Kouma To Kapav Amelior To Bann Lapriyer?

1-2. (a) Kan nou priye Zeova, ki kitsoz kapav anpes nou pou dir Li seki nou vremem resanti? (b) Kouma nou kone ki Zeova ekout avek boukou latansion nou bann lapriyer?

ESKI to’nn remarke ki souvan to dir bann mem kitsoz kan to fer lapriyer, ouswa ki bien rar to dir Zeova seki to vremem resanti? Avredir, sa kapav ariv nou tou. Akoz nou bien okipe ek ki nou ena boukou kitsoz pou fer, li kapav arive ki nou fer nou bann lapriyer vit-vit, ouswa ki nou fer zis bann ti lapriyer. Kitfwa nou trouv sa difisil osi pou dir Zeova seki nou vremem resanti, parski nou panse ki nou pa merite pou koz avek Li.

² Labib ansegn nou ki seki pli inportan pou Zeova se pa ki nou servi bann zoli-zoli fraz kan nou priye Li, me plito ki nou priye Li avek tou nou leker. Zeova ekout dezir bann ki ena limilite. (Ps. 10:17) Li ekout avek boukou latansion tou seki nou dir Li parski Li vremem interese ar nou.—Ps. 139:1-3.

3. Ki kestion nou pou reponn dan sa lartik-la?

³ Dan sa lartik-la, nou pou reponn sa bann kestion-la: Kifer fode pa nou per pou dir Zeova seki nou vremem resanti? Kouma nou kapav priye Zeova dan enn fason ki pou fer nou vinn pli pros avek Li? Ki nou kapav aprann ar bann lapriyer ki bann serviter Zeova dan lepase ti fer, ek kouma sa kapav ed nou pou amelior nou bann lapriyer? Kan nou trakase ek ki nou pa reisi dir Zeova seki nou vremem resanti, ki nou kapav fer?

FODE PA TO PER POU DIR ZEOVA SEKI TO RESANTI

4. Pou nou pa per pou dir Zeova seki nou resanti, ki kitsoz nou bizin konpran? (Psom 119:145)

⁴ Si nou konpran ki Zeova Li enn bon kamarad ki anvi seki pli bon pou nou, nou pou santi nou plis alez pou nou priye Li ek pou nou dir Li seki nou panse ek seki nou resanti. Ekrivin Psom 119 ti fer zefor pou ena sa kalite lamitie-la ar Zeova. Pourtan, so lavi pa ti fasil. Sertin dimounn ti mem koz manti lor li. (Ps. 119:23, 69, 78) Parfwa, li ti dekouraze osi akoz bann erer ki li ti fer. (Ps. 119:5) Me kanmem sa, li pa ti per pou ouver so leker ar Zeova.—Lir Psom 119:145.

5. Kifer fode pa ki nou les bann santiman negatif anpes nou priye Zeova? Donn enn lexanp.

⁵ Zeova invit mem bann dimounn ki’nn fer bann pese grav pou priye Li. (Iza. 55:6, 7) Alor, fode pa ki nou les nou bann santiman negatif anpes nou pou priye Li. Anou pran enn lexanp pou explik sa. Enn pilot avion kone ki li kapav kominik ar latour kontrol si li bizin led. Me fer koumadir pilot-la inn perdi so sime ouswa ki li’nn fer enn erer, eski li pou ezite pou kontakte latour kontrol parski li gagn onte? Li pa pou fer sa, pa vre! Dan mem fason, si nou pa kone ki desizion pou pran, ouswa si nou’nn fer enn pese, fode pa nou ezite ouswa nou per pou priye Zeova.—Ps. 119:25, 176.

PRIYE ZEOVA DAN ENN FASON KI POU FER TWA VINN PLI PROS AR LI

6-7. Ki kitsoz kapav ed nou pou nou dir Zeova seki nou vremem resanti? Donn enn lexanp. (Get not osi.)

⁶ Kan nou dir Zeova seki nou panse ek seki nou vremem resanti, sa pou ed nou pou vinn pli pros ar Li. Alor, kouma nou kapav amelior nou bann lapriyer?

