Parole Jéhovah vivant

JOB, ki chef enn famille, reste dan pays Outs, en Arabie. Dan sa mem lepok-la, ena enn quantité Israélite ki reste en Égypte. Mem si Job pa enn Israélite, li adore Jéhovah. La Bible dire lor li: “Pena personne couma li lor la terre, personne pa kapav faire li okenn reproche, li enn dimoune sans defaut ek li droite; li ena la crainte pou Bondié ek li evite tou seki mauvais.” (Job 1:8) Sans doute Job pé vive apré lepok Joseph, garson Jacob, ek avant lepok prophete Moïse—deux serviteur Jéhovah remarquable.

Nou pensé ki c’est Moïse, ki finn ecrire livre Job. Kitfois li ti aprann bann kitsoz lor Job kan li ti passe 40 an dan Madiân ki pa loin ar pays Outs. Li possible ki Moïse ti tann koz bann dernier jour ki Job ti vive, kan bann Israélite ti pré ar Outs, vers la fin sa 40 an ki zot ti passé dan desert-la.a L’experience ki Job inn vive, inn tellement bien raconté ki dimoune considere sa couma enn grand livre litterature. Mais livre Job, li beaucoup plus ki sa. Sa livre-la reponn bann question couma: Kifer bann bon dimoune souffert? Kifer Jéhovah permette la mechanceté? Eski bann dimoune imparfait kapav reste fidel ar Bondié? Livre Job faire partie dan Parole inspiré Bondié, alors so message encore vivant ek puissant zordi aussi.—Hébreux 4:12.

‘LI TI POU PLI BON SI JOUR KI MO TI NÉ DISPARETTE’

(Job 1:1–3:26)

Enn jour, Satan mette en doute fidelité Job devant Bondié. Jéhovah accepté sa defi-la ek Li laisse Satan envoye bann malheur lor Job enn derriere lot. Mais Job refuse pou “maudit Bondié.”—Job 2:9.

Trois compagnon Job vini pou “prend part dan so malheur.” (Job 2:11) Zot assize avek li sans dire enn mot ziska ki Job casse sa silence-la ek dire: “Li ti pou pli bon si jour mo ti né disparette.” (Job 3:3) Li ti pou prefere “couma bann zenfant ki pa’nn trouve la lumiere,” setadir couma bann zenfant ki’nn fini mort kan zot né.—Job 3:11, 16.

Reponse pou bann question biblik:

1:4—Eski bann zenfant Job ti faire l’anniversaire? Non. Bann mot ki servi dan langue original pou “jour” ek “l’anniversaire,” zot different, parski sakenn ena so prop signification. (Genèse 40:20) Dan Job 1:4, servi mot “jour,” setadir period entre l’heure ki soleil levé ek l’heure ki li al couché. Li parette ki enn fois par an, sa sept garson Job-la ti faire enn rassemblement familial ki ti dure enn semaine. Pendant sa enn semaine-la, chaque garson, sakenn so tour, ti recevoir la famille kot li, dan “so jour.”

1:6; 2:1—Kisannla ti gagne droit vinn devant Jéhovah? La Parole, setadir sel garson ki Jéhovah finn crée direct, bann ange fidel, ek bann ange desobeissant, parmi Satan le Diable, ti presente devant Jéhovah. (Jean 1:1, 18) C’est enn tipé apré ki Royaume Bondié ti’nn etabli en 1914, ki Jésus ti pousse Satan ek so bann demon depuis dan le ciel. (Révélation 12:1-12) Jéhovah inn faire tou bann creature spirituel konn defi ki Satan ti lancé ek bann question ki sa ti soulevé kan Li’nn laisse zot presente devant Li.

1:7; 2:2—Eski Jéhovah ti koz directement avek Satan? La Bible pa donne beaucoup detail lor fason ki Jéhovah koz avek bann creature spirituel. Mais, prophete Mikaïa ti gagne enn vision kot li ti trouve enn ange pé koz directement ar Jéhovah. (1 Rois 22:14, 19-23) Alors li parette ki Jéhovah ti koz avek Satan sans passe par enn intermediaire.

1:21—Dan ki sens eski Job ti kapav retourne dan ‘ventre so mama’? Jéhovah inn faire dimoune “avek la poussiere ki sorti dan la terre.” Alors dan sa passage-la, mot “mama” vedir la terre, dan sens symbolik.—Genèse 2:7.

2:9—Ki sentiment Job so madame kitfois ti ena kan li ti dire so missié maudit Bondié ek mort? Pareil couma so missié, li ti’nn perdi so bann zenfant ki li ti bien content, ek so bann di-bien aussi. Sa ti surement faire li la peine pou trouve so missié, ki avant ti en bonne santé ek asterla li affecté par enn maladie degoutant. Li possible ki tousala ti tellement bouleverse li, ki li ti pa ti reflechi lor seki ti pli important, setadir zot relation avek Jéhovah.

Bann leson pou nou:

1:8-11; 2:3-5. Couma nou trouvé dan cas Job, en plus dire ek faire seki bizin, l’integrité vedir aussi servi Jéhovah avek bann bon mobile.

