Liv Zob Kapav Ed Twa kan To Donn Bann Konsey

1-2. Ki lokazion Zob so trwa kamarad ek Eliou ti gagne?

KAN Zob ti perdi tou seki li ti ena, boukou dimounn ki ti res dan bann pei toutotour ti aprann seki ti ariv li. Ek kan so trwa kamarad, Elifaz, Bildad, ek Zofar, ti aprann seki ti arive, zot ti vinn Ouz pou rekonfort li. Selman, zot ti gagn sok kan zot ti trouve seki ti ariv Zob.

² Zob ti pe extra soufer parski li ti perdi bann kitsoz ki ti ena boukou valer pou li. Bann dimounn ti kokin ouswa ti touy so bann zanimo, kouma par exanp so bann vas, so bann samo, so bann bourik ek so bann mouton. So bann zanfan ek laplipar so bann serviter ti mor. Lakaz kot so bann zanfan ti mor, ti kraze net. Anplis, Zob ti gagn enn maladi bien grav. So lekor ti kouver ar bouton koulou, ek sa ti pe fer li bien soufer. Kan Elifaz, Bildad, ek Zofar ti arive, Zob ti pe asize dan lasann ek li ti bien dekouraze. Kouma bann-la ti reazir? Pandan set zour, zot ti asiz pre ar Zob, me zot pa ti dir li nanye mem si zot ti trouve ki li ti pe bien soufer. (Zob 2:12, 13) Inpe apre, enn zenn zom ki ti apel Eliou ti vinn get Zob ek li ti asiz pre ar bann-la. Lerla, Zob ti koumans koze. “Li ti modi zour so nesans,” ek li ti dir ki li ti anvi mor. (Zob 3:1-3, 11) Zob ti vremem bizin led so bann kamarad! Sa bann zom-la ti gagn lokazion pou ankouraz Zob ek pou montre li ki zot bann vre kamarad ki gagn so traka. Anou gete seki zot ti fer.

3. Ki nou pou examine dan sa lartik-la?

³ Zeova ti fer Moiz ekrir seki Elifaz, Bildad, Zofar, ek Eliou ti dir ek ti fer. Sirman to rapel ki Eliou ti dir Zob bann kitsoz ki Zeova ti anvi li dir. Parkont, seki Elifaz ti dir Zob, kitfwa se enn demon ki ti fer li dir sa. (Zob 4:12-16; 33:24, 25) Se pou sa rezon-la ki dan liv Zob nou kapav trouv bann extra bon konsey, me osi bann konsey ki pa bon ditou. Dan sa lartik-la, nou pou trouve kouma liv Zob kapav ed nou kan nou bizin donn enn kikenn enn konsey. Pou koumanse, ar lexanp Elifaz, Bildad, ek Zofar, nou pou trouve ki kitsoz fode pa nou dir ek nou fer. Ek apre sa, ar lexanp Eliou, nou pou trouve seki nou bizin dir ek fer kan nou donn enn konsey. Nou pou gete osi kouma liv Zob kitfwa ti ed bann Izraelit, ek kouma li kapav ed nou azordi.

BANN KONSEY ZOB SO TRWA KAMARAD

4. Kifer Zob so trwa kamarad pa ti reisi rekonfort li? (Get zimaz osi.)

⁴ Labib dir ki Zob so trwa kamarad ti vinn get li “pou partaz so lapenn ek rekonfort li” akoz tou bann move kitsoz ki ti ariv li. (Zob 2:11) Selman, zot pa ti reisi rekonfort Zob. Kifer? Anou get trwa rezon. Premierman, zot pa ti pran letan pou ekout Zob ek zot pa ti esey konpran so sitiasion. Par exanp, zot ti panse ki Zeova ti pe pini Zob parski li ti fer enn move kitsoz.a (Zob 4:7; 11:14) Deziemman, mem si laplipar kitsoz ki zot ti dir Zob ti paret bann bon kitsoz, sa pa ti vremem ed li. (Zob 13:12) Zot ti osi dir li bann kitsoz ki ti bien bles li. Par exanp, Bildad de fwa ti dir Zob ki li koz tro boukou. (Zob 8:2; 18:2) Parfwa, zot ti osi bien kriel anver li. Par exanp, Zofar ti dir li ki li ti “enn inbesil.” (Zob 11:12) Trwaziemman, mem si zot pa ti koz brit ar Zob, seki zot ti dir li ek fason ki zot ti koz ar li, ti fer li santi li koupab ek ti montre ki zot pa ti ena respe pou li. (Zob 15:7-11) Sa bann zom-la ti pe rod montre ki Zob ti fer enn pese, olie ki zot ti rekonfort li ek ranforsi so lafwa.