⁷ Reflesi lor bann kalite ki Zeova ena.a Plis nou reflesi lor bann zoli kalite ki Zeova ena, plis li pou fasil pou nou dir Li seki nou panse ek seki nou resanti. (Ps. 145:8, 9, 18) Anou get lexanp Kristine. So papa ti bien violan. Akoz sa, li ti trouv sa bien difisil pou krwar ki Zeova Li enn Papa ki ena lamour. Kristine ti osi gagn difikilte pou koz ar Zeova. Li ti panse osi ki li pa ti ena valer, ek ki Zeova ti pou aret kontan li akoz bann erer ki li ti fer. Ki kitsoz inn ed Kristine? Li dir: “Mo ti reflesi boukou lor lamour fidel Zeova, ek sa ti rasir mwa ki Zeova bien kontan mwa. Azordi, mo kone ki Li pou touletan trap mo lame, ek mem si mo tonbe, Li pou touletan kontan mwa ek Li pou ed mwa pou mo releve. Kan mo reflesi lor ki kantite lamour Zeova ena, li pli fasil pou mo partaz mo lazwa ek mo lapenn avek Li.”

8-9. Kifer li bon ki to reflesi alavans lor seki to pou dir Zeova dan to lapriyer? Donn enn lexanp.

⁸ Reflesi lor seki to pou dir Zeova. Avan ki to priye Zeova, li bon ki to poz tomem de-trwa kestion. Par exanp: ‘Ki bann difikilte mo pe gagne azordi? Eski ena enn kikenn ki mo bizin pardone? Eski finn ena enn sanzman dan mo lavi ek ki mo pe bizin led Zeova pou fer fas ar sa?’ (2 Ler. 19:15-19) Li bon osi ki to reflesi lor fason ki Zezi inn ansegn nou pou priye Zeova, ek ki to reflesi osi lor kouma to kapav koz lor Zeova So nom, So Rwayom, ek So volonte dan to lapriyer.—Mat. 6:9, 10.

⁹ Kan Aliska ti aprann ki so misie ti ena enn kanser servo ek ki li ti pre pou mor, li ti gagn difikilte pou priye Zeova. Li dir: “Mo ti telman trakase ki kan mo ti priye, mo pa ti pe kapav reflesi lor seki mo pou dir Zeova.” Ki kitsoz ti ed Aliska? Li dir: “Avan ki mo ti priye Zeova, mo ti pran letan pou reflesi lor seki mo ti pou dir Li. Sa ti ed mwa pou mo pa priye zis pou mwa, pou mo misie, ek lor so maladi. Kan mo ti fer sa, mo ti santi mwa pli kalm, ek mo ti plis kapav priye Zeova pou bann lezot kitsoz.”

10. Kifer nou bizin pran letan pou priye Zeova? (Get zimaz osi.)

¹⁰ Pran letan pou priye Zeova. Mem si bann ti lapriyer kapav fer nou vinn pros ar Zeova, kan nou pran letan pou fer bann pli long lapriyer, nou pou kapav dir Li pli boukou kitsoz lor seki nou panse ek seki nou resanti.b Elijah, Aliska so misie, dir: “Mo fer zefor pou priye Zeova plizir fwa par zour. Selman, kan mo pran letan pou fer bann pli long lapriyer, mo santi mwa pli pros ar Zeova. Zeova pa prese pou ki mo fini mo bann lapriyer, alor mo pran mo letan.” Eski to kapav esey fer sa? Rod enn moman ek enn plas kot to pou kapav priye Zeova, kitfwa mem priye Li for, san ki personn deranz twa, ek pran labitid pou fer bann pli long lapriyer.

REFLESI LOR BANN LAPRIYER KI BANN SERVITER ZEOVA TI FER

11. Kouma nou kapav gagn bann bienfe kan nou reflesi lor bann lapriyer ki ena dan Labib? (Get osi lankadre “Eski To Ena Mem Santiman ki Zot?”)

¹¹ To pou gagn bann bienfe osi si to reflesi lor bann lapriyer ek bann psom ki ena dan Labib. Kan to trouve kouma bann serviter Zeova ti ouver zot leker avek Li, sa pou ed twa pou fer parey kouma zot. Zot bann lapriyer kapav ed twa pou trouv bann nouvo lexpresion ki to kapav servi dan to lapriyer. Ek dan sertin lapriyer ki bann serviter Zeova ti fer, kitfwa to pou trouve ki bann-la ti ena mem santiman ki twa ek ki zot inn demann Zeova bann mem kitsoz ki twa.

12. Kan nou lir enn lapriyer ki ena dan Labib, ki kestion nou kapav poz nou-mem?

¹² Kan to lir enn lapriyer ki ena dan Labib, demann tomem: ‘Kisann-la inn dir sa bann parol-la, ek dan ki sitiasion li ti ete? Eski mo ena mem santiman ki sa dimounn-la? Ki leson mo kapav aprann ar sa lapriyer-la?’ Kitfwa to pou bizin fer bann resers pou reponn sa bann kestion-la, me li vo lapenn ki to fer sa zefor-la. Aster-la, anou examinn kat lapriyer ki ena dan Labib.

