Kouma To Kapav Ed To Etidian Labib pou Li Pran Desizion pou Servi Zeova?

1-2. (a) Kifer sertin etidian Labib ezite pou pran desizion pou servi Zeova? (b) Ki nou pou examine dan sa lartik-la?

ESKI ti ena bann kitsoz ki ti fer twa ezite pou vinn enn Temwin Zeova? Kitfwa to ti per tansion to bann koleg travay, to bann kamarad, ouswa to fami ankoler ar twa si to vinn enn Temwin. Ouswa, kitfwa to ti panse ki sa ti pou tro difisil pou to obeir bann prinsip Zeova. Si to’nn pas par sa bann sitiasion-la, alor to konpran seki sertin etidian Labib resanti ek kifer zot trouv sa difisil pou zot pran desizion pou vinn enn Temwin Zeova.

² Zezi ti kone ki sa bann kitsoz-la ti kapav anpes enn kikenn servi Zeova. (Mat. 13:20-22) Kanmem sa, li ti kontign ed bann dimounn ki ti ezite pou vinn so bann disip. Anplis, Zezi inn donn nou enn zoli lexanp lor kouma nou kapav ed sa kalite dimounn-la (1) pou trouve seki pe anpes zot progrese, (2) pou ogmant zot lamour pou Zeova, (3) pou ed zot pou met Zeova an premie dan zot lavi, ek (4) pou ed zot pou fer fas ar lopozision. Dan sa lartik-la, nou pou gete kouma nou kapav swiv lexanp Zezi kan nou ansegn nou bann etidian Labib, ek kouma nou kapav servi liv Viv Ere pou Touletan! pou ed nou etidian pou pran desizion pou servi Zeova.

ED TO ETIDIAN POU TROUVE SEKI PE ANPES LI PROGRESE

3. Ki kitsoz kitfwa ti anpes Nikodem pou vinn enn disip Zezi?

³ Nikodem ti enn sef bien inportan parmi bann Zwif. Apepre sis mwa apre ki Zezi ti koumans prese, Nikodem ti konpran ki Zezi ti Lemesi. (Zan 3:1, 2) Selman, ti ena enn kitsoz ki ti anpes li pou vinn enn disip Zezi. Kan li ti al koz ar Zezi, li ti fer sa aswar parski li ti “per bann Zwif.” (Zan 7:13; 12:42) Kitfwa li ti per tansion li perdi so pozision ek sertin so bann dibien si li vinn enn disip Zezi.a

4. Kouma Zezi ti ed Nikodem pou konpran seki Bondie ti anvi li fer?

⁴ Nikodem ti konn bien Lalwa Moiz, me li ti bizin led pou konpran seki Zeova ti anvi li fer. Kouma Zezi ti ed li? Zezi ti dispoze pou pran letan ek pou koz ar Nikodem, mem si li ti bizin fer sa aswar. Anplis, Zezi ti koz fran ar li kan li ti dir li seki li ti bizin fer pou vinn so disip: Nikodem ti bizin repanti pou so bann pese, pran batem delo, ek ena lafwa dan Garson Bondie.—Zan 3:5, 14-21.

5. Kouma nou kapav ed enn etidian Labib pou trouve seki pe anpes li progrese?

⁵ Mem si enn etidian konn bien Labib, kitfwa nou pou bizin ed li pou trouve seki pe anpes li progrese. Par exanp, kitfwa so travay pe pran tro boukou so letan, ouswa so fami pa anvi ki li vinn enn Temwin Zeova. Parey kouma Zezi, to bizin pran letan pou to ed to etidian. Kitfwa to kapav invit li pou al bwar enn ti kafe ouswa pou al fer enn ti letour ar twa. Kan zot fer bann kitsoz koumsa ansam, kitfwa li pou explik twa inpe plis lor so sitiasion ek sa pou ed twa pou trouv bann kitsoz ki pe anpes li progrese. Lerla, to pou kapav ed li pou fer bann sanzman ki bizin. Selman, rapel li ki se parski li kontan Zeova ki li bizin fer sa bann sanzman-la, pa parski li anvi fer twa plezir.

