LARTIK LETID 23
KANTIK 2 Zeova Se To Nom
Kifer Nom Zeova Bien Inportan pou Nou?
“Ala seki Zeova dir, ‘Zot mo bann temwin.’”—IZA. 43:10.
PWIN PRINSIPAL
Dan sa lartik-la, nou pou gete seki nou bizin fer pou montre ki Zeova Li sin ek pou montre ki tou seki Satan inn dir lor Zeova, li fos.
1-2. Kouma nou kone ki nom Zeova bien inportan pou Zezi?
NOM Zeova, samem kitsoz pli inportan pou Zezi. Zezi limem personaz prinsipal ki sanktifie nom Zeova. Dan lartik avan, nou ti trouve kouma Zezi ti aksepte mor pou montre ki Zeova Li sin ek ki tou seki Zeova fer, li drwat. (Mark 14:36; Ebre 10:7-9) Ek apre Regn Mil An, Zezi pou aksepte retourn tou lotorite so Papa, parski li anvi ki so Papa gagn tou laglwar. (1 Kor. 15:26-28) Tou seki Zezi inn fer pou Zeova montre ki li extra kontan Zeova.
2 Zezi inn vinn lor later pou reprezant Zeova. (Zan 5:43; 12:13) Li ti fer so bann disip konn nom so Papa. (Zan 17:6, 26) Li ti ansegn bann dimounn ek li ti fer bann mirak lor nom Zeova. (Zan 10:25) Zezi ti osi demann Zeova pou vey lor so bann disip “akoz [So] nom.” (Zan 17:11) Li kler ki nom Zeova, samem ki pli inportan pou Zezi. Alor, kouma enn kikenn kapav dir ki li enn vre disip Zezi, si li pa konn nom Zeova ouswa si li pa servi So nom?
3. Ki nou pou examine dan sa lartik-la?
3 Parski nou bann vre Kretien, nou imit Zezi kan nou montre lamour ek respe pou nom Zeova. (1 Pier 2:21) Dan sa lartik-la, nou pou trouve kifer Zeova inn donn so nom bann ki anons “bon nouvel lor Rwayom.” (Mat. 24:14) Nou pou trouve osi kouma nou kapav montre ki nom Zeova bien inportan pou nou.
“ENN PEP POU SO NOM”
4. (a) Avan ki li mont dan lesiel, ki Zezi ti dir so bann disip? (b) Ki kestion nou pou reponn aster-la?
4 Avan ki Zezi mont dan lesiel, li ti dir so bann disip: “Zot pou gagn pwisans kan lespri sin pou desann lor zot, ek zot pou vinn mo bann temwin dan Zerizalem, partou dan Zide ek Samari, ek ziska dan bann landrwa pli lwin lor later.” (Zist. 1:8) Alor, bann disip Zezi ti pou bizin pres bon nouvel partou, pa zis dan Izrael. Ek avek letan, bann dimounn ki res partou lor later antie, ti pou gagn lokazion pou vinn bann disip Zezi. (Mat. 28:19, 20) Me kan Zezi ti dir, “Zot pou vinn mo bann temwin,” eski savedir ki sa bann nouvo disip-la ti pou zis bann temwin Zezi, ouswa eski zot ti pou bizin konn nom Zeova? Nou gagn repons sa kestion-la kan nou lir Zistwar Bann Zapot sapit 15.
5. Kouma bann zapot ek bann ansien dan Zerizalem ti montre ki tou dimounn ti bizin konn nom Zeova? (Get zimaz osi.)
5 Lane 49 Nou Lepok, bann zapot ek bann ansien dan Zerizalem ti zwenn ansam pou gete si bann non-Zwif ti bizin sirkonsi pou ki zot kapav vinn bann Kretien. Alafin sa renion-la, Zak, demi-frer Zezi, ti dir: “[Pier] inn rakont an detay kouma Bondie pou premie fwa inn pran kont bann dimounn lezot nasion pou tir parmi zot enn pep pou so nom.” Kan Zak dir “enn pep pou so nom,” lor kisann-la so nom li ti pe koze? Nou trouv repons sa kestion-la dan seki li ti dir apre, kan li ti sit bann parol profet Amos. Zak ti dir: “Pou ki bann dimounn ki reste kapav rod Zeova avek tou zot leker, ansam avek bann dimounn lezot nasion, setadir bann dimounn ki port mo nom. Samem ki Zeova dir.” (Zist. 15:14-18) Alor, sa bann nouvo disip-la pa ti pou zis aprann konn Zeova, me zot ti pou osi ‘port so nom.’ Savedir ki zot ti pou fer bann dimounn konn nom Bondie, ek ki bann dimounn ti pou kone ki zot reprezant sa nom-la.
