Job—Enn dimoune ki’nn enduré ek ki’nn garde so l’integrité
“Eski to’nn fixé to leker lor mo serviteur Job? Eski to’nn remarké ki pena personne couma li lor la terre: personne pa kapav faire li okenn reproche, li enn dimoune droite, ki ena la crainte pou Bondié ek ki evite seki mauvais?”—JOB 1:8.
1, 2. (a) Ki malheur ti affecté Job sans ki li ti attann? (b) Couma la vie Job ti été avant ki li ti gagne sa bann malheur-la?
Ti ena enn dimoune ki ti parette ena tou dan so la-vie, li ti ena di-bien, enn grand position, enn bon la-santé ek li ti heureux dan so famille. Mais enn jour, trois malheur ti’nn affecté li enn derriere lot. Enn coup, li ti’nn perdi tou so di-bien. Apré sa, enn catastrophe ti touye tou so bann zenfant. Enn tipé apré, li ti gagne enn maladie ki ti mine li ek ki ti faire li gagne bann gros-gros coulou lor so lekor, ek sa ti faire li bien souffert. Surement ou finn deviné kisannla sa dimoune-la. Oui c’est Job, personnage principal ki mentionné dan livre ki porte so nom dan la Bible.—Job, chapitre 1 ek 2.
2 Job ti soupiré kan li ti dire: “Ah, si seulement mo ti pareil couma mo ti été pendant bann mois lunaire longtemps.” (Job 3:3; 29:2) Kan malheur arrivé, kisannla pa rappel lepok kot li ti dan bien dan so la-vie? Job ti amenn enn bon la-vie, coumadir li ti protegé ek li pa ti gagne okenn malheur. Bann dimoune bien important ti respecté li ek ti rod so conseil. (Job 29:5-11) Li ti riche, mais li ti ena enn l’attitude equilibré lor l’argent. (Job 31:24, 25, 28) Kan li ti trouve bann veuve ek bann orphelin dan problem, li ti aide zot. (Job 29:12-16) Ek li ti reste fidel envers so madame.—Job 31:1, 9, 11.
3. Couma Jéhovah ti considere Job?
3 Personne pa ti kapav faire Job okenn reproche dan so la-vie parski li ti adore Bondié. Jéhovah ti dire lor li: “Pena personne couma li lor la terre: personne pa kapav faire li okenn reproche, li enn dimoune droite, ki ena la crainte pou Bondié ek ki evite seki mauvais.” (Job 1:1, 8) Mem si Job ti enn dimoune droite lor plan moral, bann malheur ti fini so la-vie net. Tou seki li ti’nn faire ti disparette, ek bann souffrance ek bann tracas ti montré ki qualité dimoune li ti été vrai-mem.
4. Kifer li pou bon ki nou examine bann l’epreuve ki Job inn gagné?
4 Bien-sur, parmi bann serviteur Bondié, pa zis Job tousel ki’nn souffert personnellement a cause bann malheur. Zordi, beaucoup chrétien ki’nn passe par bann malheur kapav comprend par ki Job inn passé. Pou sa raison-la, li bon ki nou examine deux question: Si nou rappel bann l’epreuve ki Job inn gagné, couma sa kapav aide nou kan nou gagne bann malheur? Et, couma sa kapav enseigne nou pou comprend pli bien bann ki pé souffert?
Enn question fidelité ek enn test integrité
5. Dapré Satan, kifer Job ti pé servi Jéhovah?
5 Personne lor la terre pa finn passe par mem situation ki Job. Sans ki Job ti koné, Satan ti mette en doute bann mobile ki ti pousse li pou servi Bondié. Pendant enn reunion ki ti ena dan le ciel, Jéhovah ti attire l’attention Satan lor bann bon qualité Job, ek Satan ti reponn: “Eski to pa finn monte enn barrage autour li, autour so lakaz, ek autour tou seki li ena?” Par là, Satan ti pé pretann ki Job ti pé servi Bondié par interet—ek sa accusation-la applik aussi ar tou bann lezot serviteur Bondié. Satan ti dire Jéhovah: “Envoye to la-main, s’il te plait, ek touche tou seki li ena, ek guetté si li pa maudi toi dan to figure.”—Job 1:8-11.
