Imit Zeova So Limilite

1. Kan to mazinn limilite ki Zeova ena, ki kitsoz inpresionn twa?

KAN to pans bann dirizan ki ena dan lemond azordi, eski to pou dir ki zot ena limilite? Kitfwa non. Parkont, Zeova Li, mem si Li Tou-Pwisan, Li ena limilite. (Ps. 113:5-8) Pena personn ki ena otan limilite ki Zeova. Li pena okenn lorgey dan Li. Dan sa lartik-la, nou pou trouv kat zoli kalite ki Zeova ena, ek nou pou gete kouma sakenn parmi sa bann kalite-la montre ki Li ena limilite. Nou pou trouve osi kouma Zezi ena limilite, parey kouma so Papa. Kan nou pou examinn sa bann kalite-la, nou pou trouve kouma sa kapav ed nou pou vinn pli pros ar Zeova ek osi kouma nou kapav ena plis limilite.

ZEOVA LI ABORDAB

2. Ki nou aprann lor Zeova dan Psom 62:8? (Get zimaz osi.)

² Bann dimounn ki orgeye, bien souvan zot pa bann dimounn ki abordab. Kifer nou dir sa? Parski bann dimounn orgeye panse ki zot pli bon ki lezot. Akoz sa, bien souvan zot tret lezot dan enn move fason, ek lerla lezot prefer evit frekant zot. Me Zeova Li pa koumsa ditou! Okontrer, parski Li ena limilite, Li ankouraz nou pou ouver nou leker ar Li ek pou dir Li tou seki pe trakas nou. (Lir Psom 62:8.) Parey kouma enn bon papa ki anvi konn santiman ek traka ki so zanfan ena, Zeova ekout lapriyer so bann serviter avek boukou latansion. Avredir, Li’nn fer ekrir boukou parmi sa bann lapriyer-la dan Labib, ek sa montre ki Li abordab ek ki Li vremem anvi tann nou bann lapriyer. (Zozwe 10:12-14; 1 Sam. 1:10-18) Me eski parfwa, akoz bann erer ki to’nn fer, to panse ki Zeova pa kontan twa, ek akoz sa to ezite pou priye Li?

3. Kifer to kapav sir ki Zeova anvi ki to priye Li souvan?

³ Mem si to panse ki Zeova pa kontan twa, to kapav ouver to leker avek Li. Kouma nou konn sa? Dan lexanp “Garson Ki Ti Perdi,” Zezi konpar Zeova ar enn bon papa. Sa papa-la so garson ti fer boukou erer ek garson-la ti panse ki so papa pa ti pou aksepte ki li retourn kot li. Me ki papa-la ti fer kan so garson ti retourne? Zezi dir ki deswit kouma papa-la ti trouv so garson, li “ti galoupe, ti may li ek ti anbras li avek boukou lafeksion.” (Lik 15:17-20) Zeova Li parey kouma sa papa-la! Kan enn kikenn ki santi li koupab, ki trakase, ouswa ki dekouraze, priye Li, Li ekout so lapriyer avek boukou latansion. (Lam. 3:19, 20) Zeova ena boukou konpasion, ek kan Li tann sa kalite lapriyer-la, Li anvi rekonfort sa dimounn-la ek rasir li ki Li kontan li, parey kouma sa papa ki ti galoupe pou al zwenn so garson-la. (Iza. 57:15) Kouma Zeova fer sa azordi? Bien souvan, Li servi bann ansien, bann manb nou fami ki dan laverite, ouswa nou bann frer ek ser, pou rekonfort nou. (Zak 5:14, 15) Zeova fer sa parski Li anvi ki nou vinn pros ar Li.

4. Kouma Zezi ti montre ki li ti abordab?

⁴ Zezi imit so Papa. Zezi ena limilite, parey kouma so Papa. Ek akoz sa, kan li ti lor later, bann dimounn ti santi zot alez pou koz avek li. Zot pa ti per pou poz li bann kestion. (Mark 4:10, 11) Kan li ti demann zot zot lopinion lor enn kitsoz, zot pa ti ezite pou dir li seki zot ti vremem resanti. (Mat. 16:13-16) Kan zot ti fer bann erer, zot pa ti per tansion li ankoler ar zot. Zot ti kone ki li ti bon ek ki li ti ena mizerikord ek pasians. (Mat. 17:24-27) Ek parski Zezi ti imit so Papa dan enn fason parfe, so bann disip ti aprann konn Zeova pli bien. (Zan 14:9) Gras-a Zezi, zot ti konpran ki Zeova ena limilite ek ki Li ti anvi vinn pros ar zot. Zot ti konpran osi ki Zeova pa ti parey kouma zot bann sef relizie, ki ti orgeye ek ki pa ti gagn zot traka.