Pandan enn renion dan premie siek, komite santral ti rekonet ki bann Kretien zot enn pep pou nom Zeova (Get paragraf 5)
6-7. (a) Kifer Zezi ti vinn lor later? (b) Pou ki rezon pli inportan Zezi ti vinn lor later?
6 Nom Zezi vedir “Zeova Delivre,” ek Zeova inn servi Zezi pou sov tou bann dimounn ki ena lafwa dan Li ek dan so Garson. Zezi ti vinn lor later pou donn so lavi pou bann dimounn. (Mat. 20:28) Kan li’nn donn so lavi kouma enn ranson, Zezi inn donn bann dimounn posibilite pou gagn pardon pou zot pese ek pou viv pou touletan.—Zan 3:16.
7 Me kifer bann dimounn ti bizin enn ranson? Akoz seki ti arive dan zardin Eden. Kouma nou ti trouve dan lartik avan, nou bann premie paran, Adan ek Ev, ti rebel kont Zeova, ek akoz sa zot ti perdi posibilite pou viv pou touletan. (Zen. 3:6, 24) Zezi ti vinn lor later pou sov bann desandan Adan ek Ev. Me ena enn lot rezon pli inportan kifer Zezi ti vinn lor later. Satan ti dir bann gro foste lor Zeova. (Zen. 3:4, 5) Akoz sa, bann dimounn ti bizin kone ki Zeova pa’nn fer nanye demal ek ki so nom li sin. Ek Zezi ti meyer dimounn ki ti kapav montre sa, parski li ti reprezant Zeova dan enn fason parfe ek li ti fer tou seki Zeova ti demann li pou fer.
Kouma enn kikenn kapav dir ki li enn vre disip Zezi, si li pa konn nom Zeova ouswa si li pa servi So nom?
8. Ki kitsoz tou bann disip Zezi ti bizin konpran?
8 Tou bann disip Zezi, ki zot Zwif ouswa non, ti bizin konpran ki se gras-a Zeova, Zezi so Papa, ki zot ti pou kapav gagn lavi sov. (Zan 17:3) Ek parey kouma Zezi, bann dimounn ti pou idantifie zot gras-a nom Zeova. Bann disip Zezi ti pou bizin konpran osi ki li bien inportan ki zot sanktifie nom Zeova. Zot ti pou bizin fer sa pou ki zot gagn lavi sov. (Zist. 2:21, 22) Alor, tou bann disip Zezi ti bizin aprann konn Zeova ek Zezi osi. Nou konpran kifer dan Zan 17, Zezi ti terminn so lapriyer par sa bann parol-la: “Mo finn fer zot konn to nom ek mo pou kontign fer sa, pou ki lamour ki to finn ena pou mwa kapav dan zot ek ki mwa mo res dan linite avek zot.”—Zan 17:26.
“ZOT MO BANN TEMWIN”
9. Kouma nou kapav montre ki nom Zeova bien inportan pou nou?
9 Alor, li kler ki pou nou vinn enn vre disip Zezi, nou bizin sanktifie nom Zeova. (Mat. 6:9, 10) Pou nou, nom Zeova bizin nom pli inportan ki ena, ek nou montre sa par nou bann parol ek nou bann aksion. Alor, kouma nou kapav sanktifie nom Zeova ek montre ki tou seki Satan inn dir lor Zeova, li fos?
10. Ki nou aprann dan Izai 42-44? (Izai 43:9; 44:7-9) (Get zimaz osi.)
10 Izai 42-44 montre nou seki nou kapav fer pou sanktifie nom Zeova. Dan sa bann sapit-la, Zeova demann bann dimounn ki pa ador Li pou donn bann prev ki zot bann bondie vremem existe. Parey kouma enn case ki pas lakour, Zeova demande si ena bann temwin ki kapav donn sa bann prev-la. Me personn pa’nn kapav!—Lir Izai 43:9; 44:7-9.