6. Kouma to kapav ed to etidian pou ki li ena kouraz pou met an pratik seki li pe aprann? (1 Korintien 16:13)

⁶ Kan to etidian Labib sir ki Zeova pou ed li pou swiv bann prinsip Labib, sa pou donn li kouraz pou met an pratik seki li pe aprann. (Lir 1 Korintien 16:13.) Enn ansegnan Labib, li inpe parey kouma enn profeser lekol. Kan to ti lekol, ki profeser to ti plis kontan? Sirman se sa profeser ki ti ena pasians avek twa, ki ti ed twa pou konn to bann kapasite, ek ki ti fer twa ena konfians an tomem. Dan mem fason, enn bon ansegnan Labib, li pa zis ansegn so etidian seki Bondie anvi li fer, me li bizin osi ed so etidian pou ena konfians ki, avek led Zeova, li pou kapav fer bann sanzman ki bizin. Kouma to kapav fer sa?

ED TO ETIDIAN POU OGMANT SO LAMOUR POU ZEOVA

7. Kouma Zezi ti ed bann ki ti ekout li pou zot ogmant zot lamour pou Zeova?

⁷ Zezi ti kone ki si enn kikenn kontan Bondie, li pou anvi met an pratik seki li pe aprann. Akoz sa, souvan li ti ansegn so bann disip bann kitsoz ki ti ed zot pou ogmant zot lamour pou Zeova. Par exanp, li ti konpar Zeova ar enn Papa ki donn so bann zanfan bann bon kitsoz. (Mat. 7:9-11) Sertin parmi bann ki ti pe ekout Zezi kitfwa pa ti ena enn papa ki ena lamour. Alor, esey mazine seki zot ti resanti kan Zezi ti servi lexanp enn papa ki ena boukou lamour ek ki ti aksepte ki so garson retourn kot li, mem si garson-la ti fer boukou move kitsoz. Zezi ti ed zot pou trouve ki Zeova kontan zot boukou ek ki Li vremem anvi ed zot.—Lik 15:20-24.

8. Kouma to kapav ed to etidian pou ogmant so lamour pou Zeova?

⁸ Twa osi, to kapav ed to etidian pou ogmant so lamour pou Zeova, kan to koz souvan lor bann zoli kalite ki Zeova ena. Sak fwa ki to etidie Labib avek li, ed li pou trouve kouma seki li pe aprann montre ki Zeova kontan nou. Ek kan to koz lor laranson, ed li pou konpran kouma sa konsern li. (Rom. 5:8; 1 Zan 4:10) Kan enn etidian konpran ki kantite Zeova kontan li personelman, sa kapav ed li pou kontan Zeova ankor plis.—Gal. 2:20.

9. Ki kitsoz ti ed Michael pou fer bann sanzman dan so lavi?

⁹ Anou get lexanp Michael, ki res Indonezi. Depi ki li tipti, li konn laverite me zame li pa’nn pran batem. Laz 18 an, li ti al dan enn lot pei pou travay kouma sofer kamion. Plitar, li ti retourn Indonezi pou marye, me apre li ti al travay dan enn lot pei bien lwin ar so madam ek so tifi. So madam ek so tifi ti koumans etidie Labib ek zot ti fer bann progre. Apre lamor so mama, Michael ti desid pou retourn kot li pou okip so papa ek li ti aksepte enn letid Labib. Kan Michael ti etidie parti “Anou Get Inpe Plis” ki trouv dan leson 27 dan liv Viv Ere pou Touletan!, sa ti tous so leker. Michael ti reflesi lor seki Zeova ti resanti kan Li ti trouv so Garson soufer. Sa ti telman tous li ki li ti koumans plore. Ek kan li ti konpran ki kantite Zeova ek Zezi kontan li, Michael ti bien rekonesan. Li ti fer bann sanzman dan so lavi ek li ti pran batem.

