Zeova Li Nou “Gran Lazwa”

1-2. (a) Ki kitsoz boukou dimounn panse azordi? (b) Ki nou pou examine dan sa lartik-la?

AZORDI, bann dimounn fer tou seki zot kapav pou ki zot ere. Me malgre tou seki zot fer, zot pa vremem ere. Avredir, boukou dimounn bien tris azordi, ek zot panse ki zot sitiasion zame pa pou ameliore. Mem bann serviter Zeova kapav pans koumsa. Anplis, nou pe viv dan “bann dernie zour,” alor nou kone ki nou pou gagn bann difikilte ki pou “difisil pou siporte,” ek akoz sa nou kapav trakase ek nou bien tris.—2 Tim. 3:1.

² Dan sa lartik-la, nou pou trouve ki kitsoz kapav fer nou perdi nou lazwa, ek nou pou gete osi kouma nou kapav regagn nou lazwa. Me pou koumanse, anou gete kisann-la ki kapav ed nou pou nou vremem ere.

KISANN-LA KAPAV ED NOU POU NOU VREMEM ERE?

3. Ki nou aprann lor Zeova kan nou reflesi lor bann kitsoz ki Li’nn kree? (Get zimaz osi.)

³ Zeova Li touletan ere, ek Li anvi ki nou osi nou ere ek nou zwaye. Se akoz sa ki Li’nn kree boukou kitsoz ki rann nou zwaye. Par exanp, nou zwaye kan nou trouv sa kantite kouler ki ena lor nou zoli planet la. Nou kontan osi kan nou trouv bann zanimo pe zwe ar zot kamarad, ouswa kan nou manz nou manze prefere. Zeova Li vremem kontan nou ek Li anvi ki nou profit nou lavi!

Baby elephant: Image © Romi Gamit/Shutterstock; penguin chicks: Vladimir Seliverstov/500px via Getty Images; baby goats: Rita Kochmarjova/stock.adobe.com; two dolphins: georgeclerk/E+ via Getty Images

4. (a) Kifer Zeova Li ere mem si Li trouve kouma bann dimounn pe soufer azordi? (b) Ki zoli kado Zeova inn donn nou? (Psom 16:11)

⁴ Zeova trouve kouma bann dimounn pe soufer azordi, ek sa fer so leker fermal. Selman, Labib dir ki Li enn “Bondie ere.” (1 Tim. 1:11) Kifer Zeova Li ere? Enn rezon kifer Li ere se parski Li’nn fini swazir enn zour kot Li pou tir tou bann soufrans ki ena lor later. Me an-atandan, Li konpran bann difikilte par ki nou pe pase, ek Li anvi ed nou. Ek enn fason ki Li ed nou, se gras-a enn zoli kado ki Li’nn donn nou: Lazwa. (Lir Psom 16:11.) Anou gete kouma Li ti donn sa zoli kado-la so Garson, Zezi.

5-6. Kifer Zezi ere?

⁵ Apre Zeova, nou Bondie ere, se Zezi ki plis ere. Anou get de rezon kifer Zezi ere: (1) “Li refle Bondie ki invizib,” savedir ki li parey kouma so Papa. (Kol. 1:15) (2) Zezi inn pas extra boukou letan ar so Papa. Parmi tou bann kreasion Zeova, se limem ki’nn pas pli boukou letan ar Zeova.

⁶ Zezi ere osi parski li touletan fer seki so Papa demann li pou fer. (Prov. 8:30, 31; Zan 8:29) Ek gras-a sa, li ena faver Zeova.—Mat. 3:17.

7. Ki nou bizin fer pou nou vremem ere?

⁷ Nou osi, nou pou vremem ere si nou kontign vinn pli pros ar Zeova. Plis nou aprann konn Zeova ek nou fer zefor pou imit Li, plis nou pou zwaye. Kan nou fer Zeova so volonte ek ki nou kone ki nou ena so faver, sa osi rann nou zwaye.a (Ps. 33:12) Selman, li normal ki parfwa nou santi nou tris. Kitfwa sa fer de-trwa zour ki nou tris ouswa inpe pli lontan. Si nou santi nou koumsa, sa pa vedir ki nou pena faver Zeova. Akoz nou inparfe, parfwa nou pou soufer ek parfwa nou pou santi nou tris. Me nou kapav sir ki Zeova konpran nou santiman. (Ps. 103:14) Aster-la, anou gete seki kapav fer nou perdi nou lazwa ek osi kouma nou kapav regagn nou lazwa.

