Kifer Nou Bizin Rod Bann Konsey ar Lezot?

1. Ki nou bizin fer pou ki nou pran bann bon desizion ek pou ki nou bann proze reisi? (Proverb 13:10; 15:22)

NOU tou nou anvi pran bann bon desizion, ek nou anvi osi ki nou bann proze reisi. Ek pou ki sa arive, Labib dir nou ki nou bizin rod konsey ar lezot.—Lir Proverb 13:10; 15:22.

2. Ki kitsoz Zeova promet nou?

² Biensir, se zis Zeova ki kapav donn nou bann meyer konsey ki ena. Se pou sa rezon-la ki nou bizin priye Li ek demann Li so sazes. Anplis, Zeova promet ki Li pou ed nou, kan Li dir: “Mo pou donn twa konsey ek mo pou vey lor twa.” (Ps. 32:8) Sa verse-la montre nou ki Zeova pa zis donn nou bann konsey, me ki Li vremem interese ar nou ek ki Li pou ed nou pou ki nou kapav met so bann konsey an pratik.

3. Ki nou pou examine dan sa lartik-la?

³ Dan sa lartik-la, nou pou servi Labib pou reponn sa kat kestion-la: (1) Si mo anvi gagn bann bienfe kan lezot donn mwa bann konsey, ki bann kalite mo bizin ena? (2) Kisann-la ki kapav donn mwa bann bon konsey? (3) Kan mo rod konsey ar lezot, ki kitsoz montre ki mo vremem sinser? (4) Kifer fode pa mo demann lezot pou pran bann desizion dan mo plas?

KI BANN KALITE MO BIZIN ENA?

4. Pou ki nou gagn bann bienfe kan nou gagn bann bon konsey, ki bann kalite nou bizin ena?

⁴ Pou ki nou kapav gagn bann bienfe kan nou gagn bann bon konsey, nou bizin ena limilite ek modesti. Kifer? Parski nou bizin aksepte ki kitfwa nou pena ase lexperyans ouswa ase konesans pou ki nou kapav pran bann bon desizion par nou-mem. Si nou pena limilite ek modesti, Zeova pa pou kapav ed nou. Lerla, ninport ki konsey ki Li pou donn nou atraver so Parol Labib, sa pou koumadir dilo lor bred sonz. (Mish. 6:8; 1 Pier 5:5) Parkont, si nou ena limilite ek modesti, nou pou koumadir enn leponz ki absorb tou bann konsey ki sorti depi Labib, ek nou pou gagn bann bienfe gras-a sa.

5. Ki kitsoz ti kapav fer David vinn enn kikenn ki orgeye?

⁵ Anou gete seki nou kapav aprann ar lexanp Lerwa David. Mem si David ti fer boukou kitsoz extraordiner, li pa ti vinn orgeye. Boukou lane avan ki li ti vinn lerwa, bann dimounn ti kone ki David ti enn extra bon mizisien. Lerwa ti mem demann li pou vinn zwe lamizik pou li. (1 Sam. 16:18, 19) Kan Zeova ti swazir David pou vinn prosin lerwa lor Izrael, Li ti donn li So lespri sin, ek David ti vinn enn kikenn ki pwisan. (1 Sam. 16:11-13) Lepep ti donn David laglwar parski li ti touy zot bann lennmi, kouma par exanp Goliat. (1 Sam. 17:37, 50; 18:7) Si David ti enn kikenn ki ti orgeye, kitfwa li ti pou panse ki li’nn fer tousala par limem ek ki li pa bizin ki lezot donn li bann konsey. Selman, David pa ti koumsa.

6. Kouma nou kone ki David ti aksepte ki lezot donn li bann konsey? (Get zimaz lor kouvertir.)

⁶ Apre ki li ti vinn lerwa, David ti swazir bann kamarad ki ti kapav donn li bann konsey. (1 Kro. 27:32-34) Sa pa etonn nou, parski avan mem ki li vinn lerwa, David ti touletan ekout bann bon konsey ki lezot ti donn li. David ti aksepte bann konsey ki bann zom ti donn li, me li ti osi aksepte konsey ki enn madam, ki ti apel Abigail, ti donn li. Abigail ti marye ar Nabal, enn zom ki ti ingra, ki ti egois, ek ki pa ti ena okenn respe pou lezot. Parkont, David li, li ti ena limilite ek li ti ekout bon konsey ki Abigail ti donn li. Gras-a sa, li ti evit fer enn erer bien grav.—1 Sam. 25:2, 3, 21-25, 32-34.

7. Ki leson nou kapav aprann ar lexanp David? (Ekleziast 4:13) (Get zimaz osi.)

⁷ Ki leson nou kapav aprann ar lexanp David? Premierman, mem si nou ena bann kapasite ouswa enn sertenn lotorite, fode zame nou panse ki nou konn tou ek ki nou pa bizin konsey. Ek deziemman, nou bizin dispoze pou ekout ninport kisann-la ki donn nou bann bon konsey. (Lir Ekleziast 4:13.) Si nou fer sa, nou pou evit fer bann gro erer ki kapav fer nou-mem ek lezot osi ditor.