6. Ki kitsoz bien important Satan ti mette en doute?
6 Au commencement, Satan ti souleve enn question bien important. Li ti mette en doute fason ki Jéhovah dirigé. Eski li vrai-mem possible ki Bondié dirige l’univers kot tou so bann creature servi Li par amour? Ou-soit, couma Satan ti pretann, eski finalement c’est pa par l’interet ki zot tou pou servi Li? Jéhovah ti ena confiance dan l’integrité ek dan fidelité Job. Li ti permette ki Satan servi Job pou prouve seki li ti dire. Alors, Satan li-mem finn amenn bann malheur enn derriere lot lor Job. Kan Satan ti envoye bann premier malheur lor Job, li pa ti reussi faire li maudi Bondié, alors, li ti faire li gagne enn maladie grave ki ti faire li bien souffert. Satan ti pretann: “La peau pou la peau, ek tou seki enn dimoune ena, li pou donne sa pou sap so nâme.”—Job 2:4.
7. Dan ki fason bann serviteur Bondié gagne bann l’epreuve pareil couma Job ti gagné?
7 Li vrai ki la plupart chrétien zordi pa souffert mem quantité ki Job, mais zot gagne tou sorte qualité l’epreuve ki faire zot souffert. Ena beaucoup ki gagne persecution ou-soit bann problem dan zot famille. Bann difficulté economik ek bann problem la santé kapav affecté nou beaucoup. Certain finn perdi zot la-vie a cause zot la-foi. Bien-sur, fodé pa ki nou pensé ki c’est Satan ki responsable chaque problem ki nou gagné. En fait, li possible ki certain problem arrivé a cause nou bann prop erreur ou-soit a cause enn maladie hereditaire. (Galates 6:7) Ek nou tou, nou affecté par la vieillesse ek kitfois par bann catastrophe naturel. Dapré la Bible, li clair ki zordi Jéhovah pa faire mirak pou protege so bann serviteur kont sa bann kitsoz-la.—Ecclésiaste 9:11.
8. Couma Satan kapav servi bann l’epreuve ki nou gagné?
8 Mais, Satan kapav servi nou bann l’epreuve pou mine nou la-foi. L’apotre Paul ti dire ki li ti pé souffert a cause “enn pikan dan [so] la-chair, enn ange Satan,” ki ti pé contigne “batte” li. (2 Corinthiens 12:7) Nou pa koné si sa ‘pikan-la’ ti enn problem lor plan physique, kitfois li pa ti trouve bien clair, ou-soit enn lot problem. Mais Paul ti comprend ki Satan ti kapav servi sa problem-la ek la peine ki sa ti faire li gagné, pou faire li perdi so la-joie ek so l’integrité. (Proverbes 24:10) Zordi, Satan kapav pousse bann membre la famille, bann camarade lekol, ou-soit mem bann gouvernement dictateur pou persecute bann serviteur Bondié dan certaine fason.
9. Kifer fodé pa ki nou etonné kan nou gagne bann difficulté ou-soit persecution?
9 Couma eski nou kapav reussi faire face ar sa bann problem-la? C’est kan nou considere sa bann situation-la couma enn l’occasion pou montré ki nou l’amour pou Jéhovah ek nou soumission ar so domination, pou reste touletan fort. (Jacques 1:2-4) N’importe ki raison ki pé faire nou souffert, si nou comprend l’importance pou reste fidel ar Bondié, sa pou aide nou pou garde nou l’equilibre lor plan spirituel. L’apotre Pierre ti ecrire bann chrétien: “Bien-aimé, pa etonné a cause sa difé ki ena parmi zot-la, ek ki pé vinn lor zot pou testé zot, coumadir c’est enn kitsoz drole ki pé arrive zot.” (1 Pierre 4:12) Ek Paul ti donne sa l’explication-la: “Tou seki envie vive dan l’attachement avek Bondié en tant ki disciple Jésus Christ, zot aussi zot pou gagne persecution.” (2 Timothée 3:12) Satan encore toujours pé testé l’integrité bann Témoins de Jéhovah, pareil couma li ti faire ar Job. En realité, la Bible montré ki dan lepok dernier jour Satan inn augmente so bann l’attak kont bann serviteur Bondié.—Révélation 12:9, 17.