ED TO ETIDIAN POU MET ZEOVA AN PREMIE DAN SO LAVI

10. Kouma Zezi ti ed so bann premie disip pou konpran ki kitsoz ti bizin zot priorite? (Lik 5:5-11) (Get zimaz osi.)

¹⁰ Bann premie disip Zezi pa ti tarde pou konpran ki Zezi ti Lemesi. Selman, Zezi ti bizin ed zot pou konpran ki zot ti bizin fer predikasion vinn zot priorite. Par exanp, Pier ek Andre ti deza bann disip Zezi depi inpe letan kan Zezi ti invit zot pou swiv li aplintan. (Mat. 4:18, 19) Sa lepok-la, Pier ek Andre ti pe travay ansam ar Zak ek Zan. Zot ti bann peser ek zot biznes ti pe mars bien. (Mark 1:16-20) Kan Pier ek Andre ti “kit zot bann file” pou swiv Zezi aplintan, sirman zot ti pran bann dispozision pou ki zot fami gagn seki zot bizin pou viv. Ki kitsoz ti motiv zot pou met Zeova an premie dan zot lavi? Zezi ti fer enn mirak pou montre zot ki ninport ki arive, Zeova ti pou donn zot seki zot bizin. Sa mirak-la ti fer zot ena konfians ki Zeova ti pou pran zot swin tanki zot met Li an premie dan zot lavi.—Lir Lik 5:5-11.

11. Kouma nou kapav ed nou etidian Labib pou ranforsi so lafwa?

¹¹ Azordi, nou pa kapav fer bann mirak. Selman, nou kapav partaz ar nou etidian bann lexperyans ki nou ouswa ki lezot inn fer, pou montre li kouma Zeova pran swin bann ki met Li an premie dan zot lavi. Par exanp, eski to rapel kouma Zeova ti ed twa kan to ti fek koumans asiste bann renion? Kitfwa to ti bizin koz ar to patron pou explik li ki to pou nepli fer overtime parski sa pe anpes twa asiste to bann renion. Kan to rakont to etidian bann lexperyans koumsa, explik li kouma sa finn ranforsi to lafwa kan to’nn trouve kouma Zeova inn ed twa parski to’nn met Li an premie dan to lavi.

12. (a) Kan to fer letid to etidian Labib, kifer li bon to invit diferan frer ek ser pou asiste so letid? (b) Kouma to kapav servi bann video pou ansegn to etidian dan enn fason efikas? Donn enn lexanp.

¹² To etidian pou gagn bann bienfe osi kan li tann bann lezot Kretien explike kouma zot inn gagn bann bienfe kan zot inn met Zeova an premie dan zot lavi. Alor, kan to fer so letid, invit diferan frer ek ser pou asiste so letid. Demann zot pou explike kouma zot inn konn laverite ek osi seki zot inn bizin fer pou ki zot inn reisi met Zeova an premie dan zot lavi. Pran letan osi avek to etidian pou get bann video dan parti “Anou Get Inpe Plis” ek parti “Dekouver,” ki ena dan liv Viv Ere pou Touletan! Par exanp, kan zot pe etidie leson 37 ek get video Zeova Pou Donn Nou Seki Nou Bizin, koz lor video-la ek ed to etidian pou trouve kouma Zeova pou ed li si li met Li an premie dan so lavi.

ED TO ETIDIAN POU FER FAS AR LOPOZISION

13. Kouma Zezi ti prepar so bann disip pou fer fas ar lopozision?

¹³ Zezi plizir fwa ti dir so bann disip ki zot ti pou gagn lopozision mem ar bann manb zot fami. (Mat. 5:11; 10:22, 36) Inpe avan so lamor, Zezi ti dir so bann disip ki bann dimounn kitfwa ti pou mem touy zot parski zot ti pe servi Zeova. (Mat. 24:9; Zan 15:20; 16:2) Akoz sa, li ti dir zot ki zot ti bizin fer bien atansion kan zot prese. Par exanp, li ti dir zot pou pa diskit ar bann dimounn ki koz kont zot bann krwayans. Li ti osi dir zot pou fer bien atansion ar seki zot dir ek seki zot fer, pou ki zot kapav kontign prese.