KISANN-LA KAPAV DONN MWA BANN BON KONSEY?

8. Kifer Zonatan ti kapav donn David enn bon konsey?

⁸ Anou get enn lot leson ki nou kapav aprann ar lexanp David. David ti al rod konsey ar bann dimounn ki ti ena enn bon lamitie ar Zeova ek sa bann dimounn-la ti konpran osi par ki sitiasion li ti pe pase. Par exanp, kan li ti anvi kone si li ti kapav regagn enn bon lamitie ar Lerwa Sail, David ti ekout konsey ki Zonatan, garson Sail, ti donn li. Kifer Zonatan ti kapav donn David enn bon konsey? Parski Zonatan ti ena enn bon lamitie ar Zeova ek parski li ti konn Sail bien. (1 Sam. 20:9-13) Ki leson sa aprann nou?

9. Kan nou bizin enn konsey, kisann-la nou bizin al gete? Explike. (Proverb 13:20)

⁹ Kan nou bizin bann konsey, nou bizin rod sa ar enn kikenn ki ena enn bon lamitie ar Zeova ek ki konpran osi par ki sitiasion nou pe pase.a (Lir Proverb 13:20.) Anou pran enn lexanp. Fer koumadir enn zenn frer pe rod enn kikenn pou marye. Ar kisann-la li kapav rod bann konsey? So kamarad ki selibater kitfwa pou kapav donn li bann bon konsey ki sorti Labib. Selman, kitfwa li pou gagn bann pli bon konsey si li al rod led ar enn koup ki konn li bien, ki ena enn bon lamitie ar Zeova, ek ki marye depi inpe letan ek ki ere dan zot maryaz.

10. Ki nou pou examine aster-la?

¹⁰ Ziska ler, nou’nn trouv de kalite ki nou bizin ena, ek osi kisann-la ki kapav donn nou bann bon konsey. Aster-la, anou al gete ki kitsoz montre ki nou vremem sinser kan nou rod konsey ar lezot, ek osi kifer fode pa nou demann lezot pou pran bann desizion dan nou plas.

KAN MO ROD KONSEY AR LEZOT, KI KITSOZ MONTRE KI MO VREMEM SINSER?

11-12. (a) Ki kitsoz fode pa nou fer? (b) Ki Lerwa Roboam ti fer kan li ti bizin pran enn desizion inportan?

¹¹ Parfwa, enn kikenn kapav donn linpresion ki li pe rod enn konsey, alor ki an realite li’nn fini pran so desizion ek li pe zis anvi ki lezot dir li ki li’nn pran enn bon desizion. Bann dimounn koumsa, zot pa vremem anvi gagn bann konsey. Anou gete seki nou kapav aprann ar lexanp Lerwa Roboam.

¹² Roboam ti vinn lerwa lor Izrael apre Salomon. Kan li ti vinn lerwa, lepep ti pe viv bien ek zot ti ena boukou bon kitsoz. Selman, zot ti panse ki Salomon ti rann zot lavi difisil. Akoz sa, zot ti vinn get Roboam ek zot ti demann li pou diminie zot travay. Roboam ti dir zot donn li letan pou li reflesi ek pou li pran enn desizion. O-koumansman, Roboam ti fer enn bon kitsoz. Li ti al rod konsey ar bann zom ki ti aze ek ki ti abitie konsey Salomon. (1 Ler. 12:2-7) Selman, li ti rezet bann konsey ki sa bann zom-la ti donn li. Kifer li ti fer sa? Kitfwa li ti fini deside seki li ti anvi fer, ek li ti zis anvi ki sa bann zom-la dakor ar so desizion. Kan li ti al rod konsey ar so bann kamarad ki ti ena mem laz ki li, ek ki bann-la ti dakor avek li, sa ti fer li plezir. (1 Ler. 12:8-14) Lerla, Roboam ti dir lepep desizion ki li ti pran. Akoz sa desizion-la, boukou dimounn parmi lepep ti rebel kont li ek zot ti swazir enn lot lerwa. Ek depi sa zour-la, Roboam zame ti anpe.—1 Ler. 12:16-19.

13. Ki kitsoz montre ki nou sinser kan nou rod konsey ar lezot?

¹³ Ki nou kapav aprann ar lexanp Roboam? Kan nou rod konsey ar lezot, fode pa ki nou fini pran nou desizion avan ki nou ekout zot. Nou bizin dispoze pou ekout bann konsey ki zot donn nou. Alor, li bon ki nou demann nou-mem, ‘Kan mo demann enn kikenn enn konsey, eski mo rezet so konsey parski se pa sa ki mo anvi tande?’