5. Kouma limilite kapav ed nou pou vinn pli abordab?

⁵ Kouma nou kapav imit Zeova? Kan nou fer zefor pou ena plis limilite, lezot pou santi zot alez pou vinn koz ar nou. Si nou pena limilite, nou pou zalou lezot, nou pou panse ki nou pli bon ki zot, ek nou pa pou pardonn zot kan zot fer bann erer. Ek si nou azir koumsa, personn pa pou anvi frekant nou. Parkont, si nou ena limilite, nou pou zanti anver lezot, nou pou ena pasians, ek nou pou pardonn zot. Ek si nou azir koumsa, lezot pou anvi vinn nou kamarad. (Kol. 3:12-14) Se sirtou bann ansien ki bizin fer zefor pou vinn pli abordab. Ek pou zot reisi fer sa, zot bizin ansam ar zot bann frer ek ser. Savedir ki zot bizin fer zot maximum pou asiste bann renion an prezansiel, olie ki zot fer sa par video-konferans. Zot bizin osi fer zot maximum pou prese lakaz-lakaz avek bann frer ek ser. Plis bann frer ek ser abitie ar bann ansien, plis zot pou santi zot alez pou koz ar bann ansien kan zot bizin led.

ZEOVA LI REZONAB

6-7. Donn bann lexanp ki montre kouma Zeova ti ekout ek exos lapriyer so bann serviter.

⁶ Bann dimounn ki orgeye, bien souvan zot panse ki zot konn plis ki lezot, ek akoz sa, zot teti ek zot latet dir. Parkont, mem si Zeova konn tou kitsoz, Li ena limilite, Li rezonab, Li pran letan pou ekout lezot, ek Li mem dispoze pou sanz so desizion. Anou gete kouma Zeova ti azir ar Miryam. Kan Miryam ek Aaron ti koz kont zot frer Moiz, Zeova ti bien ankoler. Kifer? Parski Moiz ti pe reprezant Li, ek kan Miryam ti koz kont Moiz, se koumadir li pa ti ena okenn respe pou Zeova. Lerla, Zeova ti fer Miryam gagn lalep. Me kan Aaron ti demann Moiz pou ed Miryam, Moiz ti sipliy Zeova pou Li geri so ser. Ki Zeova ti fer? Enn kikenn ki orgeye, kitfwa pa ti pou fer nanye. Me Zeova pa ti azir koumsa! Ek parski Li ena limilite, Li ti ekout Moiz ek Li ti geri Miryam.—Nonb 12:1-15.

⁷ Zeova inn osi montre limilite dan fason ki Li ti azir ar Lerwa Ezekias. Kan Zeova ti avoy profet Izai pou dir Ezekias ki li ti pou mor, Ezekias ti plore ek li ti sipliy Zeova pou geri li. Lerla, Zeova ti montre mizerikord anver li ek Li ti dir li ki li pou viv ankor 15 an. (2 Ler. 20:1, 5, 6) Zeova vremem ena konpasion pou bann dimounn, ek parski Li ena limilite, Li ekout ek exos zot bann lapriyer.

8. Donn bann lexanp ki montre ki Zezi li rezonab. (Mark 3:1-6)

⁸ Zezi imit so Papa. Kan Zezi ti lor later, li ti ed bann dimounn kan sa ti posib, mem si kitfwa sa pa ti an-akor ar Lalwa. Par exanp, pandan zour Saba, li ti geri bann dimounn mem si bann sef relizie ti panse ki li pa ti gagn drwa fer sa sa zour-la. Sa ti montre ki Zezi ti ena konpasion ek ki li ti rezonab. Li pa ti kriel. (Lir Mark 3:1-6.) Azordi osi, Zezi montre ki li rezonab ek ki li ena konpasion dan fason ki li diriz bann lasanble. Par exanp, kan enn kikenn dan lasanble fer enn pese grav, li montre pasians ar sa dimounn-la ek li donn li lokazion pou sanze.—Rev. 2:2-5.