Enn malentendu ek bann mauvais conseil
10. Ki desavantage Job ti ena?
10 Job ti ena enn desavantage, ki nou, nou pena. Li pa ti koné kifer tou sa bann malheur-la ti pé affecté li. Li ti tire sa mauvais conclusion-la: “Jéhovah Li-mem inn donné, ek Jéhovah Li-mem inn prend.” (Job 1:21) Kitfois, par expré Satan ti essaye donne Job l’impression ki c’est Bondié ki ti envoye sa bann malheur-la lor li.
11. Couma Job ti reagir kan bann malheur ti pé affecté li?
11 Femme Job ti encourage li pou maudi Bondié. Mem si li ti refuse pou faire sa, li ti bien decouragé. (Job 2:9, 10) Li ti dire: ‘Bann mauvais dimoune parette pé reussi pli bien ki moi.’ (Job 21:7-9) Li ti surement demann li-mem: ‘Kifer Bondié pé puni moi?’ Ti ena bann l’occasion dan so la-vie kot li ti envie mort. Li ti dire: “Ah ! si to ti cachiette moi dan shéol, si to ti contigne cachiette moi ziska ki to colere passé!”—Job 14:13.
12, 13. Couma seki trois camarade Job ti dire li, sa ti bien affecté li?
12 Job ti ena trois camarade ki ti vinn visite li, pou soi-disant vinn “partage so la-peine ek reconforte li.” (Job 2:11) Mais, zot ti bann “mauvais consolateur.” (Job 16:2) Si Job ti ena bann camarade avek ki li ti kapav devide so leker, li ti pou gagne enn soulagement. Mais sa trois-la zot, zot ti faire Job plus troublé, ek zot ti agace li encore plus.—Job 19:2; 26:2.
13 Nou comprend kifer kitfois Job ti demann li-mem: ‘Kifer moi? Ki mo’nn faire pou merite tou sa bann malheur-la?’ So bann camarade ti donne li bann l’explication ki ti bien fausse. Zot ti pretann ki Job ti responsable tou so bann souffrance parski li ti’nn faire enn peché grave. Éliphaz ti pose sa question-la: “Ki dimoune innocent ki’nn mort?” Li ti ajouté: “Dapré seki mo’nn trouvé, bann ki faire seki mauvais ek bann ki sème malheur, zot-mem ki pou recolté sa.”—Job 4:7, 8.
14. Kifer fodé pa ki touletan nou associé souffrance avek enn mauvais conduite?
14 Nou kapav gagne bann problem si nou rod faire nou lekor plaisir au lieu ki nou rod bann kitsoz spirituel. (Galates 6:7, 8) Pourtant, dan sa lé-monde zordi-la, li possible ki nou gagne problem mem si nou ena enn bon conduite. En plus, jamais nou pa kapav dire ki bann innocent protegé kont tou bann malheur. Jésus Christ, ki ti “pur, separé ar bann dimoune ki faire peché,” ti souffert kan li ti mort lor enn poteau, ek l’apotre Jacques ti mort couma enn martyre. (Hébreux 7:26; Actes 12:1, 2) Mauvais raisonnement Éliphaz ek so deux camarade ti pousse Job pou defann so reputation ek pou insisté lor so innocence. Sa trois camarade-la ti persisté pou faire Job croire ki, si li ti pé souffert, c’est parski li ti merite sa. Surement sa ti influence fason ki Job ti considere la justice Bondié.—Job 34:5; 35:2.
