Kouma To Pou Montre To Rekonesans pou Laranson?

1-2. Zezi inn donn so lavi pou nou. Ki sa obliz nou pou fer, ek kifer? (2 Korintien 5:14, 15) (Get zimaz osi.)

FER koumadir to ti bloke dan bann debri enn batiman ki’nn kraze, ek enn kikenn inn sap twa, eski to pa pou ena rekonesans pou sa dimounn-la? Mem si li’nn sap bann lezot dimounn osi, sirman to pou anvi remersie li personelman, pa vre! Sa pou montre ki to vremem rekonesan anver li ek ki zame to pa pou bliye seki li’nn fer pou twa.

² Kouma nou ti trouve dan lartik avan, nou bizin ki enn kikenn liber nou ar pese ek lamor. Ek se samem ki Zeova inn fer! Li’nn donn so Garson kouma enn ranson, (1) pou ki Li kapav pardonn nou bann pese, (2) pou ki nou kapav vinn parfe, ek (3) pou ki nou kapav ena enn bon lamitie avek Li. Gras-a laranson, nou ena posibilite pou viv pou touletan dan lemond nouvo. Laranson se osi enn prev ki Zezi bien kontan bann dimounn. Ek Zezi ti kontan bann dimounn avan mem ki li vinn lor later. (Prov. 8:30, 31) Lapot Pol ti dir ki “lamour ki Lekris ena obliz nou.” (Lir 2 Korintien 5:14, 15.) Savedir ki nou oblize montre nou rekonesans pou lamour ki Zezi ena pou nou ek ki fode zame nou bliye seki li’nn fer pou nou.

3. Kifer sak dimounn montre so rekonesans pou laranson dan diferan fason?

³ Kouma to pou montre to rekonesans pou laranson? To repons kitfwa pou bien diferan ar seki lezot pou reponn. Kifer? Anou pran enn lexanp pou explik sa. Fer koumadir trwa dimounn pe al dan mem lavil, selman sakenn pe sorti diferan landrwa. Mem si toule trwa ena mem destinasion, sakenn pou pran diferan sime. Dan mem fason, nou tou nou ena mem destinasion ouswa lobzektif, setadir montre nou rekonesans pou laranson. Selman, “sime” ki nou pran pou nou montre nou rekonesans pou laranson, li pou depann lor kotsa nou ete dan nou lamitie avek Zeova. Dan sa lartik-la, nou pou trouve kouma bann etidian Labib, bann Kretien ki batize, ek osi bann ki’nn al lwin ar Zeova, kapav montre zot rekonesans pou laranson.

BANN ETIDIAN LABIB

4. Kouma nou kone ki bann etidian Labib ena valer pou Zeova?

⁴ Si to enn etidian Labib, savedir ki to anvi aprann konn Zeova ek bann lansegnman ki ena dan Labib. Savedir osi ki Zeova anvi ki to vinn so kamarad, ek Li pou ed twa pou fer sa. (Zan 6:44; Zist. 13:48) “Zeova, Limem ki examinn bann leker.” Li remark tou bann zefor ki to fer pou aprann konn Li, ek Li bien kontan kan Li trouve ki to pe fer bann sanzman dan to lavi pou to kapav fer Li plezir. (Prov. 17:3; 27:11) Se parski Li’nn donn so Garson pou twa, ki to kapav ena enn bon lamitie avek Li. (Rom. 5:10, 11) Fode zame to bliye sa!

5. Kouma bann etidian Labib kapav swiv konsey ki ena dan Filipien 3:16?

⁵ Si to enn etidian Labib, kouma to kapav montre to rekonesans pou laranson? Enn fason to kapav fer sa se kan to swiv konsey ki lapot Pol ti donn bann Filipien. Li ti dir zot: “Ninport ki kantite progre ki nou finn fer, anou kontign mars dan enn fason ordone dan sa mem direksion-la.” (Fil. 3:16) Enn lot tradiksion Labib tradir sa verse-la koumsa: “Kontigne tini ferm dan mem direksion.” Alor, pa les nanye ni personn anpes twa kontign mars lor sime lavi.—Mat. 7:14; Lik 9:62.