13. Ki leson nou aprann ar lapriyer ki Ann ti fer? (1 Samiel 1:10, 11) (Get zimaz osi.)

¹³ Lir 1 Samiel 1:10, 11. Kan Ann ti fer sa lapriyer-la, li ti ena de gro problem dan so lavi. Premierman, li pa ti kapav gagn zanfan, ek deziemman, Penina, deziem madam so misie, ti pe rann so lavi bien difisil. (1 Sam. 1:4-7) Si twa osi to pe fer fas ar enn problem ki pe rann to lavi difisil, ki to kapav aprann ar lapriyer Ann? Ann ti pran letan pou dir Zeova tou seki ti pe trakas li, ek kan li ti fini fer sa, li ti santi li bien. (1 Sam. 1:12, 18) Nou osi, si nou “zet [nou] fardo lor Zeova” ek ki nou dir Li tou seki pe trakas nou ek seki nou resanti, nou pou santi nou bien apre.—Ps. 55:22.

14. (a) Ki kitsoz ankor nou kapav aprann ar lexanp Ann? (b) Kan nou lir ek nou reflesi lor seki ena dan Labib, kouma sa kapav ed nou pou amelior nou bann lapriyer? (Get not.)

¹⁴ De-trwa lane apre ki Samiel, Ann so garson, ti ne, Ann ti amenn li ar Gran Pret Eli. (1 Sam. 1:24-28) Apre sa, Ann ti fer enn lapriyer bien profon ek li ti dir Zeova ki li ti bien rekonesan anver Li, parski li ti trouve ki Zeova protez ek pran swin so bann serviter ki fidel.c (1 Sam. 2:1, 8, 9) Ann ti ankor ena bann problem dan so lavi, me olie ki li ti konsantre li lor so bann problem, li ti konsantre li lor bann benediksion ki Zeova ti donn li. Ki leson nou aprann? Si nou res konsantre lor kouma Zeova inn touletan soutenir nou, nou pou plis kapav fer fas ar bann difikilte ki nou pe gagne.

15. Kan nou dekouraze akoz bann linzistis ki ena otour nou, ki nou kapav aprann ar lapriyer ki Zeremi ti fer? (Zeremi 12:1)

¹⁵ Lir Zeremi 12:1. Kan Zeremi ti trouve kouma sertin dimounn ti ena enn zoli lavi mem si zot ti pe fer bann move kitsoz, sa ti bien dekouraz li. Zeremi ti dekouraze osi parski bann Izraelit souvan ti boufonn li. (Zer. 20:7, 8) Eski twa osi bann dimounn abitie boufonn twa, ouswa to agase parski to trouve kouma bann dimounn ki malonet pe prospere? Si wi, alor kitfwa to konpran santiman Zeremi. Li vre ki Zeremi ti dir Zeova ki sa bann sitiasion-la ti agas li, selman zame li pa ti dir Zeova ki Li enn Bondie ki inzis. Ek kan Zeremi ti trouve kouma Zeova ti koriz So pep ki ti rebel, li ti ena plis konfians dan lazistis Zeova apre sa. (Zer. 32:19) Nou osi, nou kapav ouver nou leker ar Zeova ek dir Li tou seki pe agas nou. Selman, nou bizin ena konfians ki Zeova pou regle sa bann sitiasion-la dan moman ki Li Li deside.

16. Ki nou kapav aprann ar lapriyer ki enn Levit ti fer? (Psom 42:1-4) (Get zimaz osi.)

¹⁶ Lir Psom 42:1-4. Se enn Levit ki pa ti kapav ador Zeova ansam ar bann lezot Izraelit, ki ti ekrir sa psom-la. Dan sa psom-la, sa Levit-la ti dir seki li ti resanti. Eski nou konfine kot nou akoz enn maladi, ouswa eski nou dan prizon akoz nou lafwa? Si wi, alor kitfwa nou konpran santiman sa Levit-la. Ena zour, kitfwa nou santi nou bien, me ena zour, kitfwa nou bien dekouraze. Selman, ninport ki santiman nou ena, li bon ki nou koz ar Zeova lor la. Kan nou fer sa, sa pou ed nou pou konpran nou santiman pli bien ek sa pou rapel nou ki kitsoz ki pli inportan. Par exanp, sa Levit-la ti konpran ki li ti pou gagn bann lezot lokazion pou loue Zeova. (Ps. 42:5) Li ti reflesi osi lor kouma Zeova ti pe pran li swin. (Ps. 42:8) Kan nou fer bann lapriyer profon ek ki nou dir Zeova seki nou vremem resanti, sa kapav ed nou pou konpran nou santiman pli bien. Sa pou osi ed nou pou nou santi nou anpe, ek nou pou gagn lafors pou nou kontign andire.

