Liv Zob Kapav Ed Twa kan To Pe Soufer

1-2. Sit sertin rezon kifer li vo lapenn lir liv Zob.

ESKI to rapel dernie fwa ki to’nn lir liv Zob? Mem si sa fer preske 3,500 an ki’nn ekrir sa liv-la, boukou dimounn konsider li kouma enn parmi bann meyer liv ki’nn ekrir. Boukou dimounn kontan stil ki sa ekrivin-la inn servi pou ekrir sa liv-la, parski li servi bann lexpresion ki zoli, ki fasil pou konpran, ek ki ena enn gran lefe lor bann dimounn. Li vre ki se Moiz ki’nn ekrir sa liv-la. Selman, se Zeova ki ti dir Moiz seki li ti bizin ekrir.—2 Tim. 3:16.

² Liv Zob, se enn liv inportan dan Labib. Kifer? Parski li fer nou konpran ki bann anz ek bann imin ena enn desizion inportan pou pran: Zot bizin deside si zot pou defann repitasion Zeova ek servi Li parski zot kontan Li. Liv Zob montre nou osi bann kalite extraordiner ki Zeova ena, kouma so lamour, so sazes, so lazistis, ek so pwisans. Par exanp, dan liv Zob, 31 fwa li dir ki Zeova Li “Tou-Pwisan,” ek se dan liv Zob ki nou trouv sa lexpresion-la pli boukou fwa dan Labib. Liv Zob reponn osi boukou kestion inportan, kouma par exanp: Kifer Bondie permet ki bann dimounn soufer?

3. Ki nou kapav aprann ar liv Zob?

³ Parey kouma nou trouv bien seki ena otour nou kan nou lor enn montagn, kan nou lir liv Zob, nou trouv bien seki Zeova panse lor soufrans. Alor, anou gete kouma liv Zob kapav ed nou kan nou pe soufer. Dan sa lartik-la, nou pou trouve kouma liv Zob kitfwa ti ed sertin Izraelit, ek osi kouma li kapav ed nou azordi. Nou pou trouve osi kouma nou kapav servi sa liv-la pou ed lezot.

BONDIE LES ZOB SOUFER

4. Kifer Zob ti bien diferan ar bann Izraelit ki ti dan Lezip?

⁴ Zob ti res dan enn pei ki ti apel Ouz. Sa pei-la kitfwa ti dan les Later Promiz ek dan lenor Larabi. Zob ti viv lepok kot bann Izraelit ti bann esklav dan Lezip. Ek kan zot ti dan Lezip, sertin Izraelit ti pe ador bann fos bondie, me Zob pa ti kouma zot parski li ti pe servi Zeova avek fidelite. (Zozwe 24:14; Eze. 20:8) Konsernan Zob, Zeova ti dir: “Pena personn kouma li lor later.”a (Zob 1:8) Zob ti bien ris ek li ti “dimounn pli inportan parmi tou bann dimounn ki ti viv dan Les.” (Zob 1:3) Satan sirman ti bien ankoler pou trouv enn kikenn kouma Zob pe servi Zeova avek fidelite, sirtou parski lezot ti bien konn li ek ti bien respekte li!

5. Kifer Zeova ti les Zob soufer? (Zob 1:20-22; 2:9, 10)

⁵ Satan ti dir ki Zob ti pou aret servi Zeova si li soufer. (Zob 1:7-11; 2:2-5) Mem si Zeova ti bien kontan Zob, Li ti permet ki Satan fer Zob soufer. Sa ti pou montre si Satan ena tor ouswa ena rezon. (Zob 1:12-19; 2:6-8) Lerla, Satan ti fer Zob perdi tou so bann zanimo, li ti touy so dis zanfan, ek li ti fer Zob gagn enn maladi ki ti kouver so lekor net ek ki ti fer li bien soufer. Me malgre tousala, Zob ti res fidel ar Zeova. (Lir Zob 1:20-22; 2:9, 10.) Avek letan, Zeova ti redonn Zob enn bon lasante, li ti revinn ris, li ti regagn enn bon repitasion, ek Zeova ti donn li dis lezot zanfan. Ek gras-a Zeova, Zob ti viv ankor 140 an. Li ti viv ase lontan pou li trouv so bann zanfan ek so bann ti-zanfan lor “kat zenerasion.” (Zob 42:10-13, 16) Ki leson bann serviter Zeova dan lepase ti kapav aprann ar zistwar Zob, ek ki nou nou kapav aprann azordi?