6. Ki kitsoz bann etidian Labib kapav fer si zot pe gagn difikilte pou fer bann sanzman? (Deteronom 30:11-14) (Get zimaz osi.)

⁶ Eski to pe gagn difikilte pou aksepte enn lansegnman ki to fek aprann dan Labib? Fer bann resers lor-la ek priye Zeova pou ki Li ed twa konpran sa lansegnman-la pli bien. (Ps. 86:11) Ek si to ankor pe gagn difikilte pou konpran sa lansegnman-la, met li dan enn kwin pou linstan, me pa aret etidie Labib. Eski to pe gagn difikilte pou aret fer enn kitsoz ki pa fer Zeova plezir? Zeova zame pa pou demann bann dimounn inparfe pou fer bann kitsoz ki zot pa kapav fer. Alor, to kapav fer Li plezir. (Lir Deteronom 30:11-14.) Anplis, Zeova promet ki Li pou ed twa. (Iza. 41:10, 13; 1 Kor. 10:13) Alor, pa bes lebra. Olie ki to konsantre twa lor bann kitsoz ki to pa pe reisi fer, konsantre twa lor tou bann bon kitsoz ki Zeova pe kontign fer pou twa. Konsantre twa sirtou lor laranson ki Li’nn done pou twa. Plis to lamour pou Zeova ogmante, plis to pou trouve ki “so bann komannman pa lour.”—1 Zan 5:3.a

7. Si to enn zenn ki pe grandi dan laverite, lor ki kitsoz to kapav reflesi?

⁷ Eski to enn zenn ki pe grandi dan laverite? Twa osi to enn etidian Labib. Avredir, pou to bann paran, tomem etidian Labib pli inportan ki ena. Labib dir: “Vinn pros ar Bondie, ek li pou vinn pros ar zot.” (Zak 4:8; 1 Kro. 28:9) Kan par tomem to fer bann kitsoz pou vinn pros ar Zeova, Li osi Li pou vinn pros ar twa. Fode pa to panse ki se parski to’nn grandi dan enn fami Temwin ki Zeova pran twa kont. Li pran twa kont parski Li anvi ki to vinn so bon kamarad. Ki kitsoz Zeova inn fer pou ki to kapav ena enn bon lamitie avek Li? Li’nn donn lavi so Garson pou twa. Fode zame to bliye sa zoli kado ki Li’nn fer twa la! (Rom. 5:1, 2) Alor, avan ki to asiste Komemorasion Lamor Zezi sa lane-la, reflesi lor seki Zeova ek Zezi inn fer pou twa. Ek apre sa, reflesi lor seki to pou fer ar to lavi ek lor bann lobzektif ki to kapav fixe, pou to montre Zeova ki to rekonesan anver Li.b

BANN KRETIEN KI BATIZE

8. Dan ki fason bann Kretien ki batize inn fini montre ki zot ena rekonesans pou laranson?

⁸ Si to enn Kretien ki batize, to’nn fini montre dan plizir fason ki to ena rekonesans pou laranson. Par exanp, to’nn fer bann sanzman dan to lavi pou to fer Zeova plezir ek pou to vinn so kamarad. To’nn obeir komannman Zezi pou pres bon nouvel ek pou ansegn bann dimounn laverite lor Zeova ek Zezi. To’nn donn to lavi Zeova ek to’nn pran batem. Kitfwa lezot inn persekit twa parski to pe servi Zeova. (2 Tim. 3:12) Selman, to’nn kontign servi Li avek fidelite ek sa montre ki to kontan Li ek ki to rekonesan anver Li pou laranson.—Ebre 12:2, 3.

9. Ar ki kitsoz bann Kretien ki batize bizin fer bien atansion?

⁹ Si sa fer inpe letan ki to batize, to bizin fer bien atansion ki to rekonesans pou laranson pa diminie. Anou gete seki ti ariv bann Kretien lasanble Efez dan premie siek. Mem si Zezi ti felisit zot parski zot ti ena boukou landirans, li ti dir zot: “Selman, mo ena sa kont twa . . . to’nn perdi lamour ki to ti ena dan koumansman.” (Rev. 2:3, 4) Malerezman, kouma bann parol Zezi montre, li kapav arive ki enn Kretien servi Zeova zis parski li abitie fer li, selman li nepli fer li par amour. Sa Kretien-la pou priye Zeova, pou al renion, ek pou sorti predikasion, zis parski sa finn vinn enn labitid pou li. Ki to kapav fer si to trouve ki to lamour pou Zeova nepli for parey kouma avan?