PA LES NANYE FER TWA PERDI TO LAZWA

8. Ki lefe nou bann difikilte kapav ena lor nou?

⁸ Seki kapav fer nou perdi nou lazwa: Bann difikilte. Eski to pe soufer akoz maladi, persekision, lamizer, enn katastrof natirel, ouswa parski to pe vinn vie? Kan nou gagn bann difikilte koumsa, bien vit nou kapav perdi nou lazwa, sirtou si nou pa kapav fer nanye pou sanz nou sitiasion. Labib dir ki “kan leker fermal, sa fer moral down.” (Prov. 15:13) Babis, ki servi kouma ansien, inn perdi so frer, so mama, ek so papa dan lespas kat-r-an. Li dir: “Mo ti santi mwa tousel ek mo ti panse ki personn pa ti kapav ed mwa. Kan bann-la ti ankor vivan, mo pa ti pas boukou letan avek zot. Me aster-la ki zot inn mor, mo nepli kapav fer li. Kan mo mazinn sa, mo ena boukou regre dan mo leker.” Parfwa, bann sitiasion ki nou viv zot telman konplike ki nou dekouraze ek nou santi nou abat net.

9. Ki kitsoz kapav ed nou pou nou regagn nou lazwa? (Zeremi 29:4-7, 10)

⁹ Kouma nou kapav regagn nou lazwa? Nou kapav regagn nou lazwa si nou aret trakase konsernan bann kitsoz ki nou pa kapav sanze, ek ki nou ena rekonesans pou bann kitsoz ki nou ena. Bann dimounn dan sa lemond-la anvi fer nou krwar ki pou nou ere, tou bizin pas bien dan nou lavi. Me Labib ansegn nou ki, mem si bann kitsoz dan nou lavi pa pe pas kouma nou anvi, nou kapav ere. Par exanp, kan ti amenn bann Zwif dan Babilonn, Zeova ti dir zot ki zot ti bizin fer zot maximum pou ki zot profit zot lavi laba. (Lir Zeremi 29:4-7, 10.) Ki leson sa aprann nou? Nou bizin fer zefor pou aksepte nou sitiasion, ek ena rekonesans pou bann bon kitsoz ki nou ena dan nou lavi. Fode pa nou bliye osi ki Zeova zame pa pou abandonn nou. Li pou ed nou. (Ps. 63:7; 146:5) Effie, ki’nn paralize apre ki li ti fer enn aksidan, dir: “Zeova, mo fami, ek bann frer ek ser dan lasanble inn bien ed mwa ek soutenir mwa. Mo anvi montre zot ki mo rekonesan pou tou seki zot inn fer ek seki zot ankor pe fer pou mwa. Alor, mo fer tou seki mo kapav pou mo gard mo lazwa.”

10. Kifer nou kapav zwaye mem si nou pe pas par bann sitiasion difisil?

¹⁰ Nou kapav zwaye mem kan nou ouswa nou fami pe pas par bann sitiasion difisil.b (Ps. 126:5) Kifer nou dir sa? Parski nou lazwa pa depann lor nou sitiasion. Maria, ki enn pionie, dir: “Kan nou gagn bann difikilte, nou bizin rapel bann promes ki Zeova inn fer nou. Sa pou ed nou pou gard nou lazwa. Sa pa vedir ki zame nou pou plore ouswa ki nou pa pou dir seki nou resanti. Selman, ninport ki kitsoz ki pe fer nou soufer, nou kapav sir ki Zeova pou ed nou pou gard nou lazwa.” Nou bizin rapel osi ki mem si nou sitiasion bien difisil aster-la, li pa pou touletan res koumsa. Nou bann difikilte, zot kouma bann tras lipie lor bor lamer avan ki enn vag vini ek fer zot disparet. Biento, Zeova pou fer tou bann kitsoz ki pe fer nou soufer ek ki pe rann nou tris, disparet net.