5. Bann konsey ki Zob so trwa kamarad ti donn li, ki lefe sa ti ena lor li?

⁵ Kan Elifaz, Bildad, ek Zofar ti fini koze, Zob ti santi li plis dekouraze. (Zob 19:2) Plis zot ti akiz Zob ki li ti fer enn move kitsoz, plis li ti anvi defann limem. Zob ti telman anvi montre ki li ti inosan, ki li ti dir bann kitsoz ki li pa ti bizin dir. (Zob 6:3, 26) Seki Zob so trwa kamarad ti dir, pa ti an-akor avek fason panse Zeova, ek zot pa ti tret Zob avek konpasion. Akoz sa, san ki zot realize, zot ti vinn enn zouti dan lame Satan pou dekouraz Zob. (Zob 2:4, 6) Kouma liv Zob kitfwa ti ed bann Izraelit, ek kouma li kapav ed nou azordi?

6. Ki kitsoz kitfwa bann ansien dan Izrael ti aprann ar zistwar Zob?

⁶ Kouma zistwar Zob kitfwa ti ed bann Izraelit? Kan Zeova ti donn bann Izraelit bann lalwa, Li ti swazir bann ansien pou ziz so pep ek pou ed zot swiv so bann lalwa. (Det. 1:15-18; 27:1) Sa bann zom-la ti bizin ekout bien avan ki zot donn bann konsey ouswa ziz bann Izraelit. (2 Kro. 19:6) Zot ti bizin osi poz bann kestion, olie ki zot panse ki zot konn tou kitsoz. (Det. 19:18) Sa bann ansien-la ti bizin koz avek zantiyes avek sa dimounn ki ti vinn rod led ar zot la. Kifer? Parski si zot ti ankoler ouswa koz brit ar li, kitfwa li pa ti pou anvi ouver so leker ar zot ek dir zot seki li resanti. (Ex. 22:22-24) Sa, se de-trwa leson ki bann ansien dan Izrael kitfwa ti aprann ar zistwar Zob.

7. Apart bann ansien dan Izrael, kisann-la ankor ti kapav donn bann konsey, ek kouma liv Zob kitfwa ti ed zot? (Proverb 27:9)

⁷ Biensir, se pa zis bann ansien dan Izrael ki ti kapav donn bann konsey. Ninport ki Izraelit, ki li zenn ouswa vie, enn madam ouswa enn misie, ti kapav donn so kamarad enn konsey pou li amelior so lamitie ar Zeova, ouswa pou li aret fer enn move kitsoz. (Ps. 141:5) Kan enn kikenn donn bann “konsey sinser,” sa montre ki li enn vre kamarad. (Lir Proverb 27:9.) Si bann Izraelit ti reflesi lor fason ki Elifaz, Bildad, ek Zofar ti koz avek Zob, kitfwa sa ti ed zot pou konpran seki fode pa zot dir ek fer kan zot donn bann konsey.

8. Kan nou donn bann konsey, ki kitsoz fode pa nou fer? (Get zimaz osi.)

⁸ Kouma zistwar Zob kapav ed nou? Nou touletan anvi ed nou bann frer ek ser ki pe pas par bann difikilte. Selman, si nou dir ouswa nou fer parey kouma Zob so trwa kamarad, nou pa pou reisi rekonfort zot. Alor, pou ki nou kapav ed nou bann frer ek ser, premierman nou bizin fini gagn tou bann linformasion avan ki nou donn zot bann konsey. Fode pa nou panse ki nou’nn fini konpran zot sitiasion avan mem ki nou gagn tou bann linformasion. Deziemman, olie ki nou donn nou prop lopinion parey kouma Elifaz plizir fwa ti fer, nou bizin donn bann konsey ki sorti dan Labib. (Zob 4:8; 5:3, 27) Ek trwaziemman, fode pa nou koz brit ek fode pa nou dir bann kitsoz ki bles lezot. Elifaz ek so de kamarad ti dir sertin kitsoz ki ti vre, parski plitar lapot Pol ti sit sertin parol ki Elifaz ti dir. (Konpar Zob 5:13 ar 1 Korintien 3:19.) Selman, laplipar bann kitsoz ki zot ti dir lor Bondie ti fos, ek sa ti bien bles Zob. Akoz sa, Zeova ti dir zot ki zot pa ti dir laverite. (Zob 42:7, 8) Alor, kan nou donn lezot bann konsey, fode pa nou dir bann kitsoz ki donn linpresion ki Zeova kriel anver so bann serviter ouswa ki Li pa kontan zot. Aster-la, anou get bann leson ki nou kapav aprann ar lexanp Eliou.