14. Kouma nou kapav prepar nou etidian pou fer fas ar lopozision? (2 Timote 3:12)

¹⁴ Parey kouma Zezi, nou kapav prepar nou etidian Labib pou fer fas ar lopozision. Par exanp, nou kapav explik li kouma sertin dimounn kitfwa pou reazir parski li pe etidie Labib, ek parmi sa bann dimounn-la, kitfwa pou ena sertin koleg travay, bann kamarad, ouswa mem bann manb so fami. (Lir 2 Timote 3:12.) Sertin koleg travay kitfwa pou pran plezir ar li parski li pe fer zefor pou swiv bann prinsip Labib. Ouswa so bann fami pros kitfwa pa pou dakor ar seki li pe aprann dan Labib. Alor, pli vit nou prepar nou etidian pou fer fas ar lopozision, pli vit li pou kone seki li bizin dir ek fer kan li pou gagn lopozision.

15. Ki kitsoz kapav ed enn etidian Labib pou fer fas ar lopozision ki li pe gagne ar so fami?

¹⁵ Si to etidian pe gagn lopozision ar so fami, ed li pou reflesi lor kifer so fami pe reazir koumsa. Kitfwa zot panse ki bann Temwin Zeova koz manti, ouswa kitfwa zot panse ki bann Temwin Zeova bann move dimounn. Mem Zezi so fami pa ti kontan seki li ti pe fer; zot ti panse ki li ti vinn fou. (Mark 3:21; Zan 7:5) Ansegn to etidian osi pou ena pasians ek pou koz avek respe avek tou dimounn, mem ar bann manb so fami.

16. Kouma to kapav ed to etidian Labib pou montre li rezonab kan li partaz so bann krwayans?

¹⁶ Mem si so bann fami anvi konn plis lor so bann krwayans, li pou bon si etidian-la pa explik tro boukou kitsoz enn sel kout. Kifer? Parski si li fer sa, kitfwa li pou donn bann-la tro boukou linformasion. Lerla, zot pou plin ek zot pa pou anvi rekoz lor la ankor. Akoz sa, ankouraz to etidian pou partaz so bann krwayans tigit par tigit. Koumsa, so fami pou aksepte ekout li koz lor Labib enn lot fwa. (Kol. 4:6) Li kapav osi ankouraz so fami pou al lor nou sit jw.org. Koumsa, sa pou permet zot pou aprann plis lor bann Temwin Zeova dan moman ki zot zot anvi.

17. Kouma to kapav prepar to etidian pou reponn bann kestion ki bann dimounn poze lor bann Temwin Zeova? (Get zimaz osi.)

¹⁷ To kapav servi seksion “Kestion ki Poze Souvan lor Bann Temwin Zeova” ki ena lor jw.org, pou ed to etidian pou prepar li pou donn bann repons sinp pou bann kestion ki bann fami ouswa bann koleg kapav poz li. (2 Tim. 2:24, 25) Kan to fer so letid dan liv Viv Ere pou Touletan!, alafin sak leson, get parti “Sertin Dimounn Dir” ek ankouraz to etidian pou dir kouma li ti pou explik lezot so bann krwayans. Pa ezite osi pou donn li bann sizesion pou ki li kapav explik pli bien so bann krwayans. Kan to pran letan pou fer bann ti repetision koumsa ar to etidian Labib, li pou plis kapav defann so bann krwayans.