6. Kouma zistwar Zob kitfwa ti ed bann Izraelit? (Get zimaz osi.)

⁶ Kouma zistwar Zob kitfwa ti ed bann Izraelit? Lavi bann Izraelit ti bien difisil dan Lezip. Par exanp, kan zot ti zenn, Zozwe ek Kaleb ti bann esklav, ek apre sa, zot ti bizin viv 40 an dan dezer parski bann lezot Izraelit ti dezobeir Zeova. Si bann Izraelit ti tann koz lor bann leprev ki Zob ti gagne ek osi lor seki ti ariv li apre, sirman sa ti ed zot ek zot bann desandan pou konpran akoz kisann-la bann dimounn soufer. Sirman sa ti ed zot osi pou konpran pli bien kifer Zeova les bann dimounn soufer, ek pou konpran osi ki fidelite bann dimounn bien inportan pou Zeova.

7-8. Kouma liv Zob kapav ed bann ki pe soufer? Donn enn lexanp.

⁷ Kouma zistwar Zob kapav ed nou? Malerezman, boukou dimounn azordi nepli krwar dan Bondie parski zot pa konpran kifer bann bon dimounn soufer. Anou get lexanp Hazelb ki res Rwannda. Kan li ti tipti, li ti krwar dan Bondie. Me apre sa, li ti pas par boukou problem. Par exanp, so bann paran ti divorse, ek kan so mama ti remarye, so boper ti bien maltret li. Kan li ti adolesan, enn zom ti viol li. Ek kan li ti al so Legliz, li pa ti gagn okenn rekonfor laba. Avek letan, Hazel ti ekrir Bondie enn let, ek dan so let li ti dir: “Bondie, mo’nn priye twa ek mo’nn esey fer lebien, me to’nn fer mwa bien soufer. Azordi, mo pe kit twa ek mo pou fer tou seki mo anvi.” Nou leker bien fermal kan nou mazinn bann dimounn kouma Hazel, ki panse ki se akoz Bondie ki bann dimounn soufer!

⁸ Gras-a liv Zob, nou’nn aprann ki se pa akoz Bondie ki nou soufer, se akoz Satan. Nou’nn aprann osi ki kan bann dimounn soufer, fode pa nou panse ki zot pe rekolte seki zot inn seme. Labib dir ki “bann moman difisil ek bann sitiasion ki personn pa atann” kapav ariv nou tou. (Ekle. 9:11; Zob 4:1, 8) Nou’nn aprann osi ki si nou kontign servi Zeova avek fidelite dan bann moman difisil, nou donn Zeova lokazion pou montre ki Satan enn manter. (Zob 2:3; Prov. 27:11) Nou bien kontan ki nou’nn aprann sa bann lansegnman-la, parski aster-la nou konn vre rezon kifer nou ek bann dimounn ki nou kontan, soufer. Avek letan, Hazel inn etidie Labib ar bann Temwin Zeova, ek li’nn konpran ki se pa akoz Bondie ki li soufer. Li dir: “Mo ti re-priye Bondie ar tou mo leker. Mo ti dir Li ki, kan mo ti dir ki mo ti pe kit Li, mo pa ti vremem kit Li, parski avredir mo pa ti vremem konn Li. Aster-la, mo kone ki Zeova kontan mwa ek sa rann mwa ere.” Nou bien rekonesan ar Zeova, parski gras-a Labib nou konpran kifer Li les bann dimounn soufer! Aster-la, anou gete kouma liv Zob kapav ed nou kan nou gagn bann difikilte.