9. Kouma nou kapav vinn enn kikenn ki rezonab? (Get zimaz osi.)

⁹ Kouma nou kapav imit Zeova? Pou nou vinn enn kikenn ki rezonab, nou bizin fer zefor pou pans ek pou azir parey kouma Zeova. (Zak 3:17) Par exanp, enn paran ki rezonab, li pa pou atann ki so zanfan fer bann kitsoz ki li pa kapav fer. Zakob ti enn bon lexanp dan sa domenn-la, parski li ti montre li rezonab ar so bann zanfan. (Zen. 33:12-14) Enn paran ki ena limilite ek ki rezonab, li pa pou konpar so zanfan ar bann lezot zanfan. Bann ansien osi bizin rezonab. Par exanp, kan mazorite ansien inn dakor ar enn desizion ek ki sa desizion-la pa al kont bann prinsip Labib, enn ansien pou soutenir sa desizion-la ek li pa pou rod inpoz so lopinion. (1 Tim. 3:2, 3) Ek nou tou dan lasanble nou bizin fer zefor pou konpran fason panse lezot, mem si kitfwa nou nou pa pans koumsa. (Rom. 14:1) Wi, anou kontign fer zefor pou ki “tou dimounn kone ki [nou] rezonab.”—Fil. 4:5.

ZEOVA ENA PASIANS

10. Kouma Zeova inn montre ki Li ena pasians?

¹⁰ Bann dimounn ki orgeye, zot mank pasians, ek bien souvan zot pa kontan kan lezot fer zot atann. Me Zeova Li pa koumsa ditou! Okontrer, Li ena plis pasians ki ninport kisann-la. Par exanp, dan lepok Noe, Zeova ti dir ki Li ti pou atann 120 an avan ki Li detrir bann move dimounn. (Zen. 6:3) Gras-a sa, Noe ti gagn ase letan pou elve so bann zanfan ek aranz enn lars avek led so fami. Plitar, Zeova ti ekout Abraam avek pasians kan Abraam ti poz li bann kestion lor destriksion Sodom ek Gomor. Enn kikenn ki orgeye, kitfwa ti pou dir li, ‘To panse mo pa kone ki mo bizin fer!’ Me parski Zeova ena limilite, Li ti ena pasians ar Abraam.—Zen. 18:20-33.

11. Dapre 2 Pier 3:9, kifer Zeova pe montre pasians dan nou lepok?

¹¹ Zeova pe montre pasians dan nou lepok osi. Par exanp, mem si Li’nn fini fixe enn ler pou Li amenn lafin, Li pe atann avek pasians ki sa ler-la arive. Kifer? “Parski li pa anvi ki personn detrir, me li anvi ki tou dimounn repanti.” (Lir 2 Pier 3:9.) Me eski Zeova so pasians li dan vid? Non! Parski gras-a so pasians, bann milyon dimounn inn vinn pros ar Li ek inn vinn so kamarad. Ek nou espere ki bann milyon dimounn ankor pou reisi fer sa! Selman, Zeova so pasians ena bann limit osi. Mem si Li kontan bann dimounn, Li pa pou les zot fer seki zot anvi pou touletan. Biento, Li pou detrir bann move dimounn.—Abak. 2:3.

12. Kouma Zezi pe imit pasians Zeova?

¹² Zezi imit so Papa. Pandan plizir milye lane, Zezi osi inn ena pasians. Par exanp, li’nn trouv Satan koz manti lor Zeova ek lor So bann fidel serviter. (Zen. 3:4, 5; Zob 1:11; Rev. 12:10) Li’nn trouve osi kouma bann dimounn pe bien soufer. Alor, nou kapav sir ki li ena enn gran dezir “pou detrir bann travay Lediab”! (1 Zan 3:8) Me ki kitsoz pe ed Zezi pou atann avek pasians ziska ki Zeova donn li permision pou fer sa? Se limilite. Zezi ena limilite ek li kone ki se Zeova ki deside kan lafin pou vini.—Zist. 1:7.

13. Kouma Zezi ti montre ki li ena pasians ar so bann zapot, ek kifer li ti ena pasians ar zot?

¹³ Kan Zezi ti lor later, li ti osi ena pasians ar so bann zapot. Par exanp, kan bann zapot ti diskite plizir fwa pou kone kisann-la parmi zot ti pli inportan, Zezi pa ti plin ar zot. Okontrer, li ti kontign ena pasians. (Lik 9:46; 22:24-27) Li ti sir ki avek letan, zot ti pou ena plis limilite. Eski to’nn deza fer mem erer plizir fwa? Si wi, alor sirman to bien kontan ki to ena enn Lerwa kouma Zezi, ki ena boukou pasians ek limilite!

14. Ki kitsoz kapav ed nou pou ena plis pasians?

¹⁴ Kouma nou kapav imit Zeova? Pou ki nou pans ek azir parey kouma Zeova, nou bizin fer zefor pou ena “fason panse Kris.” (1 Kor. 2:16) Ek ki kitsoz kapav ed nou pou ena “fason panse Kris”? Nou bizin lir bann Levanzil. Apre sa, nou bizin pran letan pou reflesi lor seki nou’nn lir ek demann nou-mem kifer Zezi ti pans ek azir koumsa. Nou bizin osi priye Zeova pou ki Li ed nou pou ena pasians ek limilite, parey kouma Zezi. Plis nou fer zefor pou ena “fason panse Kris,” plis nou pou kapav imit Zeova ek ena pasians avek nou-mem ek avek lezot osi.—Mat. 18:26-30, 35.

