier pa ti ena mem fason panse ki Zeova, ek akoz sa, Zezi pa ti dakor ar li.
6. Kouma Zezi ti montre ki li ena mem fason panse ki Zeova?
6 Zezi ti ena mem fason panse ki so Papa lor sa sitiasion-la. Akoz sa, li ti dir Pier: “Pas deryer mwa, Satan! To kouma enn ros lor mo sime, parski to pa pans kouma Bondie me kouma bann zom.” (Mat. 16:23) Zezi ti kone ki, pou li fer volonte Zeova, li ti pou bizin soufer ek mor. Se akoz sa ki li pa ti aksepte konsey ki Pier ti donn li, mem si Pier ti pe esey ed li. Sa zour-la, Pier ti aprann ki li bizin fer zefor pou pans parey kouma Zeova. Se enn leson bien inportan ki nou osi nou bizin aprann.
7. Kouma Pier ti montre ki li ti sanz so fason panse? (Get lor kouvertir.)
7 Avek letan, Pier ti montre ki li ti anvi aprann pans parey kouma Zeova. Kan ti ariv ler pou ki bann non-Zwif form parti dan pep Bondie, Zeova ti avoy Pier pres ar Korney. Korney ti pou premie non-Zwif ki ti pou vinn enn Kretien. Bann Zwif pa ti gagn zafer ar bann non-Zwif. Alor, Pier ti bizin sanz so fason panse pou ki li kapav al pres ar bann non-Zwif. Ek kan Pier ti konpran fason panse Zeova dan sa sitiasion-la, li ti fer bann sanzman ki bizin. Lerla, kan Korney ti demann Pier pou vinn kot li, Pier ti ale “san okenn obzeksion.” (Zist. 10:28, 29) Li ti pres ar Korney ek tou bann ki res kot li, ek zot tou ti pran batem.—Zist. 10:21-23, 34, 35, 44-48.
Pier pe rant dan lakaz Korney (Get paragraf 7)
8. Kouma to kapav montre ki to ena mem fason panse ki Zeova? (1 Pier 3:8 ek not)
8 Plizir lane apre, Pier ti dir bann Kretien ki zot “bizin tom dakor” ant zot. (Lir 1 Pier 3:8 ek not.) Pou nou reisi tom dakor ar nou bann frer ek ser, nou bizin aprann konn fason panse Zeova gras-a Labib, ek nou bizin fer zefor pou ena mem fason panse ki Li. Par exanp, Zezi ti ankouraz so bann disip pou met Rwayom Bondie an premie dan zot lavi. (Mat. 6:33) Alor, si enn kikenn dan to lasanble desid pou rant dan servis aplintan, kouma to kapav ena mem fason panse ki Zeova? Olie ki to dir li ki li ‘bizin bon ar limem,’ to kapav dir bann kitsoz pozitif lor so lobzektif ek to kapav propoz li to led.
ENA LIMILITE
9-10. Kouma Zezi ti montre ki li ena boukou limilite?
9 Lanwit avan so lamor, Zezi ti ansegn Pier ek bann lezot zapot enn leson bien inportan lor limilite. Inpe avan, Zezi ti avoy Pier ek Zan pou al prepar bann kitsoz ki zot ti pou bizin pou dernie repa ki li ti pou pran avek zot. Parmi bann preparasion ki zot ti bizin fer, zot ti bizin prepar enn kivet ek bann serviet pou ki Zezi ek bann zapot kapav lav zot lipie avan ki zot manze. Me kisann-la ti pou ena ase limilite pou lav lipie zot kamarad?
10 Zezi pa ti ezite pou fer sa travay-la, ek sa ti montre ki li ti ena boukou limilite. Sirman bann zapot ti bien etone, parski Zezi ti pe fer enn travay ki bann serviter abitie fer. Zezi ti tir so manto, li ti atas enn serviet otour so lerin, li ti met delo dan enn kivet ek li ti koumans lav zot lipie. (Zan 13:4, 5) Sirman sa ti pran inpe letan, parski li ti lav lipie toule 12 zapot; li ti mem lav lipie Zida, ki ti pou trayir li apre. Pourtan, avek boukou limilite, Zezi ti fer sa travay-la. Apre sa, Zezi ti explik so bann zapot kifer li ti fer sa. Li ti dir zot: “Eski zot konpran ki mo’nn fer avek zot? Zot apel mwa ‘Ansegnan’ ek ‘Segner,’ ek zot ena rezon, parski samem mo ete. Si mwa ki Segner ek Ansegnan mo’nn lav zot lipie, alor zot osi zot bizin lav lipie zot kamarad.”—Zan 13:12-14.