LIV ZOB KAPAV ED NOU POU ANDIRE

9. Ki Zob ti kontign fer mem si li ti pe soufer? (Zak 5:11)

⁹ Mazinn Zob pe asize tousel dan lasann, enn ta bouton koulou lor li, ek li pe korde ar douler. Li’nn vinn bien meg, ek so lapo inn sanz kouler akoz so maladi. Li nepli ena lafors. Li pe asize anba, li pe plengn so sor, ek li pe grat so bann bouton ar enn bout po an larzil ki kase. Selman, dan tou sa bann maler-la, Zob pa ti pe zis viv, me li ti pe kontign andire ek res fidel ar Zeova. (Lir Zak 5:11.) Ki kitsoz ti ed Zob pou andire?

10. Ki kitsoz montre ki Zob ti bien pros ar Zeova? Explike.

¹⁰ Zob ti ouver so leker ar Zeova ek li ti dir Li seki li ti resanti. (Zob 10:1, 2; 16:20) Par exanp, sapit 3 montre ki Zob ti bien sagrin ki tou sa bann maler-la ti ariv li, ek li ti panse ki se akoz Zeova ki li ti pe gagn tousala. Apre sa, trwa parmi so bann kamarad plizir fwa ti dir li ki Bondie ti pe pini li akoz so bann pese. Me Zob ti kontign dir ki li ti res fidel ar Bondie. Parfwa, li ti mem dir ki li ti pli zis ki Bondie. (Zob 10:1-3; 32:1, 2; 35:1, 2) Zob ti telman anvi montre ki li ti res fidel ar Zeova, ki parfwa li ti “koze san reflesi.” (Zob 6:3, 26) Dan sapit 31, Zob anvi ki Bondie reponn li, ek li dir ki li pa merite gagn tou sa bann maler-la. (Zob 31:35) Selman, Zob ti bizin pa insiste ar Zeova pou ki Li dir li kifer li ti pe soufer.

11. Kouma Zeova ti reponn Zob?

¹¹ Par fason ki Zob ti koz ar Zeova, nou konpran ki li ti ena enn bon lamitie avek Li. Li ti sir ki Zeova ti pou trouve ki li fidel. Selman, kan Zeova ti fer enn tanpet pou Li reponn Zob, Li pa ti explik li kifer li ti pe soufer. Ek Li pa ti pini Zob, parski Zob ti dir seki li ti resanti, ouswa parski li ti dir ki li pa ti fer nanye demal. Olie sa, parey kouma enn bon papa ti pou fer ar so garson, Zeova ti koz avek Zob ek Li ti ed li pou sanz so fason panse. Sa ti meyer fason pou ed Zob! Gras-a sa, avek limilite Zob ti rekonet ki li pa ti konn nanye, ek li ti repanti parski li ti koze san reflesi. (Zob 31:6; 40:4, 5; 42:1-6) Kouma sa zistwar-la ti kapav ed bann serviter Zeova dan lepase, ek kouma sa kapav ed nou azordi?