BANN KONSEY ELIOU

9. Kan Zob so trwa kamarad ti aret koze, kifer Zob ti bizin lankourazman, ek kouma Zeova ti ed li?

⁹ Zob ek so trwa kamarad ti diskite ant zot pandan inpe letan. Zot ti koz telman boukou ki zot bann parol trouv dan 28 sapit dan Labib. Ek laplipar bann kitsoz ki zot ti dir, montre ki zot ti agase ek ankoler. Alor, nou konpran kifer sa pa ti ankouraz Zob ditou! Zob ti bizin ki enn kikenn ankouraz li ek konsey li. Kouma Zeova ti ed Zob? Li ti servi Eliou pou donn Zob bann konsey. Me kifer Eliou ti atann bann-la aret diskite avan ki li koze? Eliou ti dir: “Mwa mo zenn ek zot, zot pli dan laz. Akoz sa, avek respe, mo’nn atann avan mo koze.” (Zob 32:6, 7) Eliou ti kone ki bann dimounn ki pli vie, souvan zot ena plis sazes parski zot inn viv pli lontan ek zot ena plis lexperyans. Akoz sa, avek pasians, li ti ekout Zob ek so trwa kamarad. Selman, apre inpe letan, li ti nepli kapav res trankil. Li ti dir: “Se pa zis laz ki fer enn dimounn gagn sazes, ek se pa zis bann vie dimounn ki konpran si enn kitsoz bon.” (Zob 32:9) Ki kitsoz Eliou ti dir apre sa, ek dan ki fason li ti dir sa?

10. Avan ki li ti donn Zob bann konsey, ki kitsoz Eliou ti fer? (Zob 33:6, 7)

¹⁰ Avan ki Eliou konsey Zob, li ti anvi ki Zob kalme limem. Koumsa, Zob ti pou plis dispoze pou ekout seki li ti ena pou dir. Kouma Eliou ti fer sa? Pou koumanse, li ti bizin kalme limem avan ki li koz avek Zob. Labib dir ki Eliou ti bien ankoler akoz bann kitsoz ki li ti tande. (Zob 32:2-5) Me kanmem sa, zame Eliou pa ti koz brit ar Zob. Okontrer, li ti ena limilite ek li ti rekonfort Zob kouma enn vre kamarad. Par exanp, li ti dir Zob: “Gete! Mo parey kouma twa devan vre Bondie.” (Lir Zob 33:6, 7.) Eliou ti osi montre ki li ti bien ekout Zob, parski avan ki li konsey li, li ti repet sertin kitsoz ki Zob ti dir. (Zob 32:11; 33:8-11) Ek plitar, kan li ti bizin redonn Zob bann konsey, li ti refer mem zafer.—Zob 34:5, 6, 9; 35:1-4.

11. Ki Eliou ti fer kan li ti donn Zob bann konsey? (Zob 33:1)

¹¹ Kan Eliou ti donn Zob bann konsey, li pa ti fer Zob santi ki li pena valer. Okontrer, li ti montre respe anver li. Par exanp, kan Eliou ti koz ar Zob, li ti servi Zob so nom, alor ki Zob so trwa kamarad kitfwa pa ti fer sa. (Lir Zob 33:1.) Sirman Eliou ti rapel ki kantite li ti anvi koze kan Zob ek so trwa kamarad ti pe diskite ant zot. Alor, Eliou ti donn Zob lokazion pou koze kan li ti donn li bann konsey. (Zob 32:4; 33:32) Anplis, Eliou ti fran avek Zob, ek li ti explik li kifer sertin kitsoz ki li ti dir ek fer, pa ti bon. Avek bonte, Li ti osi rapel Zob bann kalite ki Zeova ena, setadir so sazes, so pwisans, so lazistis ek so lamour fidel. (Zob 36:18, 21-26; 37:23, 24) Bann bon konsey ki Eliou ti donn Zob sirman ti prepar li pou ekout bann konsey ki Zeova ti pou donn li. (Zob 38:1-3) Kouma lexanp Eliou kitfwa ti ed bann Izraelit, ek kouma li kapav ed nou azordi?