11. Kouma lexanp lapot Pol kapav ankouraz twa?

¹¹ Parfwa, nou kapav panse ki se parski nou pena faver Zeova ki nou gagn bann difikilte. Si nou pans koumsa, li bon ki nou reflesi lor bann fidel serviter Zeova ki ti pas par bann sitiasion difisil zot osi. Anou get lexanp lapot Pol. Zezi ti swazir li pou pres bon nouvel “ar bann lezot nasion ek osi ar bann lerwa ek bann Izraelit.” (Zist. 9:15) Sa ti vremem enn gran privilez! Selman, sa pa vedir ki Pol pa ti ena okenn difikilte. (2 Kor. 11:23-27) Me mem si Pol so lavi ti difisil, li kler ki li ti ena faver Zeova. Avredir, li ti reisi andir so bann difikilte parski Zeova ti pe beni li. (Rom. 5:3-5) Aster-la, reflesi lor to sitiasion. Eski twa osi to pe andir bann difikilte ek to pe res fidel ar Zeova? Si wi, alor to kapav sir ki to ena faver Zeova!

12. Kan nou pa reisi realiz nou bann lobzektif, ki lefe sa kapav ena lor nou?

¹² Seki kapav fer nou perdi nou lazwa: Bann lobzektif ki nou pa reisi realize. (Prov. 13:12) Nou lamour ek nou rekonesans pou Zeova motiv nou pou fixe bann lobzektif dan nou servis pou Li. Selman, si nou fixe bann lobzektif ki nou sitiasion pa permet nou realize, sa kapav dekouraz nou. (Prov. 17:22) Enn pionie ki apel Holly, dir: “Mo ti anvi fer Lekol pou Bann Evanzelizater Rwayom Bondie, al servi dan enn lot pei, ouswa ede pou proze konstriksion Ramapo. Selman, mo sitiasion ti sanze ek mo ti nepli kapav realiz sa bann lobzektif-la. Akoz sa, mo ti bien tris ek mo ti dekouraze.” Boukou serviter Zeova ena mem santiman kan zot pa reisi fer seki zot anvi fer dan zot servis pou Zeova.

13. Si nou sitiasion pa permet nou fer bann kitsoz ki nou anvi fer, ki bann lobzektif nou kapav fixe?

¹³ Kouma nou kapav regagn nou lazwa? Fode pa nou bliye ki Zeova Li pa enn Bondie ki exizan. Li pa atann ki nou fer plis ki seki nou kapav. Pou Zeova, nou ena boukou valer mem si nou pa reisi fer parey kouma lezot. Zeova anvi ki nou res fidel anver Li ek ki nou ena modesti. (Mish. 6:8; 1 Kor. 4:2) Seki pli inportan pou Zeova, se pa zis seki nou fer pou Li, me se sirtou nou bann kalite, nou bann santiman, ek nou fason panse. Alor, fode pa nou rod fer plis ki seki nou kapav fer.c Si ena sertin kitsoz ki to pa pe reisi fer dan to servis pou Zeova, konsantre twa plito lor bann kitsoz ki to kapav fer. Par exanp, eski to kapav form enn zenn ouswa ankouraz bann frer ek ser ki aze dan to lasanble? Eski to kapav fixe lobzektif pou ankouraz enn kikenn, kan to telefonn li, avoy li enn mesaz ouswa al vizit li? Zeova pou beni twa ek to pou gagn boukou lazwa kan to fixe bann lobzektif ki to kapav realize. Ek pa bliye ki dan lemond nouvo, nou pou kapav servi Zeova dan bann fason extraordiner! Holly, ki nou ti mansione avan, dir: “Kan mo santi mwa dekouraze, mo reflesi ek mo dir ar momem, ‘Mo ena leternite devan mwa.’ Dan Paradi, avek led Zeova, mo pou reisi fer seki mo anvi fer pou Li.”