Bann disposition ki pou aide nou dan bann l’epreuve
15. Ki qualité raisonnement pou aide nou kan nou pé souffert?
15 Eski nou kapav tire enn leson ar seki’nn arrive Job? Pou nou, bann malheur, la maladie, ou-soit persecution kapav parette bien injuste, surtout si nou ena l’impression ki bann dimoune autour nou pa pé gagne sa. (Psaume 73:3-12) Parfois, nou pou bizin demann nou-mem: ‘Eski mo l’amour pou Bondié pousse moi pou servi Li n’importe ki arrivé? Eski mo vrai-mem envie donne Jéhovah l’occasion pou “reponn celui ki pé provok Li?” ’ (Proverbes 27:11; Matthieu 22:37) Fodé jamais ki nou laisse commentaire ki lezot faire sans reflechi, faire nou ena bann doute lor nou Papa ki dan le ciel. Enn jour, enn chrétien fidel ki ti pé souffert pendant plusieurs l’année a cause enn maladie chronik, ti dire: “Mo koné ki n’importe ki l’epreuve Jéhovah permette, mo pou kapav supporte sa. Mo koné ki Li pou donne moi la force necessaire. Li finn toujours donne moi la force ki mo bizin.”
16. Couma Parole Bondié aide bann dimoune ki dan bann l’epreuve?
16 En rapport avek bann tactik ki Satan servi, nou, nou comprend certain kitsoz ki Job pa ti comprend. La Bible dire: “Nou konn bien so bann l’intention,” setadir so bann mauvais plan ki li ena kont nou. (2 Corinthiens 2:11) En plus, nou kapav trouve enn grand sagesse pratik dan la Bible ki raconte la vie bann zom ek bann femme fidel ki finn supporte tou sorte qualité problem. L’apotre Paul, ki ti souffert plus ki beaucoup lezot chrétien, ti ecrire: “Tou bann kitsoz ki finn ecrire longtemps finn ecrire pou nou l’instruction, pou ki par nou l’endurance ek par consolation ki nou gagné dan bann l’Ecriture, nou ena enn l’espoir.” (Romains 15:4) Enn Témoin de Jéhovah en Europe, ki ti dan prison a cause so la-foi pendant deuxieme laguerre mondial, ti change so ration mangé pou trois jour kont enn la Bible. Li dire: “Sa l’echange-la ti vrai-mem faire moi gagne beaucoup bienfait! Mem si mo ti bien faim, mo ti gagne enn mangé spirituel ki ti soutenir moi ek lezot [camarade] aussi dan nou bann l’epreuve pendant sa period critik-la. Mo finn garde sa la-Bible-la ziska zordi.”
17. Ki disposition spirituel kapav aide nou pou enduré?
17 En plus reconfort ki nou gagné dan la Bible, ena beaucoup lezot livre ki basé lor la Bible ki donne nou enn bon direction pou faire face ar nou bann problem. Si ou examine l’Index des publications Watch Tower, ou pou surement trouve l’experience enn chrétien ki finn passe par mem l’epreuve ki ou. (1 Pierre 5:9) Ou-soit seki kapav aide ou aussi, c’est discute ou situation avek bann ancien ki comprend, ou-soit avek bann lezot chrétien mur. Mais surtout, par la priere ou kapav compte lor l’aide Jéhovah ek so l’esprit saint. Couma eski Paul ti tini ferme kan Satan ti “batte” li? C’est kan li ti aprann compte lor la force Bondié. (2 Corinthiens 12:9, 10) Li ti ecrire: “Pou tou kitsoz mo ena courage grace a celui ki donne moi la force.”—Philippiens 4:13.
