Aprann Kouma pou Donn Lezot Bann Bon Konsey

1. Kisann-la ki bizin donn bann konsey? Explike.

ESKI to kontan donn lezot bann konsey? Pou sertin, kitfwa li fasil pou fer sa. Me pou lezot, kitfwa zot per ouswa zot malalez pou fer sa. Selman detanzantan, nou tou bizin donn lezot bann konsey. Kifer? Parski se enn fason ki nou montre nou lamour pou nou bann frer ek ser. Zezi ti dir ki nou bizin montre lamour pou sakenn nou kamarad si nou anvi vinn so bann disip. (Zan 13:35) Anplis, Labib dir ki kan nou donn enn kikenn enn “konsey sinser,” sa kapav fer nou ena enn “bon lamitie” avek li.—Prov. 27:9.

2. Ki kitsoz bann ansien bizin konn fer, ek kifer? (Get osi lankadre “Bann Konsey Pandan Renion Lasemenn.”)

² Se sirtou bann ansien ki bizin kone kouma pou donn lezot bann bon konsey. Kifer? Parski Zeova ek Zezi inn donn zot responsabilite pou pran swin lasanble. (1 Pier 5:2, 3) Enn fason ki zot fer sa, se kan zot fer bann diskour, ek ki dan zot bann diskour ena bann konsey ki sorti depi Labib. Kan zot remarke ki enn kikenn bizin bann konsey, zot pa ezite pou ed li. Zot osi ed bann ki’nn kit lasanble pou retourn ar Zeova. Kouma nou tou, sirtou bann ansien, kapav donn lezot bann bon konsey?

3. (a) Kouma nou kapav aprann pou donn bann bon konsey? (Iza. 9:6; get osi lankadre “Swiv Lexanp Zezi kan Nou Donn Bann Konsey.”) (b) Ki nou pou examine dan sa lartik-la?

³ Labib koz lor boukou dimounn ki’nn donn lezot bann bon konsey. Nou kapav aprann kouma pou donn bann bon konsey kan nou etidie zot lexanp. Ek meyer lexanp ki nou ena dan sa domenn-la, se Zezi. Labib dir ki Zezi enn “Konseye Extraordiner.” (Lir Izai 9:6.) Dan sa lartik-la, nou pou gete seki nou kapav fer kan lezot demann nou bann konsey, ek seki nou kapav fer kan nou bizin donn lezot bann konsey, mem si zot pa’nn demann nou. Nou pou gete osi kifer li inportan ki nou donn bann konsey dan bon moman ek dan bon fason.

KAN LEZOT DEMANN NOU BANN KONSEY

4-5. Kan enn kikenn demann nou enn konsey, ki kestion li bon nou poz nou-mem avan? Donn enn lexanp.

⁴ Kan enn kikenn demann nou bann konsey, kitfwa nou pou kontan parski sa montre ki li fer nou konfians. Ek akoz sa, kitfwa nou pou rod ed li deswit. Me avan ki nou fer sa, li bon ki nou demann nou-mem, ‘Eski momem pli bien plase pou donn li enn konsey dan sa domenn-la?’ Parfwa, olie ki nou donn enn kikenn enn konsey, meyer fason ki nou kapav ed li, se kan nou ed li pou trouv enn kikenn ki ena lexperyans ek konesans ki bizin dan sa domenn-la.

⁵ Anou pran enn lexanp. Fer koumadir to bon kamarad tom bien malad. Li dir twa ki li’nn fer bann resers lor diferan tretman medikal, ek li demann twa ki tretman to panse pou pli bon pou li. Mem si ena enn tretman ladan ki to kontan, to pa enn dokter ek to pa’nn swiv okenn formasion dan sa domenn-la pou ki to kapav ed li. Dan sa ka-la, meyer fason to kapav soutenir to kamarad, se kan to ed li pou trouv enn kikenn ki ena bann konpetans ki bizin konsernan so maladi.

6. Kifer li pli bon ki nou atann avan ki nou donn enn konsey?

⁶ Mem si nou panse ki nou bien plase pou donn enn kikenn enn konsey, kitfwa li pou pli bon ki nou atann avan ki nou donn li konsey-la. Kifer? Proverb 15:28 dir ki ‘enn dimounn ki zis, li reflesi avan li reponn.’ Alor, mem si nou kone ki konsey nou pou donn li, li pli bon ki nou fer bann resers avan, ki nou priye Zeova, ek ki nou reflesi bien lor la avan ki nou donn li enn konsey. Kan nou fer sa, konsey ki nou pou donn li pou an-akor avek seki Zeova anvi nou dir li.