Limilite inplik seki nou panse lor nou-mem ek osi lor lezot
11. Kouma Pier ti montre ki li fer zefor pou ena limilite? (1 Pier 5:5) (Get zimaz osi.)
11 Pier ti aprann pou ena limilite gras-a lexanp Zezi. Apre ki Zezi ti retourn dan lesiel, Pier ti fer enn mirak ek li ti geri enn misie ki ti andikape depi so nesans. (Zist. 1:8, 9; 3:2, 6-8) Enn gran lafoul dimounn ti trouv sa mirak-la, ek zot ti antour Pier. (Zist. 3:11) Me mem si Pier ti grandi dan enn kiltir kot bann dimounn kontan grander, li pa ti atir latansion lor limem. Okontrer, li ti ena limilite ek li ti atir latansion lor Zeova ek Zezi, kan li ti dir: “Gras-a nom Zezi, ek nou lafwa dan so nom, sa zom ki zot pe trouve ek ki zot kone la inn regagn lafors.” (Zist. 3:12-16) Plitar, Pier ti ekrir bann Kretien pou dir zot ki zot bizin ena limilite. Dan lang ki li ti ekrir zot, li ti servi enn lexpresion ki montre ki nou bizin met limilite lor nou koumadir nou pe met enn linz. Sa lide-la rapel nou kouma Zezi ti atas enn serviet otour so lerin ek ti lav lipie so bann zapot.—Lir 1 Pier 5:5.
Apre ki Pier ti fer enn mirak, avek limilite li ti atir latansion lor Zeova ek Zezi. Nou osi, nou kapav montre ki nou ena limilite kan nou fer bann bon kitsoz san ki nou atir latansion lor nou-mem ek san ki nou atann kitsoz an retour (Get paragraf 11-12)
12. Kouma nou kapav fer zefor pou ena limilite parey kouma Pier?
12 Nou bizin swiv lexanp Pier ek kontign fer zefor pou ena limilite. Lexpresion ki Pier servi pou “limilite” montre ki limilite inplik seki nou panse lor nou-mem ek osi lor lezot. Alor, kan enn kikenn ena limilite, se pa zis so bann parol ki montre ki li ena limilite, me so bann aksion osi. Par exanp, kan nou fer bann kitsoz pou lezot, nou fer sa parski nou kontan Zeova ek nou kontan bann dimounn, pa parski nou anvi atir latansion lor nou-mem. Nou montre ki nou ena vre limilite kan nou kontan pou servi Zeova ek pou servi nou bann frer ek ser, mem si lezot pa remark seki nou fer.—Mat. 6:1-4.
ENA “BON ZIZMAN”
13. Ki savedir ena “bon zizman”?
13 Ki savedir ena “bon zizman”? (1 Pier 4:7) Enn Kretien ki ena “bon zizman” pou fer so maximum pou pran bann desizion ki an-akor avek fason panse Zeova. Li kone ki pena nanye ki pli inportan ki so lamitie avek Zeova. Li pa pou panse ki li pli siperyer ki lezot, parski li kone ki li pa konn tou kitsoz. Li montre osi ki li kont lor Zeova kan li priye Li souvan pou rod So direksion.b
14. Kan eski Pier pa ti reisi kont lor Zeova?
14 Lanwit avan so lamor, Zezi ti averti so bann disip ek li ti dir zot: “Aswar, zot tou pou abandonn mwa.” Me Pier ti panse ki li ti for, ek li ti reponn: “Mem si zot tou abandonn twa, mwa zame mo pa pou abandonn twa!” Sa mem lanwit-la, Zezi ti ankouraz sertin parmi so bann disip, ek li ti dir zot: “Kontign veye ek kontign priye.” (Mat. 26:31, 33, 41) Malerezman, Pier pa ti swiv sa konsey-la. Si li ti swiv sa konsey-la, kitfwa li ti pou ena ase kouraz apre pou dir ki li ti enn disip Zezi. Selman, Pier ti dir ki li pa ti konn Zezi, ek li bien regret seki li ti dir.—Mat. 26:69-75.