12. Kouma zistwar Zob kitfwa ti ed bann Izraelit?

¹² Kouma zistwar Zob kitfwa ti ed bann Izraelit? Bann Izraelit ti kapav tir bann leson ar seki ti ariv Zob. Anou pran lexanp Moiz. Li ti bizin diriz pep Izrael, me sa ti bien difisil parski bann-la plizir fwa ti dezobeir Zeova ek ti bien desevwar li. Bann Izraelit souvan ti plengne ek ti rebel kont Zeova kan zot ti gagn bann difikilte. Parkont, kan Moiz ti gagn bann difikilte, li ti priye ek li ti rod led Zeova, parey kouma Zob ti fer. (Ex. 16:6-8; Nonb 11:10-14; 14:1-4, 11; 16:41, 49; 17:5) Lexanp Zob kitfwa ti ed Moiz osi kan Zeova ti disiplinn li. Kan bann Izraelit ti dan Kades inpe avan ki zot rant dan Later Promiz, Moiz ti “koze san reflesi” ek li pa ti donn laglwar Zeova. (Ps. 106:32, 33) Ek akoz sa, Zeova pa ti les li rant dan Later Promiz. (Det. 32:50-52) Mem si sa disiplinn-la ti bien difisil, Moiz ti aksepte li avek limilite. Zistwar Zob kitfwa ti ed osi bann Izraelit pou andir bann difikilte ki zot ti gagne apre ki zot ti rant dan Later Promiz. Gras-a zistwar Zob, kitfwa zot ti aprann kouma pou ouver zot leker ar Zeova ek pou dir Li seki zot resanti. Kitfwa sa ti rapel zot osi ki zot pa pli zis ki Zeova, ek ki zot bizin ena limilite ek aksepte ki Zeova disiplinn zot.

13. Kouma zistwar Zob kapav ed nou pou andire? (Ebre 10:36)

¹³ Kouma zistwar Zob kapav ed nou? Azordi, nou pe viv dan enn lepok bien difisil, alor nou bien bizin ena landirans pou ki nou kontign servi Zeova avek fidelite. (Lir Ebre 10:36.) Par exanp, sertin parmi nou bann frer ek ser bien malad, ouswa zot pe fer enn depresion. Ena lezot ki ena bann problem dan lafami, ouswa enn manb zot fami ouswa zot kamarad inn mor. Ek ena lezot ki pe gagn bann lezot problem ankor. Anplis, kan nou pe soufer, li kapav arive ki enn kikenn dir nou ouswa fer nou enn kitsoz ki bien desevwar nou, ek akoz sa, nou kapav trouv sa pli difisil pou andire. (Prov. 12:18) Selman, gras-a liv Zob, nou’nn trouve ki nou kapav ouver nou leker ar Zeova ek dir Li seki nou resanti, ek nou kapav sir ki Li pou ekout nou. (1 Zan 5:14) Li pa pou pini nou si nou “koze san reflesi,” parey kouma Zob. Okontrer, Li pou donn nou lafors ek sazes ki nou bizin pou ki nou kapav andire. (2 Kro. 16:9; Zak 1:5) Zeova kapav ed nou osi pou sanz nou fason panse, parey kouma Li ti fer ar Zob. Li kapav donn nou bann konsey gras-a Labib, bann piblikasion, bann ansien, ouswa enn kamarad. Lexanp Zob ansegn nou osi ki, kan Zeova disiplinn nou, nou bizin andire. (Ebre 12:5-7) Zob ti gagn bann bienfe kan li ti ekout Zeova, ek nou osi nou pou gagn bann bienfe si nou ena limilite ek nou aksepte bann konsey ki nou gagne. (2 Kor. 13:11) Tousala, se bann zoli leson ki nou’nn aprann gras-a liv Zob! Aster-la, anou gete kouma nou kapav servi liv Zob pou ed lezot.

SERVI LIV ZOB POU ED LEZOT

14. Sit enn fason kouma nou kapav explik bann dimounn kifer nou soufer.

¹⁴ Eski to’nn deza zwenn enn kikenn dan predikasion ki’nn demann twa kifer bann dimounn soufer? To rapel seki to ti reponn li? Kitfwa to ti montre li dan Labib seki ti arive dan zardin Eden. Kitfwa to ti dir li ki Satan, enn anz ki move, ti koz manti ar Adan ek Ev, ek ki akoz sa, zot ti rebel kont Bondie. (Zen. 3:1-6) Apre sa, kitfwa to ti explik li ki se parski Adan ek Ev ti rebel kont Bondie ki nou soufer ek nou mor. (Rom. 5:12) Ek kitfwa to ti explik li osi ki Bondie pe les letan pase pou montre tou dimounn ki seki Satan ti dir ti fos. An-atandan, bann dimounn pe gagn posibilite pou tann koz lor bon nouvel ek pou aprann ki biento bann imin pou vinn parfe ek zot pou viv pou touletan. (Rev. 21:3, 4) Se enn bon fason pou reponn sa kestion-la, ek sa finn ed boukou dimounn pou konpran kifer bann dimounn soufer.