17. (a) Ki nou kapav aprann ar lapriyer ki Zonas ti fer? (Zonas 2:1, 2) (b) Kouma sertin lexpresion ki ena dan bann Psom kapav ed nou kan nou gagn bann leprev? (Get not.)

¹⁷ Lir Zonas 2:1, 2. Se profet Zonas ki ti fer sa lapriyer-la kan li ti dan vant enn gro pwason. Mem si li ti dezobeir Zeova, Zonas ti sir ki Zeova ti pou ekout so lapriyer. Dan sa lapriyer-la, Zonas ti servi boukou lexpresion ki ena dan bann Psom.d Sirman li ti konn bien sa bann psom-la, ek kan li ti reflesi lor la, sa ti ed li pou ena konfians ki Zeova ti pou ed li. Dan mem fason, nou osi nou bizin fer zefor pou rapel bann verse Labib. Lerla, kan nou gagn bann leprev ek ki nou priye Zeova, kitfwa nou pou rapel sa bann verse-la ek zot pou rekonfort nou.

KONTIGN VINN PLI PROS AR ZEOVA GRAS-A LAPRIYER

18-19. Si parfwa nou pa kone seki nou pou dir Zeova dan nou lapriyer, kouma Romin 8:26, 27 kapav rekonfort nou? Donn enn lexanp.

¹⁸ Lir Romin 8:26, 27. Parfwa, nou telman trakase ki nou pa kone kouma pou dir Zeova seki nou resanti. Me mem dan bann moman koumsa, Zeova ed nou. Labib dir ki Zeova so “lespri sin pled pou nou,” setadir li sipliy pou nou. Kouma so lespri sin fer sa? Zeova inn servi so lespri sin pou fer bann ekrivin Labib ekrir boukou lapriyer. Alor, kan nou pa reisi dir Zeova seki nou resanti, Li aksepte ki nou servi sertin lexpresion ki ena dan sa bann lapriyer-la pou nou demann Li so led. Zeova kapav reponn sa kalite lapriyer-la osi.

¹⁹ Se seki ti ed Yelena, enn ser ki res Larisi. Kan bann lotorite ti aret li parski li ti lir Labib ek li ti fer lapriyer, Yelena ti telman strese ki li pa ti pe kapav priye Zeova. Li dir: “Kan mo ti strese ek ki mo pa ti kone pou ki kitsoz mo ti bizin priye Zeova, mo ti rapel ki Zeova aksepte ki nou servi bann lapriyer ki so bann serviter dan lepase ti fer . . . pou nou demann li seki nou bizin. . . . Sa ti bien rekonfort mwa dan sa bann moman bien difisil la.”

20. Kan to trakase, kouma to kapav prepar to bann lapriyer?

²⁰ Kan nou trakase, kitfwa nou gagn difikilte pou res konsantre kan nou priye Zeova. Ki kitsoz kapav ed nou? Nou kapav ekout bann Psom lor lanrezistreman odio avan ki nou fer lapriyer. Nou kapav osi esey ekrir seki nou resanti, parey kouma Lerwa David ti fer. (Ps. 18, 34, 142; bann not ki ena lao.) Ena plizir metod ki nou kapav servi pou prepar nou bann lapriyer. (Ps. 141:2) Alor, servi metod ki mars pli bien pou twa.

21. Kifer fode pa nou ezite pou priye Zeova?

²¹ Kan nou kone ki Zeova konpran nou santiman avan mem ki nou dir Li kitsoz, sa vremem rekonfort nou! (Ps. 139:4) Kanmem sa, Li anvi ki nou dir Li seki nou resanti ek ki nou montre Li ki kantite nou fer Li konfians. Alor, fode pa to ezite pou priye to Papa Zeova. Priye Li avek tou to leker. To kapav osi servi bann lexpresion ki ena dan bann lapriyer ki ena dan Labib. Partaz to lazwa ek to lapenn ar Zeova. To kapav sir ki to bon kamarad Zeova pou touletan la pou twa!