ZEOVA KONTAN EK RESPEKTE BANN DIMOUNN KI ENA LIMILITE

15. Donn bann lexanp pou montre ki Zeova kontan bann dimounn ki ena limilite. (Psom 138:6)

¹⁵ Lir Psom 138:6. Zeova, Personaz pli gran dan liniver, kontan ek respekte bann dimounn ki ena limilite. Extraordiner, pa vre! Atraver listwar, finn ena boukou dimounn ki lezot ti konsider kouma inferyer. Selman, pou Zeova, zot ti ena boukou valer. Kitfwa nou pa tro konn sertin parmi zot, selman Zeova inn koz lor zot dan Labib. Par exanp, ena Debora, enn servant ki ti servi dan lakaz Izaak ek Zakob avek fidelite pandan apepre 125 an. Mem si nou pa konn boukou kitsoz lor li, Zeova ti fer Moiz ekrir enn detay lor li, ki montre ki kantite bann dimounn ti kontan li. (Zen. 24:59; 35:8, not) Bann santenn lane apre, Zeova ti fer David, enn zenn berze, vinn lerwa lor pep Izrael. (2 Sam. 22:1, 36) Inpe apre ki Zezi ti ne, Zeova ti avoy bann anz pou fer bann berze kone ki Lemesi ti ne dan Betleem. Zot ti bann premie pou konn sa, ek se vremem enn gran loner ki Zeova ti donn zot. (Lik 2:8-11) Ek kan Zozef ek Mari ti amenn Zezi dan tanp, Zeova ti montre ki Li ti kontan ek ki Li ti ena respe pou de vie dimounn, Simeon ek Ann, kan Li ti donn zot privilez pou trouv So Garson. (Lik 2:25-30, 36-38) Wi, “Zeova, so pozision bien ot, ek pourtan Li trouv dimounn ki ena limilite”!

16. Kouma Zezi imit so Papa dan fason ki li azir avek lezot?

¹⁶ Zezi imit so Papa. Parey kouma so Papa, Zezi kontan bann dimounn ki ena limilite. Par exanp, li ti ansegn bann dimounn ki “pa ti ena boukou ledikasion ek . . . bann dimounn sinp” bann verite lor Rwayom Bondie. (Zist. 4:13; Mat. 11:25) Li ti osi geri bann dimounn ki ti malad, ek li ti fer sa dan enn fason ki ti montre ki li ti kontan zot ek respekte zot. (Lik 5:13) Lanwit avan so lamor, Zezi ti fer enn kitsoz ki bann serviter abitie fer; li ti lav lipie so bann zapot. (Zan 13:5) Ek avan ki li mont dan lesiel, li ti donn enn gran loner so bann disip. Li ti donn zot travay pli inportan ki ena, setadir ed bann dimounn pou ki zot kapav gagn lavi eternel. Ek nou osi, nou ena sa gran loner-la azordi!—Mat. 28:19, 20.

17. Kouma nou kapav montre ki nou kontan ek respekte lezot? (Get zimaz osi.)

¹⁷ Kouma nou kapav imit Zeova? Nou montre ki nou kontan ek respekte bann dimounn kan nou pres bon nouvel avek tou dimounn. Nou fer sa, mem si zot ledikasion, zot kiltir, ek zot kouler lapo pa parey kouma nou. Ek nou montre ki nou kontan ek respekte nou bann frer ek ser kan nou konsider zot kouma pli siperyer ki nou. Nou fer sa, mem si nou ena pli boukou kapasite ouswa pli boukou responsabilite ki zot dan lasanble. (Fil. 2:3) Zeova bien kontan kan, avek limilite, nou “touzour premie pou onor” lezot dan diferan fason.—Rom. 12:10; Sof. 3:12.

18. Kifer to anvi imit Zeova so limilite?

¹⁸ Kan nou fer zefor pou imit Zeova so limilite, nou pou vinn pli abordab, nou pou vinn pli rezonab, ek nou pou ena plis pasians. Lerla, nou pou kontan ek respekte lezot, parey kouma Zeova. Alor, anou kontign fer zefor pou vinn pli pros ar nou Bondie ki ena limilite, koumsa nou pou ena ankor plis valer devan so lizie!—Iza. 43:4.