15. Zis avan so lamor, kouma Zezi ti montre ki li ti ena bon zizman?
15 Zezi ti touletan kont lor Zeova. Mem si Zezi ti parfe, lanwit avan so lamor, plizir fwa li ti kontign priye Zeova. Gras-a sa, li ti gagn kouraz pou fer volonte so Papa. (Mat. 26:39, 42, 44; Zan 18:4, 5) Ek kan Pier ti trouv Zezi priye plizir fwa pandan sa lanwit-la, sirman sa ti ena enn gran lefe lor li.
16. Kouma nou kone ki Pier ti fer zefor pou ena bon zizman? (1 Pier 4:7)
16 Avek letan, Pier ti aprann pou kont plis lor Zeova dan lapriyer. Kan Zezi ti resisite, li ti dir Pier ek bann lezot zapot ki zot ti pou gagn lespri sin pou ki zot kapav kontign pres bon nouvel. Selman, Zezi ti demann zot pou atann dan Zerizalem ziska ki sa arive. (Lik 24:49; Zist. 1:4, 5) Ki Pier ti fer pandan ki li ti pe atann? Labib dir ki Pier ek bann lezot Kretien “ti pe kontign priye.” (Zist. 1:13, 14) Plitar, dan so premie let, Pier ti ankouraz so bann frer ek ser pou ena bon zizman ek pou kont lor Zeova dan lapriyer. (Lir 1 Pier 4:7.) Tousala montre ki Pier ti vinn enn frer ki ena matirite, ek li ti osi vinn enn kolonn dan lasanble, savedir ki li ti ed ek ranforsi lafwa so bann frer ek ser.—Gal. 2:9.
17. Mem si sertin kitsoz paret fasil pou fer, ki kitsoz nou bizin kontign fer? (Get zimaz osi.)
17 Nou osi parey, pou nou ena bon zizman, nou bizin priye Zeova souvan. Avredir, pou tou kitsoz ki nou fer, nou bizin rod led Zeova. Li bien inportan ki nou kont lor Zeova ek ki nou priye Li, mem si nou bizin fer bann kitsoz ki paret fasil pou fer. Ek biensir, kan nou ena bann desizion inportan pou pran, nou bizin priye Zeova pou gagn so led, ek nou bizin ena konfians ki Li kone seki pli bon pou nou.
Pier ti aprann pou kont lor Zeova dan lapriyer. Nou osi, nou kapav montre ki nou ena bon zizman kan nou priye Zeova pou gagn so led, sirtou kan nou ena bann desizion inportan pou pran (Get paragraf 17)c
18. Kouma nou kapav kontign fer zefor pou ena mem fason panse ki Zeova?
18 Nou bien rekonesan anver Zeova parski Li’nn kree nou dan enn fason ki nou kapav imit so bann zoli kalite. (Zen. 1:26) Biensir, nou pa kapav imit Li dan enn fason parfe. (Iza. 55:9) Selman, parey kouma Pier, nou bizin aprann pou pans parey kouma Zeova. Alor, anou kontign fer zefor pou ena mem fason panse ki Zeova, pou ena limilite, ek pou ena bon zizman.
KANTIK 30 Mo Bondie, Mo Kamarad, ek Mo Papa
a Dan 1 Pier 4:1, lexpresion “leta-d-espri,” vedir osi “fason panse, latitid, rezonnman.”
b Pou konn plis lor seki savedir ena bon zizman, al dan « Que veulent dire ces versets ? » ek get lartik « 2 Timothée 1:7: ‘Dieu ne nous a pas donné un esprit de crainte’ » lor jw.org ouswa lor JW Library.
c DESKRIPSION ZIMAZ : Enn ser pe priye Zeova dan so leker pandan ki li pe atann pou fer enn interview.