18. Kouma to kapav ankouraz to etidian pou prese ansam ar lasanble? (Matie 10:27)

¹⁸ Zezi inn donn so bann disip lord pou pres bon nouvel. (Lir Matie 10:27.) Pli vit enn etidian Labib koumans pres ansam ar lasanble, pli vit li pou aprann kont lor Zeova. Kouma to kapav ed to etidian pou fixe ek pou realiz sa lobzektif-la? Kan anonse dan lasanble ki pou ena enn kanpagn predikasion biento, ankouraz to etidian pou reflesi kouma li kapav ranpli bann kondision pou ki li vinn enn proklamater. Explik li kifer li pli fasil pou koumans prese kan ena enn kanpagn. Li pou osi gagn bann bienfe gras-a parti Amelior To Bann Kapasite pou Ansegne ki ena pandan bann renion lasemenn. Ek amezir ki li pe fer zefor pou ranpli bann kondision pou partisip dan parti Amelior To Bann Kapasite pou Ansegne, li pou aprann pli bien kouma pou explik so bann krwayans.

MONTRE TO ETIDIAN KI TO FER LI KONFIANS

19. Kouma Zezi ti montre ki li ti fer so bann disip konfians, ek kouma nou kapav swiv so lexanp?

¹⁹ Avan ki Zezi mont dan lesiel, li ti dir so bann disip ki enn zour, zot ti pou ansam avek li. Selman, bann disip pa ti konpran ki Zezi ti pe dir zot ki zot ti pou zwenn li dan lesiel. Me mem si ti ena boukou kitsoz ki bann disip pa ti konpran, Zezi ti fer zot konfians parski li ti sir ki zot ti anvi fer Zeova plezir. (Zan 14:1-5, 8) Li ti kone ki zot ti pou bizin letan pou konpran sertin kitsoz, kouma par exanp, ki zot ti pou al viv dan lesiel. (Zan 16:12) Parey kouma Zezi, nou kapav montre nou etidian Labib ki nou fer li konfians, parski nou kone ki li anvi fer Zeova plezir.

20. Kouma enn ser dan Malawi ti montre ki li ti ena konfians dan so etidian Labib?

²⁰ Nou bizin ena konfians ki nou etidian Labib anvi fer seki drwat. Anou get lexanp Chifundo, enn ser ki res Malawi. Li ti koumans enn letid Labib dan liv Viv Ere pou Touletan! avek enn madam Katolik ki apel Alinafe. Kan zot ti fini etidie leson 14, Chifundo ti demann Alinafe seki li ti panse lor servi bann zimaz pou ador Bondie. Alinafe ti agase ek li ti dir, “Se enn desizion personel!” Apre sa, Chifundo ti panse ki Alinafe kitfwa ti pou aret so letid Labib. Me avek pasians, Chifundo ti kontign etidie Labib avek Alinafe, ek li ti ena konfians ki avek letan, Alinafe ti pou konpran ki fode pa servi bann zimaz pou ador Bondie. De-trwa mwa apre, Chifundo ti poz Alinafe kestion ki ena dan leson 34: “Depi ki ou’nn koumans etidie Labib ek aprann konn vre Bondie, Zeova, ki bienfe ou’nn gagne?” Chifundo explike seki Alinafe ti reponn. Chifundo dir, “Li ti koz lor plizir zoli pwin ek enn parmi, se ki bann Temwin Zeova pa fer bann kitsoz ki Labib kondane.” Inpe apre sa, Alinafe ti aret servi bann zimaz ek li ti pran batem.

21. Kouma nou kapav ed nou etidian Labib pou li pran desizion pou servi Zeova?

²¹ Mem si Labib dir ki se Zeova “ki fer pouse,” nou kapav ed nou etidian Labib pou fer bann progre. (1 Kor. 3:7) Fode pa nou zis ansegn li seki Zeova anvi li fer. Me plito, nou bizin ed li pou devlop enn gran lamour pou Zeova. Nou bizin osi ankouraz li pou montre so lamour pou Zeova kan li met Zeova an premie dan so lavi. Ek nou bizin ansegn li kouma pou kont lor Zeova kan li gagn bann difikilte. Kan nou montre nou etidian Labib ki nou fer li konfians parski nou kone ki li anvi fer Zeova plezir, sa kapav donn li lafors ek kouraz pou li pran desizion pou servi Zeova.