7. Ki leson nou aprann ar lexanp profet Natan?

⁷ Anou get lexanp profet Natan. Kan Lerwa David ti dir Natan ki li ti anvi ranz enn tanp pou Zeova, Natan deswit ti dir li ki li kapav fer li. Selman, se pa seki Zeova ti anvi. Avan ki li donn David sa konsey-la, Natan ti bizin demann Zeova seki Li ti anvi ki David fer. (1 Kro. 17:1-4) Sa lexanp-la montre nou ki kan enn kikenn demann nou enn konsey, fode pa nou “prese pou koze.” (Zak 1:19) Kan nou fer sa, nou montre ki nou ena sazes.

8. Sit enn lot rezon kifer nou bizin reflesi bien avan ki nou donn enn kikenn enn konsey.

⁸ Enn lot rezon kifer nou bizin reflesi bien avan ki nou donn enn konsey, se ki si nou donn enn move konsey ek ki ariv sa dimounn-la bann move kitsoz, nou pou an parti responsab. Akoz sa, li bon ki nou reflesi bien avan ki nou donn enn kikenn enn konsey.

KAN NOU BIZIN DONN LEZOT BANN KONSEY MEM SI ZOT PA’NN DEMANN NOU

9. Ki kitsoz bann ansien bizin sir avan ki zot donn enn kikenn enn konsey? (Galat 6:1)

⁹ Detanzantan, bann ansien bizin konsey enn kikenn ki’nn “fer enn fopa.” (Lir Galat 6:1.) Enn not pou letid dir ki sa kalite dimounn-la “pe pran enn move sime mem si li pankor fer enn pese grav.” Lobzektif bann ansien, se pou ed sa dimounn-la pou kontign servi Zeova ek pou res lor sime ki pou fer li gagn lavi pou touletan. (Zak 5:19, 20) Selman, pou ki bann ansien zot konsey li efikas, zot bizin fer sir ki sa dimounn-la inn vremem fer enn fopa. Bann ansien kone ki, mem si enn kikenn pran enn desizion ki bien diferan ar desizion ki zot zot ti pou pran, sa pa vedir ki sa dimounn-la inn fer enn kitsoz ki pa fer Zeova plezir. (Rom. 14:1-4) Me fer koumadir bann ansien trouve ki sa dimounn-la inn vremem fer enn kitsoz ki kapav gat so lamitie avek Zeova, kouma zot kapav konsey li?

10-12. Kan enn kikenn pa pe atann ki li pou gagn enn konsey, kouma bann ansien kapav prepar li pou aksepte sa konsey-la? Donn enn lexanp. (Get zimaz osi.)

¹⁰ Li pa fasil pou bann ansien konsey enn kikenn, sirtou si sa dimounn-la pa pe atann ki li pou gagn enn konsey. Kifer? Lapot Pol dir ki enn kikenn kapav “fer enn fopa san ki li rann li kont.” Alor, avan ki bann ansien konsey enn kikenn ki pa’nn rann li kont ki li’nn fer enn fopa, zot bizin prepar sa dimounn-la pou aksepte sa konsey-la.

¹¹ Kan enn kikenn pa atann ki li pou gagn enn konsey, se koumadir pe esey plant enn lagrin dan enn later ki bien dir. Avan ki enn planter sem bann lagrin, li bizin prepar later-la. Ek apre ki li’nn fini plant bann lagrin-la, li aroz zot pou ki zot pouse. Dan mem fason, ena sertin kitsoz ki enn ansien kapav fer pou prepar enn kikenn pou aksepte enn konsey. Par exanp, li pou atann bon moman pou li koz ar sa dimounn-la. Ek kan li pou koz avek li, li pou dir li ki li bien kontan li, ek ki li ena enn kitsoz pou koz avek li. Si sa ansien-la li enn kikenn ki ena boukou lamour ek li bien zanti, li pou pli fasil pou lezot aksepte so bann konsey.

¹² Pandan konversasion-la, ansien-la pou kontign “prepar” dimounn-la pou aksepte sa konsey-la. Par exanp, li kapav dir dimounn-la ki nou tou nou fer bann erer, ek ki parfwa nou tou nou bizin gagn bann konsey. (Rom. 3:23) Avek boukou respe ek enn lavwa bien dous, ansien-la pou servi Labib pou montre li kouma li’nn fer enn fopa. Lerla, kan dimounn-la rekonet ki li’nn fer enn erer, ansien-la pou “plant lagrin-la,” setadir li pou dir li dan enn fason bien kler seki li bizin fer pou fer bann sanzman. Alafin konversasion-la, ansien-la pou “aroz lagrin-la,” setadir felisit dimounn-la ek priye Zeova ansam avek li.—Zak 5:15.