10. Kouma to kapav met an pratik konsey ki Pol ti donn Timote? (1 Timote 4:13, 15)

¹⁰ Lapot Pol ti dir Timote “reflesi” ek “absorb [li] net” dan so servis pou Zeova, pou ki li kapav fer sa ar tou so leker. (Lir 1 Timote 4:13, 15.) Twa osi, to bizin reflesi lor seki to kapav fer pou ki to kontign servi Zeova ar tou to leker. (Rom. 12:11) Par exanp, to kapav pran pli boukou letan pou prepar to bann renion. Lerla, sa pou ed twa pou to konsantre pli bien ek pou to partisipe pandan bann renion. Ouswa, to kapav rod enn plas kot to pou trankil pou to fer to letid personel. Koumsa, to pou kapav konsantre pli bien lor seki to pe aprann ek to pou gagn pli boukou bienfe. Parey kouma to bizin met dibwa dan enn dife pou ki li kontign brile, to bizin kontign fer bann kitsoz ki pou ed twa pou ena rekonesans pou laranson ek pou tou bann lezot kitsoz ki Zeova inn donn twa. De-trwa semenn avan Komemorasion Lamor Zezi, to kapav reflesi lor tou seki Zeova inn fer pou so bann serviter ek pou twa personelman. Si to fer sa, sa pou ogmant to rekonesans pou laranson ek to pou vinn pli pros ar Zeova.

11-12. Si to’nn ralanti dan to servis pou Zeova, eski sa vedir ki to nepli ena so faver? Explike. (Get zimaz osi.)

¹¹ Si to trouve ki to’nn inpe ralanti dan to servis pou Zeova, fode pa to dekouraze ek fode pa to panse ki to nepli ena so faver. Anou gete seki ti ariv lapot Pol. Dan let ki li ti ekrir bann Korintien, li ti dir zot: “Mem si mo fer sa kont mo volonte, mo ankor ena sa responsabilite ki Bondie finn konfie mwa la.” (1 Kor. 9:17) Ki Pol ti pe rod dir?

¹² Parfwa, Pol pa ti anvi al prese. Selman, li ti bien deside pou kontign prese, mem si parfwa li pa ti motive pou fer li. Twa osi, to kapav fer parey kouma Pol. Mem si parfwa to mank motivasion, to bizin bien deside pou kontign prese. Ek pou to reisi fer sa, priye Zeova ek demann Li pou donn twa ‘dezir ek lafors pou azir.’ (Fil. 2:13) Kontign fer bann kitsoz ki pou ed twa pou res pros ar Zeova. To kapav sir ki avek letan, to lamour pou Zeova pou vinn pli for ek to pou bien deside pou servi Li ar tou to leker.

13. Kouma nou kapav ‘examinn nou-mem pou gete si nou dan lafwa’?

¹³ Detanzantan, li bon ki nou fer seki 2 Korintien 13:5 ankouraz nou pou fer. Sa verse-la dir: “Kontign examinn zotmem pou gete si zot dan lafwa; kontign verifie seki zot ete vremem.” Par exanp, nou kapav poz nou-mem sa bann kestion-la: ‘Eski mo pe met Rwayom Bondie an premie dan mo lavi?’ (Mat. 6:33) ‘Eski mo bann divertisman montre ki mo deteste lemal?’ (Ps. 97:10) ‘Eski mo bann parol ek mo bann aksion ede pou ki ena lape ek linite dan lasanble?’ (Efe. 4:2, 3) Lepok Komemorasion Lamor Zezi, se moman kot nou gagn plis lokazion pou reflesi lor seki Zeova ek Zezi inn fer pou nou. Alor, se bon moman osi pou nou examinn nou-mem, pou nou fer sir ki nou pa pe viv pou nou-mem, me ki nou pe viv pou Lekris.c

BANN KI’NN AL LWIN AR ZEOVA

14. Kifer sertin inn al lwin ar Zeova?

¹⁴ Apre plizir mwa ouswa plizir lane fidelite, sertin Kretien inn aret asiste bann renion. Kifer? Sertin parmi zot inn dekouraze akoz “bann traka ki ena dan lavi.” (Lik 21:34) Ena lezot ki’nn ofanse akoz seki enn kikenn dan lasanble inn dir ouswa inn fer zot. (Zak 3:2) Ek ena lezot ki’nn fer enn pese grav ek zot gagn onte pou rod led. Si to’nn al lwin ar Zeova, ki to kapav fer? Laranson, ek lamour ki Zeova ek Zezi ena pou twa, “obliz” twa pou fer ki kitsoz?