18. Couma nou bann frere ek soeur spirituel kapav donne nou enn grand l’encouragement?
18 Alors, ou kapav gagne l’aide necessaire, ek fodé jamais ou hesité pou rod sa l’aide-la. Enn proverbe dire: “Eski to finn montré ki to decouragé kan malheur vinn lor toi? To pou ena enn tigit la-force mem.” (Proverbes 24:10) Pareil couma karya kapav fini enn lakaz di-bois net, decouragement kapav mine l’integrité enn chrétien. Pou aide nou faire face ar sa danger-la, Jéhovah servi nou bann frere ek soeur spirituel pou soutenir nou. Dan la nuit avant ki bann Juif ti vinn arrete Jésus, enn ange ti apparette ek ti encourage li. (Luc 22:43) Kan Paul ti pé al Rome couma enn prisonnier, li ti joinde so bann frere kot bazar Appius ek Trois-Tavernes. Li ti “remercié Bondié ek li ti prend courage.” (Actes 28:15) Enn Témoin allemand encore toujours rappel l’aide ki li ti gagné kan li ti arrive dan camp concentration Ravensbrück. Sa lepok-la, li ti encore enn adolescente ek li ti peur. Li raconté: “Couma mo ti arrivé, enn soeur inn trouve moi, ek li ti bien accueillir moi. Enn lot soeur fidel ti aide moi, ek li ti vinn couma enn mama spirituel pou moi.”
“Reste fidel”
19. Ki ti aide Job pou resisté kont bann zeffort Satan?
19 Jéhovah ti decrire Job couma enn dimoune ki ti “tini ferme dan so l’integrité.” (Job 2:3) Concernant sa question important en rapport avek fidelité bann dimoune, Job ti reste ferme, mem si li ti bien decouragé ek li pa ti comprend kifer li ti pé souffert. Job ti refuse pou abandonne seki ti pli important dan so la-vie. Li ti insisté: “Ziska mo mort, mo pa pou abandonne mo l’integrité!”—Job 27:5.
20. Kifer li vaut la peine pou enduré?
20 Si nou aussi nou ena mem determination, sa pou aide nou pou garde nou l’integrité dan n’importe ki situation—devant tentation, l’opposition, ou-soit bann difficulté. Jésus ti dire congregation Smyrne: “Pa peur bann kitsoz ki pré pou faire toi souffert. Guetté! Satan le Diable pou contigne jette certain parmi zot dan prison, pou testé zot net ek pou faire zot gagne bann l’epreuve [problem, bouleversement, ou-soit persecution] pendant dix jour. Reste fidel ziska la mort, ek mo pou donne toi couronne la vie.”—Révélation 2:10.
21, 22. Kan nou pé endure bann l’epreuve, ki pou kapav aide nou pou supporte sa?
21 Dan sa lé-monde ki dirigé par Satan-la, nou l’endurance ek nou l’integrité pou testé. Mais, Jésus donne nou l’assurance ki nou pena okenn raison pou peur alors ki nou pé attann seki pou arrivé dan l’avenir. Seki important c’est reste fidel. Paul ti dire: “[Sa] l’epreuve-la li pou enn tigit lé-temps-mem,” alors ki “la gloire” ou-soit recompense ki Jéhovah inn promette nou, ‘ena enn poids ki pé vinn de plus en plus extraordinaire ek ki eternel.’ (2 Corinthiens 4:17, 18) Mem bann malheur ki Job ti gagné, zot ti dure enn tigit lé-temps-mem, comparé avek bann l’année kot Job ti vive heureux avant ek apré so l’epreuve.—Job 42:16.
22 Mais kitfois ena bann period dan nou la-vie kot nou gagne l’impression ki nou bann l’epreuve jamais pa pou fini, ek ki nou nepli kapav supporte nou souffrance. Dan prochain lartik, nou pou examiné couma nou kapav tire lezot leson ar l’experience ki Job inn faire. Nou pou aussi trouve bann fason couma nou kapav fortifié bann ki pé gagne problem dan zot la-vie.
Couma ou pou reponn?
• Ki question fondamental Satan ti posé concernant l’integrité Job?
• Kifer fodé pa nou etonné kan nou gagne bann l’epreuve?
• Couma Jéhovah aide nou pou enduré?
[Zimage, page 15]
Faire bann recherche, koz avek bann chrétien mur, ek devide nou leker dan la priere ar Jéhovah, kapav aide nou pou enduré