13. Kouma bann ansien kapav fer sir ki enn kikenn inn bien konpran bann konsey ki zot inn donn li?

¹³ Parfwa, kan to donn enn kikenn enn konsey, li kapav arive ki li mal konpran konsey-la. Kifer? Parski ant seki to’nn dir li ek seki li li’nn konpran, sa kapav de kitsoz bien diferan. Kan bann ansien konsey enn kikenn, kouma zot kapav fer sir ki li’nn bien konpran konsey-la? Avek zantiyes, zot kapav poz sa dimounn-la bann kestion pou gete si li’nn bien konpran konsey-la ek osi bann sanzman ki li bizin fer.—Ekle. 12:11.

DONN BANN KONSEY DAN BON MOMAN EK DAN BON FASON

14. Kifer fode pa ki nou donn bann konsey kan nou ankoler?

¹⁴ Nou tou nou inparfe. Akoz sa, li normal ki nou fer ouswa nou dir bann kitsoz ki bles lezot. (Kol. 3:13) Labib dir ki parfwa lezot kapav dir ouswa fer bann kitsoz ki fer nou ankoler. (Efe. 4:26) Selman, fode pa ki nou donn bann konsey kan nou ankoler. Kifer? Parski Labib dir ki “koler enn dimounn pa akonpli lazistis Bondie.” (Zak 1:20) Si nou donn bann konsey kan nou ankoler, nou pou fer dimounn-la plis ditor ki dibien. Me sa pa vedir ki kan enn kikenn fer nou ankoler, ki fode zame nou dir li seki nou panse ek seki nou resanti. Selman, li pou pli bon ki nou atann ki nou kalme net avan ki nou koz ar li. Anou gete seki nou kapav aprann ar lexanp Eliou, ki ti donn Zob bann bon konsey.

15. Ki leson nou aprann ar lexanp Eliou? (Get zimaz osi.)

¹⁵ Pandan plizir zour, Zob ti esey defann limem kan so bann fos kamarad ti akiz li. Eliou ti ekout tou seki Zob ti dir ek li ti ena konpasion pou li. Selman, kan Zob ti dir bann kitsoz ki fos lor Zeova pou esey montre ki li ti inosan, Eliou ti bien ankoler. Kanmem sa, Eliou ti atann so tour pou li koze, ek kan li ti koze, li ti konsey Zob avek boukou douser ek respe. (Zob 32:2; 33:1-7) Gras-a lexanp Eliou, nou aprann enn leson bien inportan: Enn konsey pas pli bien kan nou donn li dan bon moman ek dan bon fason, setadir avek amour ek respe.—Ekle. 3:1, 7.

KONTIGN DONN EK AKSEPTE BANN KONSEY

16. Ki leson nou aprann dan Psom 32:8?

¹⁶ Text prinsipal pou sa lartik-la dir ki ‘Zeova donn nou konsey ek li vey lor nou.’ (Lir Psom 32:8.) Savedir ki Li pou kontign ed nou; Li pa zis donn nou bann konsey, me Li ed nou osi pou met zot an pratik. Kouma nou kapav swiv lexanp Zeova kan nou bizin donn lezot bann konsey? Nou swiv lexanp Zeova kan nou kontign ankouraz zot ek ed zot pou pran bann bon desizion.

17. Ar ki kitsoz Labib konpar bann ansien ki donn bann konsey ki sorti dan Labib? Explike. (Izai 32:1, 2)

¹⁷ Plis nou koste ar lafin, plis nou bizin pare pou donn bann konsey ek pou aksepte bann konsey. (2 Tim. 3:1) Bann ansien ki donn bann konsey ki sorti dan Labib, zot kouma “bann ti larivier dan enn pei kot pena delo,” setadir zot ankouraz nou ek ed nou pou kontign servi Zeova. (Lir Izai 32:1, 2.) Nou bien rekonesan osi ki nou ena bann kamarad ki pa ezite pou dir nou seki nou bizin tande. Zot bann parol koumadir “bann pom an-or lor enn plato an-arzan.” (Prov. 25:11) Alor, anou kontign aprann kouma pou donn bann konsey ek kouma pou aksepte bann konsey.