Par nou bann parol ek nou bann aksion, nou kapav montre ki pena lot Bondie apart Zeova (Get paragraf 10-11)
11. Ki Zeova dir so pep dan Izai 43:10-12?
11 Lir Izai 43:10-12. Ar so pep, Zeova dir: “Zot mo bann temwin ek momem Bondie.” Apre sa, Li demann zot: “Eski ena enn lot Bondie apart mwa?” (Iza. 44:8) Azordi, se nou ki ena privilez pou reponn sa kestion-la. Par nou bann parol ek nou bann aksion, nou kapav montre ki zis Zeova tousel ki vre Bondie. So nom pli inportan ki tou lezot nom! Ek par fason ki nou viv nou lavi, nou kapav montre ki nou vremem kontan Zeova ek ki nou fidel anver Li, mem kan Satan rann nou lavi difisil. Se koumsa ki nou kapav ede pou sanktifie nom Zeova.
12. Kouma profesi ki trouv dan Izai 40:3, 5 ti realize?
12 Kan nou ede pou sanktifie nom Zeova, nou pe imit Zezi. Profet Izai ti predir ki enn kikenn ti pou “ouver [ouswa, “prepar,” not] semin Zeova.” (Iza. 40:3) Kouma sa profesi-la ti realize? Zan Batis ti prepar semin pou Zezi. Me avredir, sa semin-la ti “semin Zeova” parski Zezi ti vini pou reprezant Zeova ek li ti koz lor nom Zeova. (Mat. 3:3; Mark 1:2-4; Lik 3:3-6) Sa profesi-la dir osi ki Zezi ti “pou revel laglwar Zeova.” (Iza. 40:5) Kouma li ti fer sa? Kan li ti vinn lor later, Zezi ti reprezant Zeova telman bien ki sa ti koumadir Zeova mem ti vinn lor later.—Zan 12:45.
13. Kouma nou kapav swiv lexanp Zezi?
13 Parey kouma Zezi, nou bann temwin pou Zeova. Nou port So nom ek nou dir tou dimounn bann kitsoz extraordiner ki Li fer. Me pou nou vinn enn bon temwin pou Zeova, nou bizin osi dir bann dimounn tou seki Zezi inn fer pou sanktifie nom Zeova. (Zist. 1:8) Zezi, limem pli gran Temwin Zeova, ek nou bizin swiv so lexanp. (Rev. 1:5) Me kouma nou kapav montre ki nom Zeova bien inportan pou nou?
KOUMA NOU KAPAV MONTRE KI NOM ZEOVA BIEN INPORTAN POU NOU?
14. Dapre Psom 105:3, ki santiman nou ena konsernan nom Zeova?
14 Nou fier akoz nom Zeova. (Lir Psom 105:3.) Zeova bien kontan kan nou fier akoz so nom. (Zer. 9:23, 24; 1 Kor. 1:31; 2 Kor. 10:17) Kan Labib dir ki nou “fer vantar an rapor avek Zeova,” savedir ki nou bizin fier ki Zeova Li nou Bondie. Se enn gran loner pou dir lezot ki Zeova Li sin ek ki tou seki Li fer, li drwat. Fode zame nou onte pou dir nou koleg travay, nou bann kamarad lekol, nou bann vwazin, ek bann lezot dimounn ki nou bann Temwin Zeova. Satan anvi ki nou aret koz lor Zeova ar lezot. (Zer. 11:21; Rev. 12:17) Avredir, Satan ek so bann fos profet anvi ki bann dimounn bliye nom Zeova. (Zer. 23:26, 27) Me nou, parski nou kontan nom Zeova, nou anvi loue Li “toutlong lazourne.”—Ps. 5:11; 89:16.
15. Ki savedir ena konfians dan nom Zeova?
15 Nou kontign ena konfians dan nom Zeova. (Zoel 2:32; Rom. 10:13, 14) Kan nou ena konfians dan nom Zeova, savedir ki nou pa zis konn so nom ouswa servi so nom, me nou bizin konn so personalite, konn so bann kalite, rod so led, ek aksepte ki Li gid nou. (Ps. 20:7; 99:6; 116:4; 145:18) Nou bizin osi fer bann dimounn konn so nom ek so bann zoli kalite, ankouraz zot pou repanti ek pou fer seki bizin pou ki zot kapav gagn so faver.—Iza. 12:4; Zist. 2:21, 38.