12. Kouma Zeova ti servi bann profet pou ed so pep, ek kouma lexanp Eliou kitfwa ti ed bann zom ek bann fam fidel?

¹² Kouma zistwar Zob kitfwa ti ed bann Izraelit? Zeova souvan ti servi bann profet pou ansegn ek pou koriz bann Izraelit. Par exanp, dan lepok bann ziz, Zeova ti servi profetes Debora pou donn So pep bann instriksion. Li ti osi servi Samiel, ki ti ankor bien zenn, pou donn bann Izraelit bann instriksion. (Ziz 4:4-7; 5:7; 1 Sam. 3:19, 20) Plitar, dan lepok bann lerwa, Zeova ti avoy plizir profet pou ed bann Izraelit pou ki zot ador Li dan bon fason. Ek kan bann-la ti dezobeir Li, Li ti avoy bann profet pou koriz zot. (2 Sam. 12:1-4; Zist. 3:24) Lexanp Eliou kitfwa ti ed bann zom ek bann fam fidel, ek osi bann profet, pou konpran seki zot ti bizin dir kan zot ti konsey lezot, ek osi kouma zot ti bizin fer sa.

13. Kouma nou kapav ankouraz nou bann frer ek ser azordi?

¹³ Kouma zistwar Zob kapav ed nou? Parey kouma sa bann profet-la, nou servi Parol Bondie pou fer bann dimounn konn volonte Zeova, ek nou osi “ankouraz ek konsol” nou bann frer ek ser par nou bann parol. (1 Kor. 14:3) Bann ansien bizin touletan fer bien atansion pou koz avek zantiyes ek lamour, sirtou kan enn kikenn dekouraze ouswa kan li “koze san reflesi.”—1 Tes. 5:14; Zob 6:3.

14-15. Kouma bann ansien kapav swiv lexanp Eliou kan zot donn bann konsey? Donn enn lexanp.

¹⁴ Fer koumadir enn ansien aprann ki enn ser dan so lasanble dekouraze. Ansam avek enn lot ansien, li al get sa ser-la pou ankouraz li. Pandan sa vizit-la, ser-la explik zot ki mem si li asiste bann renion ek li sorti predikasion, li nepli ena lazwa. Ki sa ansien-la pou fer?

¹⁵ Premierman, li bizin esey konpran pli bien kifer sa ser-la ena sa santiman-la. Ek pou li fer sa, li bizin poz ser-la bann kestion ek ekout bien seki li dir. Eski ser-la panse ki li pena valer ek ki Zeova pa kontan li? Eski li dekouraze akoz “bann traka ki ena dan lavi”? (Lik 21:34) Deziemman, ansien-la pou fer zefor pou felisit ser-la pou bann bon kitsoz ki li pe fer. Par exanp, li kapav felisit li parski li asiste bann renion ek li prese, mem si sa pa touletan fasil pou li. Ek trwaziemman, kan ansien-la inn konpran pli bien kifer ser-la dekouraze, li pou servi Labib pou rasir li ki Zeova vremem kontan li.—Gal. 2:20.

KONTIGN TIR BANN LESON AR LIV ZOB

16. Pou ki nou kontign gagn bann bienfe ar liv Zob, ki nou bizin fer?

¹⁶ Nou’nn aprann boukou leson dan liv Zob, pa vre! Dan lartik avan, nou’nn aprann kifer Bondie les bann dimounn soufer ek kouma nou kapav andire kan nou gagn bann problem. Ek dan sa lartik-la, nou’nn aprann kouma nou tou nou kapav donn bann bon konsey kan nou swiv lexanp Eliou, olie ki nou swiv lexanp Elifaz, Bildad, ek Zofar. Eski biento to pou bizin konsey enn kikenn? Kitfwa to kapav reget bann leson ki nou’nn aprann dan liv Zob. Ek si sa fer lontan ki to pa’nn lir liv Zob, to kapav fixe lobzektif pou lir sa zoli liv-la. Nou sir ki to pou trouv bann lezot zoli leson ek ki to pou gagn boukou bienfe gras-a sa liv-la!