15. Kouma to kapav servi zistwar Zob pou explik bann dimounn kifer nou soufer? (Get zimaz osi.)

¹⁵ Anou get enn lot fason kouma to kapav explik bann dimounn kifer nou soufer. Nou pou servi zistwar Zob pou fer sa. Pou koumanse, to kapav felisit dimounn-la parski li’nn poz enn zoli kestion. Apre sa, to kapav explik li ki Zob, enn zom ki ti fidel ar Bondie ek ki ti gagn boukou difikilte dan so lavi, ti poz sa kestion-la li osi, ek li ti panse ki se akoz Bondie ki li ti pe soufer. (Zob 7:17-21) Dimounn avek ki to pe koze la, kitfwa pou etone pou aprann ki sa fer bien lontan ki bann dimounn pe poz zotmem sa kestion-la. Lerla, to kapav explik li ki se Satan, pa Bondie, ki ti pe fer Zob gagn tou sa bann difikilte-la ek ki ti pe fer li soufer. Satan ti fer sa parski li ti anvi montre ki bann dimounn servi Bondie par lintere. To kapav explik li osi ki mem si se pa Bondie ki ti pe fer Zob soufer, Li ti les sa arive parski Li ti kone ki sertin dimounn ti pou res fidel anver Li ek ki sa ti pou montre ki Satan ena tor. Apre sa, to kapav explik li kouma Bondie ti beni Zob parski li ti res fidel anver Li. Wi, gras-a zistwar Zob, nou kapav rekonfort bann dimounn ek ed zot pou konpran ki se pa akoz Bondie ki zot pe gagn bann difikilte.

16. Servi enn lexanp pou explike kouma liv Zob kapav ed enn kikenn ki pe soufer.

¹⁶ Anou gete kouma liv Zob inn ed Mario. An 2021, enn ser ti pe prese par telefonn. Li ti telefonn Mario, li ti lir enn verse Labib avek li, ek li ti explik li ki Bondie pa zis ekout nou bann lapriyer, me Li osi donn bann dimounn enn lavenir ek enn lespwar. Kan li ti demann Mario seki li panse lor la, Mario ti dir li ki, zis avan ki li telefone, li ti pe ekrir enn let swisid. Mario ti dir li: “Mo krwar dan Bondie, me gramatin mo ti pe demann momem si Li vremem gagn mo traka ek si Li interese ar mwa.” Deziem fwa ki ser-la ti telefonn Mario, li ti rakont li zistwar Zob, ek Mario ti anvi lir zistwar-la limem. Alor, ser-la ti avoy li enn lien lor jw.org, pou ki li kapav lir liv Zob dan Labib. Ki ti arive apre sa? Mario ti aksepte enn letid Labib, ek li bien kontan pou aprann plis lor nou Bondie ki kontan li ek ki interese ar li.

17. Kifer nou bien kontan ki Zeova inn fer ekrir liv Zob dan Labib? (Zob 34:12)

¹⁷ Labib vremem kapav sanz lavi bann dimounn ek rekonfort bann ki pe soufer. (Ebre 4:12) Nou bien kontan ki Zeova inn fer ekrir zistwar Zob dan Labib! (Zob 19:23, 24) Gras-a liv Zob, nou sir ki “Bondie pa azir dan enn move fason.” (Lir Zob 34:12.) Liv Zob ansegn nou osi kifer Bondie les bann dimounn soufer, ek li montre nou kouma nou kapav andir nou bann difikilte. Li kapav osi ed nou pou rekonfort bann ki pe soufer. Dan prosin lartik, nou pou trouve kouma liv Zob kapav ed nou kan nou donn bann konsey.