16. Kouma nou kapav montre ki Satan enn manter?
16 Nou aksepte soufer akoz nom Zeova. (Zak 5:10, 11) Kan nou res fidel ar Zeova, mem si nou soufer akoz sa, nou montre ki Satan enn manter. Dan lepok Zob, Satan ti met enn lakizasion lor tou bann serviter Zeova. Li ti dir: “Enn dimounn pou donn tou seki li ena pou sap so lavi.” (Zob 2:4) Satan pretann ki bann dimounn servi Zeova zis kan tou korek dan zot lavi, me si zot gagn bann difikilte, zot pou aret servi Zeova. Zob ti res fidel ar Zeova, ek li ti montre ki sa lakizasion-la ti fos. Azordi, nou osi nou kapav montre ki, mem si nou lavi bien difisil ouswa mem si Satan esey dekouraz nou, zame nou pa pou aret servi Zeova. Anplis, nou kapav sir ki Zeova pou kontign vey lor nou ek pou protez nou akoz so nom.—Zan 17:11.
17. Dapre 1 Pier 2:12, sit enn lot fason kouma nou kapav donn laglwar nom Zeova.
17 Nou ena respe pou nom Zeova. (Prov. 30:9; Zer. 7:8-11) Parski nou reprezant Zeova ek nou port so nom, nou kondwit kapav swa loue so nom, swa sali so nom. (Lir 1 Pier 2:12.) Akoz sa, nou anvi fer nou maximum pou donn Zeova laglwar par nou bann parol ek nou bann aksion. Kan nou fer sa, nou pou kapav donn Zeova so nom loner, mem si nou inparfe.
18. Sit enn lot fason kouma nou kapav montre ki nom Zeova bien inportan pou nou. (Get not osi.)
18 Nom Zeova bizin pli inportan pou nou ki nou prop repitasion. (Ps. 138:2) Kifer? Parski kan nou fer bann kitsoz pou fer Zeova plezir, bien souvan bann dimounn pa kontan ek kitfwa zot pou dir bann move kitsoz lor nou.a Kan Zezi ti mor, bann dimounn ti konsider li kouma enn kriminel ek zot ti ena laenn pou li. Me Zezi ti aksepte gagn sa kalite lamor-la pou ki nom Zeova kapav gagn laglwar. Labib dir ki Zezi pa ti “pran kont laont,” savedir ki li pa ti trakase plis ki bizin konsernan seki lezot ti panse lor li ek li pa ti les sa afekte li. (Ebre 12:2-4) Zezi ti res konsantre lor so mision, setadir fer volonte so Papa.—Mat. 26:39.
19. Ki to resanti konsernan nom Zeova, ek kifer?
19 Nou fier ki nou servi Zeova, ek se vremem enn loner ki apel nou bann Temwin Zeova. Nom Zeova telman inportan pou nou ki nou pou kontign donn li laglwar mem si lezot denigre nou akoz sa. Nom Zeova pli inportan ki nou prop repitasion. Alor, anou bien deside pou kontign donn nom Zeova laglwar, mem si Satan esey anpes nou fer sa. Lerla, parey kouma Zezi, nou pou montre ki nom Zeova, samem nom ki pli inportan pou nou.
KANTIK 10 Loue Nou Bondie Zeova!
a Zob ti enn fidel serviter Zeova. Pourtan, kan so trwa kamarad ti dir li ki li’nn fer enn move kitsoz, mem li, li ti koumans trakase konsernan seki lezot ti panse lor li. O-koumansman, kan so bann zanfan ti mor ek ki li ti perdi tou so bann dibien, “Zob pa ti fer pese ek li pa ti rann Bondie responsab pou okenn move kitsoz.” (Zob 1:22; 2:10) Selman, kan bann-la ti akiz li ki li ti fer enn move kitsoz, li ti koumans “koze san reflesi.” Lerla, so repitasion ti vinn pli inportan pou li, olie ki li donn laglwar nom Zeova.—Zob 6:3; 13:4, 5; 32:2; 34:5.