1:21, 22. Kan nou reste fidel ar Jéhovah dan bann situation favorable ek defavorable toulé-deux, nou kapav prouvé ki Satan enn menteur.—Proverbes 27:11.

2:9, 10. Pareil couma Job, nou bizin reste ferme dan la foi mem si bann membre nou famille pa d’accord avek nou bann l’objectif spirituel, ou-soit zot mette pression lor nou pou nou faire compromis ou-soit abandonne nou la-foi.

2:13. Bann compagnon Job pa ti ena okenn parole reconfortant pou dire lor Bondié ek lor So bann promesse parski zot ti mank spiritualité.

“MO PA POU ABANDONNE MO L’INTEGRITÉ!”

(Job 4:1–31:40)

Point principal ki trois compagnon Job faire ressorti dan zot discours, c’est ki Job inn bizin faire enn kitsoz ki bien mauvais, pou li gagne enn punition severe coumsa ar Bondié. Éliphaz koz en premier. Bildad koz apré ek li dire bann parole pli blessant. Tsophar dire bann parole pli dur encore.

Job pa accepté fausse raisonnement so bann compagnon. Li pa comprend kifer Bondié inn permette li souffert coumsa, ek a cause sa li rod prouvé ki li ena raison avant tou. Malgré sa, li toujours content Jéhovah ek li dire: “Ziska mo mort mo pa pou abandonne mo l’integrité!”—Job 27:5.

Reponse pou bann question biblik:

7:1; 14:14—Ki vedir “corvée”? Job ti tellement abatte ki li ti trouve la vie couma enn travail obligatoire ki bien dure. (Job 10:17, note) Enn dimoune ki mort obligé passe sa lé-temps ki ena entre so la-mort ek so resurrection-la dan shéol. A cause sa Job compare sa period-la ar enn travail obligatoire.

7:9, 10; 10:21; 16:22—Eski seki Job dire dan sa bann verset-la vedir ki li pa ti croire dan la resurrection? Kan Job ti dire sa bann parole-la, li ti pé pense seki ti pou arrive li dé-suite. Alors, ki li ti pé rod dire? Li possible ki li ti pé dire ki si li mort, bann dimoune ki ti pé vive dan so lepok ti nepli pou trouve li. Zot pa ti pou trouve li retourne dan so lakaz ek personne pa ti pou prend li compte ziska le temps ki Bondié inn fixé arrivé. Kitfois Job ti pé aussi rod dire ki personne pa kapav sorti dan shéol ek retourné par li-mem. Kan nou lire Job 14:13-15, li clair ki Job ti croire dan la resurrection.

10:10—Couma eski Jéhovah ti ‘verse Job couma di-lait’ ek faire li “caillé couma fromage”? Job pé decrire dan enn fason poetik fason ki li’nn formé dan ventre so mama.

19:20—Ki Job ti pé rod dire par l’expression: “Mo sapé avek la peau mo lé-dent”? Kan li ti dire ki li ti sapé avek la peau enn kitsoz ki parette pena la peau, kitfois Job ti pé dire ki li ti sapé avek preské nanyin.

Bann leson pou nou:

4:7, 8; 8:5, 6; 11:13-15. Fodé pa nou pressé pou croire ki enn dimoune ki dan problem, pé recolté seki li’nn semé ek ki li pena faveur Bondié.

4:18, 19; 22:2, 3. Nou bann conseil bizin basé lor Parole Bondié, pa lor nou bann l’idée personnel.—2 Timothée 3:16.

10:1. Job ti tellement amer avek la vie ki li ti nepli comprend nanyin ek li pa ti maziné ki kitfois ti ena lezot raison kifer li ti pé souffert. Kan nou passe par bann souffrance, fodé pa ki nou vinn amer, surtout ki nou, nou konn bien bann question ki impliké.

14:7, 13-15; 19:25; 33:24. L’espoir la resurrection kapav soutenir nou dan n’importe ki l’epreuve ki Satan kapav faire nou gagné.

16:5; 19:2. Fodé pa ki nou bann parole faire lezot en colere, mais sa bizin plutot encourage ek fortifié zot.—Proverbes 18:21.

22:5-7. Si nou donne enn dimoune conseil ki basé lor bann accusation ki pena preuve, sa conseil-la pena okenn valeur ek sa kapav faire di-tort.

27:2; 30:20, 21. Pa bizin nou parfait pou ki nou kapav garde nou l’integrité. Job ti ena tort kan li ti critik Bondié.

27:5. Job tousel ti ena pouvoir pou garde so prop l’integrité parski l’integrité depann lor l’amour ki enn dimoune ena pou Bondié. Alors nou bizin developpe enn l’amour profond pou Jéhovah.

28:1-28. Bann dimoune koné kot bann tresor la terre été. A mesure zot rod sa bann tresor-la, zot faire zot l’esprit travail ek sa amenn zot dan bann chemin souterrain ki mem bann zoiseau ki lachasse ek ki trouve bien loin pa reussi trouvé. Mais nou kapav gagne la sagesse lor plan spirituel si nou ena la crainte pou Jéhovah.