15. Ki Zeova resanti pou bann ki’nn al lwin ar Li? (Ezekiel 34:11, 12, 16)

¹⁵ Ki Zeova resanti pou bann ki’nn al lwin ar Li? Li pa ankoler ar zot ek Li pa’nn rezet zot. Okontrer, Li al rod so “bann mouton ki’nn perdi.” Li donn zot manze ek Li ed zot pou retourn ar Li. (Lir Ezekiel 34:11, 12, 16.) Eski Zeova pou fer sa pou twa? Wi. Si to pe lir sa lartik-la, sa montre ki to ankor kontan Zeova ek ki to anvi fer Li plezir. Kan to ti konn laverite, Zeova ti trouve seki ena debon dan to leker ek Li ti ed twa pou aprann konn Li, pou ki to kapav form parti dan so fami. Azordi, Zeova ankor trouve seki ena debon dan to leker, ek Li anvi ki to revinn dan so fami.

16. Ki kitsoz kapav ed bann ki’nn al lwin ar Zeova pou retourn ar Li? (Get zimaz osi.)

¹⁶ Dan brosir Retourn ar Zeova, ena sa bann parol bien ankourazan la: “To kapav sir ki Zeova pou la pou ed twa kan to pou retourn ar Li. Li pou ed twa pou fer fas ar to bann traka, Li pou ed twa kan to bann santiman finn blese. Li pou ed twa osi pou ena enn konsians kler pou ki to kapav ena lape dan to lespri ek dan to leker. Lerla, sa pou pous twa pou rekoumans servi Zeova avek to bann frer ek ser.” Pa bliye osi ki bann ansien bien anvi ed twa. Labib dir ki zot “kouma enn plas kot kapav al kasiet kont divan, enn proteksion kont gro lapli.” (Iza. 32:2) Nou kone ki to anvi montre Zeova ki to rekonesan pou laranson. Alor, demann tomem, ‘Ki mo bizin fer pou mo “remet bann kitsoz an-ord” avek Zeova?’ (Iza. 1:18; 1 Pier 2:25) Eski to kapav rekoumans asiste bann renion? Eski to kapav al rod led enn ansien? Si bizin, ansien-la kapav mem organize pou ki to rekoumans etidie Labib pandan inpe letan. Antouka, to kapav sir ki Zeova pou beni bann zefor ki to fer pou retourn ar Li ek pou montre to rekonesans pou laranson.

KI TO POU FER?

17-18. Bann semenn avan Komemorasion Lamor Zezi, ki nou bizin fer?

¹⁷ Zezi ti dir ki Zeova ti avoy li pou li donn so lavi, “pou ki tou dimounn ki ena lafwa dan li pa detrir me gagn lavi pou touletan.” (Zan 3:16) Gras-a sakrifis Zezi, Zeova kapav liber nou ar pese ek lamor. Fode zame ki nou rekonesans pou laranson diminie! (Rom. 3:23, 24; 2 Kor. 6:1) Bann semenn avan Komemorasion Lamor Zezi, pran letan pou reflesi lor lamour ki Zeova ek Zezi inn montre pou twa. Sa pou “obliz” twa pou montre rekonesans pou lamour ki zot ena pou twa.

¹⁸ Kouma to pou montre to rekonesans pou laranson? To repons kitfwa pou bien diferan ar seki lezot pou reponn. Selman, to kapav sir ki Zeova pou beni to bann zefor ek zefor ki bann milyon frer ek ser dan lemond antie pe fer, pou zot “nepli viv pou zotmem, me pou sa kikenn ki’nn mor pou zot la,” setadir Zezi Kris.—2 Kor. 5:15.