14. Ki kitsoz kapav fer nou perdi nou lazwa?

¹⁴ Seki kapav fer nou perdi nou lazwa: Bann plezir lavi. Lor bann rezo sosio, kitfwa nou trouve ki bann dimounn bien zwaye parski zot touletan pe profit bann bon kitsoz. Kitfwa sa kapav fer nou krwar ki kan nou fer bann kitsoz ki nou kontan, nou aste seki nou anvi, ek ki nou vwayaze boukou, nou pou vremem ere. Li normal ki nou fer bann kitsoz ki nou kontan. Zeova anvi ki nou profit bann zoli kitsoz ki Li’nn kree. Selman, boukou dimounn inn realize ki sa bann kitsoz-la pa rann zot zwaye. Okontrer, sa finn fer zot perdi zot lazwa. Eva, enn ser ki pionie, dir: “Kan to pans zis pou fer tomem plezir, to pou touletan anvi gagn plis.” Si nou touletan rod fer nou-mem plezir, zame nou pa pou satisfe ek nou pou perdi nou lazwa.

15. Ki leson nou aprann ar Lerwa Salomon?

¹⁵ Lerwa Salomon ti esey diferan kitsoz pou gete si sa bann kitsoz-la ti pou rann li ere. Par exanp, li ti manz tou kalite bon manze, li ti ekout bann zoli lamizik, ek li ti aste bann kitsoz ki bien ser. Selman, sa bann kitsoz-la pa ti donn li lazwa. Li ti dir: “Lizie pa satisfe ar seki li trouve; ek zorey pa satisfe ar seki li tande.” (Ekle. 1:8; 2:1-11) Sertin dimounn panse ki si zot ena kas ek zot fer tou seki zot anvi, zot pou ere. Me sa li pa vre! Sa bann kitsoz-la zame pa pou kapav donn nou vre lazwa.

16. Kan nou fer bann kitsoz pou lezot, kouma sa kapav ed nou pou regagn nou lazwa? (Get zimaz osi.)

¹⁶ Kouma nou kapav regagn nou lazwa? Zezi inn ansegn nou ki “ena plis lazwa kan done ki kan resevwar.” (Zist. 20:35) Alekos, ki enn ansien, dir: “Mo esey fer bann ti kitsoz pou ed lezot. Kan mo ed lezot, sa rann mwa zwaye ek sa ed mwa pou ki mo pa konsantre tro lor momem.” Ki to kapav fer pou ed lezot? Si to trouv enn kikenn ki’nn dekouraze, fer zefor pou ankouraz li. Kitfwa to pa pou kapav rezoud so problem, me to pou kapav rekonfort li kan to ekout li, kan to montre konpasion anver li, ek kan to rapel li ki li kapav “zet [so] fardo lor Zeova.” (Ps. 55:22; 68:19) To kapav osi ed li pou rapel ki Zeova pa’nn abandonn li. (Ps. 37:28; Iza. 59:1) To kapav osi ed li dan enn fason pratik, kouma par exanp, prepar enn repa ouswa al fer enn ti lamars ansam avek li. To kapav osi al prese ansam avek li. Kan nou partaz bon nouvel ar lezot, sa touletan rann nou zwaye. Les Zeova servi twa pou ankouraz lezot. Kan nou servi nou letan pou ed lezot olie ki nou res konsantre lor nou-mem, sa pou donn nou vre lazwa!—Prov. 11:25.

17. Ki nou bizin fer pou nou vremem ere? (Psom 43:4)

¹⁷ Nou pou vremem ere si nou kontign fer zefor pou vinn pros ar nou Papa, Zeova. Fode pa nou trakase ouswa nou per mem si nou ena bann difikilte. Labib dir ki Zeova Li nou “gran lazwa.” (Lir Psom 43:4.) Alor, anou fer Zeova vinn nou pli bon Kamarad, parski se gras-a Li ki nou vremem ere!—Ps. 144:15.