14. Kan nou rod konsey ar lezot, ki kitsoz fode pa nou bliye? Donn enn lexanp. (Get zimaz osi.)

¹⁴ Anou pran enn lexanp. Fer koumadir enn frer inn gagn enn travay ki pey bien. Me avan ki li aksepte travay-la, li al rod konsey ar enn ansien. Ansien-la dir li ki akoz sa travay-la, li pou bizin al lwin ar so fami pandan boukou letan, ek li osi montre frer-la seki Labib dir konsernan so responsabilite pou pran swin so fami lor plan spiritiel. (Efe. 6:4; 1 Tim. 5:8) Selman, frer-la pa dakor ar seki ansien-la dir li. Alor, li kontign poz lezot dan lasanble bann kestion, ziska ki li trouv enn kikenn ki dir li ki li kapav aksepte sa travay-la. Eski sa frer-la ti pe vremem rod bann konsey, ouswa eski li ti fini pran so desizion ek li ti pe zis rod enn kikenn ki dir li seki li anvi tande? Fode pa nou bliye ki nou leker li enn tret. (Zer. 17:9) Parfwa, sa konsey ki nou bien bizin la, se zisteman samem ki nou pa anvi tande.

KIFER FODE PA MO DEMANN LEZOT POU PRAN BANN DESIZION DAN MO PLAS?

15. Ar ki kitsoz nou bizin fer bien atansion, ek kifer?

¹⁵ Zeova atann ki nou pran nou prop desizion. (Gal. 6:4, 5) Kouma nou’nn trouve avan, enn kikenn ki ena sazes pou rod bann konsey ar Zeova dan Labib, ouswa ar bann Kretien ki ena matirite, avan ki li deside seki li pou fer. Selman, nou bizin fer bien atansion pou pa demann lezot pou pran bann desizion dan nou plas. Parfwa, sertin kapav fer sa dan enn fason direk, kan zot demann enn kikenn ki zot fer konfians: “Si to ti dan mo plas, ki to ti pou fer?” Ouswa, ena lezot ki kapav fer sa dan enn fason indirek, kouma par exanp, avan mem ki zot reflesi lor enn sitiasion, zot zis fer parey kouma lezot.

16. Ki ti arive dan lasanble Korint konsernan bann laviann ki ti sakrifie pou bann zidol, ek kisann-la ti bizin deside si li ti pou manz sa kalite laviann-la? (1 Korintien 8:7; 10:25, 26)

¹⁶ Anou gete seki ti arive dan lasanble Korint dan premie siek. Bann Kretien sa lasanble-la ti bizin deside si zot ti pou manz bann laviann ki’nn sakrifie pou bann zidol. Pol ti dir sa bann Kretien-la: “Nou kone ki enn zidol li enn nanye ditou ek ki ena enn sel Bondie.” (1 Kor. 8:4) Parski Pol ti dir sa, sertin dan lasanble ti deside ki zot ti kapav aste sa kalite laviann-la dan bazar. Ek lezot ti deside pou pa manz sa kalite laviann-la akoz zot konsians. (Lir 1 Korintien 8:7; 10:25, 26) Sa ti enn desizion personel. Pol zame pa ti dir bann Korintien pran bann desizion pou lezot, ouswa pou zis fer parey kouma lezot. Sakenn ti bizin “rann kont pou limem devan Bondie.”—Rom. 14:10-12.

17. Ki kapav arive si nou zis fer parey kouma lezot? Donn enn lexanp. (Get zimaz osi.)

¹⁷ Kouma enn sitiasion koumsa kapav arive azordi? Anou pran enn lexanp. Konsernan bann fraksion disan, sak Kretien bizin deside par limem ki fraksion li pou aksepte ek ki fraksion li pa pou aksepte.b Konsernan disan, kitfwa nou kapav trouv sa difisil pou deside seki nou bizin fer. Selman, sakenn bizin pran so prop desizion. (Rom. 14:4) Si nou zis fer parey kouma lezot pe fer, nou konsians pou res feb ek zame nou pa pou ena sazes. Pou nou vinn enn kikenn ki ena sazes, nou bizin swiv bann prinsip Labib ek pran nou prop desizion. (Ebre 5:14) Me kan eski nou bizin rod konsey ar enn Kretien ki ena matirite? Se apre ki nou’nn fer nou prop resers, me ki nou ankor bizin led pou konpran bann prinsip Labib ki aplike dan sa sitiasion-la.

KONTIGN ROD BANN KONSEY

18. Ki Zeova inn fer pou nou?

¹⁸ Zeova les nou pran nou prop desizion. Sa montre ki Li vremem fer nou konfians. Li’nn donn nou so Parol Labib, ek Li’nn donn nou bann kamarad ki ena sazes, ki kapav ed nou pou konpran bann prinsip Labib pou nou kapav pran bann bon desizion. Tousala montre ki Zeova Li enn bon Papa ek ki Li bien kontan nou. (Prov. 3:21-23) Kouma nou kapav montre Li nou rekonesans?

19. Kouma nou kapav kontign fer leker Zeova kontan?

¹⁹ Bann paran bien kontan kan zot trouv zot zanfan grandi ek vinn bann serviter Zeova ki ena matirite, sazes, ek ki kontan ed lezot. Dan mem fason, Zeova bien kontan kan Li trouv nou kontign grandi lor plan spiritiel, vinn bann Kretien ki ena matirite ek ki rod konsey ar lezot; bann Kretien ki pran bann desizion ki montre ki nou kontan Li.