29:12-15. Nou bizin content pou montré l’amour, ek aide bann ki dan besoin.

31:1, 9-28. Job inn laisse enn bon l’exemple pou nou. Li ti pa ti flirté ni commette l’adultere. Li ti manifesté la justice ek pitié dan so relation avek lezot. Li pa ti materialiste ek li ti rejette l’idolatrie.

“MO VRAI-MEM REPENTI DAN LA POUSSIERE EK DAN LA CENDRE”

(Job 32:1–42:17)

Élihou, li enn jeune homme ki ti pé observe la situation ek li’nn ecoute avek patience sa discussion-la. Asterla li dire seki li pensé. Li corrige maniere pensée Job ek so trois compagnon ki pé fatigue li.

Couma Élihou fini kozé, Jéhovah reponn dan enn tempete. Li pa donne okenn explication lor souffrance Job. Mais par enn serie question, Li faire Job konn So puissance extraordinaire ek So grand sagesse. Job reconette ki li’nn kozé sans comprend ek li dire: “Mo tire tou seki mo’nn dire, ek mo vrai-mem repenti dan la poussiere.” (Job 42:6) Letan bann l’epreuve Job fini, Jéhovah recompense so l’integrité.

Reponse pou bann question biblik:

32:1-3—Kan eski Élihou ti vini? Élihou ti tann tou bann discours. Alors sans doute, li’nn vinn assizé pa trop loin, avant ki Job commence kozé pou casse sa silence ki ti dure sept jour-la.—Job 3:1, 2.

34:7—Dan ki sens Job ti coumadir enn dimoune “ki boire moquerie, coumadir li pé boire de l’eau”? Dan sa situation malheureux kot li ti été-la, Job ti ena tendance pou pensé ki so trois compagnon ti pé moque li, alors ki en realité zot ti pé koz kont Bondié. (Job 42:7) C’est dan sa fason-la ki li ti pé accepté tou moquerie couma enn dimoune ki boire de l’eau avek plaisir.

Bann leson pou nou:

32:8, 9. Enn dimoune pa gagne la sagesse zis parski li’nn rente dan l’age. Pou enn dimoune ena la sagesse, li bizin comprend Parole Bondié ek laisse-li guidé par So l’esprit.

34:36. Pou nou kapav prouve nou l’integrité, nou bizin ‘passe par bann l’epreuve ziska nou dernier limite’ dan enn fason ou dan enn lot.

35:2. Élihou ti ecoute avek attention seki Job ek so trois compagnon ti dire ek li ti comprend kot problem-la ti été avant li kozé. (Job 10:7; 16:7; 34:5) Avant ki bann ancien donne conseil, zot bizin ecouté, konn la verité, ek comprend bien kot problem-la été.—Proverbes 18:13.

37:14; 38:1–39:30. Kan nou medite lor bann kitsoz extraordinaire ki Jéhovah inn faire ek ki montré nou so puissance ek so sagesse, sa faire nou senti-nou bien tipti ek aussi sa aide nou pou comprend ki justification souveraineté Jéhovah pli important ki n’importe ki l’interet personnel nou kapav ena.—Matthieu 6:9, 10.

40:1-4. Kan nou senti-nou tenté pou critik Bondié Tout-Puissant, nou bizin ‘mette nou la-main lor nou la-bouche.’

40:15–41:34. Behémoth (hippopotame) ek Léviathan (crocodile) ena vrai-mem enn la-force extraordinaire! Createur sa bann zanimo ki ena la force-la donne nou aussi l’energie ki nou bizin pou contigne servi Li.—Philippiens 4:13.

42:1-6. Kan Jéhovah ti koz avek Job ek ti rappel li couma Li montré so puissance, sa ti aide Job pou “trouve Bondié,” ou-soit pou konn la verité concernant Bondié. (Job 19:26) Sa ti faire li corrige so fason pensé. Kan nou gagne correction a travers la Bible, nou bizin paré pou reconette nou erreur ek faire bann changement ki bizin.

Cultive ‘l’endurance couma Job’

Livre Job montré nou dan enn fason bien clair ki Bondié pa responsable souffrance bann dimoune. C’est Satan ki responsable. Bondié permette ki ena mechanceté lor la terre, alors sa donne nou l’occasion pou montré personnellement dan ki coté nou été en rapport avek question concernant souveraineté Jéhovah ek nou l’integrité.

Pareil couma Job, tou bann ki content Jéhovah pou passe par l’epreuve zot aussi. Zistoire Job convaink nou ki nou kapav enduré. Li rappel nou ki nou bann problem pa pou contigné pou touletan. Jacques 5:11 dire: “Zot finn tann koz lor l’endurance Job, ek zot finn trouvé ki Jéhovah finn faire pou li apré.” Jéhovah ti recompense Job parski li ti garde so l’integrité. (Job 42:10-17) Nou ena vrai-mem enn grand l’esperance devant nou—la vie eternel dan Paradi lor la terre! Alors pareil couma Job, anou determiné pou garde nou l’integrité.—Hébreux 11:6.

[Note]

[Zimage, page 32]

‘Job ti ena l’endurance.’ Ki leson nou kapav tiré ladan?